ಅಂಥ ಹುಡುಗಿಯರ ನಡುವೆ ನಾವು ಕಳೆದು ಹೋಗಿದ್ದೇವೆ!

ಕಳೆದ 4-5 ದಿನಗಳಿಂದ ಈ ಬಗ್ಗೆ ಅನೇಕ ಚರ್ಚೆಗಳು ನಡೆಯುತ್ತಿವೆ.

ಪೋರ್ನ್ ಸಮರ್ಥಿಸಲು ಅದರ ಪರವಾಗಿ ನಿಲ್ಲುವವರು ನೀಡುವ ಮುಖ್ಯ ಕಾರಣಗಳು.

————————————————————————-
1. ದೇಶದಲ್ಲಿ ಅಲ್ಲಲ್ಲಿ ಹಿಂಸಾಚಾರ ಆಗಿದೆ / ಆಗುತ್ತಿದೆ ಅನ್ನುವ ಕಾರಣಕ್ಕೆ ಚಲನಚಿತ್ರಗಳಲ್ಲಿ ಹಿಂಸೆ ಅಥವಾ ಫ಼ೈಟಿಂಗ್, ಬಾಂಬು ಸ್ಪೋಟ ಮೊದಲಾದವನ್ನು ನಿಲ್ಲಿಸಲಾಗಿದೆಯೇ ? ಅಥವಾ ನಿಲ್ಲಿಸಲು ಸಾಧ್ಯವೇ ? ಸಿನಿಮಾಗಳು ಬರುವದಕ್ಕೂ ಮೊದಲು ಹಿಂಸೆ ನಡೆದಿರಲಿಲ್ಲವೇ ? ಅದರಂತೆ ಪೋರ್ನ್ ನೋಡಿದ ಮಾತ್ರಕ್ಕೆ ಜನ ಅತ್ಯಾಚಾರದಲ್ಲಿ ಭಾಗವಗಿಸುತ್ತಾರೆಂದು ಹೇಗೆ ಹೇಳುತ್ತೀರಿ. ನಾಲ್ಕು ಗೋಡೆಯ ಮಧ್ಯದಲ್ಲಿ ಯಾರಿಗೂ ತೊಂದರೆಯಾಗದಂತೆ ನೋಡಿದರೆ, ಸರ್ಕಾರಕ್ಕೆ ಯಾಕೆ ಸಮಸ್ಯೆ? ಇದು ಮಾನವೀಯ ವೈವ್ಯಕ್ತಿಕ ಹಕ್ಕುಗಳ ದಮನ.

2. ಇಂದಿನ ಮುಂದುವರೆದ ಯುಗದಲ್ಲಿ ಲೈಂಗಿಕ ಶಿಕ್ಷಣದ ಅಗತ್ಯವಿದೆ. ಪೋರ್ನ್ ಅಂಥಹ ಶಿಕ್ಷಣವನ್ನು ನೀಡುತ್ತಿದೆ. ಆದ್ದರಿಂದ ಇದನ್ನು ಬಹಿಷ್ಕರಿಸಿದರೆ, ವ್ಯವಸ್ಥಿತ ಲೈಂಗಿಕ ಶಿಕ್ಷಣ ವ್ಯವಸ್ಥೆಗೆ ಭಂಗ ತಂದಂತೆ.

3. ಮನುಷ್ಯ ತನಗೆ ಸಾಧಿಸಲಾಗದ, ತನಗೆ ಎಟುಕಲಾಗದ ಭೋಗಗಳನ್ನು ಈ ಪೋರ್ನ್ ಗಳ ನೊಡುವಿಕೆಯೊಂದಿಗೆ ಕಾಲ್ಪನಿಕ ಅಥವಾ ದೈಹಿಕ ಭೋಗಗಳಿಂದ ಅನುಭವಿಸಿಕೊಳ್ಳುತ್ತಾನೆ. ಅದನ್ನು ತಡೆದರೆ ಅವನ ಹಕ್ಕಿನ ಹರಣವಾದಂತೆ.
—————————————————————————————————–

ಈ ಮೂರು ಮುಖ್ಯಪ್ರಶ್ನೆಗಳಿಗೆ ಸರಕಾರ ಹಾಗೂ ಪೋರ್ನ್ ದೇಶದ ಒಳಿಗೆ ಮಾರಕ ಎಂದು ಒಪ್ಪುವ ಸಂಸ್ಥೆಗಳು, ಮಾಧ್ಯಮಗಳು ಸರಿಯಾಗಿ ಉತ್ತರಿಸಿ ಜನರನ್ನು ಸರಿದಾರಿಗೆ ತರುವ ಪ್ರಯತ್ನಮಾಡಬೇಕಿದೆ.

ನನ್ನ ಅಭಿಪ್ರಾಯವನ್ನು ಈ ಮೂರೂ ಪ್ರಶ್ನೆಗಳಿಗೆ ಉತ್ತರದ ರೂಪದಲ್ಲಿ ನೀಡುತ್ತಿದ್ದೇನೆ. ಪೋರ್ನ್ ಬಹಿಷ್ಕಾರಕ್ಕೆ ಅನೇಕ ಕೋನಗಳಿಂದ ಬಂದ ಅಭಿಪ್ರಾಯಗಳ ಹಿನ್ನೆಲೆಯಲ್ಲಿ ಸರಕಾರವಾಗಲೀ ನ್ಯಾಯಾಲಯವಾಗಲೀ ಇಂತಹ ಕ್ರಮಕ್ಕೆ ಮುಂದಾಗಿರುತ್ತವೆ. ಕೆಲವು ಹಂತಗಳಲ್ಲಿ ವ್ಯಕ್ತಿಗಿಂತ ಸಮಷ್ಟಿಯ ಹಿತದೃಷ್ಟಿಯಿಂದ ನಿರ್ಧಾರಗಳೂ ಅನಿವಾರ್ಯವಾಗುತ್ತವೆ.

ಮುಖ್ಯವಾಗಿ ಮಹಾನಗರ ಮತ್ತು ಕೆಲ ನಗರಗಳ ಮಾನಸಿಕರೋಗ ತಜ್ಞರೂ / ಮನಃಶಾಸ್ರಜ್ಞರೂ / ಸಮಾಜಸೇವಕರೂ / ಪೋಷಕರೂ ಅಭಿಪ್ರಾಯ ಪಡುವಂತೆ,…. ಯೌವನದ ಆರಂಭದ ದಿನಗಳಲ್ಲೇ ಪೋರ್ನ್ ನೋಡಲಾರಂಭಿಸಿರುವ ಬಹುಪಾಲು ವಿದ್ಯಾರ್ಥಿಗಳು ಓದಿನಲ್ಲಿ ಹಿಂದುಳಿಯುವುದು, ಕಾಲ್ಪನಿಕ ಮನಸ್ಕರಾಗಿ ಯಾವುದೇ ಕೆಲಸದಲ್ಲಿ ಆಸಕ್ತಿ ಅಥವಾ ಶ್ರದ್ಧೆಯನ್ನು ಬೆಳೆಸಿಕೊಳ್ಳಲಾಗದೇ ಜೀವನದ ಗುರಿಯನ್ನಾಗಲೀ ಅಥವಾ ಓದಿನ ಗುರಿಯನ್ನಾಗಲೀ ಸಾಧಿಸಲಾಗದೇ ಕೆಲ ವರ್ಷಗಳ ನಂತರ ವ್ಯಥೆಪಡುವುದು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿವೆ. ಜೊತೆಗೆ ಆ ವಯಸ್ಸಿನ ನಡವಳಿಕೆ ಮತ್ತು ಪೋರ್ನ್ ನ ಪ್ರಭಾವದಿಂದಾಗಿ ಎದಿರು ಕಾಣುವ ವ್ಯಕ್ತಿಗಳನ್ನೋ / ಸಹಪಾಠಿಗಳನ್ನೋ / ನೆರೆಯವರನ್ನೋ ತಮ್ಮ ಕಾಲ್ಪನಿಕ ಸನ್ನಿವೇಶಗಳಲ್ಲಿ ಚಿತ್ರಿಸಿಕೊಂಡು, ಅಂತಹ ಸನ್ನಿವೇಶಗಳು ಉಂಟಾದೀತು ಅಥವಾ ಉಂಟಾಗಲೆಂಬ ಆಶಯದ ಹಿನ್ನೆಲೆಯಲ್ಲಿ ತಮಗೇ ಅರಿವಿಲ್ಲದಂತೆ ಅಂತಹ ಪ್ರವೃತ್ತಿಯ ಕಡೆವಾಲುತ್ತಾರೆ. ಕೆಲವರು ಇನ್ನೂ ಮುಂದುವರೆದು ಅತ್ಯಾಚಾರ ಮೊದಲಾದ ಪ್ರಕರಣಗಳಲ್ಲಿ ಭಾಗಿಯಾದದ್ದಿದೆ. ನಿರ್ಭಯಾ ಪ್ರಕರಣ ಮುಂತಾದ ಅನೇಕ ಪ್ರಕರಣಗಳಲ್ಲಿ ಆರೋಪ ಸಾಬೀತಾದ ಯುವಕರು ಇದನ್ನು ಒಪ್ಪಿಕೊಂಡಿದ್ದಾರೆ. ಇದಕ್ಕೇ ಪೋರ್ನ್ ಮುಖ್ಯಕಾರಣವೆಂದು ಹೇಗೆ ಹೇಳುವುದು ? ಅತ್ಯಾಚಾರ ಪೋರ್ನ್ ಬರುವಕ್ಕಿಂತಲೂ ನಡೆದಿಲ್ಲವೇ? ಎಂಬ ಸಮರ್ಥಕರು ಇಲ್ಲಿ ಗಮನಿಸಬೇಕಾದದ್ದು, ಪೋರ್ನ್ ನಿಂದಾಗಿ ಪ್ರೇರಿತರಾಗಿದ್ದೆವು ಎಂಬ ಅವರ ಮಾತನ್ನು ತಳ್ಳಿಹಾಕಬಾರದು. ಕುಡಿತದಿಂದಲೂ ಅಂತಹ ದುಷ್ಪರಿಣಾಮವಿದೆ ಹಾಗಂತ ಬ್ಯಾನ್ ಮಾಡಿದ್ದಾರಾ ? ಎಂದೆಲ್ಲಾ ಕೇಳುವ ಮೊದಲು, ಅವುಗಳಿಂದ ವ್ಯವಸ್ಥೆಗಳ ಮೇಲಿನ ಪರಿಣಾಮಗಳ ಆಗುಹೋಗುಗಳನ್ನೂ ಗಮನಿಸಬೇಕಾಗುತ್ತದೆ. ಕುಡಿತವೂ ತಪ್ಪೇ! ಅತ್ಯಾಚಾರ ಮೊದಲಾದ ಕೆಟ್ಟಕೆಲಸ ಪೋರ್ನ್ ನೋಡದೆಯೂ, ಕುಡಿಯದೆಯೂ ಮಾಡಿದ ಪಾಪಿಗಳಿರಬಹುದು. ಅಂತಹ ಪಾತಕಿಗಳು ಪೋರ್ನ್ ನೋಡಿಯೂ ಬಿಟ್ಟಿದ್ದಿದ್ದರೆ, ಉರಿಯುವ ಬೆಂಕಿಗೆ ತುಪ್ಪಸುರಿದಂತಾಗುತ್ತಿತ್ತು. ಪೋರ್ನ್ ಮಾಡುವ ಕೆಲಸವೇ ಅದು. ಇಗಾಗಲೇ ಹೊತ್ತಿದ ಬೆಂಕಿಯನ್ನು ಇನ್ನಷ್ಟು ಹರಡುವ ಕೆಲಸ. ಆದರೆ, ಸಮರ್ಥಕರ ಪ್ರಕಾರ ಮೂಲ ಬೆಂಕಿಗೆ ಕಾರಣ ಇದಲ್ಲವೆಂದೂ ಹಾಗಾಗಿ ತಪ್ಪು ಕೇವಲ ತಪ್ಪಿಸ್ಥನದು ಎಂಬ ಗ್ರಹಿಕೆ; ಕೊಲೆ-ಸುಲಿಗೆ ಮಾಡಿದವನಷ್ಟೇ ಅಲ್ಲದೇ ಮಾಡಿಸಿದವನು ಯಾರೆಂದು ತಿಳಿದೂ ತಪ್ಪಿತಸ್ಥನಲ್ಲ ಎಂದು ನೀವು ಘೋಷಿಸುವುದಾದರೆ ಅಂತಹ ತಪ್ಪಿನಲ್ಲಿ ನೀವೂ ಭಾಗಿಯಾದಂತೆ. ಇದು ಕೇವಲ ನಾಲ್ಕುಗೋಡೆಯ ಮಧ್ಯದಲ್ಲಿ ನೋಡಿ ಮುಗಿದ ಕೂಡಲೇ ಕೊನೆಗೊಳ್ಳುವಂಥದ್ದಲ್ಲ. ನೋಡಿದ ಮೇಲೆ ಅನೇಕ ದುಷ್ಪರಿಣಾಮಗಳ ಆರಂಭವೂ ಆಗುವ ಸಾಧ್ಯತೆ ಇದೆ. ಇಂತಹ ವಿಷಯಗಳಲ್ಲಿ ಸರಕಾರಗಳಿಗೆ ಸಮಷ್ಟಿಯ ದೃಷ್ಟಿ ಇಲ್ಲಿ ಮುಖ್ಯವೇ ಹೊರತು ಒಬ್ಬ ವ್ಯಕ್ತಿಯ ಖಾಸಗೀತನವಲ್ಲ. ಪೋರ್ನ್ ನೋಡದೆಯೂ ಜೀವನಾನಂದವನ್ನು ಅನುಭವಿಸಿದವರು ಇಲ್ಲವೇ ? ೨ ತಲೆಮಾರಿಗೂ ಹಿಂದೆ ಬದುಕಿದ ಜನಕ್ಕೆ ಇದ್ಯಾವೂದು ಇಲ್ಲದೇ ಖಾಸಗೀತನಕ್ಕೇನೂ ಭಂಗಬಂದಿರಲಿಲ್ಲವಲ್ಲ. ಇದು ಕಾಲ/ತಂತ್ರಜ್ಞಾನ ಮುಂದುವರೆದಿದೆ ಎಂಬುದರ ಸದುಪಯೋಗವೋ, ದುರುಪಯೋಗವೋ ಎಂದು ಸರಿಯಾಗಿ ಆಲೋಚಿಸಬೇಕು.

ಇನ್ನು ಲೈಂಗಿಕ ಶಿಕ್ಷಣಕ್ಕೆ ಈ ಮಾಧ್ಯಮವನ್ನು ಬಳಸುವುದು ಹಾಸ್ಯಾಸ್ಪದ. ಲೈಂಗಿಕ ಶಿಕ್ಷಣಕ್ಕೆ ಹಿರಿಯರು ಹಿತ-ಮಿತ ರೀತಿಯಲ್ಲಿ ಮುಕ್ತಮಾತುಕತೆ ನಡೆಸಿ ಶಿಕ್ಷಣವನ್ನು ನೀಡಬಹುದು. ಅದಕ್ಕಾಗಿ ಓದಿಕೊಳ್ಳಲು ಬೇಕಾದ ಸಾಹಿತ್ಯಗಳೂ ಉಪಲಬ್ಧವಿರುತ್ತವೆ. ಇಂದಿನ ಯುಗದಲ್ಲಿ ನಿರಾಯಾಸವಾಗಿ ಅಂತರ್ಜಾಲದಿಂದ ಅಂತಹ ಓದಿಗೆ ಪೂರಕವಾದ ಪರಿಕರಗಳು ಲಭ್ಯವಿದ್ದೇ ಇರುತ್ತವೆ. ಪೋರ್ನ್ ಸಮರ್ಥಕ ಬುದ್ಧಿಜೀವಿಗಳೇ ! ಭಾರತದಲ್ಲಿ ಎನೋ ಆಗಬಾರದ್ದು ಆಗಿಹೊಯಿತು ಎಂದು ಬೊಬ್ಬೆ ಹಾಕುವ ಮೊದಲು, ಪೋರ್ನ್ ನ ಉತ್ಪಾದಕ ರಾಷ್ಟ್ರಗಳಲ್ಲೊಂದಾದ ಅಮೇರಿಕಾ ಕೂಡಾ ಬೇರೆ ದೇಶಗಳು ಬೇಕಾದರೆ ಹಾಳಾಗಲೀ, ತನ್ನ ದೇಶದ ೧೮ಕ್ಕಿಂತ ಕೆಳಗಿನ ಮಕ್ಕಳಿಗೆ ಸಿಗದಂತೆ ಅನೇಕ ಮುನ್ನೆಚ್ಚರಿಕೆವಹಿಸುತ್ತದೆ. ಆಪಲ್, ಗೂಗಲ್. ಮೈಕ್ರೋಸಾಫ್ಟ್ ಬಿಂಗ್ ಮೊದಲಾದವು ಈ ಬಗ್ಗೆ ಎಚ್ಚರಿಕೆಯ ಗಂಟೆ ಈಗಾಗಲೇ ಬಾರಿಸಿವೆ. ಎಡಪಂಥೀಯ ಧೋರಣೆಯವರು ಭಾರತದಲ್ಲಿ ಪೋರ್ನ್ ಬ್ಯಾನ್ ಮಾಡಿದಕೂಡಲೇ ನಿರಂತರ ವಾಗ್ಧಾಳಿ ನಡೆಸುತ್ತಿದ್ದಾರೆ. ಪಾಪ! ಅವರಿಗೆ ತಮ್ಮ ಮಾನಸ-ತವರು, ಚೈನಾ ಪೋರ್ನ್ ಅನ್ನು ಸಂಫೂರ್ಣ ಬಹಿಷ್ಕರಿಸಿರುವುದು ತಿಳಿದಿಲ್ಲವೆಂಬತಿದ್ದಾರೆ.

ಇನ್ನು ಮನುಷ್ಯ ತನಗೆ ಸಾಧಿಸಲಾಗದ್ದನ್ನು ಪೋರ್ನ್ ನಿಂದ ಪಡೆಯುತ್ತಾನೆ. ಅದು ಖಾಸಗೀ ವಿಷಯ / ಹಕ್ಕು ಎನ್ನುವುದಾದರೆ, ಅದನ್ನು ವಿಕೃತಿ ಎಂದು ಕರೆಯಲೇಬೇಕಾಗುತ್ತದೆ. ಸಹಜಕ್ಕೂ ವಿಕೃತಿಗೂ ವ್ಯತ್ಯಾಸವಿದೆ. ಈ ವಿಕೃತಿಗಳೇ ಸರಿ ಎಂದು ಭಾವಿಸುವವರು ಯಾರೂ ಸಹಜವಾದ ಜೀವನ ನಡೆಸಿದವರಾಗಿರುವುದಿಲ್ಲ. ತಮಗೆ ಎಲ್ಲವೂ ತಿಳಿದಿದೆ ಅಥವಾ ತಮ್ಮನ್ನು ಯಾರೂ ಪ್ರಶ್ನಿಸಬಾರದು, ಆದರೆ ತಾವು ಮಾತ್ರ ಎಲ್ಲದಕ್ಕೂ ಎಲ್ಲವನ್ನೂ ಹೀಗಳೆಯಬಹುದೆಂಬ ಮನಃಸ್ಥಿತಿ ಇಂತಹವರದ್ದು. ಇಂತಹ ಮನಃಸ್ಥಿತಿಯವರಿಗೆ ಉತ್ತರಿಸಿಯೂ ಪ್ರಯೋಜನವಿಲ್ಲ. ಸಿಕ್ಕದ್ದು ಎಂದಿಗೂ ಅವರಿಗೆ ಉತ್ತರವಾಗಿರುವಿದಿಲ್ಲ; ಪ್ರಶ್ನೆಗಳು ತಮ್ಮ ಸೀಮೀತ ಬುದ್ಧಿಯನ್ನು ದಾಟಲೂ ಬಿಡುವುದಿಲ್ಲ. ಮತ್ತೆ ಅವೇ ಪ್ರಶ್ನೆಗಳು; ಅವೇ ದೊಂಬರಾಟ.

ಸದನದಲ್ಲಿ ಅದ್ಯಾರೋ ನಾಲಾಯಕ್ ಶಾಸಕರು ಅಶ್ಲೀಲವನ್ನು ನೋಡಿದ್ದಕ್ಕೆ ತಿಂಗಳುಗಟ್ಟಲೇ ಬಾಯಿಬಡೆದುಕೊಂಡವರೇ, ಇವತ್ತು ಪೋರ್ನ್ ಖಾಸಗೀಹಕ್ಕು ಎಂದು ಬಡಿದಾಡುವುದನ್ನು ಕಂಡರೆ ಇವರ ಇಬ್ಬಂದಿತನ ಅರ್ಥವಾಗದೇ? ಅದನ್ನು ಸದನಲ್ಲಿ ನೋಡುವುದೂ ತಪ್ಪು; ಎಕಾಂತದಲ್ಲಿ ಸದ್ದಿಲ್ಲದೇ ನೋಡುವುದೂ ತಪ್ಪು ಎಂಬ ಧೋರಣೆ ವಿಕೃತ ವಿಕ್ರೀತಮಾಧ್ಯಮವರಿಗೆ ಹೇಗೆ ಬರಲು ಸಾಧ್ಯ!? ಕಾರ್ಪೋರೇಟ್ ಕಂಪನಿಗಳು, ಅನೇಕ ಸಂಘ ಸಂಸ್ಥೆಗಳು ಅನೇಕ ಇಂಟರ್ನೆಟ್ ತಾಣಗಳನ್ನು ಜಾಲಾಡದ ಹಾಗೆ ನಿರ್ಬಂಧಿಸಿರುತ್ತಾರೆ. ಅಲ್ಲೇಕೆ ಈ ಜನಗಳು ತಮ್ಮ ಹಕ್ಕು ದಮನವಾಯಿತೆಂದು ಹಾರಾಡುವುದಿಲ್ಲ?! ಒಂದು ವೇಳೆ ಪೋರ್ನೋಗ್ರಫಿಯನ್ನು ಸಮರ್ಥಿಸುವವರು ನಾಳೆ ತಾವೇ ಒಂದು ದೊಡ್ಡ ಕಂಪನಿ ನಡೆಸಿದರೆ ತನ್ನಲ್ಲಿರುವ ಉದ್ಯೋಗಿಗಳಿಗೆ ಕಂಪನಿಯ ಖಾಸಗೀ ಸ್ಥಳಗಳಲ್ಲಿ, ತಮ್ಮ ಇಂಟರ್ನೆಟ್ ವ್ಯವಸ್ಥೆಯಿಂದ ನೋಡಲು ಬಿಡುತ್ತಾರೆಯೇ ? ಖಂಡಿತಾ ಇಲ್ಲ. ಹಾಗೆ ಬಿಟ್ಟರೆ, ಕಂಪನಿಯೇ ಹಾಳಾಗಿ, ಉದ್ಯೋಗಿಗಳಿಂದ ಆಗಬೇಕಾದ ಕೆಲಸ ಕಾಲಕ್ಕೆ ಸರಿಯಾಗಿ ಆಗದೇ ಅರ್ಥವ್ಯವಸ್ಥೆಯೇ ಅಲುಗಾಡಿಹೋಗುತ್ತದೆಂದು ಅನ್ನಿಸದಿರದೇ? ಯಾವ ಸಣ್ಣ ಕಂಪನಿಯೂ ಈ ವಿಷಯದಲ್ಲಿ ನಿರ್ಬಂಧ ಸಡಿಲಿಸಲು ಇಚ್ಛೆಪಡುವುದಿಲ್ಲ. ಹಾಗಿದ್ದ ಮೇಲೆ ದೇಶವನ್ನು ನಡೆಸುವ ಸರ್ಕಾರ ನಿರ್ಬಂಧ ಹೇರಿದರೆ ಯಾಕಿಷ್ಟು ಕಾರುವಿಕೆ?!! ಯಾವುದರಿಂದ ತಮ್ಮ ಯುವ ಮಕ್ಕಳು ದಾರಿತಪ್ಪಬಾರದೆಂದು ಎಚ್ಚರವಹಿಸುತ್ತಾರೋ, ಅದು ಬೇಕೆನ್ನುವುದು, ದೇಶ-ದೃಷ್ಟಿಯೋ?! ಮೋದಿಸರ್ಕಾರದ ಮೇಲಿನ ದ್ವೇಷದೃಷ್ಟಿಯೋ?! ತಿಳಿದವರು ಮನಗಾಣಬೇಕು.

ಈ ವಿಷಯದ ಕುರಿತು ಏನ್. ಡಿ. ಟಿವಿ ನಡೆಸಿದ ಕಾರ್ಯಕ್ರಮವನ್ನು ಒಮ್ಮೆ ನೋಡಿ. ಜೊತೆಗೆ ಪೋರ್ನ್ ಬಹಿಷ್ಕಾರ ಅನಗತ್ಯ ಅಂತ ಸಾಧಿಸಲು ಹೊರಟವರವ ತರ್ಕವನ್ನೂ ನೋಡಿ. ನಿಷ್ಪಕ್ಷಪಾತಿಯಾಗಿರಬೇಕಾಗಿದ್ದ ನಿರೂಪಕಿಯೇ ಸ್ವತಃ ಪೋರ್ನ್ ಪರವಾಗಿ ಮಾತಾಡುತ್ತಾ ಈ ದೇಶದ ನ್ಯಾಯಾಂಗ ವ್ಯವಸ್ಥೆಯ ಬಗ್ಗೆ ಕೀಳಾಗಿ ಮಾತನಾಡುವ ಧೈರ್ಯ ತೋರುತ್ತಾಳೆ. “ಒಬ್ಬ ಹೆಣ್ಣು ತನಗೆ ಬೇಕೆನಿಸಿದ ವ್ಯಕ್ತಿಯ ಜೊತೆ (ತನ್ನ ವೈವಾಹಿಕ ಜೀವನದ ಚೌಕಟ್ಟನ್ನೂ ಮೀರಿ) ಮಲಗುವುದರಲ್ಲಿ ತಪ್ಪೇನು?! ಅನೇಕರು ಹಾಗಿದ್ದಾರೆ” ಎಂಬ ಹಾರಿಕೆಯ ಸಮರ್ಥನೆಯನ್ನೂ ನೀಡಿದ್ದಾಳೆ. ಈ ಮಾನಸಿಕ ಸ್ಥಿತಿಗೆ ಕಾರಣವೇನು ? ಸ್ವಚ್ಛಂದ ಪ್ರವೃತ್ತಿಯಲ್ಲವೇ! ವಿಕೃತಭಾವ ಅನ್ನಿಸುವುದಿಲ್ಲವೇ! ಸುಪ್ರೀಂಕೋರ್ಟಿನ ಮುಖ್ಯನ್ಯಾಯಾಧೀಶರು ಹೇಳಿದ ಒಂದು ಮಾತಿನ ಸುತ್ತವೇ ಹುತ್ತಕಟ್ಟುವ ಇವರು, ಆ ಮಾತಿನ ನಂತರದ ಬೆಳವಣಿಗೆಗಳನ್ನು ಗಾಳಿಗೆ ತೂರಿದ್ದಾರೆ. ತಮಗೆ ಬೇಕಾದ್ದನ್ನು ಮಾತ್ರ ಹೆಕ್ಕಿಕೊಂಡು, ಸಹಜ ಸ್ವಂತಿಕೆಗಳಿರದ ಯಾವುದೋ ಇಸಂ ಗಳನ್ನು ನೆಕ್ಕಿಕೊಂಡು ಬದುಕುವವರ ಮನೋಧರ್ಮವೇ ಅಶ್ಲೀಲ. ಆ ಬೌದ್ಧಿಕ ಅಶ್ಲೀಲತೆಯೂ ನಮ್ಮ ದೇಶದಿಂದ ದೂರವಾಗಲೆಂದು ಆಶಿಸೋಣ.

http://www.ndtv.com/video/player/left-right-centre/porn-sites-blocked-is-government-being-the-moral-police/377490?livevideo-mostpopular