ಪ್ರೊ.ಪ್ರೇಮಶೇಖರ್ ಮೇಲೆ ಎಡಪಂಥೀಯರ Intolerance!

– ರಾಜೇಶ್ ನರಿಂಗಾನ

ಕಳೆದ ಅಕ್ಟೋಬರ್ 21ರಂದು ಮಂಗಳೂರು ವಿ.ವಿ.ಯ ಮಂಗಳಾ ಸಭಾಂಗಣದಲ್ಲಿ ನಡೆದ ವಿದ್ಯಾರ್ಥಿ ಸಂಘದ ಉದ್ಘಾಟನೆಗೆ ಅಂತರರಾಷ್ಟ್ರೀಯ ವಿದ್ಯಮಾನಗಳ ವಿಶ್ಲೇಷಕ, ಖ್ಯಾತ ಅಂಕಣಕಾರರಾದ ಪ್ರೊ.ಪ್ರೇಮಶೇಖರ ಅವರನ್ನು ವಿದ್ಯಾರ್ಥಿ ಸಂಘ ಆಹ್ವಾನಿಸಿತ್ತು. ಅಲ್ಲಿನ ವಿದ್ಯಾರ್ಥಿ ಕ್ಷೇಮಪಾಲನಾ ಅಧಿಕಾರಿಯಾಗಿರುವ ಉದಯ್ ಬಾರ್ಕೂರ್ ಅವರು ಇದನ್ನು ವಿರೋಧಿಸಿದ್ದರು. ಆದರೆ ವಿದ್ಯಾರ್ಥಿ ಸಂಘದ ಪದಾಧಿಕಾರಿಗಳು ಪಟ್ಟು ಹಿಡಿದ ಕಾರಣ, ಪ್ರೊ.ಪ್ರೇಮಶೇಖರ ಅವರನ್ನು ಉದ್ಘಾಟಕರಾಗಿ ಕರೆಯಲು ಒಲ್ಲದ ಮನಸ್ಸಿನಿಂದ ಒಪ್ಪಿಗೆ ನೀಡಿದರು. ವಿದ್ಯಾರ್ಥಿ ಸಂಘದ ಪದಾಧಿಕಾರಿಗಳು, ಪ್ರೊ.ಪ್ರೇಮಶೇಖರ ಅವರನ್ನು ಉದ್ಘಾಟನೆಗೆ ಆಹ್ವಾನಿಸಿದಾಗ ಅವರು ಬಹಳ ಖುಷಿಯಿಂದಲೇ ಬರುತ್ತೇನೆ ಎಂದು ಹೇಳಿದರು. ಅಂತೂ ಕಾರ್ಯಕ್ರಮದ ದಿನ ಬಂದೇ ಬಿಟ್ಟಿತು.

ತದನಂತರ‌ ಪ್ರೊ.ಪ್ರೇಮಶೇಖರ ಅವರು ಉದ್ಘಾಟನಾ ಭಾಷಣ ಮಾಡುತ್ತಾ, ಯುವ ಜನತೆ ಹೇಗಿರಬೇಕು? ಎಂಬ ವಿಚಾರವನ್ನು ಮಾತಾಡುತ್ತಿದ್ದರು.  ಆ ಸಮಯದಲ್ಲಿ ಬ್ಲೂಫಿಲಂ ನೋಡುವುದು ತಪ್ಪಲ್ಲ ಎಂದು ಹೇಳಿದ್ದು ನಿಜ. ಅದು ಯಾವ ದೃಷ್ಟಿಕೋನದಿಂದ ಹೇಳಿದ್ದರು ಎಂಬುದನ್ನು ನಾವು ಗಮನಿಸಬೇಕು. “ನೀವು ಚಿಕ್ಕವರಿದ್ದಾಗ ಚಿನ್ನಿದಾಂಡು ಆಡುತ್ತಿರುವುದನ್ನು 25ನೇ ವಯಸ್ಸಿನಲ್ಲೂ ಆಡುತ್ತಿದ್ದರೆ ನೀವು ಬೆಳೆದಿಲ್ಲ ಎಂದರ್ಥ. ಅದೇ ರೀತಿ ನೀವು ಹದಿನೆಂಟನೆಯ ವಯಸ್ಸಿನಲ್ಲಿ ಬ್ಲೂಫಿಲಂ ನೋಡುವುದನ್ನು ಇಪ್ಪತ್ತಾರನೇ ವಯಸ್ಸಿನಲ್ಲೂ ಮುಂದುವರಿಸಿದರೆ ಸಮಸ್ಯೆಯಾಗಬಹುದು” ಎಂದು ಹೇಳಿದ್ದರು. ಮನುಷ್ಯ ತನ್ನ ಅನುಭವದ ಮೂಲಕ ಬೆಳೆಯುತ್ತಾ ಹೋಗಬೇಕೇ ಹೊರತು, ನಿಂತ ನೀರಾಗಬಾರದು ಎಂಬುದು ಅವರ ನಿಲುವಾಗಿತ್ತು. ಅದಾದನಂತರ ಕಾಶ್ಮೀರದ ಸಮಸ್ಯೆಯ ಕುರಿತು ಚುಟುಕಾಗಿ ವಿಶ್ಲೇಷಣೆಯನ್ನು ಮಾಡಿದರು. ಪಾಕಿಸ್ತಾನದ ಈಗಿನ ಪರಿಸ್ಥಿತಿಯನ್ನು ಅವಲೋಕನ ಮಾಡಿದ್ದರು. ನಮ್ಮ ಪ್ರಧಾನಮಂತ್ರಿಗಳ ಕಾರ್ಯವೈಖರಿ ಹೇಗಿದೆ ಎಂಬ ವಿಚಾರದ ಬಗ್ಗೆಯೂ ಮಾಹಿತಿಯನ್ನು ಹಂಚಿದ್ದರು. ಇಷ್ಟೆಲ್ಲ ವಿಚಾರಗಳನ್ನು ವಿದ್ಯಾರ್ಥಿಗಳ ಮುಂದೆ ಮಂಡಿಸಿದ ನಂತರ, ವಿ.ಸಿ.ಯವರು ಮಾತನಾಡಿ, ಕಾರ್ಯಕ್ರಮ ಮುಗಿಯಿತು. ಕಾರ್ಯಕ್ರಮ ಮುಗಿದ ನಂತರ, ಬಂದ ಅತಿಥಿಗಳನ್ನು ಅತಿಥಿಗೃಹಕ್ಕೆ, ವಿ.ಸಿ. ಹಾಗೂ ವಿದ್ಯಾರ್ಥಿ ಕ್ಷೇಮಪಾಲನಾ ಅಧಿಕಾರಿಗಳು ಕರೆದುಕೊಂಡು ಹೋಗಿ ಸತ್ಕರಿಸುವುದು ವಿ.ವಿ.ಯ ನಿಯಮ. ಆದರೆ ಪ್ರೇಮಶೇಖರ ಅವರನ್ನು ವೇದಿಕೆಯಲ್ಲೇ ಬಿಟ್ಟು, ಅವರಿಬ್ಬರೂ ಸರಸರನೆ ಹೊರನಡೆದರು. ಕೊನೆಗೆ ವಿದ್ಯಾರ್ಥಿ ಸಂಘದ ಪದಾಧಿಕಾರಿಗಳೇ ಪ್ರೇಮಶೇಖರ ಅವರನ್ನು ಅತಿಥಿಗೃಹಕ್ಕೆ ಕರೆದುಕೊಂಡು ಹೋಗಿ ಸತ್ಕರಿಸಿದರು. ಇವೆಲ್ಲವನ್ನೂ ತಮ್ಮ ಎಂದಿನ ಶಾಂತರೂಪದ ನಗುಮೊಗದಿಂದಲೇ ಸಹಿಸಿಕೊಂಡಿದ್ದರು ಪ್ರೇಮಶೇಖರ್.

ಆ ಭಾಷಣದಲ್ಲಿ ಅವರು ಬ್ಲೂಫಿಲಂ ಕುರಿತು ಆಡಿದ ಮಾತುಗಳನ್ನೇ ಹಿಡಿದುಕೊಂಡು ಚಾರಿತ್ರ್ಯವಧೆಗೆ ವ್ಯವಸ್ಥಿತ ಷಡ್ಯಂತ್ರ ರೂಪಿಸಲಾಯಿತು. ಅದಕ್ಕೆ ಸಾಥ್ ಕೊಟ್ಟಿದ್ದು ಪಬ್ಲಿಕ್ ಟಿವಿಯ ಸುಬಗ ವರದಿಗಾರ ಸುಖಪಾಲ್ ಪೊಳಲಿ. ಆತ ಅತಿಥಿಗಳು ಆಡುವ ಮಾತುಗಳಲ್ಲಿ ಅರ್ಧ ತೆಗೆದು ಅದನ್ನೇ ವಿವಾದಾತ್ಮಕ ವಿಷಯವನ್ನಾಗಿ ಪರಿವರ್ತಿಸಿ ತನ್ನ ಚಾನೆಲ್’ನ ಟಿ.ಆರ್.ಪಿ. ಹೆಚ್ಚಿಸುವ ವಿಷಯದಲ್ಲಿ ನಿಸ್ಸೀಮ. ಇಲ್ಲೂ ಅದನ್ನೇ ಮುಂದುವರಿಸಿದ. ಅದಕ್ಕೆ ಪಬ್ಲಿಕ್ ಟಿವಿಯ ಆಲ್ ರೈಟ್ ರಂಗಣ್ಣ ಸಾಥ್ ಕೊಟ್ಟರು. ಪ್ರೊ.ಪ್ರೇಮಶೇಖರ ಅವರನ್ನು ಪೋಲಿ ಪ್ರೊಫೆಸರ್ ಎಂದು ಕರೆದರು; ಅವರು ಯಾವ ಯೂನಿವರ್ಸಿಟಿಯಲ್ಲಿ ಉಪನ್ಯಾಸಕರಾಗಿದ್ದರು ಎಂಬ ಅರಿವಿಲ್ಲದೆ ಮಂಗಳೂರು ವಿ.ವಿ.ಯ ಇತಿಹಾಸ ಉಪನ್ಯಾಸಕ ಎಂದು ಹೇಳುವ ಮೂಲಕ ನಗೆಪಾಟಲಿಗೆ ಒಳಗಾದರು. ಈ ರೀತಿಯಾಗಿ ವಿ.ವಿ.ಯ ಕೆಲವು ಎಡಪಂಥೀಯ ಉಪನ್ಯಾಸಕರು ಹೆಣೆದ ವ್ಯವಸ್ಥಿತ ಷಡ್ಯಂತ್ರಕ್ಕೆ ಪಬ್ಲಿಕ್ ಟಿವಿ ಸಾಥ್ ಕೊಟ್ಟು ಪ್ರೊ. ಪ್ರೇಮಶೇಖರ ಅವರ ಚಾರಿತ್ರ್ಯ ವಧೆ ಮಾಡಿತು.

ಪ್ರೇಮಶೇಖರ ಅವರು ಬರೆಯುತ್ತಿರುವ ಪ್ರತಿ ಅಂಕಣಗಳಲ್ಲಿ ಎಡಪಂಥೀಯ ಸಿದ್ದಾಂತವನ್ನು ಖಂಡ ತುಂಡವಾಗಿ ಖಂಡಿಸುತ್ತಿದ್ದಾರೆ. ಪೊಳ್ಳು ಕಮ್ಯುನಿಸ್ಟ್ ಸಿದ್ಧಾಂತದ ಹುಳುಕುಗಳನ್ನು ಜನರ ಮುಂದೆ ಎಳೆಎಳೆಯಾಗಿ ಬಿಚ್ಚಿಟ್ಟು ಯುವಜನತೆಯನ್ನು ಎಡಪಂಥೀಯ ಸಿದ್ಧಾಂತದ ದೂರವಿಡುವ ಪ್ರಯತ್ನದಲ್ಲಿ ಯಶಸ್ವಿಯಾದರು. ಇದು ಪ್ರಸಕ್ತ ಕಾಲಘಟ್ಟದಲ್ಲಿ ಅಳಿದು ಹೋಗುತ್ತಿರುವ ಎಡಪಂಥೀಯ ಚಿಂತನೆಗೆ ಮತ್ತು ಚಿಂತಕರಿಗೆ ನುಂಗಲಾರದ ತುತ್ತಾಯಿತು.

ಇನ್ನು ಮಂಗಳೂರು ವಿಶ್ವವಿದ್ಯಾನಿಲಯದ ವಿದ್ಯಾರ್ಥಿ ಕ್ಷೇಮಪಾಲನಾ ಅಧಿಕಾರಿಗಳು ಪಕ್ಕಾ ಎಡಪಂಥೀಯ ಚಿಂತಕರು. ಅವರಿಗೆ ರಾಷ್ಟ್ರೀಯ ವಿಚಾರಗಳ ಪ್ರತಿಪಾದಕರನ್ನು ಕಂಡರೆ ಆಗಲ್ಲ. ಅವರ ವಿದ್ಯಾರ್ಥಿಗಳೇನಾದರೂ ರಾಷ್ಟ್ರೀಯ ವಿಚಾರಗಳನ್ನು ಪ್ರತಿಪಾದಿಸಿದರೆ ಆ ವಿದ್ಯಾರ್ಥಿಗಳ ಭವಿಷ್ಯವೇ ಮುಗಿದು ಹೋಯಿತು; ಅವರನ್ನು ವ್ಯವಸ್ಥಿತವಾಗಿ ಟಾರ್ಗೆಟ್ ಮಾಡಿ ಇಲ್ಲದ ಹಿಂಸೆ ನೀಡುತ್ತಿದ್ದ ಉದಾಹರಣೆಗಳು ಸಾಕಷ್ಟಿವೆ. ಈ ರೀತಿಯ ಅಸಹನೆ ಹೊಂದಿರುವ ಉಪನ್ಯಾಸಕರು ಪ್ರೊ.ಪ್ರೇಮಶೇಖರ ಅವರಂಥ ಖಟ್ಟರ್ ರಾಷ್ಟ್ರೀಯ ವಿಚಾರಗಳ ಪ್ರತಿಪಾದಕರನ್ನು ಸಹಿಸುತ್ತಾರೆಯೇ.? ಯಾವುದಾದರೂ ವಿಷಯವನ್ನು ಹಿಡಿದುಕೊಂಡು ಅವರ ಚಾರಿತ್ರ್ಯ ವಧೆ ಮಾಡಬೇಕು ಎಂದು ಹವಣಿಸುತ್ತಿದ್ದರು. ಆಗ ಸಿಕ್ಕಿದ್ದೇ ಬ್ಲೂಫಿಲಂ ವಿಷಯ.

ಇನ್ನು ಎಡಪಂಥೀಯರ ಸಿದ್ಧಾಂತಕ್ಕೆ ಜ್ಞಾನಮಾರ್ಗದಿಂದಲೇ ಕೊಡಲಿ ಏಟು *ನಿಲುಮೆ* ಬಳಗದ ಜೊತೆ ಗುರುತಿಸಿಕೊಂಡ ಪ್ರೊ. ಪ್ರೇಮಶೇಖರ ಅವರು ನಿಲುಮೆ ವಿಚಾರಸಂಕಿರಣದಲ್ಲಿ ಸಕ್ರಿಯವಾಗಿ ಭಾಗವಹಿಸಿ ವಿಚಾರಗಳನ್ನು ಮಂಡಿಸುತ್ತಿದ್ದಾರೆ. ಇದೂ ಈ ಎಡಪಂಥೀಯ ಚಿಂತಕರ ಕೆಂಪು ಕಣ್ಣಿಗೆ ಗುರಿಯಾಯಿತು. ಕಳೆದ ವರ್ಷ ನಿಲುಮೆ ಗುಂಪನ್ನು ಮುಚ್ಚಿಸಲು ಹೋಗಿ ನಾಡಿನ ಪ್ರಜ್ಞಾವಂತ ಜನರಿಂದ ಛೀಮಾರಿಗೊಳಗಾದ ಪಕ್ಕಾ ಎಡಪಂಥೀಯ ಚಿಂತಕ, ಮುಖ್ಯಮಂತ್ರಿ ಗಳ ಮಾಧ್ಯಮ ಸಲಹೆಗಾರ ದಿನೇಶ್ ಅಮೀನ್ ಮಟ್ಟು ಹಿಂದೊಮ್ಮೆ ಪ್ರೊ.ಪ್ರೇಮಶೇಖರ ಅವರನ್ನು ಫೇಸ್ಬುಕ್ಕಿನಲ್ಲಿ ತುಚ್ಛ ಪದಗಳಿಂದ ನಿಂದಿಸಿದ್ದರು.

ಒಟ್ಟಿನಲ್ಲಿ ಎಡಪಂಥೀಯ ಚಿಂತನೆಯನ್ನು ವಿರೋಧಿಸುವವರನ್ನು ಅವರೆಂದೂ ಸಹಿಸುವುದಿಲ್ಲ‌. ಕೇರಳದಲ್ಲಿ ಅಂಥವರನ್ನು ಟಾರ್ಗೆಟ್ ಮಾಡಿ ಅವರ ಜೀವವನ್ನೇ ತೆಗೆಯುತ್ತಾರೆ. ಕರ್ನಾಟಕದಲ್ಲಿ ಇನ್ನೂ ಅಷ್ಟಾಗಿ ಬೆಳೆಯದ ಅವರುಗಳು ಈಗ ಚಾರಿತ್ರ್ಯ ವಧೆಯ ತನಕ ಮಾತ್ರ ಇಳಿದಿದ್ದಾರೆ. ಅದಕ್ಕೆ ಪಬ್ಲಿಕ್ ಟಿ.ವಿ.ಯಂಥ ಟಿ.ಆರ್.ಪಿ.ಗೋಸ್ಕರ ಇರುವ ಸುದ್ದಿ ಮಾಧ್ಯಮಗಳು ಕೂಡ ಸಾಥ್ ಕೊಟ್ಟಿವೆ‌. ನಾಡಿ‌ನ ಪ್ರಜ್ಞಾವಂತ ನಾಗರಿಕರು ಈ ಎರಡೂ ಜನರನ್ನೂ ಕಡೆಗಣಿಸಬೇಕು. ಇವರ ಸತ್ತು ಹೋದ ಸಿದ್ಧಾಂತವನ್ನು ತಿಪ್ಪೆಗೆಸೆಯಬೇಕು. ಇಲ್ಲವಾದಲ್ಲಿ ಕೇರಳದ ಪರಿಸ್ಥಿತಿ ಕರ್ನಾಟಕಕ್ಕೂ ಬರಬಹುದು.