ಹಸುವಿನ ಕೆಚ್ಚಲು ಹಿಂಡಿ ತೋಳನಿಗೆ ಹಾಲುಣಿಸುವವರು

– ರೋಹಿತ್ ಚಕ್ರತೀರ್ಥ

ದಡ್ಡ ವೈರಿಯನ್ನು ಗೆಲ್ಲುವುದು ಸುಲಭ. ಆದರೆ ಅತಿ ಬುದ್ಧಿವಂತ ಶತ್ರುವಿನದ್ದೇ ಸಮಸ್ಯೆ. ಕ್ರಿಸ್ಟೋಫರ್ ನೊಲನ್‍ನ ಡಾರ್ಕ್ ನೈಟ್ ಸಿನೆಮಾ ಸರಣಿಯನ್ನು ನೋಡಿದವರಿಗೆ ಜೋಕರ್‍ನ ಪರಿಚಯ ಚೆನ್ನಾಗಿಯೇ ಇರುತ್ತದೆ. ಈತ ಹೊಡೆ ಬಡಿ ಕೊಲ್ಲು ಎನ್ನುವಂಥ ನೇರಾನೇರ ವಿಲನ್ ಅಲ್ಲ. ನಾಯಕನ ಜೊತೆಗೇ ಇದ್ದು, ಆತನ ತಂತ್ರಗಳನ್ನೆಲ್ಲ ಕರಗತ ಮಾಡಿಕೊಳ್ಳಬಲ್ಲ; ಸಂದರ್ಭ ಬಂದರೆ ನಾಯಕನಿಗಿಂತ ಚೆನ್ನಾಗಿ ಅವನ್ನು ಪ್ರಯೋಗಿಸಬಲ್ಲ ಚತುರನೀತ. ಇಂಥವರನ್ನು ಸಂಭಾಳಿಸುವುದು ಕಷ್ಟದ, ನಾಜೂಕಿನ, ಬುದ್ಧಿವಂತಿಕೆ ಮತ್ತು ಸಂಯಮ ಬೇಡುವ ಕೆಲಸ. ಸಿನೆಮಾದಲ್ಲಿ ಈತನ ಹಾವಭಾವ, ವೇಷಭೂಷಣಗಳನ್ನು ನೋಡಿಯಾದರೂ ವಿಲನ್ ಎನ್ನಬಹುದೇನೋ; ಆದರೆ ನಿಜಜೀವನದಲ್ಲಿ ಇವರು ನಮ್ಮ ನಿಮ್ಮಂತೆಯೇ ಇರುತ್ತಾರೆ. ನಮ್ಮ ಭಾಷೆಯನ್ನೇ, ನಮ್ಮ ಧಾಟಿಯಲ್ಲೇ ಮಾತಾಡುತ್ತಾರೆ. ನಮಗೇನೋ ಬಹಳ ದೊಡ್ಡ ಉಪಕಾರ ಮಾಡಲಿಕ್ಕೆಂಬಂತೆ ಹಿಂದೆ ಮುಂದೆ ಸುಳಿದಾಡಿಕೊಂಡಿರುತ್ತಾರೆ. “ನೀನೂ? ಬ್ರೂಟಸ್!” ಎಂದು ನಾವು ಕಂಗಾಲಾಗಿ ನೆಲಕ್ಕುರುಳುವಷ್ಟರಲ್ಲಿ ಕಾಲ ಮಿಂಚಿರುತ್ತದೆ.

ಶೆಲ್ಡನ್ ಪೊಲಾಕ್, ಅಮೆರಿಕದಲ್ಲಿರುವ ಸಂಸ್ಕೃತ ಪಂಡಿತರು. ಹಾರ್ವರ್ಡ್ ವಿಶ್ವವಿದ್ಯಾಲಯದಲ್ಲಿ ಗ್ರೀಕ್ ಮತ್ತು ಲ್ಯಾಟಿನ್ ಭಾಷೆಗಳನ್ನು ಕಲಿತು, ಮುಂದೆ ಅಭಿಜಾತ ಭಾಷೆಗಳ ಇತಿಹಾಸದಲ್ಲಿ ಆಸಕ್ತನಾಗಿ, ಸಂಸ್ಕೃತವನ್ನು ಅಭ್ಯಾಸ ಮಾಡಿ, ಅದರಲ್ಲಿ ಪಾರಂಗತನಾದವರು. ಹಲವು ಹತ್ತು ಸಂಸ್ಥೆಗಳಲ್ಲಿ, ವಿವಿಗಳಲ್ಲಿ ದುಡಿದ ಅನುಭವವಿರುವ ಪೊಲಾಕ್ ಪ್ರಸ್ತುತ ಕೊಲಂಬಿಯಾ ವಿವಿಯಲ್ಲಿ ಫಿಲಾಲಜಿ ವಿಭಾಗದ ಪ್ರಾಧ್ಯಾಪಕರು. ಸಂಸ್ಕೃತ ಸಾಹಿತ್ಯ, ಶಾಸ್ತ್ರ, ಇತಿಹಾಸಗಳ ವಿಷಯಗಳಲ್ಲಿ ಅಧಿಕೃತ ವಕ್ತಾರನಂತೆ ಮಾತಾಡಬಲ್ಲಷ್ಟು ಮಾಹಿತಿ, ಪಾಂಡಿತ್ಯ, ಕೌಶಲ ಇರುವ ಜಾಣ. ಅಮೆರಿಕನ್ ಅಕಾಡೆಮಿ ಆಫ್ ಆಟ್ರ್ಸ್ ಆಂಡ್ ಸೈನ್ಸ್ ನ ಫೆಲೋ ಆಗಿ, ಕ್ಲೇ ಸಂಸ್ಕೃತ ಲೈಬ್ರರಿಯ ಜನರಲ್ ಎಡಿಟರ್ ಆಗಿ, ಸೌತ್ ಏಷ್ಯ ಎಕ್ರಾಸ್ ದ ಡಿಸಿಪ್ಲಿನ್ಸ್ ಎಂಬ ಮೂರು ವಿವಿಗಳ ಸಹಭಾಗಿತ್ವದ ಪ್ರಕಾಶನ ಸಂಸ್ಥೆಯ ಸಂಪಾದಕನಾಗಿ, ಹಾರ್ವರ್ಡ್ ವಿವಿ ಪ್ರಕಟಿಸುವ ಹತ್ತಾರು ಪ್ರಕಟಣೆಗಳ ಕಾರ್ಯಕಾರಿ ಸಂಪಾದಕನಾಗಿ ಹಲವು ಜವಾಬ್ದಾರಿಗಳನ್ನು ಏಕಕಾಲಕ್ಕೆ ನಿರ್ವಹಿಸಬಲ್ಲ ಗಟ್ಟಿಗ. ಅಮೆರಿಕ ಮತ್ತು ಯುರೋಪ್ ಖಂಡಗಳ ಒಂದಿಲ್ಲೊಂದು ಸಂಸ್ಕೃತ ಸಂಬಂಧಿ ಕೆಲಸಗಳಲ್ಲಿ ಪೊಲಾಕ್‍ರ ನೇರ ಯಾ ಪರೋಕ್ಷ ನೆರಳು ಇದ್ದೇ ಇರುತ್ತದೆ. ಕೊಲಂಬಿಯಾ ವಿವಿಯಲ್ಲಿ ದಲಿತ ವಿದ್ಯಾರ್ಥಿಗಳಿಗಾಗಿ ಅಂಬೇಡ್ಕರ್ ಸಂಸ್ಕೃತ ಫೆಲೋಶಿಪ್ ಪ್ರಾರಂಭಿಸಿದ ಹೆಗ್ಗಳಿಕೆ ಕೂಡ ಅವರದ್ದು. ಕಳೆದ ಒಂದು ವರ್ಷದಿಂದ ಪೊಲಾಕ್ “ಮೂರ್ತಿ ಕ್ಲಾಸಿಕಲ್ ಲೈಬ್ರರಿ” ಎಂಬ ಇನ್ಫೋಸಿಸ್ ಮೂರ್ತಿಗಳ ಬಹುದೊಡ್ಡ ಸಾಹಿತ್ಯ ಯೋಜನೆಯ ಮುಖ್ಯ ಸಂಪಾದಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಮುಂದಿನ ನೂರು ವರ್ಷಗಳಲ್ಲಿ, ವರ್ಷಕ್ಕೆ ಐದರಂತೆ, ಭಾರತೀಯ ಭಾಷೆಗಳ ಅಭಿಜಾತ ಸಾಹಿತ್ಯವನ್ನು ಮೂಲದೊಡನೆ ಅನುವಾದ ಎಂಬ ರೀತಿಯಲ್ಲಿ ಪಾಶ್ಚಾತ್ಯ ಜಗತ್ತಿಗೆ ಕೊಡಬೇಕೆಂಬ ಮಹತ್ವಾಕಾಂಕ್ಷೆಯಿಂದ ನಾರಾಯಣಮೂರ್ತಿಯವರ ಮಗ ರೋಹನ್ ಪ್ರಾರಂಭಿಸಿರುವ ಯೋಜನೆ ಇದು. ಇದಕ್ಕಾಗಿ 5.2 ಮಿಲಿಯನ್ ಅಮೆರಿಕನ್ ಡಾಲರ್‍ಗಳನ್ನು (ಸುಮಾರು 35 ಕೊಟಿ ರುಪಾಯಿ) ಮೀಸಲಿರಿಸಲಾಗಿದೆ. ಕಳೆದ ವರ್ಷ ಈ ಯೋಜನೆಯಲ್ಲಿ ನಾಲ್ಕು ಪುಸ್ತಕಗಳನ್ನು ಹೊರತರಲಾಗಿದೆ.

ಎಲ್ಲ ಒಪ್ಪೋಣ. ಆದರೆ ಸಮಸ್ಯೆ ಇರುವುದು ಪೊಲಾಕ್ ಅವರ ಪಾಂಡಿತ್ಯದಲ್ಲಾಗಲೀ ಅವರಿಗಿರುವ ಸಂಸ್ಕೃತ ಯಾ ಬೇರಾವುದೇ ಅಭಿಜಾತ ಭಾಷೆಯ ಮೇಲಿನ ತಿಳಿವಳಿಕೆಯಲ್ಲಾಗಲೀ ಅಲ್ಲ. ಸಮಸ್ಯೆ ಇರುವುದು ಅವರ ಚಿಂತನಾಕ್ರಮದಲ್ಲಿ. ಭಾರತದಲ್ಲಿ ಇತ್ತೀಚೆಗೆ ಸೆಕ್ಯುಲರ್/ಕಮ್ಯುನಿಸ್ಟ್ ಬುದ್ಧಿಜೀವಿಗಳ ಹಾವಳಿ ಹೆಚ್ಚಾಗಿರುವುದರಿಂದ ಪೊಲಾಕ್ ಚಿಂತನಕ್ರಮವನ್ನು ವಿವರಿಸಲು ನಾನು ಹೆಚ್ಚು ಪದಗಳನ್ನು ವ್ಯರ್ಥ ಮಾಡುವ ಅವಶ್ಯಕತೆಯೇ ಇಲ್ಲ. ಯಾಕೆಂದರೆ ಇಲ್ಲಿನ ಎಡಬಿಡಂಗಿ ಬುದ್ಧಿಜೀವಿಗಳನ್ನೆಲ್ಲ ಜೊತೆಗೂಡಿಸಿ ತೆಗೆದ ರಸಪಾಕದಂತಿದ್ದಾರೆ ಪೊಲಾಕ್. ಭಾರತಕ್ಕೆ ಆರ್ಯರು ಹೊರಗಿನಿಂದ ಬಂದರು; ಇಲ್ಲಿನ ದ್ರಾವಿಡರೆಂಬ ಮೂಲನಿವಾಸಿಗಳನ್ನು ತುಳಿದರು; ಸಂಸ್ಕೃತ ಎಂದಿಗೂ ಸಂವಹನದ ಭಾಷೆಯಾಗಿರಲಿಲ್ಲ; ಬ್ರಾಹ್ಮಣವರ್ಗ ಇದನ್ನು ತನ್ನ ಸ್ವತ್ತೆಂಬಂತೆ ಕಾಯ್ದುಕೊಂಡು ಬಂತು; ವರ್ಣಾಶ್ರಮ ವ್ಯವಸ್ಥೆಯನ್ನು ಸಮಾಜದ ಮೇಲೆ, ಸಮಾಜದ ಶೋಷಿತ ಸಮುದಾಯದ ಮೇಲೆ ಹೇರಲಾಯಿತು; ಹದಿನಾರನೇ ಶತಮಾನದ ಹೊತ್ತಿಗೆಲ್ಲ ಭಾರತದಲ್ಲಿ ಸಂಸ್ಕೃತ ಮೃತಭಾಷೆಯಾಗಿತ್ತು; ವೇದ-ಉಪನಿಷತ್ತುಗಳು, ಪುರಾಣಗಳು, ಮಹಾಕಾವ್ಯಗಳು ಆ ಕಾಲಘಟ್ಟದ ಜನಜೀವನ ವ್ಯವಸ್ಥೆಯನ್ನು ವಿವರಿಸುತ್ತವೆಯೇ ಹೊರತು ಇಂದಿಗೆ ಪ್ರಸ್ತುತವಲ್ಲ; ವೇದಗಳನ್ನು ಪ್ರಾಚೀನಕಾಲದ ಆಚರಣೆಗಳಿಗೆ ಬಳಸುತ್ತಿದ್ದ ಮ್ಯಾನುಯೆಲ್ ಎಂಬ ರೀತಿಯಲ್ಲೇ ನೋಡಬೇಕು; ಅಲ್ಲಿ ಸಮ್ಯಕ್‍ದರ್ಶನ, ಜೀವನದೃಷ್ಟಿ ಇತ್ಯಾದಿಗಳನ್ನೆಲ್ಲ ಹುಡುಕುವುದು ಮೂರ್ಖತನ – ಹೀಗೆ ಪುಂಖಾನುಪುಂಖವಾಗಿ ನಮ್ಮ ಭಾರತೀಯ ಎಡ ಬುದ್ಧಿಜೀವಿಗಳು ಏನು ವಾದಗಳನ್ನು ಹರಿಯಬಿಡುತ್ತಾರೋ ಅವೆಲ್ಲವೂ ಬಂದದ್ದು ಪೊಲಾಕ್ ಎಂಬ ಪಾಶ್ಚಾತ್ಯ ಸಂಸ್ಕೃತ ಪಂಡಿತನ ಶಂಖದಿಂದ! ಸಂಸ್ಕೃತವನ್ನು ಮೂಲದಲ್ಲಿ ಓದಿಕೊಳ್ಳದ, ಓದಲು ಆಸಕ್ತಿಯೂ ಇಲ್ಲದ ಭಾರತದ ಕಮ್ಯುನಿಸ್ಟ್ ಚಿಂತಕರಿಗಂತೂ ಪೊಲಾಕ್ ಅವರೇ ಯಾಜ್ಞವಲ್ಕ್ಯ, ಅಗಸ್ತ್ಯ, ವಿಶ್ವಾಮಿತ್ರ, ವ್ಯಾಸಮಹರ್ಷಿ ಎಲ್ಲವೂ. ಭಾರತೀಯ ಸಂಸ್ಕೃತಿಯ ಬಗ್ಗೆ ಭಾರತೀಯ ಪಂಡಿತರು ಬರೆದದ್ದಕ್ಕಿಂತಲೂ ಪೊಲಾಕ್ ಹೇಳಿದ್ದೇ ಅಧಿಕೃತ. ಅವರದ್ದೇ ವೇದವಾಕ್ಯ. ಭಾರತದ ಹಿಂದೂ ಪಂಡಿತರು ಕೂಪಮಂಡೂಕಗಳಾಗಿ ಯೋಚಿಸುತ್ತಾರೆ; ತಮ್ಮ ಕುದುರೆಗೆ ಮೂರೇ ಕಾಲೆಂದು ವಾದಿಸುತ್ತಾರೆ; ಆದರೆ ಪೊಲಾಕ್ ಭಾರತವನ್ನು ದೂರನಿಂತು ಗ್ರಹಿಸುವುದರಿಂದ ಅವರ ದೃಷ್ಟಿ ವಿಶಾಲ ಮತ್ತು ಸಮಗ್ರವಾದದ್ದು ಎನ್ನುವುದು ಕಮ್ಯುನಿಸ್ಟ್ ಚಿಂತಕರ ವಾದ.
ಪೊಲಾಕ್ ಯಾಕೆ ಭಾರತೀಯತೆಗೆ ಭಯೋತ್ಪಾದಕರಾಗುತ್ತಾರೆಂದರೆ ಅವರು ನಮ್ಮ ಭಗವಾನ್, ಬಂಜಗರೆ, ಗಿರೀಶ್ ಕಾರ್ನಾಡ್ ಮುಂತಾದವರು ಹೇಳುವ ಸಂಗತಿಗಳನ್ನೇ ಬಹಳ ನಾಜೂಕಾಗಿ ಜಾಗತಿಕ ವೇದಿಕೆಯಲ್ಲಿ ನಿಂತು ಹೇಳುತ್ತಾರೆ. ಕೌಸಲ್ಯಾದಿ ಪತ್ನಿಯರಿಗೆ ದಶರಥನಿಂದ ನೇರವಾಗಿ ಮಕ್ಕಳಾಗುವುದಿಲ್ಲ; ಬದಲು ದೇವಪ್ರಸಾದವಾದ ಪಾಯಸ ಕುಡಿದು ಮಕ್ಕಳಾಗುತ್ತವೆ – ಎಂಬುದನ್ನು ನಾವು ಓದುತ್ತೇವೆ. ಆದರೆ, ಅದೇ ಸತ್ಯ ಭಗವಾನ್ ಬಾಯಲ್ಲಿ “ರಾಮ ಅಪ್ಪನಿಗೆ ಹುಟ್ಟಿದವನಲ್ಲ” ಎಂಬ ಕೈಕಾಲು ಕಳೆದುಕೊಂಡ ವಿಕಲ ವ್ಯಾಕುಲ ಶಿಶುವಿನಂಥ ವಾಕ್ಯವಾಗುವುದೆಂಬ ಸತ್ಯವನ್ನು ಕಂಡಿದ್ದೇವೆ. ಒಂದೇ ವಿಚಾರವನ್ನು ಎರಡು ಭಿನ್ನ ದೃಷ್ಟಿಕೋನಗಳಿಂದ ನೋಡಿದಾಗ ಅದಕ್ಕೆ ಎಂಥಾ ವಿರುದ್ಧಾರ್ಥಗಳು ಬರುತ್ತವೆ ಎಂಬ ಅಪಾಯದ ಅರಿವು ನಮಗಿದೆ. ವೇದದಲ್ಲಿ “ಏಕಂ ಸತ್, ವಿಪ್ರಾಃ ಬಹುಧಾ ವದಂತಿ” ಎಂಬ ಮಾತಿದೆ. ಬ್ರಹ್ಮಜ್ಞಾನ ಅಥವಾ ಅಂತಿಮಸತ್ಯವೆನ್ನುವುದು ಒಂದೇ; ಅದನ್ನೇ ನಾವು ಹಲವು ಬಗೆಯಲ್ಲಿ ಕಂಡರಿಸುತ್ತೇವೆ – ಎಂಬುದು ಸೂಚ್ಯಾರ್ಥ. ಆದರೆ, ಈ ಉದಾತ್ತ ಹೇಳಿಕೆ ನಮ್ಮ ಎಡಬಿಡಂಗಿ ಬುದ್ಧಿಜೀವಿಗಳ ಕೈಯಲ್ಲಿ, “ಸತ್ಯವನ್ನು ಮರೆಮಾಚುವಂತೆ ಬ್ರಾಹ್ಮಣರು ಹಲವು ಬಗೆಯಲ್ಲಿ ತಿರುಚಿ ಹೇಳುತ್ತಾರೆ” ಎಂಬ ಅರ್ಥ ಪಡೆದುಕೊಳ್ಳಬಹುದು. ಹೀಗೆ ವಾಕ್ಯಕ್ಕೆ ಸೀಮಿತಾರ್ಥ, ವಿಪರೀತಾರ್ಥ, ವಾಚ್ಯಾರ್ಥ, ಅಧಿಕಪ್ರಸಂಗಾರ್ಥಗಳನ್ನು ಹಚ್ಚುವವರು ಅಜ್ಞಾನಿಗಳೋ ಅನಕ್ಷರಸ್ಥರೋ ಆಗಿದ್ದರೆ ಪರವಾಗಿಲ್ಲ; ಆದರೆ ಅವರು ಕೂಡ ಸಂಸ್ಕೃತದಲ್ಲಿ ಸ್ನಾತಕೋತ್ತರ ಪದವಿಯುಳ್ಳವರೇ ಆದಾಗ ನಿಜವಾದ ತಲೆನೋವು ಎದುರಾಗುತ್ತದೆ. ಪೊಲಾಕ್ ವಿಷಯದಲ್ಲಿ ಹುಟ್ಟಿರುವ ಸಮಸ್ಯೆ ಇದೇ. ಭಾರತದ ಆತ್ಮವನ್ನು ಕೆಂಪು ಮಸೂರದ ಕನ್ನಡಕದ ಮೂಲಕ ನೋಡುವ ಪೊಲಾಕ್‍ರಿಗೆ ಜಾತಿಪದ್ಧತಿ, ಪುರೋಹಿತಶಾಹಿ, ತಳಸಮುದಾಯ, ಆರ್ಯ-ದ್ರಾವಿಡ ಮುಂತಾದ ಪದಪುಂಜಗಳು ಬಹಳ ಪ್ರಿಯ. ಪ್ರೊ. ಬಾಲಗಂಗಾಧರ, ಪ್ರೊ. ರಾಜಾರಾಮ ಹೆಗ್ಡೆ ಮುಂತಾದವರು ಸತ್ಯದ ಮೆಟ್ಟಿಲಿನಲ್ಲಿ ಜನರನ್ನು ಹತ್ತುಹೆಜ್ಜೆ ಮೇಲೆ ನಡೆಸಲು ಯತ್ನಿಸಿದರೆ ಪೊಲಾಕ್ ಸುಳ್ಳಿನ ಜಾರುಬಂಡಿಯಲ್ಲಿ ಅದೇ ಜನರನ್ನು ನೂರು ಹೆಜ್ಜೆ ಕೆಳಕ್ಕೆ ಜಾರಿಸಿ ಕಾರ್ಯಸಾಧನೆ ಮಾಡಿಕೊಳ್ಳಬಲ್ಲರು. ಸುಳ್ಳುಗಳ ನಯದಲ್ಲಿ ಜಾರಿಕೊಂಡು ಹೋಗುವುದು ಸುಲಭ ಮಾತ್ರವಲ್ಲ; ರೋಚಕವೂ ಆಗಿರುತ್ತದೆ ಅಲ್ಲವೆ?

ಹಿಂದೊಮ್ಮೆ ಅಂಬೇಡ್ಕರ್ ಸಮಗ್ರಸಾಹಿತ್ಯವನ್ನು ಕನ್ನಡಕ್ಕೆ ತರುವ ಸಂದರ್ಭದಲ್ಲಿ ಸ್ವಘೋಷಿತ ಅಂಬೇಡ್ಕರ್ ಉತ್ತರಾಧಿಕಾರಿಗಳು ತರ್ಜುಮೆಯ ಹೆಸರಲ್ಲಿ ತಮಗೆ ತೋಚಿದಂತೆ ಗೀಚಿ ಇಡೀ ಯೋಜನೆಯನ್ನೇ ಹಳ್ಳ ಹಿಡಿಸಿದ ಉದಾಹರಣೆ ನಮ್ಮ ಕಣ್ಣಮುಂದೆಯೇ ಇದೆ. ನಂತರ ಮೈಸೂರು ವಿವಿಯ ಪ್ರೊ. ಪ್ರಧಾನ್ ಗುರುದತ್ತ ಅವಷ್ಟೂ ಬರಹಗಳನ್ನು ಕಸದ ಬುಟ್ಟಿಗೆ ಹಾಕಿ, ಮೂಲಕ್ಕೆ ನಿಷ್ಠವಾಗಿರುವ ಬರಹಗಳನ್ನು ಹೊಸದಾಗಿ ಬರೆಸಬೇಕಾಗಿ ಬಂತು. ಈಗ ಪೊಲಾಕ್ ಸಂಪಾದಿಸಿ ಹೊರತರುತ್ತಿರುವ ಪುಸ್ತಕಗಳ ಮೌಲ್ಯಮಾಪನವನ್ನು ನಾವು ಈ ಹಿನ್ನೆಲೆಯಲ್ಲಿ ಮಾಡಬೇಕಾಗುತ್ತದೆ. ಅವರ ಅನುವಾದದಲ್ಲಿ ಧರ್ಮ ಎಂಬುದಕ್ಕೆ ರಿಲಿಜನ್ ಎಂಬ ಒಂದೇ ಅರ್ಥವಿದ್ದರೆ ಏನು ಮಾಡೋಣ? ವಿಪ್ರಾಃ ಎಂಬುದಕ್ಕೆ ಬ್ರಾಹ್ಮಣರು ಎಂದಿದ್ದರೆ ಏನು ಹೇಳೋಣ? ಆಸ್ತಿ ಇದ್ದವನೇ ಆಸ್ತಿಕ ಎಂಬಷ್ಟು ದರಿದ್ರ ಅನುವಾದವನ್ನು ಪೊಲಾಕ್‍ರಿಂದ ಎದುರುನೋಡಲಾರೆವಾದರೂ “ಬ್ರಾಹ್ಮಣನೇ ಶಿರಕ್ಕೆ ಹೋಲಿಸಿ ಉಚ್ಛನೆಂದೂ ಶೂದ್ರನನ್ನು ಕಾಲಿಗೆ ಹೋಲಿಸಿ ನೀಚನೆಂದೂ ದೇವರೇ ವರ್ಗೀಕರಣ ಮಾಡಿಬಿಟ್ಟಿದ್ದಾನೆ” ಎಂಬ ವ್ಯಾಖ್ಯೆಯನ್ನಂತೂ ಧಾರಾಳವಾಗಿ ನಿರೀಕ್ಷಿಸಬಹುದು! “ಸಾಧ್ಯವಾದಷ್ಟೂ ಮೂಲಕ್ಕೆ ಹೊಂದುವ ಪದಗಳನ್ನೇ ಬಳಸಿ ಪದಶಃ ಅನುವಾದ ಮಾಡುತ್ತೇವೆ” ಎಂದು ಯೋಜನೆಯ ರೂವಾರಿ ರೋಹನ್ ಮೂರ್ತಿ ಹೇಳಿದ್ದಾರಾದರೂ ಅವರ ಬಂಡಿ ಹೋಗುಹೋಗುತ್ತಾ ಎಡಕ್ಕೇ ವಾಲಿಕೊಂಡರೆ ಏನು ಗತಿ? ಮಿಲಿಯನ್ ಡಾಲರ್ ಯೋಜನೆಯಾಗಿರುವುದರಿಂದ ಇದು ಬಹಳ ಬೇಗ ಅಧಿಕೃತತೆಯ ಮಾನ್ಯತೆ ಪಡೆಯುತ್ತದೆ. ಕ್ಲಾಸಿಕಲ್ ಲೈಬ್ರರಿಯಿಂದ ಪ್ರಕಾಶಿತವಾದ ಪುಸ್ತಕಗಳನ್ನು ಹಲವು ಪಾಶ್ಚಾತ್ಯ ವಿಶ್ವವಿದ್ಯಾಲಯಗಳು ಕೂಡಲೇ ತಮ್ಮ ಲೈಬ್ರರಿ ತುಂಬಿಸಿಕೊಳ್ಳುತ್ತವೆ. ಪದವಿ ತರಗತಿಗಳಿಗೆ ಇವನ್ನೇ ಪಠ್ಯವಾಗಿಯೋ ಪೂರಕ ಪಠ್ಯವಾಗಿಯೋ ಆರಿಸುತ್ತವೆ. ಹಲವು ಪಿಎಚ್‍ಡಿ ಪ್ರಬಂಧಗಳು ಈ ಪುಸ್ತಕಗಳನ್ನು ಅಧಿಕೃತ ಅನುವಾದಗಳೆಂದು ಒಪ್ಪಬಹುದು. ಹಲವು ಕಡೆಗಳಲ್ಲಿ ಈ ಪುಸ್ತಕಗಳ ಉಲ್ಲೇಖ ಬರಬಹುದು. ಪೊಲಾಕ್ ತನ್ನ ಅತ್ಯಂತ ಕಟುವಾದ ರಾಜಕೀಯ ನಿಲುವುಗಳನ್ನು ಈ ಪುಸ್ತಕಗಳ ಮೂಲಕ ಹರಡುತ್ತಾ ಹೋಗುವುದಿಲ್ಲ ಎಂದು ಹೇಗೆ ಹೇಳುವುದು? ಮೋದಿ ಸರಕಾರವನ್ನು ಕೋಮುವಾದಿ ಎಂದು ಜರೆಯುವ; ಭಾರತ ಶಿಲಾಯುಗದತ್ತ ಹೋಗುತ್ತಿದೆ ಎಂದು ಅಮೆರಿಕದಲ್ಲಿ ಕೂತು ನಂಬುವ, ಜೆಎನ್‍ಯು ವಿವಾದದಲ್ಲಿ ಸರಕಾರವು ಪ್ರಜಾಪ್ರಭುತ್ವದ ಕಗ್ಗೊಲೆ ಮಾಡಿದೆ ಎಂದು ಬರೆಯುವ ಪೊಲಾಕ್ ಎಂಥ ಮನುಷ್ಯ ಎಂಬುದನ್ನು ಬಿಡಿಸಿಹೇಳಬೇಕಾದ ಅಗತ್ಯವೇನೂ ಇಲ್ಲ.

ಪೊಲಾಕ್ ನೂರಕ್ಕೆ ಹದಿನಾರಾಣೆ ಕಮ್ಯುನಿಸ್ಟರು. ತನ್ನ ರಾಜಕೀಯ ಸಿದ್ಧಾಂತಗಳಲ್ಲಿ ಅವರೆಂದೂ ಮುಚ್ಚುಮರೆ ಮಾಡಿಲ್ಲ. ಶಾಸ್ತ್ರಗಳಿರಲಿ ಸಾಹಿತ್ಯವಿರಲಿ ಅವರು ಕಮ್ಯುನಿಸ್ಟ್ ಸಿದ್ಧಾಂತಗಳನ್ನು ಕಣ್ಣು ಮತ್ತು ತಲೆಗೇರಿಸಿಕೊಂಡೇ ವಿಮರ್ಶೆಗಿಳಿಯುತ್ತಾರೆ. ಪ್ರತಿಯೊಂದು ಮೌಲ್ಯಮಾಪನವೂ ರಾಜಕೀಯದ ಕೋನವನ್ನಿಟ್ಟುಕೊಂಡೇ ನಡೆಯಬೇಕು ಎಂಬ ಪೂರ್ವಗ್ರಹ ಅವರ ಎಲ್ಲ ಬರಹ, ಭಾಷಣಗಳಲ್ಲಿ ಕಾಣುತ್ತದೆ. ದುರಂತವೆಂದರೆ, ಸಂಸ್ಕೃತವನ್ನು ಎಂದೂ ಓದದ ಜಗತ್ತಿನ ಸಾವಿರಾರು ಎಡಚಿಂತಕರು ಪೊಲಾಕ್‍ರನ್ನು ಉದ್ಧರಿಸುತ್ತಾರೆ. ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಗುರುತಿಸಿಕೊಳ್ಳಲು ಈ ವ್ಯಕ್ತಿಯನ್ನು ಚಿಮ್ಮುಹಲಗೆಯಾಗಿ ಬಳಸಿಕೊಳ್ಳಲು ಹಲವರು ಹವಣಿಸುತ್ತಾರೆ. ವಿದೇಶದಿಂದ ಬಂದದ್ದೆಲ್ಲ ತೀರ್ಥವೆಂಬ ಭ್ರಮೆಯಲ್ಲಿರುವ ನಮ್ಮ ಪಂಡಿತರೂ ಸಂಸ್ಕೃತ ಕಲಿತಿರುವ ಈ ಬಿಳಿಯನನ್ನು ದೇವಲೋಕದ ಪಾರಿಜಾತವೆಂದೇ ನಂಬಿದ್ದಾರೆ. ಪೊಲಾಕ್ ಬಂದರೆ ತಮ್ಮ ಸಮಾರಂಭಗಳಿಗೆ ಕಳೆಗಟ್ಟುತ್ತದೆ ಎಂಬ ಕಾರಣಕ್ಕೆ ಅವರನ್ನು ಕರೆಸಿ ಸನ್ಮಾನಿಸಿ ಮಾತಾಡಿಸಿ ತಮ್ಮ ಪೃಷ್ಟಕ್ಕೆ ಅವರಿಂದ ಒದೆಸಿಕೊಂಡೂ ರೋಮಾಂಚಿತರಾಗುವ ದಡ್ಡಶಿಖಾಮಣಿಗಳಿದ್ದಾರೆ. ಮೊದಲ ಓದಿನಲ್ಲಿ ಗ್ರಹಿಸಲಾಗದಷ್ಟು ಸಂಕೀರ್ಣವಾಗಿ ತನ್ನ ವಿಚಾರಗಳನ್ನು ಮಂಡಿಸುವ ಪೊಲಾಕ್ ತನ್ನ ಮಿತ್ರರನ್ನೂ ಶತ್ರುಗಳನ್ನೂ ಸಮಾನವಾಗಿ ಯಾಮಾರಿಸಿದ್ದಾರೆಂಬುದರಲ್ಲಿ ಯಾವ ಸಂಶಯವೂ ಇಲ್ಲ. ಪೊಲಾಕ್‍ರ ಚಿಂತನೆಯ ಧಾಟಿ ಸಂಪೂರ್ಣವಾಗಿ ತಪ್ಪುದಾರಿಯಲ್ಲಿದೆ ಎಂಬುದನ್ನು ಎಳೆಎಳೆಯಾಗಿ ತೋರಿಸಲು ಇತ್ತೀಚೆಗೆ, ಅಮೆರಿಕದಲ್ಲಿರುವ ಇನ್ನೋರ್ವ ವಿದ್ವಾಂಸ ರಾಜೀವ್ ಮಲ್ಹೋತ್ರ, “ಬ್ಯಾಟಲ್ ಫಾರ್ ಸಂಸ್ಕೃತ್” ಎಂಬ ಪುಸ್ತಕವನ್ನೇ ಬರೆಯಬೇಕಾಯಿತು! ತಮಾಷೆಯೆಂದರೆ, ಬಂಡವಾಳಶಾಹಿಗಳನ್ನು ಹಿಗ್ಗಾಮುಗ್ಗಾ ಬಯ್ಯುತ್ತಿದ್ದ ಕಾರ್ಲ್ ಮಾಕ್ರ್ಸ್‍ನ “ಕಮ್ಯುನಿಸ್ಟ್ ಮ್ಯಾನಿಫೆಸ್ಟೋ” ಪ್ರಕಟವಾಗಲು ಮ್ಯಾಂಚೆಸ್ಟರಿನ ಜವಳಿ ಕಾರ್ಖಾನೆಯ ಲಾಭದ ದುಡ್ಡೇ ಬೇಕಾಯಿತು. ಹಾಗೆಯೇ, ಇನ್ನೂ ಹದಿನೆಂಟನೇ ಶತಮಾನದ ಕಮ್ಯುನಿಸಂಅನ್ನು ಆತುಕೊಂಡಿರುವ ಪೊಲಾಕ್, ಮಾತಿನಲ್ಲಿ ಮಾತ್ರ ಕಮ್ಯುನಿಸ್ಟ್. ಅವರು ಸಂಪಾದಕರಾಗಿ ಕೆಲಸ ಮಾಡುವುದೆಲ್ಲ ದೊಡ್ಡದೊಡ್ಡ “ಬಂಡವಾಳಶಾಹಿ” ಕಂಪೆನಿಗಳ ಪ್ರಾಜೆಕ್ಟ್ ಗಳಿಗೇನೇ! ಕೋಟ್ಯಂತರ ರುಪಾಯಿಯ ಬಂಡವಾಳಶಾಹಿ ದುಡ್ಡಲ್ಲಿ ಮೂರ್ತಿ ಲೈಬ್ರರಿಯ ಸಂಪಾದಕನಾಗಲು ಅವರಿಗೆ ಸಿದ್ಧಾಂತ ಅಡ್ಡಬರುವುದಿಲ್ಲ ಎನ್ನುವುದು ವಿಶೇಷ!

“ಈ ದೇಶದಲ್ಲಿ ದೇಶಭಕ್ತಿ ಯಾಕೆ ಇಂಗಿಹೋಗಿದೆ ಗೊತ್ತೆ?” ಎಂದು ಹೇಳಿ ಇತ್ತೀಚೆಗೆ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಐದು-ಆರನೇ ಕ್ಲಾಸುಗಳ ಪಠ್ಯಪುಸ್ತಕಗಳ ಇತಿಹಾಸ ಪಾಠಗಳನ್ನು ಸಂಸತ್ತಿನಲ್ಲಿ ಎಲ್ಲರ ಮುಖಕ್ಕೆ ಹಿಡಿದರು. ಭಾರತ ದಂಗೆಗಳ ದೇಶ; ಇಲ್ಲಿ ಅನ್ಯಮತೀಯರನ್ನು ಹಿಂದೂಗಳು ಹೊಡೆದುಹಾಕುತ್ತಾರೆ; ಹಿಂದೂಗಳೆಲ್ಲ ಭಯೋತ್ಪಾದಕರು ಎಂಬ ಆಘಾತಕಾರಿ ಸಾಲುಗಳನ್ನು ಅಲ್ಲಿ ಬರೆಯಲಾಗಿತ್ತು. ಇಂಥ ಅಪಾಯಕಾರಿ ಪೂರ್ವಗ್ರಹಗಳನ್ನು ಮುಂದುವರಿಸುವ ಮತ್ತು ಜೀವಂತವಾಗಿಡುವ ಕೆಲಸವನ್ನು ಮೂರ್ತಿ ಕ್ಲಾಸಿಕಲ್ ಲೈಬ್ರರಿಯಂಥ ಬಹುಕೋಟಿ ಯೋಜನೆಗಳ ಮೂಲಕ ಶೆಲ್ಡನ್ ಪೊಲಾಕ್‍ನಂಥ ಅಪಾಯಕಾರಿ ಬುದ್ಧಿಜೀವಿಗಳು ಮಾಡಿದ್ದೇ ಆದರೆ, ನಾರಾಯಣಮೂರ್ತಿಗಳು ಹಸುವಿನ ಕೆಚ್ಚಲು ಹಿಂಡಿ ತೋಳಕ್ಕೆ ಹಾಲುಣಿಸುವ ಕೆಲಸವನ್ನು ಮಾಡುತ್ತಿದ್ದಾರೆ ಎಂದೇ ಹೇಳಬೇಕು. ಯಾಕೆ, ಇವರಿಗೆ ಭವ್ಯ ಭಾರತದ ಸಂಸ್ಕೃತಿಯನ್ನು ಜಗತ್ತಿಗೆ ತೆರೆದಿಡುವ ಸಮರ್ಥ ಭಾರತೀಯ ಮನಸ್ಸು ಯಾವುದೂ ಸಿಗಲಿಲ್ಲವೆ? ಭಾರತದ ಬಗ್ಗೆ ಮಾತಾಡುವವರಿಗೆ ಕನಿಷ್ಠ ಭಾರತದ ಆತ್ಮವಾದರೂ ಇರಲಿ – ಎಂದಿದ್ದಾರೆ ಪೊಲಾಕ್‍ರನ್ನು ಕ್ಲಾಸಿಕಲ್ ಲೈಬ್ರರಿ ಯೋಜನೆಯಿಂದ ಕಿತ್ತೊಗೆಯಿರಿ ಎಂದು ಕರೆಕೊಟ್ಟಿರುವ 132 ವಿದ್ವಾಂಸರು (https://goo.gl/Uip2T7). ಈ ಧ್ವನಿ ಜಾಗತಿಕ ಮಟ್ಟದಲ್ಲಿ ಒಂದು ಹೊಸ ತಿಳಿವಳಿಕೆಯನ್ನು ಪ್ರಚಾರಪಡಿಸಬೇಕಿದೆ. ಪೊಲಾಕ್‍ನಂಥ ಗೋಸುಂಬೆ ಪಂಡಿತರ ಮುಖವಾಡ ಶೀಘ್ರ ಕಳಚಿ ಬೀಳಬೇಕಿದೆ.