ರಮಾನಂದ ಐನಕೈ ಅವರ “ನಮಗೆ ನಾವೇ ಪರಕೀಯರು” ಪುಸ್ತಕದ ಕುರಿತು

– ಮು . ಅ . ಶ್ರೀರಂಗ  ಯಲಹಂಕ  ಬೆಂಗಳೂರು

ರಮಾನಂದ ಐನಕೈ ಅವರ “ನಮಗೆ ನಾವೇ ಪರಕೀಯರು ” (ನ. ನಾ. ಪ) (ಪ್ರಕಾಶಕರು : ರಾಷ್ಟ್ರೋತ್ಹಾನ ಸಾಹಿತ್ಯ ಬೆಂಗಳೂರು -೧೯ )ಪುಸ್ತಕ ಓದುವ ಮುನ್ನ ನಾನು ಪ್ರೊ .ಎಸ್ .ಎನ್. ಬಾಲಗಂಗಾಧರ (ಬಾಲು)ಅವರ ವಿಚಾರಗಳನ್ನು ಆಧರಿಸಿದ ಕನ್ನಡಕ್ಕೆ ಅನುವಾದವಾಗಿರುವ ಮೂರುಪುಸ್ತಕಗಳನ್ನು ಓದಿದ್ದೆ (ಪೂರ್ವಾವಲೋಕನ ,ಭಾರತದಲ್ಲಿ ಜಾತಿ ವ್ಯವಸ್ಥೆ ಇದೆಯೆ? ಮತ್ತು ಹುಡುಕಾಟವನ್ನು ನಿಲ್ಲಿಸದಿರೊಣ). ಸ್ಮೃತಿ-ವಿಸ್ಮೃತಿ ;ಭಾರತೀಯ ಸಂಸ್ಕೃತಿ ತನ್ನ ವಿಚಾರ ಮತ್ತು ಗಾತ್ರದಲ್ಲಿ ತುಂಬಾ ಘನವಾಗಿದೆ ಹೀಗಾಗಿ ನಿಧಾನವಾಗಿ ಓದಿ ಅರ್ಥಮಾಡಿಕೊಳ್ಳಬೇಕಾಗಿದೆ. ಇದುವರೆಗೆ ಸುಮಾರು ಇನ್ನೂರು ಪುಟಗಳನ್ನು ಓದಿದ್ದೆನೆ. ರಮಾನಂದರ ಪ್ರಸ್ತುತ ಪುಸ್ತಕ ಮೇಲೆ ಹೇಳಿದ ಬಾಲು ಅವರ ನಾಲ್ಕು ಪುಸ್ತಕಗಳ ಅದರಲ್ಲೂ ಮುಖ್ಯವಾಗಿ ಸ್ಮೃತಿ-ವಿಸ್ಮೃತಿ ಪುಸ್ತಕದಲ್ಲಿರುವ ವಿಷಯಗಳನ್ನು ನೇರವಾಗಿ ಭಟ್ಟಿ ಇಳಿಸಿರುವುದರ ಪ್ರತಿಫಲ! ಇದಕ್ಕೆ ಪುರಾವೆಗಳು ರಮಾನಂದರ ನ.ನಾ.ಪ.. ಪುಸ್ತಕದಲ್ಲೇ ಇವೆ.

,         ೧. ಬಾಲು ಅವರೇ ತಮ್ಮ ಮುನ್ನುಡಿಯಲ್ಲಿ—ರಮಾನಂದರ ಎಲ್ಲಾ ಲೇಖನಗಳು ಈ ವಿಷಯಗಳ ಕುರಿತಾಗಿ ಬೆಲ್ಜಿಯಂ ಹಾಗೂ ಭಾರತದಲ್ಲಿ ಕುವೆಂಪು ವಿ. ವಿ. ಸ್ಥಳೀಯ ಸಂಸ್ಕೃತಿಗಳ ಅಧ್ಯಯನ ಕೇಂದ್ರದಲ್ಲಿ ನಡೆಯುತ್ತಿರುವ ಸಂಶೋಧನೆಗಳಿಂದ ಪ್ರಭಾವಿತವಾಗಿವೆ ಎಂದ್ದಿದ್ದಾರೆ (ಪುಟxii)

೨. ಲೇಖಕರ ಮಾತಿನಲ್ಲಿ ಸ್ವತಃ ರಮಾನಂದ ಐನಕೈ ಅವರೇ ಮೇಲೆ ಹೇಳಿದ ಬಾಲು ಅವರ ಮಾತುಗಳನ್ನೇ ಅನುಮೋದಿಸಿದ್ದಾರೆ—ಬಾಲು ಅವರ ಮೂಲ ಸಿದ್ಧಾಂತಕ್ಕೆ ಚ್ಯುತಿ ಬಾರದ ಹಾಗೆ ಅವರ ವಿಚಾರಗಳನ್ನು ನನ್ನ ಅನುಭವಗಳ ಮೂಲಕ ಸರಳವಾಗಿ ನಿರೂಪಿಸುವ ಕೆಲಸ ಮಾಡಿದ್ದೇನೆ (ಪುಟ xvi )(ರಮಾನಂದರ ಅನುಭವಗಳ ಪ್ರಮಾಣ ಈ ಪುಸ್ತಕದ ವಿಚಾರದಲ್ಲಿ ತೀರಾ ಕಡಿಮೆ ಎಂಬುದು ಓದುಗರಿಗೆ ಮನವರಿಕೆಯಾಗುತ್ತದೆ!)

೩. ರಮಾನಂದರ ಪ್ರಸ್ತುತ ಪುಸ್ತಕ್ಕಕ್ಕೆ (ನ.ನಾ.ಪ) ಹಿನ್ನೆಲೆ ಬರೆದಿರುವ ದಾ॥ ರಾಜಾರಾಮ ಹೆಗಡೆಯವರು ಸಹ ರಮಾನಂದರದು ಸ್ವತಂತ್ರ ಲೇಖನಗಳಾದರೂ ಕೂಡ ಭಾರತೀಯ ಸಂಸ್ಕೃತಿಯ ಕುರಿತು ಎಸ್ . ಎನ್ . ಬಾಲಗಂಗಧರ ಅವರ ಹೊಸ ವಾದಗಳಿಂದ ಪ್ರಭಾವಿತವಾಗಿವೆ. (ಪುಟ xviii)

೪. ರಮಾನಂದರ ಈ ಪುಸ್ತಕದ ಪುಟ ೩೮ರಲ್ಲಿರುವ ಚಿತ್ರ ಮತ್ತು ಪುಟ ೩೯ರಲ್ಲಿ ಅದರ ಬಗ್ಗೆ ಇರುವ ಸಂಕ್ಷಿಪ್ತ ವಿವರಣೆ ಸಹ ಬಾಲು ಅವರ ಸ್ಮೃತಿ-ವಿಸ್ಮೃತಿಯಿಂದ ವರ್ಗಯಿಸಿಕೊಂಡಿರುವುದೇ  ಆಗಿದೆ!

ಇಷ್ಟೆಲ್ಲಾ ಸಾಕ್ಷಿಗಳು ರುಜುವಾತುಗಳಿರುವುದರಿಂದ ರಮಾನಂದರು ತಮ್ಮ ಪುಸ್ತಕದ ಮುಖಪುಟದಲ್ಲಿ,ಮೊದಲಪುಟದಲ್ಲಿ,ಹೋಗಲಿ ಕೊನೆಗೆ ಹಿಂಬದಿಯ ರಕ್ಷಾಪುಟದಲ್ಲಿ ಆದರೂ ಪ್ರೊ.ಎಸ್ ಎನ್.ಬಾಲಗಂಗಾಧರ ಅವರ ಪುಸ್ತಕಗಳಿಂದ/ವಿಚಾರಗಳಿಂದ ಪ್ರೇರಣೆ,ಪ್ರಭಾವ,ಅಥವಾ ಆಧಾರವಾದದ್ದು ಎಂದು ಮುದ್ರಿಸಬೇಕಾಗಿತ್ತು. ಲೇಖಕರ ಮಾತಿನಲ್ಲಿ ಅಥವಾ ೧೪೩ ಪುಟಗಳ ಈ ಪುಸ್ತಕದ ಮೂರು ಅಥವಾ ನಾಲ್ಕು ಪುಟಗಳಲ್ಲಿ ಬಾಲು ಅವರ ಹೆಸರನ್ನು ಹೇಳಿದ ಮಾತ್ರಕ್ಕೆ ಪ್ರಾಮಾಣಿಕತನಕ್ಕೆ ಪುರಾವೆಯಾದೀತೆ? ರಮಾನಂದರ ಜವಾಬ್ದಾರಿ ಮುಗಿದು ಹೋಗಬಹುದೆ?

—-ಭಾಗ  ೨—-

ಇನ್ನು ಈ ಪುಸ್ತಕದ ಪ್ರಮುಖ ದೋಷವೆಂದರೆ ಸರಿಸುಮಾರು ಎಲ್ಲಾ ಲೇಖನಗಳಲ್ಲೂ ಎದ್ದು ಕಾಣುವ ಪುನರುಕ್ತಿಗಳು. ಉದಾ: ರಿಲಿಜಿನ್,ಧರ್ಮ,ಸಂಸ್ಕೃತಿ ಮತ್ತು ಗಾಡ್,ಪ್ರವಾದಿ,ಧರ್ಮಗ್ರಂಥ,ಪವಿತ್ರ ಸ್ಥಳ,ವರ್ಷಿಪ್ ಇವುಗಳ ಪ್ರಸ್ತಾಪ. ಈ ಪುಸ್ತಕ ವಾರಪತ್ರಿಕೆಯೊಂದರಲ್ಲಿ ಪ್ರಕಟವಾದ ಲೇಖನಗಳ ಸಂಗ್ರಹವಾಗಿರುವುದರಿಂದ ಓದುಗರಿಗೆ ಅನುಕೂಲವಾಗಲೆಂದು ಪ್ರತಿವಾರ ಈ ಅಂಶಗಳನ್ನು ಜ್ಞಾಪಿಸುವುದು ಅವಶ್ಯವಾಗಿರಬಹುದಾದರೂ ಪುಸ್ತಕ ಪ್ರಕಟಿಸುವಾಗ ಪುನರುಕ್ತಿಗಳನ್ನು ಆದಷ್ಟೂ ತಪ್ಪಿಸಬಹುದಾಗಿತ್ತು.

ರಿಲಿಜನ್ನಿನಲ್ಲಿ ಬದುಕುವವನಿಗೆ ತಿಳುವಳಿಕೆ ಹಾಗೂ ಜ್ಞಾನವೇ ಮುಖ್ಯ. ಧರ್ಮದಲ್ಲಿ ಬದುಕುವವರಿಗೆ ಅನುಭವ ಮುಖ್ಯ(ಪುಟ ೧೭) ಎಂಬ ವಾಕ್ಯ ಸಂದಿಗ್ಧವಾಗಿದೆ. ಏಕೆಂದರೆ ಧರ್ಮಕ್ಕೆ ಅಥವಾ ಅನುಭವಕ್ಕೆ ತಿಳುವಳಿಕೆ ಮತ್ತು ಜ್ಞಾನ ವಿರೋಧಿಯೇ?ವರ್ಜ್ಯವೆ?

ಶ್ರಮಣ ಮತ್ತು ಬ್ರಾಹ್ಮಣ ಎಂಬ ಎರಡು ಸಂಪ್ರದಾಯಗಳಲ್ಲಿ ಶ್ರಮಣ ಗುಂಪು ಜೈನ ಸಂಪ್ರದಾಯವಾಗಿ ಬೆಳೆದು ಬಂತು ಹಾಗೂ ಅನಂತರದಲ್ಲಿ ಬೌದ್ಧ ಸಂಪ್ರದಾಯವಾಗಿ ಬೆಳೆಯಿತು(ಪುಟ ೧೦೦). ಈ ವಾಕ್ಯಗಳನ್ನು ಓದಿದರೆ ಜೈನ ಸಂಪ್ರದಾಯ ಬೌದ್ಧ ಸಂಪ್ರದಾಯವಾಗಿ ಪರಿವರ್ತನೆ ಆಯಿತೆಂದು ಅರ್ಥ ಬರುತ್ತದಲ್ಲವೆ? ಅಂದರೆ ಕ್ರಮೇಣ ಜೈನ ಸಂಪ್ರದಾಯ ಇಲ್ಲವಾಗುತ್ತಾ ಬಂತು! ಆದರೆ ಬಾಲು ಅವರ ಸ್ಮೃತಿ-ವಿಸ್ಮೃತಿ ಗ್ರಂಥದ ಪುಟ ೨೫೨ರಲ್ಲಿ “ಈ ಗುಂಪಿನಿಂದ ಆಜೀವಿಕರು(ಅಂದರೆ ಶ್ರಮಣರು) ಜೈನ ಸಂಪ್ರದಾಯ ಮತ್ತು ಬಹಳ ನಂತರ ಬೌದ್ಧ ಸಂಪ್ರದಾಯಗಳು ಬೆಳೆದವು “ಎಂದಿದೆ. ಅಂದರೆ ಎರಡೂ ಸಂಪ್ರದಾಯಗಳು ಅಸ್ತಿತ್ವದಲ್ಲಿವೆ ಎಂಬ ಅರ್ಥ ಅಲ್ಲವೆ? ಆದರೆ ರಮಾನಂದರು ಜೈನ ಸಂಪ್ರದಾಯವನ್ನೇ ಹೈಜಾಕ್ ಮಾಡಿಸಿ ಬೌದ್ಧ ಸಂಪ್ರದಾಯದಲ್ಲಿ ವಿಲೀನಗೊಳಿಸಿ ಬಿಟ್ಟಿದ್ದಾರೆ!

ಕೊನೆಯದಾಗಿ,ನಮಗೆ ನಾವೇ ಪರಕೀಯರು ಪುಸ್ತಕಕ್ಕೆ ಹಿನ್ನಲೆ ಬರೆದಿರುವ ಡಾ।। ರಾಜಾರಾಮ ಹೆಗಡೆಯವರು ಹೇಳಿರುವಂತೆ ಸ್ಮೃತಿ-ವಿಸ್ಮೃತಿ:ಭಾರತೀಯ ಸಂಸ್ಕೃತಿ ಎಂಬ ಬಾಲಗಂಗಾಧರರ(ಬಾಲು) ಗ್ರಂಥದಲ್ಲಿರುವ ವಿಚಾರಗಳನ್ನು ಸಾಮಾನ್ಯ ಓದುಗರಿಗೆ ತಲುಪಿಸಬೇಕಾದರೆ ಇನ್ನೂ ಒಂದು ಹಂತವನ್ನು ಅದು ಇಳಿಯಬೇಕು(ಪುಟ xx ). ಅಂತಹ ಒಂದು ಕೈಪಿಡಿಯನ್ನು(ಎಡಿಟೆಡ್ ವರ್ಷನ್)ಬಾಲು ಅವರ ಪುಸ್ತಕವನ್ನು ಕನ್ನಡಕ್ಕೆ ಅನುವಾದಿಸಿರುವ ರಾಜಾರಾಮ ಹೆಗಡೆ ಅವರೇ ಮಾಡಿದರೆ ಅತ್ಯುತ್ತಮ ಎಂದು ನನ್ನ ಅಭಿಪ್ರಾಯ. ಏಕೆಂದರೆ ಹೆಗಡೆಯವರು ಆಶಿಸಿರುವಂತೆ ರಮಾನಂದರ ಈ ಪುಸ್ತಕ ಆ ನಿಟ್ಟಿನಲ್ಲಿ ವಿಫಲವಾಗಿದೆಯೆಂದು ವಿಷಾದದಿಂದ ಹೇಳಬೇಕಾಗಿದೆ.

ಚಿತ್ರ ಕೃಪೆ : ರಮಾನಂದ ಐನಕೈ