ಕಲ್ಬುರ್ಗಿ,ಕಲ್ಲು ಮತ್ತು Colonial Consciousness

– ರಾಕೇಶ್ ಶೆಟ್ಟಿ

ಬೆಂಗಳೂರಿನ ವಿಜ್ಞಾನ ಭವನದಲ್ಲಿ ಜೂನ್ ೯ರ ಸೋಮವಾರ ನಡೆದ ಮೌಢ್ಯಮುಕ್ತ ಸಮಾಜ, ಕರ್ನಾಟಕ ಮೂಢನಂಬಿಕೆ ಪ್ರತಿಬಂಧಕ ಕಾಯ್ದೆ ಅನುಷ್ಠಾನ ಚರ್ಚಾ ಕಾರ್ಯಕ್ರಮದಲ್ಲಿ ವಯಸ್ಸಿನಲ್ಲಿ ಹಿರಿಯರಾದ (ಕೇವಲ ವಯಸ್ಸಿನಲ್ಲಷ್ಟೇ) ಪ್ರೊ.ಎಂ.ಎಂ. ಕಲ್ಬುರ್ಗಿಯವರು, ” ದೇವರ ವಿಗ್ರಹಗಳ ಮೇಲೆ ಮೂತ್ರ ಮಾಡಿದರೂ ಏನೂ ಆಗದು. ಅವುಗಳಿಗೆ ಕಾಯುವ ಶಕ್ತಿಯೂ ಇಲ್ಲ, ಕಾಡುವ ಶಕ್ತಿಯೂ ಇಲ್ಲ. ದೇವತೆ, ದೇವಾಲಯಗಳ ವಿರುದ್ಧ ಚಳವಳಿ ನಡೆಯಬೇಕು.” ಅಂತೆಲ್ಲ ಬಡಬಡಿಸಿ ಎಲ್ಲರಿಂದ ತಪರಾಕಿ ಹಾಕಿಸಿಕೊಂಡ ಮೇಲೆ “ನಾ ಹಂಗೇ ಹೇಳೇ ಇಲ್ಲಾರೀ, ನಾನು ಹಿಂದೂ ಇದ್ದೀನಿ, ನಾನ್ಯಾಕೇ ಮೂತ್ರ ಮಾಡಿ ಅಂತ ಹೇಳ್ತೀರ್ರೀ… ಅನಂತಮೂರ್ತಿ ಹಿಂಗ್ ಬರ್ದಾರಾ ಅಂತ ನಾನ್ ಸಭಿಯೋಳಗ ಹೇಳಿನ್ರೀ… ತಪ್ಪ್ ತಿಳಿ ಬ್ಯಾಡರ್ರೀ…” ಅಂತೆಲ್ಲ ಸೃಷ್ಟೀಕರಣ ಕೊಟ್ಟರು.

ನಿಜವಾಗಿ ಕಲ್ಬುರ್ಗಿಯವರ ಮನಸ್ಸಿನಲ್ಲಿದ್ದಿದ್ದು “ಮೂರ್ತಿ”ಗಳ ಮೇಲೆ ಮೂತ್ರ ಮಾಡಿದ ಹೊರೆ ಹೊರಿಸಿ ಅದರ ಜೊತೆಗೆ ಮೂರ್ತಿ ಪೂಜೆ ಮಾಡುವ ಜನರ “ಮೌಢ್ಯ” (ಅವರ ಮಂದ ಬುದ್ದಿಯ ಪ್ರಕಾರ) ನಿವಾರಿಸುವುದಾಗಿತ್ತು ಅನ್ನಿಸುತ್ತದೆ.ಕಲ್ಬುರ್ಗಿಯವರು ಹೀಗೆ ಹೇಳಿಕೆ ಕೊಡುವುದರಿಂದ ಒಂದೇ ಕಲ್ಲಿಗೆ ಎರಡು ಹಕ್ಕಿ (“ಮೂರ್ತಿ” ಮತ್ತು “ಮೌಢ್ಯ”) ಹೊಡೆಯುವ ಆಲೋಚನೆಯಲ್ಲಿದ್ದರೇನೋ.ಪಾಪ!

“ಮೂರ್ತಿ”ಗಳ ಮೇಲೆ ಕಲ್ಬುರ್ಗಿಯವರಿಗೆ ಈ ವಿಶೇಷ ಮಮತೆ ಯಾಕೆ? ಪ್ರಜಾವಾಣಿಯಲ್ಲಿ “ಮೂರ್ತಿ”ಗಳಿಗೆ ೧೦ ಲಕ್ಷ ಸರ್ಕಾರಿ ಕಾಣಿಕೆ ಕೊಟ್ಟದ್ದನ್ನು ವಿರೋಧಿಸಿ ಸೋತುಹೋಗಿದ್ದ ಕಲ್ಬುರ್ಗಿಗಳು,”ಮೂರ್ತಿಗಳ ಮೇಲೆ ಮೂತ್ರ ಮಾಡಿದರೂ ಏನೂ ಆಗುವುದಿಲ್ಲ” ಅನ್ನುವ ಮೂಲಕ ಸೇಡು ತೀರಿಸಿಕೊಂಡರು, ಅನ್ನುವಲ್ಲಿಗೆ ಅವರ ಹೇಳಿಕೆಯ ಮೊದಲನೇ “ಹಕ್ಕಿ” ಯಾವುದೆಂದು ಹೊಳೆಯುತ್ತದೆ.

ಅಸಲಿಗೆ ತಪ್ಪೆಲ್ಲ ಆಯ್ಕೆ ಸಮಿತಿಯದ್ದು!
“ಪರಾವಲಂಬಿ ಜೀವಿ”ಗಳ ನಡುವೆ “ಪ್ರಶಸ್ತಿ/ಹಣ”ವನ್ನು ಸಮನಾಗಿ ಹಂಚಿದ್ದರೆ ಮೂತ್ರ,ಮೂರ್ತಿ ಇತ್ಯಾದಿ ವಿವಾದಗಳೇ ಆಗ್ತಿರ್ಲಿಲ್ಲ ಮಾರ್ರೆ. ಎಲ್ಲವನ್ನೂ ಒಬ್ಬರಿಗೆ ಕೊಟ್ಟರೆ.ಇನ್ನೊಬ್ಬರಿಗೆ (ತಮಗಾದ) ಅನ್ಯಾಯವನ್ನು ಪ್ರಶ್ನಿಸುವ ಅಭಿವ್ಯಕ್ತಿ ಸ್ವಾತಂತ್ರ್ಯ(!) ಇದ್ದೇ ಇರುತ್ತದಪ್ಪ… (ಸೂ : “ಪರಾವಲಂಬಿ ಜೀವಿ”ಗಳನ್ನು ಕೆಲವರು “ಬುದ್ಧಿಜೀವಿ”ಗಳು ಅನ್ನುತ್ತಾರೆ.ನಾನು ಇನ್ಮುಂದೆ ಪ್ರೀತಿಯಿಂದ “ಪರಾವಲಂಬಿ ಜೀವಿ” ಎನ್ನುತ್ತೇನೆ)

ಇನ್ನು ಅವರ ಹೇಳಿಕೆಯ ಎರಡನೇ ಹಕ್ಕಿಯಾದ “ಮೌಢ್ಯ”ವೆಲ್ಲಿದೆ ಅಂತ ಹುಡುಕುತ್ತ ಹೊರಟರೆ ಅದು ಹೋಗಿ ನಿಲ್ಲುವುದು ಕಲ್ಬುರ್ಗಿಯವರ ಮೆದುಳಿನಲ್ಲೇ! ಈ ರೀತಿಯ ಮೆದುಳು ಕೇವಲ ಅವರೊಬ್ಬರದೇ ಅಲ್ಲ ನಮ್ಮ ಬಹುತೇಕ “ಚಿಂತಕ”ರದ್ದೂ ಹೌದು. (ಮೆದುಳು ಅಂದರೆ ಅವರ “ಚಿಂತನಾ ವಿಧಾನ” ಅಂತ ಓದಿಕೊಳ್ಳಿ). ನಮ್ಮ ಚಿಂತಕರ ಮೆದುಳು ಒಂದು ಖಾಯಿಲೆಯಿಂದ ನರಳುತ್ತಿದೆ.ಅದಕ್ಕೆ “Colonial Consciousness” ಎಂದು ಹೆಸರು.ಅದರಲ್ಲಿ ಹಲವರು ಖಾಯಿಲೆಯ ಎರಡನೇ ಹಂತವಾದ “Colonial Sub-Consciousness ” ಅನ್ನೂ ಕೂಡ ತಲುಪಿರಬಹುದು ಅನ್ನುವುದು ನನ್ನ ಕಿಡಿಗೇಡಿ ಊಹೆ! ಹಾಸ್ಯ ಪಕ್ಕಕ್ಕಿರಲಿ. ಏನಿದು “Colonial Consciousness”? ಕನ್ನಡಲ್ಲಿ ಇದನ್ನು “ವಸಹಾತುಶಾಹಿ ಪ್ರಜ್ಞೆ” ಎಂದು ಅನುವಾದಿಸಬಹುದು.

“Colonial Consciousness” ಅನ್ನು ಸುಲಭವಾಗಿ ವಿವರಿಸಲು ಪ್ರಯತ್ನಿಸುವುದಾದರೆ ; ವಸಾಹತು ಕಾಲದಲ್ಲಿ ಭಾರತವನ್ನು ಆಕ್ರಮಿಸಿಕೊಂಡ ಯುರೋಪಿಯನ್ನರಿಗೆ ಇಲ್ಲಿನ ಸಮಾಜವನ್ನು ಸುಲಭವಾಗಿ ಅರ್ಥಮಾಡಿಕೊಳ್ಳಲಾಗಲಿಲ್ಲ.ಕಡೆಗೆ ಅವರ ಸಹಾಯಕ್ಕೆ ಬಂದಿದ್ದು ಯುರೋಪಿನಿಂದ ತಂದ ಸಮಾಜ ವಿಜ್ಞಾನದ ಕನ್ನಡಕ…! ಅದನ್ನೇ ಧರಿಸಿಕೊಂಡು ಭಾರತೀಯ ಸಮಾಜವನ್ನು ಅವರು ನೋಡಿದಾಗ ಸಹಜವಾಗಿಯೇ ಭಾರತೀಯ ಸಾಮಾಜಿಕ ವ್ಯವಸ್ಥೆಯನ್ನು ಯುರೋಪಿಯನ್ ಸಾಮಾಜಿಕ ವ್ಯವಸ್ಥೆಗೆ ಮತ್ತು ಅಂದಿನ ಕ್ರಿಶ್ಚಿಯನ್ ಥಿಯಾಲಜಿಗೆ ಸಮೀಕರಿಸುತ್ತ ಇಲ್ಲಿನ ಸಾಮಾಜಿಕ ಕಟ್ಟುಪಾಡುಗಳನ್ನು Define ಮಾಡಿ ತಮ್ಮ ಯುರೋಪಿಯನ್ ಕನ್ನಡಕವನ್ನು ಭಾರತೀಯರಿಗೆ ತೊಡಿಸಿದರು.ಆಗಿನ ಕಾಲದ ಭಾರತೀಯ ಜೀವಿಗಳು ಅದೇ ಯುರೋಪಿಯನ್ ಕನ್ನಡಕದಿಂದಲೇ ಭಾರತವನ್ನು ಗುರುತಿಸುತ್ತ, ಕಡೆಗೆ ಆ ಕನ್ನಡಕ ಮುಂದಿನ ಪೀಳಿಗೆ ಬರುವಷ್ಟರಲ್ಲಿ ‘In-Built’ ಅನ್ನುವಷ್ಟರ ಮಟ್ಟಿಗೆ ನಿಂತುಬಿಟ್ಟಿತು.ಈಗ ಆ ‘In-Built’ ಯುರೋಪಿಯನ್ ಸಮಾಜ ವಿಜ್ಞಾನದ ಕನ್ನಡಕವನ್ನು ಧರಿಸಿ ಭಾರತವನ್ನು ನೋಡಲು ಕಲಿತಿರುವುದನ್ನು “Colonial Consciousness” ಎನ್ನಬಹುದು.

ಗಂಭೀರ ದನಿಯಲ್ಲಿ ಹೇಳುವುದಾದರೆ,ಈ “Colonial Consciousness” ಎಂಬುದು ನಾವು ಬದುಕುತ್ತಿರುವ ಪರಿಸರವನ್ನು ನಾವು ನಮ್ಮದೇ ಅನುಭವಗಳ ಮೂಲಕ ನೋಡಲು ನಮಗೆ ಬಿಡುತ್ತಿಲ್ಲ ಎನ್ನಬಹುದು.

ಇದು “Colonial Consciousness” ಹೇಗೆಲ್ಲ ಮಾತನಾಡಿಸುತ್ತದೆ ಎನ್ನುವ ಉದಾಹರಣೆಯನ್ನು ಕಲ್ಬುರ್ಗಿಯವರ ಅವತ್ತಿನ ಭಾಷಣದ ಈ ಮಾತುಗಳನ್ನು ನೋಡಿದರೆ ತಿಳಿಯುತ್ತದೆ “ಕ್ರೈಸ್ತರು, ಮುಸಲ್ಮಾನರು, ಬೌದ್ಧರೂ ಹೀಗೆ ಎಲ್ಲ ಜಾತಿ ಧರ್ಮದವರು ಭಾರತ ದೇಶವನ್ನು ಆಳಿ ಅವರವರ ನಂಬಿಕೆಗಳನ್ನು ಬಿತ್ತಿದ ಪರಿಣಾಮ ಇಂದು ಬೇರೆ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಮೂಢನಂಬಿಕೆಗಳು ಹೆಚ್ಚಾಗಿ ಕಂಡುಬರುತ್ತಿದೆ. ಬಡವರು ವಾಸಿಸುವ ಕಡೆ ಮೂಢನಂಬಿಕೆಗಳು ಹೆಚ್ಚಾಗಿದ್ದು ಶಿಕ್ಷಣ ದೂರವಾದ್ದರಿಂದ ಇಂದು ಮೂಢನಂಬಿಕೆ ದೊಡ್ಡ ಮಟ್ಟದಲ್ಲಿ ಬೇರುಬಿಟ್ಟಿದೆ.

“Colonial Consciousness” ನ ಮೊದಲ Effect ಎಂದರೆ, ಸೆಮೆಟಿಕ್ ರಿಲಿಜನ್ನುಗಳಾದ ಜೂಡಾಯಿಸಂ, ಕ್ರಿಶ್ಚಿಯಾನಿಟಿ ಹಾಗೂ ಇಸ್ಲಾಂಗಳ ಜೊತೆಗೆ ಬೌದ್ಧ,ಜೈನ,ಹಿಂದೂ(ಯಿಸಂ) ಅನ್ನು ಸಮೀಕರಿಸುವುದು.ಎರಡನೆಯದು ನಮ್ಮನ್ನಾಳಿದ ಮುಸ್ಲಿಂ ಮತ್ತು ಯುರೋಪಿನವರು ಹೇಳಿಕೊಟ್ಟಂತಹ ಗಿಳಿ ಪಾಠವಾದ ಮೂರ್ತಿ ಪೂಜೆ ಕೆಟ್ಟದ್ದು ಇತ್ಯಾದಿ ಎನ್ನುವ ವರಾತಗಳು ಶುರುವಾಗುತ್ತವೆ.

ನಮ್ಮ ಚಿಂತಕರು ನಮ್ಮ ಸಮಾಜವನ್ನು ನೋಡುತ್ತಿರುವುದು ಯುರೋಪಿಯನ್ನರು ತೊಡಿಸಿ ಹೋಗಿರುವ ಸಮಾಜ ವಿಜ್ಞಾನದ ಕನ್ನಡಕದಿಂದ.ಆ ಕನ್ನಡಕದ ಮೂಲಕ ನೋಡಿದಾಗಲೇ ಈ ಮಹಾಶಯರುಗಳಿಗೆ ಮೂರ್ತಿಪೂಜೆಯೆನ್ನುವುದು “ತಪ್ಪು” ಎನ್ನಿಸುತ್ತದೆ. ಈ ಬಗ್ಗೆ ಬೆಲ್ಜಿಯಂ ಗೆಂಟ್ ಯುನಿವರ್ಸಿಟಿಯ ಪ್ರೊ.ಬಾಲಗಂಗಾಧರ ಅವರು ಬರೆದಿರುವ ಕೆಲವು ಲೇಖನಗಳನ್ನು, ಪ್ರೊ.ರಾಜರಾಮ್ ಹೆಗಡೆ,ಪ್ರೊ.ಜೆ ಸದಾನಂದ,ಪ್ರೊ.ಷಣ್ಮುಖ ಮತ್ತಿತರು ಕನ್ನಡಕ್ಕೆ ಅನುವಾದಿಸಿ “ಪೂರ್ವಾವಲೋಕನ” ಅನ್ನುವ ಪುಸ್ತಕ ರೂಪದಲ್ಲಿ ತಂದಿದ್ದಾರೆ. ಆ ಪುಸ್ತಕದಲ್ಲಿನ ಕೆಲವು ಸಾಲುಗಳನ್ನು ಇಲ್ಲಿ Quoteಮಾಡುವುದು ಸೂಕ್ತವೆನಿಸಿತು.

ಜೂಡಾಯಿಸಂ, ಕ್ರಿಶ್ಚಿಯಾನಿಟಿ ಹಾಗೂ ಇಸ್ಲಾಂಗಳ ಜೊತೆಗೆ ಬೌದ್ಧ,ಜೈನ,ಹಿಂದೂ(ಯಿಸಂ) ಅನ್ನು ಸಮೀಕರಿಸುವುದರ ಬಗ್ಗೆ ಹೀಗೆ ಬರೆಯುತ್ತಾರೆ :“…ಯಾರಾದರು ‘ಹಿಂದೂಯಿಸಂ ಎಂದರೇನು?’ ಎಂದು ಕೇಳಿದರೆ ಅಂಥದೊಂದು ವಸ್ತುವು ಪಾಶ್ಚಾತ್ಯ ಗ್ರಂಥಾಲಯಗಳಲ್ಲಿ ಬಿಟ್ಟರೆ ಪ್ರಪಂಚದಲ್ಲಿ ಬೇರೆಲ್ಲಿಯೂ ಇಲ್ಲವೆಂದು ಹೇಳಿ. ನಿಮ್ಮನ್ನು ನೀವು ಹಿಂದೂ ಎಂದು ಕರೆದುಕೊಳ್ಳುವದು ಒಂದು ಸಂಪ್ರದಾಯವೇ ಹೊರತು ಬೇರೇನೂ ಅಲ್ಲ ಎಂಬುದಾಗಿಯೂ ಹೇಳಿ. “ನೀವು ನಿಮ್ಮ ತಂದೆಯವರನ್ನು ನಂಬಿದ್ದಿರಿ, ಅವರು ತಮ್ಮ ಪೂರ್ವಿಕರಲ್ಲಿ ನಂಬಿಕೆಯನ್ನು ಇರಿಸಿದ್ದರು ಮತ್ತು ಆ ಪೂರ್ವಿಕರು ಇಂಥವುಗಳನ್ನು ಮುಂದುವರೆಸಿಕೊಂಡು ಹೋಗಲು ಸದಾ ಅನುಗ್ರಹಿಸಿದ್ದಾರೆ” ಎಂಬುದಾಗಿಯೂ ತಿಳಿಸಿ. ಅವರಿಗೆ ಮತ್ತೂ ಹೇಳಿ: ನಿಮ್ಮ ಪೂರ್ವಿಕರ ಸಂಪ್ರದಾಯಗಳನ್ನು ಜೀವಂತವಾಗಿರಿಸಿಕೊಳ್ಳಲು ನಿಮಗೆ ಯಾವುದೇ ರೀತಿಯ ಕಾರಣಗಳು ಬೇಕಿಲ್ಲ ಹಾಗು ಸಂಪ್ರದಾಯವನ್ನು ಆಚರಿಸುವುದಕ್ಕೆ ಇರುವ ಒಂದೇ ಒಂದು ಕಾರಣವೆಂದರೆ ನಾವು ಏನನ್ನು ಆಚರಿಸುತ್ತಿದ್ದೇವೆಯೋ ಅದೇ ಸಂಪ್ರದಾಯವಾಗಿದೆ, ಮತ್ತು ‘ಹಿಂದೂ’ ಎಂಬುದರ ಅರ್ಥವೂ ಅದೇ ಆಗಿದೆ.“

ಸೆಮೆಟಿಕ್ ರಿಲಿಜನ್ನಿನ ಕಟ್ಟುಪಾಡುಗಳೊಂದಿಗೆ ಹಿಂದೂ ಎಂದು ಗುರುತಿಸಲ್ಪಡುವ ಸಾಂಪ್ರಾದಾಯಿಕ ಸಮುದಾಯವನ್ನು ಸಮೀಕರಿಸುವ ಮೊದಲಿಗೆ ನಾವು “ಸಂಪ್ರದಾಯ” ಎಂದರೇನು ಅನ್ನುವುದನ್ನು ಅರಿಯುವುದು ಒಳ್ಳೆಯದು.ಸಂಪ್ರದಾಯಗಳು ಪರಂಪರಾಗತವಾಗಿ ನಾವು ನಡೆಸಿಕೊಂಡು ಬರುತ್ತಿರುವ ಆಚರಣೆಗಳು.ಅವುಗಳನ್ನು ಯಾವುದೋ ಪುಸ್ತಕ ರೂಪದಲ್ಲಿ ಹೀಗೆಯೇ ಮಾಡಬೇಕು,ಇಷ್ಟೇ ಮಾಡಬೇಕು ಅಂತೆಲ್ಲ ಬರೆದಿರುವುದಿಲ್ಲ.ಮುತ್ತಜ್ಜನಿಂದ- ಅಜ್ಜನಿಗೆ,ಅಜ್ಜನಿಂದ-ಅಪ್ಪನಿಗೆ,ಅಪ್ಪನಿಂದ-ಮಕ್ಕಳಿಗೆ ಬರುವಾಗಲೂ ಆ ಆಚರಣೆಗಳಲ್ಲಿ ಆಯಾ ಕಾಲಮಾನಕ್ಕೆ ತಕ್ಕಂತೆ ಬದಲಾವಣೆಗಳಾಗಿರುತ್ತವೆ.ಹಾಗೆ ಬದಲಾವಣೆಗಳಾದಾಗಲೂ ಅದು ಸಂಪ್ರದಾಯ ಬದ್ಧವಾಗಿಯೇ ಇರುತ್ತದೆ. ಆದರೆ ಇದೇ ಮಾತು “ರಿಲಿಜನ್ನು”ಗಳ ವಿಷಯದಲ್ಲಿ ನಿಜವಾಗುವುದಿಲ್ಲ.ಅವರ ನಡಾವಳಿಗಳೆಲ್ಲವೂ ಅವರ ರಿಲಿಜನ್ನಿನ ಗ್ರಂಥಗಳಲ್ಲಿ ದಾಖಲಿಸಲ್ಪಟ್ಟಿದೆ.ಅವನ್ನು ಮೀರುವುದನ್ನೂ ಆಯಾ ರಿಲಿಜನ್ನುಗಳು ಒಪ್ಪುವುದಿಲ್ಲ.

ಮೂರ್ತಿ ಪೂಜೆಯ ಬಗ್ಗೆ :”…ಒಬ್ಬನು ಕ್ರಿಶ್ಚಿಯನ್, ಯೆಹೂದಿ ಅಥವಾ ಮುಸ್ಲಿಮನಾಗಿದ್ದರೆ ಅವನು ಮೂರ್ತಿಗಳನ್ನು worship ಮಾಡಿದರೆ ಡೆವಿಲ್ಲ ಅಥವಾ ಸೈತಾನನನ್ನು worship ಮಾಡಿದಂತೇ ಎಂಬುದಾಗಿ ನಂಬುತ್ತಾನೆ. ಅವರ ಬೈಬಲ್ಲಿನ ಸತ್ಯದೇವನು ಹೇಳಿದ ಪ್ರಕಾರ ಡೆವಿಲ್ಲನನ್ನು worship ಮಾಡಿದವರು ನರಕದಲ್ಲಿಯೇ ಶಾಶ್ವತವಾಗಿ ಕೊಳೆಯುತ್ತಾರೆ. ಇದನ್ನು ಯಾರು ನಂಬಿರುತ್ತಾರೊ ಅವರು ನರಕದಲ್ಲಿ ಕೊಳೆಯುವ ಹೆದರಿಕೆಯಿಂದ ಗಣೇಶನ ಪೂಜೆಯನ್ನು ಮಾಡದಿದ್ದರೆ ಅದಕ್ಕೊಂದು ಕಾರಣವಿದೆ. ಈ ರಿಲಿಜನ್ನುಗಳ ಪ್ರಕಾರ ಗಾಡ್ idolatry ಯನ್ನು ನಿಷೇಧಿಸಿದ್ದಾನೆ ಹಾಗೂ ಅದನ್ನು ಆಚರಿಸುವವರಿಗೆ ನರಕದಲ್ಲಿ ಅತ್ಯಂತ ಕ್ರೂರವಾದ ಶಿಕ್ಷೆಯನ್ನು ವಿಧಿಸುತ್ತಾನೆ, ಹಾಗಾಗಿ ಅದೊಂದು sin ಆಗಿದೆ. ಹಾಗಾಗಿ ಅವರು idolatry ಒಂದು ಮಹಾಪಾಪವೆಂದು ನಮಗೆ ಹೇಳಿದರೆ ನಮಗೆ ಅರ್ಥವಾಗುತ್ತದೆ. ಆದರೆ ನಾವು ನಮ್ಮ ‘ಮೂರ್ತಿಪೂಜೆ’ಯನ್ನು ಬಿಟ್ಟುಬಿಡಲು ಇದು ಕಾರಣವೇ ಅಲ್ಲ. ಗಣೇಶನ ಪೂಜೆಯನ್ನು ಮಾಡುವುದು ನಮ್ಮ ಸಂಪ್ರದಾಯದ ಒಂದು ಭಾಗ. ಹಾಗಾಗಿ ನಾವು ಅದನ್ನು ಮಾಡದಿರಲಿಕ್ಕೆ ನಮಗೆ ಯಾವ ಕಾರಣವೂ ಇಲ್ಲ.”

ಮೂರ್ತಿ ಪೂಜೆ ಇತ್ಯಾದಿಗಳೆಲ್ಲ ನಮ್ಮ ಸಂಪ್ರದಾಯದಗಳು ಹಾಗಾಗಿ ಆಚರಿಸುತ್ತೇವೆ ಅಂತೇನಾದರೂ ನಾವು ಈ ಜನರಿಗೆ ಉತ್ತರ ಕೊಟ್ಟರೆ,ನಮಗೆ ಬರಬಹುದಾದ ಮುಂದಿನ ಪ್ರಶ್ನೆ,ಸಂಪ್ರದಾಯವನ್ನು ಏಕೆ ಆಚರಿಸಬೇಕು? : ನಾವು ಹೀಗೆ ಉತ್ತರಿಸಬಹುದೇ – “ಒಂದು ಆಚರಣೆ ಅಸ್ತಿತ್ವದಲ್ಲಿರಲಿಕ್ಕೆ ಪ್ರತ್ಯೇಕ ‘ಕಾರಣ’ ಅಥವಾ ‘ಸಮರ್ಥನೆ’ಗಳು ಬೇಕಿಲ್ಲ.ಬದುಕುವುದನ್ನು ಮುಂದುವರಿಸಲಿಕ್ಕೆ ಹೇಗೆ ಒಬ್ಬನಿಗೆ ಕಾರಣಗಳು ಬೇಕಿಲ್ಲವೊ ಅದೇ ರೀತಿಯಲ್ಲಿ ಆಚರಣೆಯನ್ನು ಮುಂದುವರಿಸಿಕೊಂಡು ಹೋಗಲಿಕ್ಕೂ ಆತನಿಗೆ ಕಾರಣಗಳು ಬೇಕಿಲ್ಲ. ಉದಾ: ‘ಗಣೇಶ ಪೂಜೆಯನ್ನು ಏಕೆ ಮಾಡಬೇಕು?’ ಎಂಬ ಪ್ರಶ್ನೆಗೆ ಉತ್ತರವೆಂದರೆ, “ ಏಕೆಂದರೆ ಈ ಪೂಜೆಯನ್ನು ಮಾಡಲಿಕ್ಕೆ ಕಲಿಸಿದ್ದಾರೆ”. ‘ ಹಣೆಗೆ ಕುಂಕುಮವನ್ನು ಏಕೆ ಇಡಬೇಕು?’: “ಏಕೆಂದರೆ ಅದು ನಮ್ಮ ಆಚರಣೆ”. ಇನ್ನೂ ಹೆಚ್ಚಿಗೆಯೇನನ್ನೂ ಹೇಳುವ ಅಗತ್ಯವಿಲ್ಲ.”

ಸೆಮೆಟಿಕ್ ರಿಲಿಜನ್ನುಗಳ ಮತ್ತು ಯುರೋಪ್ ಸಮಾಜ ವಿಜ್ಞಾನದ ಕಣ್ಣುಗಳಿಂದ ನಮ್ಮ ಸಂಪ್ರದಾಯ,ಆಚರಣೆಗಳ ಕುರಿತ ಪ್ರಶ್ನೆಗಳನ್ನು ನಾವು ನಿಜವಾಗಿ ಎದುರಿಸ ಬೇಕಿರುವ ರೀತಿ ಮೇಲೆ ಉಲ್ಲೇಖಿಸಿದ ಧಾಟಿಯಲ್ಲಿರಬೇಕೆ ಹೊರತು,ನಾವು ಹಿಂದಿನವರೂ ಮಾಡುತಿದ್ದಕ್ಕೆಲ್ಲಕ್ಕೂ ವೈಜ್ಞಾನಿಕ ಕಾರಣಗಳಿದ್ದವು ಎನ್ನುವ ದಾಟಿಯಲ್ಲಿರಬಾರದು ಅನ್ನುವುದು ನನ್ನ ಅನಿಸಿಕೆ.ಅಷ್ಟಕ್ಕೂ, ಅದೇಕೆ ಎಲ್ಲಾ ಆಚರಣೆಗಳ ಹಿಂದೆ ನಾವು ’ವೈಜ್ಞಾನಿಕ ಕಾರಣ’ಗಳನ್ನೇ ಹುಡುಕಬೇಕು? ಬೇರೆ ಕಾರಣಗಳು ಇರಲಾರದೇ ಅಥವಾ ಕಾರಣಗಳಾದರೂ ಇರಲೇಬೇಕೇ?

ಒಂದು ರಿಲಿಜನ್ನು ಇಲ್ಲದೆಯೇ ಬದುಕಬಹುದು ಅನ್ನುವುದನ್ನೂ ನಾವು ನಮ್ಮ ಮೂಲಕ ಅವರಿಗೆ ಮನವರಿಕೆ ಮಾಡಿಕೊಡಬೇಕೆ ಹೊರತು, ಅವರ ಜೂಡಾಯಿಸಂ, ಕ್ರಿಶ್ಚಿಯಾನಿಟಿ ಹಾಗೂ ಇಸ್ಲಾಂಗಳ ಟೀಕೆಗೆ ಪ್ರತಿಯಾಗಿ ನಾವೂಗಳೂ ಸಹ, ನಮ್ಮ “ಪವಿತ್ರಗ್ರಂಥಗಳು”, “ಸತ್ಯದೇವ”, “ ಹತ್ತು ದೈವಾಜ್ಞೆಗಳು” “ ಹಿಂದೂಯಿಸಂ ಎಂಬ ರಿಲಿಜನ್ನು” ಎಂದೆಲ್ಲ ಉತ್ತರಿಸುತ್ತಹೋದರೆ ನಮಗರಿವಿಲ್ಲದೆಯೇ ನಾವು ಅವರದೇ ಕೆಲಸವನ್ನೇ ಮಾಡಿದಂತಾಗುವುದಿಲ್ಲವೇ? ಉದಾಹರಣೆಗೆ : ಕಲ್ಬುರ್ಗಿಯವರ ಹೇಳಿಕೆಗೆ ಕನ್ನಡ ಪ್ರಭದಲ್ಲಿ ಪ್ರತಿಕ್ರಿಯಿಸಿರುವ ಡಾ.ಚಿದಾನಂದ ಮೂರ್ತಿಗಳು, ಕ್ರಿಶ್ಚಿಯನ್ನರಿಗೆ ಜೆರುಸಲೇಂ, ಮುಸ್ಲಿಂರಿಗೆ ಮಕ್ಕಾವಿದ್ದಂತೆ ಹಿಂದೂಗಳಿಗೆ ವಾರಣಾಸಿ ಹಾಗೆ ಅನ್ನುವ ಅರ್ಥದಲ್ಲಿ ಮಾತನಾಡಿಸುವುದೂ ಸಹ “Colonial Consciousness”

“ನಮಗೆ “ನಮ್ಮದೇ” ಆದ ಒಂದು “ರಿಲಿಜನ್ನಿನ” ಅವಶ್ಯಕತೆಯಿಲ್ಲ; ನಾವು ಯಾರೆಂಬುದನ್ನು ಕಂಡುಹಿಡಿಯಲು ನಮಗೆ “ಹಿಂದೂಯಿಸಂ” ಎಂಬ ರಿಲಿಜನ್ನಿನ ಅವಶ್ಯಕತೆಯಿಲ್ಲ. ಒಮ್ಮೆ ನಮ್ಮ ಸಂಸ್ಕೃತಿಯನ್ನು ಈ ರೀತಿಯಲ್ಲೇ ಬದಲಾಯಿಸಬೇಕು ಎಂದಾದಲ್ಲಿ ಎಲ್ಲಾ ಭಾರತೀಯರು ಹಾಗೂ ನಿಮ್ಮೆಲ್ಲಾ ಪೂರ್ವಜರು ಮೆಕಾಲೆ ವರ್ಣಿಸಿದ ರೀತಿಯಲ್ಲೇ ಧಡ್ಡಶಿಖಾಮಣಿಗಳಾಗುವುದರಲ್ಲಿ ಸಂದೇಹವಿಲ್ಲ” ಎನ್ನುತ್ತಾರೆ ಪ್ರೊ.ಬಾಲು

ಈ ಕಲ್ಬುರ್ಗಿ,ಮೂರ್ತಿಯಂತ ವಯಸ್ಸಿನ ಹಿರಿಯರು ಅವರ ಬಾಯಿಗೆ ಬಂದ ಹಾಗೆ ಮಾತಾನಾಡಿಕೊಳ್ಳುವುದಾದರೆ ಮಾತನಾಡಿಕೊಳ್ಳಲಿ.ಆದರೆ ಕನಿಷ್ಟ ನಮ್ಮ ಮುಂದಿನ ಪೀಳಿಗೆಗೆ ನಾವು ಈ ಹಳೆತಲೆಗಳು ಮೂರ್ತಿಪೂಜೆಯನ್ನೂ,ನಮ್ಮ ಆಚರಣೆಗಳನ್ನೂ ಏಕೆ ವಿರೋಧಿಸುತ್ತಾರೆ ಅನ್ನುವುದನ್ನು ಸೂಕ್ಷ್ಮವಾಗಿ ಹೇಳಿಕೊಟ್ಟು “Colonial Consciousness” ನಿಂದ ಹೊರಬರುವ ಮಾರ್ಗವನ್ನು ತಿಳಿಸಬೇಕಾದದ್ದು ಈ ಕ್ಷಣದ ತುರ್ತುಗಳಲ್ಲೊಂದು.

ಈ ಸತ್ಯವನ್ನು ನಮ್ಮ ಹಿರಿಯರು (ಅಂದರೆ,ಹಿಂದೂಗಳೆಂದು ಹೇಳಿಕೊಳ್ಳಲು ಹಿಂಜರಿಯದ ಮತ್ತು “ಸೆಕ್ಯುಲರ್” ಅಲ್ಲದ) ಆದಷ್ಟು ಬೇಗ ಅರಿತುಕೊಂಡರೆ,ಕಿರಿಯರಿಗೆ ನಮ್ಮ ಸಮಾಜವನ್ನು ನೋಡಲು ತೊಡಕಾಗುತ್ತಿರುವ “Colonial Consciousness” ಅನ್ನು ನಿವಾರಿಸಬಹುದು.ಹಾಗೆ ಮಾಡುವ ಮೊದಲಿಗೆ ಮೊದಲಿಗೆ ಆ ಹಿರಿಯರು ಸಹ “Colonial Consciousness”ನಿಂದ ಹೊರಬರಬೇಕಿದೆ.

ಚಿತ್ರಕೃಪೆ : http://www.thewitnesswithin.com