ಬ್ರಹ್ಮಚರ್ಯವೇ ಅಸಹಜವೆಂದ ದಾರ್ಶನಿಕ, ಸನ್ಯಾಸಿನಿಯನ್ನು ವಂಚಕಿ ಎಂದ….!!

– ಗುರುರಾಜ ಕೋಡ್ಕಣಿ. ಯಲ್ಲಾಪುರ

“ನಾನು ಯಾರನ್ನೂ ಸಹ ಆದರ್ಶವ್ಯಕ್ತಿಯಾಗಿ ಸ್ವೀಕರಿಸಲಾರೆ. ನನ್ನನ್ನೂ ಸಹ ಯಾರೂ ಆದರ್ಶವಾಗಿ ಸ್ವೀಕರಿಸಬಾರದು. ಆದರ್ಶ ವ್ಯಕ್ತಿತ್ವಗಳಲ್ಲಿ ಮೇಲು ಕೀಳು ಎಂಬ ಭೇದವಿರಬಾರದು. ಮೊದಲು ಜನಿಸಿದ್ದ ಆದರ್ಶ ವ್ಯಕ್ತಿ, ನಂತರ ಜನಿಸಿದ ಮಹಾನ್ ವ್ಯಕ್ತಿಗಿಂತ ಶ್ರೇಷ್ಟವೆನ್ನುವುದು ಅರ್ಥಹೀನ. ವ್ಯಕ್ತಿತ್ವಗಳಲ್ಲಿನ ಮಹಾನತೆ ಸಮಾನಾಂತರ ರೇಖೆಯಂಥದ್ದು. ಮಹಾತ್ಮಾ ಗಾಂಧಿ, ಮದರ್ ತೆರೆಸಾರಂಥಹ ವ್ಯಕ್ತಿತ್ವಗಳ ಮೇಲೆ ನನಗೆ ತೀರ ಕಡಿಮೆ ಗೌರವವಿದೆ ಎಂಬುದು ಅನೇಕರ ಅಂಬೋಣ. ಅಂಥಹ ಅಭಿಪ್ರಾಯಗಳು ಸಂಪೂರ್ಣ ತಪ್ಪು. ಅಸಲಿಗೆ ನನಗೆ ಇಂಥವರ ಮೇಲೆ ಗೌರವವೇ ಇಲ್ಲ. ಅಂದ ಮೇಲೆ ಹೆಚ್ಚು ಗೌರವ, ಕಡಿಮೆ ಆದರ ಎನ್ನುವ ಪ್ರಶ್ನೆಯೇ ನಿರರ್ಥಕ. ಇವರೆಲ್ಲರೂ ಆದರ್ಶವಾದಿ ಅಪರಾಧಿಗಳು ಎನ್ನುವುದು ನನ್ನ ಅಭಿಪ್ರಾಯ. ನಮ್ಮ ಕಾನೂನು ಮರಣದಂಡನೆ ವಿಧಿಸುವ ದುಷ್ಕರ್ಮಿಗಳ ಅಪರಾಧಕ್ಕಿಂತಲೂ ಇಂಥಹ ಆದರ್ಶವಾದಿ ಅಪರಾಧಿಗಳ ಅಪರಾಧ ಘೋರವೆನ್ನುವುದು ನನ್ನ ವಾದ. ಒಂದರ್ಥದಲ್ಲಿ ನಿಜವಾದ ಅಪರಾಧಿಗಳೆಂದರೆ ಇಂಥವರೇ. ಮದರ್ ತೆರೆಸಾರ ಉದಾಹರಣೆಯನ್ನೇ ತೆಗೆದುಕೊಳ್ಳಿ. ಆಕೆಗೆ ನೊಬೆಲ್ ಪ್ರಶಸ್ತಿಯನ್ನು ನೀಡಲಾಯಿತು. ವಿಶ್ವದ ಹತ್ತಾರು ರಾಷ್ಟ್ರಗಳು ಆಕೆಯ ಸಾಧನೆಯನ್ನು ಮೆಚ್ಚಿ ಪ್ರಶಸ್ತಿಗಳ ಸುರಿಮಳೆಗೈದವು. ಇಂದಿಗೂ ವಿಶ್ವವಿದ್ಯಾಲಯಗಳು ಆಕೆಗೆ ಒಂದರ ಹಿಂದೊಂದರಂತೆ ಗೌರವ ಡಾಕ್ಟರೇಟ್ ನೀಡುತ್ತಲೇ ಇವೆ. ಇಷ್ಟಾಗಿಯೂ ಆಕೆಯ ಸಾಧನೆಯೇನು ಎಂಬುದು ನನಗರ್ಥವಾಗದ ವಿಷಯ. ಕೈಗೆ ಸಿಕ್ಕ ಅನಾಥರನ್ನೆಲ್ಲ ಎಳೆದುಕೊಂಡು ಹೋಗಿ ಅವರೆಲ್ಲರನ್ನು ಕ್ಯಾಥೋಲಿಕ್ಕರನ್ನಾಗಿ ಪರಿವರ್ತಿಸಿದ್ದೇ ಆಕೆಯ ಸಾಧನೆ.

ಅದೊಮ್ಮೆ ವ್ಯಕ್ತಿಯೊಬ್ಬ ಕಲ್ಕತ್ತಾದ ತೆರೆಸಾರ ಅನಾಥಾಲಯಕ್ಕೆ ತೆರಳಿ, ಅಲ್ಲಿದ್ದ ಸಹಾಯಕಿಯ ಬಳಿ, ‘ನಾನೊಂದು ಮಗುವನ್ನು ದತ್ತು ತೆಗೆದುಕೊಳ್ಳಬೇಕಿದೆ. ದಯವಿಟ್ಟು ಸಹಕರಿಸಿ’ ಎಂದು ಕೇಳಿಕೊಂಡಿದ್ದ. ಬಂದಿದ್ದ ಬಿಳಿಯ ವ್ಯಕ್ತಿಯನ್ನು ನೋಡಿದ ಸಹಾಯಕಿ ಆತ ಕ್ರೈಸ್ತಮತೀಯನೇ ಇರಬೇಕೆಂದು ಊಹಿಸಿ, ‘ನಿಜಕ್ಕೂ ನಮಗಿದು ಸಂತಸದ ವಿಷಯ ಸರ್, ನಮ್ಮಲ್ಲಿ ಸುಮಾರು ಏಳುನೂರು ಅನಾಥ ಮಕ್ಕಳಿದ್ದಾರೆ. ನೀವು ಯಾರನ್ನು ಬೇಕಾದರೂ ದತ್ತು ಪಡೆದುಕೊಳ್ಳಬಹುದು. ಮೊದಲು ಈ ಅರ್ಜಿಯನ್ನು ತುಂಬಿ’ ಎಂದು ಅರ್ಜಿಯೊಂದನ್ನು ಆತನ ಕೈಗಿತ್ತಳು. ಅರ್ಜಿಯಲ್ಲಿದ್ದ ‘ಧರ್ಮ’ ಎನ್ನುವ ಸಾಲಿನಲ್ಲಿ ‘ಪ್ರಾಟೆಸ್ಟಂಟ್ ಕ್ರೈಸ್ತ’ ಎಂದು ತುಂಬಿದ ವ್ಯಕ್ತಿಯತ್ತ ಕೊಂಚ ಗಲಿಬಿಲಿಯಿಂದ ನೋಡಿದ ಸಹಾಯಕಿ, ‘ಒಂದು ನಿಮಿಷ ಇರಿ ಸರ್, ನಾನೊಮ್ಮೆ ತೆರೆಸಾರನ್ನು ಕರೆದುಕೊಂಡು ಬರುತ್ತೇನೆ’ ಎನ್ನುತ್ತ ಅವಸರವಸರವಾಗಿ ಒಳಕ್ಕೆ ಹೋದಳು. ಒಂದೆರಡು ನಿಮಿಷಗಳ ನಂತರ ಸಹಾಯಕಿಯೊಂದಿಗೆ ಹೊರಬಂದ ತೆರೆಸಾ, ‘ದಯವಿಟ್ಟು ಕ್ಷಮಿಸಿ, ಸಧ್ಯಕಂತೂ ನಮ್ಮಲ್ಲಿ ಯಾವುದೇ ಅನಾಥ ಮಗುವಿಲ್ಲ. ನೀವು ನಿಮ್ಮ ವಿಳಾಸವನ್ನು ನಮ್ಮ ಕಚೇರಿಯಲ್ಲಿ ನಮೂದಿಸಿರಿ. ಮುಂದೆ ಮಗುವಿನ ಲಭ್ಯತೆಯಿದ್ದಾಗ ನಿಮಗೆ ಖಂಡಿತವಾಗಿಯೂ ತಿಳಿಸುತ್ತೇವೆ’ ಎಂದು ನುಡಿದರು. ವಿಚಿತ್ರ ನೋಡಿ ಒಂದು ಕ್ಷಣದ ಹಿಂದೆ ಏಳೂನೂರಕ್ಕಿದ್ದ ಮಕ್ಕಳ ಸಂಖ್ಯೆ ಏಕಾಏಕಿ ಶೂನ್ಯವಾಗಿ ಹೋಯಿತು.! ಬಂದಿದ್ದ ವ್ಯಕ್ತಿಯದ್ದು ಕ್ಯಾಥೋಲಿಕ್ ವಿರೋಧಿ ಪಂಥವೆನ್ನುವ ಏಕೈಕ ಕಾರಣಕ್ಕೆ ಆತನನ್ನು ಸಂತಾನ ಸೌಖ್ಯದಿಂದ ವಂಚಿಸಲಾಯಿತು.

ಆ ವ್ಯಕ್ತಿ ನಡೆದ ಘಟನೆಯನ್ನು ಸವಿಸ್ತಾರವಾಗಿ ಪತ್ರಿಕೆಯೊಂದರಲ್ಲಿ ವಿವರಿಸಿದ್ದ. ಅವನ ಮಾತುಗಳ ಆಧಾರದ ಮೇಲೆ ನಾನು ತೇರೆಸಾರನ್ನು ತೀವ್ರವಾಗಿ ಟೀಕಿಸಲಾರಂಭಿಸಿದೆ. ನನ್ನ ಖಂಡನೆಗಳಿಗೆ ಉತ್ತರವಾಗಿ ಪತ್ರ ಬರೆದಿದ್ದ ತೆರೆಸಾ, ‘ನಮ್ಮ ಕ್ಯಾಥೋಲಿಕ್ ಧಾರ್ಮಿಕ ವಾತಾವರಣದಲ್ಲಿ ಬೆಳೆದ ಮಗುವಿನ ಮಾನಸಿಕತೆಗೆ, ಪ್ರಾಟೆಸ್ಟಂಟ್ ರ ಮನೆಯ ವಾತಾವರಣ ಹೊಂದಿಕೆಯಾಗದು ಎನ್ನುವುದು ನನ್ನ ನಂಬಿಕೆ. ಹಾಗಾಗಿ ಮಗುವಿನ ದತ್ತು ನೀಡುವಿಕೆಗೆ ನಾನು ನಿರಾಕರಿಸಿದೆ’ ಎಂದು ವಿವರಿಸಿದ್ದರು. ಆಕೆಯ ವಿವರಣೆಯನ್ನು ಪ್ರಶ್ನಿಸುತ್ತ, ‘ನಿಮ್ಮ ಆಶ್ರಮದಲ್ಲಿರುವ ಪ್ರತಿಯೊಬ್ಬ ಅನಾಥ ಮಕ್ಕಳು ಭಾರತೀಯರು. ಅವರ ಮೂಲ ಧರ್ಮ ಹಿಂದೂ, ಮುಸ್ಲಿಮ್ ಅಥವಾ ಇನ್ನಾವುದೇ ಭಾರತೀಯ ಮತವೇ ಅಗಿರುತ್ತದೆ ಹೊರತು ಕ್ಯಾಥೋಲಿಕ್ ಧರ್ಮವಾಗಿರುವುದಂತೂ ಅಸಾಧ್ಯ. ವಸ್ತುಸ್ಥಿತಿ ಹೀಗಿರುವಾಗ ಯಾವ ಅಧಾರದಲ್ಲಿ ನೀವು ಮಕ್ಕಳನ್ನು ಕ್ಯಾಥೋಲಿಕ್ ಧಾರ್ಮಿಕ ವಾತಾವರಣದಲ್ಲಿ ಬೆಳೆಯಿಸಿದಿರಿ..? ನೀವು ನಿಜಕ್ಕೂ ಮುಕ್ತ ಮನಸ್ಸಿನ ಸೇವಕಿಯೇ ಆಗಿದ್ದಲ್ಲಿ, ಹಿಂದೂ ಮಕ್ಕಳನ್ನು ಹಿಂದೂಗಳ ಧಾರ್ಮಿಕತೆಯೊಂದಿಗೂ, ಉಳಿದ ಮತಗಳ ಕೂಸುಗಳನ್ನು, ಅವರವರ ಮತಗಳ ಧಾರ್ಮಿಕ ವಾತಾವರಣದಲ್ಲಿ ಬೆಳೆಸಿ, ಆಯಾ ಧರ್ಮದ ಪರಿಪಾಲಕರಿಗೆ ಮಕ್ಕಳನ್ನು ದತ್ತು ನೀಡುತ್ತಿದ್ದೀರಿ. ಈಗಿನಂತೆ ಕೇವಲ ಕ್ಯಾಥೋಲಿಕ್ ಕ್ರೈಸ್ತರಿಗೆ ಮಾತ್ರ ನೀಡುತ್ತಿರಲಿಲ್ಲ’ ಎಂದು ಪ್ರತಿಕ್ರಯಿಸಿದೆ. ಅದಕ್ಕೊಂದು ಮರು ಉತ್ತರವನ್ನು ಗೀಚಿದ ತೆರೆಸಾ, ‘ದೇವರು ನಿಮ್ಮನ್ನು ಕ್ಷಮಿಸಲೆಂದು ನಾನು ದಯಾಮಯನಾದ ಭಗವಂತನಲ್ಲಿ ಪ್ರಾರ್ಥಿಸುತ್ತೇನೆ’ ಎಂದು ಬರೆದಿದ್ದರು. ತೆರೆಸಾರ ಉತ್ತರ ನನಗೆ ತೀರ ಬಾಲಿಶವೆನ್ನಿಸಿತ್ತು. ಅವರ ಮರು ಉತ್ತರಕ್ಕೊಂದು ಪ್ರತ್ಯುತ್ತರವನ್ನು ನೀಡುತ್ತ, ‘ನಿಮ್ಮ ಎರಡನೆಯ ಪತ್ರದ ಬಗ್ಗೆ ನನಗೆ ವಿರೋಧವಿದೆ. ನೀವು ಕ್ಷಮೆ ಕೇಳದಿದ್ದರೆ ನಿಮ್ಮ ಮೇಲೆ ನಾನು ದಾವೆ ಹೂಡುವುದಂತೂ ಖಚಿತ. ಮೂಲತಃ ನಾನು ನಾಸ್ತಿಕ. ನನ್ನ ಬಗ್ಗೆ ದೇವರಲ್ಲಿ ಪ್ರಾರ್ಥಿಸುವುದಕ್ಕೆ ನೀವು ಯಾರು? ನನ್ನ ಕುರಿತು ಪ್ರಾರ್ಥಿಸುವಂತೆ ನಾನೇನಾದರೂ ನಿಮಗೆ ಅನುಮತಿ ಪತ್ರ ಬರೆದು ಕೊಟ್ಟಿದ್ದೇನೆಯೇ ? ಇಷ್ಟಕ್ಕೂ ದೇವರು ನನ್ನನ್ನು ಕ್ಷಮಿಸಲು ನಾನು ಮಾಡಿರುವ ಅಪರಾಧವಾದರೂ ಏನು? ನಿಜ ಹೇಳಬೇಕೆಂದರೆ ದೇವರೆನ್ನುವವನು ನಿಜವಾಗಿಯೂ ಇದ್ದರೆ ತನ್ನ ತಪ್ಪಿಗಾಗಿ ಆತ ನಮ್ಮೆಲ್ಲರ ಕ್ಷಮೆ ಕೇಳಬೇಕು. ಏಕೆಂದರೆ ಸೃಷ್ಟಿಯನ್ನು ಕುರೂಪಿಯಾಗಿಸಿದ ಸೃಷ್ಟಿಕರ್ತನಾತ. ಕೋಟಿ ಜನರನ್ನು ಹತ್ಯೆಗೈದ ಹಿಟ್ಲರನನ್ನು ಸೃಷ್ಟಿಸಿದ್ದು ಅವನೇ ಅಲ್ಲವೇ? ಸ್ಟಾಲಿನ್, ಮುಸೋಲಿನಿಯಂತಹ ಭಯಂಕರ ಸರ್ವಾಧಿಕಾರಿಗಳ ಜನ್ಮದಾತನೂ ಅವನೇ. ನಿಜಕ್ಕೂ ಭಗವಂತ ಸೃಷ್ಟಿಕರ್ತನೆನ್ನುವುದು ಸತ್ಯವಾಗಿದ್ದರೆ ಇಂಥಹ ವಿಷಜಂತುಗಳನ್ನು ಏಕೆ ಸೃಷ್ಟಿಸಿದ ಎನ್ನುವುದಕ್ಕೆ ಆತ ವಿವರಣೆ ನೀಡಬೇಕು. ನಾನು ಯಾವ ಅಪರಾಧವನ್ನು ಮಾಡಿಲ್ಲ. ನಿಮ್ಮನ್ನು ಪ್ರಶ್ನಿಸುವುದೇ ಅಪರಾಧವೆಂದಾದಲ್ಲಿ ನಿಮ್ಮ ಆಲೋಚನೆಯೂ ಸರ್ವಾಧಿಕಾರದ ಧೋರಣೆಗಿಂತ ಭಿನ್ನವೇನಲ್ಲ’ ಎಂದು ಕೊಂಚ ತೀಕ್ಷ್ಣವಾಗಿಯೇ ಪತ್ರ ಬರೆದೆ.

ತೆರೆಸಾರ ವಾದಗಳು ನಿಜಕ್ಕೂ ಆಘಾತಕಾರಿ. ಆಕೆ ಭಾರತದಂತಹ ಬಡ ರಾಷ್ಟ್ರಗಳಲ್ಲಿ ಜನಸಂಖ್ಯಾ ನಿಯಂತ್ರಣದ ವಿರುದ್ಧವಾಗಿ ಮಾತನಾಡುತ್ತಾರೆ. ಗರ್ಭನಿರೋಧಕ ಮಾತ್ರೆಗಳ ಬಳಕೆಯನ್ನು ವಿರೋಧಿಸುತ್ತಾರೆ. ಗರ್ಭಪಾತವನ್ನು ಖಂಡಿಸುತ್ತಾರೆ. ಇದಕ್ಕೆ ಕಾರಣವೂ ಸ್ಪಷ್ಟವಾಗಿದೆ. ಹೆಚ್ಚುಹೆಚ್ಚು ಹೊಸಜೀವಗಳು ಹುಟ್ಟದಿದ್ದರೆ, ಹೊಸಹೊಸ ಅನಾಥ ಮಕ್ಕಳು ಸಿಗುವುದಾದರೂ ಹೇಗೆ..?? ಕ್ಯಾಥೋಲಿಕ್ಕರ ಸಂಖ್ಯೆಯನ್ನು ಹೆಚ್ಚಿಸಲು ತೆರೆಸಾರಿಗೆ ಬಹಳಷ್ಟು ಅನಾಥ ಮಕ್ಕಳ ಅವಶ್ಯಕತೆಯಿದೆ. ಹಾಗಾಗಿಯೇ ಈ ಮಹಿಳೆಯನ್ನು ನಾನು ವಂಚಕಿ ಎಂದು ಕರೆಯುತ್ತೇನೆ. ಆಕೆ ಮಾತ್ರವಲ್ಲ ಆಕೆಯಂತಹ ಪ್ರತಿಯೊಬ್ಬ ಸನ್ಯಾಸಿನಿಯರೂ ನನ್ನ ಪ್ರಕಾರ ಅಪರಾಧಿಗಳೇ. ಇಂಥವರು ಆಚರಿಸುವ ಬ್ರಹ್ಮಚರ್ಯ, ಸಲಿಂಗಕಾಮದ ಹುಟ್ಟಿಗೆ ಕಾರಣವಾಗುತ್ತದೆನ್ನುವುದು ನನ್ನ ಅಭಿಮತ. ಸಲಿಂಗಕಾಮವೇ ಏಡ್ಸ್ ನಂತಹ ಭಯಾನಕ ಮಾರಿಗಳ ಹುಟ್ಟಿಗೆ ಕಾರಣವೆನ್ನುವುದು ಗೊತ್ತಿರದ ವಿಷಯವೇನಲ್ಲ. ಅನೇಕ ಮಾರಣಾಂತಿಕ ಲೈಂಗಿಕ ಕಾಯಿಲೆಗಳ ಹೆಚ್ಚಳಕ್ಕೂ ಇಂತಹ ದಾದಿಯರು ಕಾರಣರಾಗುತ್ತಾರೆನ್ನುವುದು ನನ್ನ ಬಲವಾದ ನಂಬಿಕೆ.

ಇಷ್ಟಕ್ಕೂ ಬ್ರಹ್ಮಚರ್ಯವೆನ್ನುವುದು ವೈಜ್ನಾನಿಕವಲ್ಲ. ಅದೊಂದು ಪ್ರಕೃತಿವಿರೋಧವಾದ ಅಸ್ವಾಭಾವಿಕ ಪ್ರಕ್ರಿಯೆ. ಜಗತ್ತಿನಲ್ಲಿ ಲಕ್ಷಾಂತರ ವೈದ್ಯರಿದ್ದಾರೆ, ಸಾವಿರಾರು ವಿಜ್ನಾನಿಗಳಿದ್ದಾರೆ. ಆದರೆ ಸಂಪೂರ್ಣ ಬ್ರಹ್ಮಚರ್ಯವೆನ್ನುವುದು ತೀರ ಅಸಹಜ ಮತ್ತು ಅಸಾಧ್ಯವೆನ್ನುವ ಸತ್ಯವನ್ನು ಇದುವರೆಗೂ ಒಬ್ಬನೇ ಒಬ್ಬ ಪ್ರಭೃತಿಯೂ ಧೈರ್ಯವಾಗಿ ನುಡಿಯದಿರುವುದು ನನ್ನಲ್ಲಿ ನಿಜಕ್ಕೂ ಸೋಜಿಗವನ್ನುಂಟುಮಾಡಿದೆ. ಲೈಂಗಿಕತೆಯೆನ್ನುವುದು ಜೀವಶಾಸ್ತ್ರದ ಬಹುಮುಖ್ಯ ಚರ್ಯೆ. ಸೃಷ್ಟಿಯ ಪ್ರಕ್ರಿಯೆಯ ಇಂಥಹ ಅನೇಕ ಅಂಶಗಳು ನಮ್ಮ ಮನಸ್ಸಿನ ನಿಯಂತ್ರಣದಲ್ಲಿಲ್ಲ. ಕನಿಷ್ಟ ಪಕ್ಷ ನೀವು ಬೆವರುವುದನ್ನು ಸಹ ನಿಯಂತ್ರಿಸಲಾರಿರಿ. ‘ನಾನು ಇನ್ಮೇಲೆ ಎಂದಿಗೂ ಬೆವರುವುದೇ ಇಲ್ಲ’ ಎಂದು ಪ್ರತಿಜ್ನೆ ಮಾಡುವುದನ್ನೇ ನೀವು ಶ್ರೇಷ್ಟತೆಯೆಂದುಕೊಂಡರೆ ಅದು ನಿಮ್ಮ ಮೂರ್ಖತನವಷ್ಟೇ. ದೇಹಕ್ಕೆ ತನ್ನದೇ ಆದ ಕಾರ್ಯವೈಖರಿಯಿದೆ. ಹುಟ್ಟಿನಿಂದಲೂ ತನ್ನ ಕಾರ್ಯವೈಖರಿಯ ಬಗ್ಗೆ ದೇಹಕ್ಕೊಂದು ಸ್ಪಷ್ಟತೆಯಿದೆ. ಹಾಗಾಗಿಯೇ ದೇಹದ ಪ್ರಮುಖ ಕಾರ್ಯವಾಗಿರುವ ಲೈಂಗಿಕತೆಯನ್ನು ತಡೆಹಿಡಿದು ಬ್ರಹ್ಮಚರ್ಯವನ್ನಾಚರಿಸುವ ಎಲ್ಲ ಸನ್ಯಾಸಿಗಳು ನನಗೆ ಆಷಾಢಭೂತಿಗಳಾಗಿ ಗೋಚರಿಸುತ್ತಾರೆ.

ನೈಸರ್ಗಿಕವಾಗಿ ಬ್ರಹ್ಮಚರ್ಯವೆನ್ನುವುದು ಅಸ್ತಿತ್ವದಲ್ಲಿರಲೇ ಇಲ್ಲ. ಭವಿಷ್ಯದಲ್ಲಿಯೂ ಅದರ ಸ್ವಾಭಾವಿಕ ಅಸ್ತಿತ್ವ ಸಾಧ್ಯವಿಲ್ಲ. ಬ್ರಹ್ಮಚರ್ಯವೆನ್ನುವುದು ದೈವತ್ವದ ಇನ್ನೊಂದು ಮುಖ, ಅತಿಮಾನುಷ ಅನುಭವ ಎಂದುಕೊಳ್ಳುತ್ತ ಮೂರ್ಖನಂತೆ ಆಲೋಚಿಸುವ ಸನ್ಯಾಸಿಗಳು, ದಾದಿಯಂದಿರು ಮತ್ತು ಕೆಲವು ಅರಿವುಗೇಡಿ ಮಾನವರು ಮಾತ್ರ ಕೃತಕವಾಗಿ ಬ್ರಹ್ಮಚರ್ಯವನ್ನು ಸೃಷ್ಟಿಸಿಕೊಳ್ಳುತ್ತಿದ್ದಾರಷ್ಟೇ. ಇದರ ಪರಿಣಾಮವಾಗಿ ಸಲಿಂಗಕಾಮ, ವಿಕೃತಕಾಮ, ಹಸ್ತಮೈಥುನದಂತಹ ಅಸಹಜ ಕ್ರಿಯೆಗಳ ಜನ್ಮಕ್ಕೆ ಸನ್ಯಾಸಿಗಳು ಪರೋಕ್ಷವಾಗಿ ಕಾರಣರಾಗುತ್ತಿದ್ದಾರೆ. ರಾಷ್ಟ್ರಪಿತ ಎಂದು ಗುರುತಿಸಿಕೊಳ್ಳುವ ಮಹಾತ್ಮ ಗಾಂಧಿ, ತನ್ನ ಹದಿನಾಲ್ಕರ ಅನುಯಾಯಿಗೆ ಬ್ರಹ್ಮಚರ್ಯದ ಪಾಲನೆಗೆ ಒತ್ತಾಯಿಸುತ್ತಿದ್ದರು. ಆದರೆ ನಿಮಗೆ ಗೊತ್ತೆ..? ತಮ್ಮ ಎಪ್ಪತ್ತನೆಯ ವಯಸ್ಸಿನಲ್ಲಿಯೂ ಸ್ವತಃ ಗಾಂಧಿ ಸ್ಪಪ್ನಸ್ಖಲನವನ್ನು ಅನುಭವಿಸುತ್ತಿದ್ದರಂತೆ. ಹೀಗಿರುವಾಗ ತನ್ನ ಲೈಂಗಿಕಾಭಿವ್ಯಕ್ತಿಯ ಉತ್ಕಟತೆಯ ವಯೋಮಾನದ ಹೊಸ್ತಿಲಲ್ಲಿರುವ ಹದಿಹರೆಯದ ಯುವಕನಿಗೆ ಬ್ರಹ್ಮಚರ್ಯದ ಪಾಠವನ್ನು ಬೋಧಿಸುವುದರಲ್ಲಿ ಅರ್ಥವಿದೆಯೇ..? ತಮ್ಮನ್ನು ತಾವು ಮಹಾನ್ ವ್ಯಕ್ತಿತ್ವವೆಂದು ಕರೆದುಕೊಳ್ಳುವ ಜನರ ಇಂಥಹ ಇಬ್ಬಂದಿತನವನ್ನು ಕಂಡಾಗ ನನಗೆ ಕೋಪಿಸಿಕೊಳ್ಳುವುದೋ, ನಗುವುದೋ ಎಂದು ತಿಳಿಯುವುದಿಲ್ಲ” ಎನ್ನುತ್ತ 1979ರಲ್ಲಿ ಮದರ್ ತೆರೆಸಾರ ನೊಬೆಲ್ ಪ್ರಶಸ್ತಿಯ ಕುರಿತಾಗಿ ತಮ್ಮದೇ ಶೈಲಿಯಲ್ಲಿ ಪ್ರತಿಕ್ರಿಯೆ ವ್ಯಕ್ತಪಡಿಸಿದವರು ದಾರ್ಶನಿಕ ರಜನೀಶ್ ಓಶೋ.

ಕಳೆದ ಕೆಲವು ದಿನಗಳಿಂದ ಮದರ್ ತೆರೆಸಾರ ಕುರಿತು ಚರ್ಚೆಗಳಾಗಿದ್ದು ನಿಮಗೆ ನೆನಪಿರಬಹುದು. ಸಂತ ಎಂದು ಮದರ್ ತೆರೆಸಾರನ್ನು ಗುರುತಿಸಿದ್ದ ವ್ಯಾಟಿಕನ್, ಇದೇ ಸೆಪ್ಟೆಂಬರ್ ತಿಂಗಳಿನಲ್ಲಿ ಅಧಿಕೃತವಾಗಿ ಆಕೆಯನ್ನು ಸಂತ ಪದವಿಗೇರಿಸಿತು. ಆಕೆ ಮಾನವತಾವಾದದ ಮಹಾನ್ ನಾಯಕಿ ಎಂಬುದು ಹಲವರ ವಾದವಾಗಿದ್ದರೆ, ಆಕೆಯ ಸಮಾಜಸೇವೆ ಕೇವಲ ವಂಚನೆಯಷ್ಟೇ, ಮತಪ್ರಚಾರವೇ ಆಕೆಯ ಪ್ರಮುಖ ಉದ್ದೇಶವಾಗಿತ್ತೆನ್ನುವುದು ಕೆಲವರ ತರ್ಕ. ಇವೆಲ್ಲದರ ನಡುವೆ ನನ್ನ ಆಧ್ಯಾತ್ಮಿಕ ಗುರು ಆಚಾರ್ಯ ರಜನೀಶ್ ಆಕೆಯ ಬಗ್ಗೆ ಏನು ಹೇಳಿರಬಹುದೆನ್ನುವ ಕುತೂಹಲಕ್ಕೆ ಹುಡುಕಿಕೊಂಡಾಗ ಕೈಗೆ ಸಿಕ್ಕ ಪ್ರವಚನವನ್ನು ನಿಮ್ಮೆದುರಿಗಿಡುವ ಮನಸ್ಸಾಗಿ ಅನುವಾದಿಸಿದ್ದೇನೆ. ಸುಮ್ಮನೇ ಓದಿಕೊಳ್ಳಿ. ಓದಿದ ಮಾತ್ರಕ್ಕೆ ಓಶೋರವರ ವಾದವನ್ನು ಒಪ್ಪಲೇಬೇಕೆನ್ನುವ ಒತ್ತಾಯವೇನಿಲ್ಲ. ರಜನೀಶರ ವಿಲಕ್ಷಣವೆನ್ನಿಸಬಹುದಾದ ಈ ವಿಭಿನ್ನ ಅಭಿಪ್ರಾಯವನ್ನು ಒಪ್ಪಿಕೊಳ್ಳುವ, ಒಪ್ಪಿಕೊಳ್ಳದೇ ಇರುವ ಎಲ್ಲ ಸ್ವಾತಂತ್ರ್ಯವೂ ನಿಮಗಿದೆಯಲ್ಲವೇ…?