“ಪಟ್ಟಭದ್ರಹಿತಾಸಕ್ತಿಗಳ ಕೈಗಳಲ್ಲಿ ಸಿಕ್ಕಿ ಒದ್ದಾಡುತ್ತಿದೆ ಕನ್ನಡ ಚಿತ್ರರಂಗ”

– ಸುರೇಶ್ ಮುಗಬಾಳ್

ಗೆಳೆಯನೊಬ್ಬ ತಮಿಳು ನಟ ವಿಜಯ್ ನಟಿಸಿರುವ ‘ಕತ್ತಿ’ ಸಿನೆಮಾವನ್ನು ವೀಕ್ಷಿಸುವಂತೆ ಹೇಳಿದ, ಆ ಸಿನೆಮಾದಲ್ಲೇನಿದೆ ಅಂತಹ ವಿಶೇಷತೆ? ಎಂದು ಕೇಳಿದಾಗ, ‘ಸಾಮಾಜಿಕ ಕಳಕಳಿಯುಳ್ಳ ಅತ್ಯುತ್ತಮ ನಿನೆಮಾ, ಸಾಧ್ಯವಾದರೆ ವೀಕ್ಷಿಸು’ ಎಂದ, ಸರಿ ನಾನೂ Hotstar ನಲ್ಲಿ ಚಿತ್ರಕ್ಕಾಗಿ ತಡಕಾಡಿದೆ, ಸಿನೆಮಾವೇನೋ ವೀಕ್ಷಿಸಲು ಸಿಕ್ಕಿತು, ಆದರೆ ಚಿತ್ರವನ್ನು ಮಲೆಯಾಳಂ ಭಾಷೆಯಲ್ಲಿ ಡಬ್ಬ್ ಮಾಡಲಾಗಿತ್ತು. ಭಾಷೆ ಬಾರದವನಿಗೆ ತಮಿಳು ಭಾಷೆಯಾದರೇನು? ಮಲೆಯಾಳಂ ಭಾಷೆಯಾದರೇನು? ಅದು ಒತ್ತಟ್ಟಿಗಿರಲಿ, ಭಾಷೆಯ ಗಂಧವೇ ಗೊತ್ತಿರದ ಅರೇಬಿಕ್ ಭಾಷೆಯ ಅಲ್ ಲೈಲ್, ಕೋರಿಯನ್ ಭಾಷೆಯ Miracle in cell No. 7 ಸಿನೆಮಾಗಳನ್ನೂ ವೀಕ್ಷಿಸಿದ್ದೇನೆ, ಈ ಚಿತ್ರಗಳಲ್ಲಿ ನನಗೆ ಅರ್ಥವಾಗುತ್ತಿದ್ದದ್ದು ಕೇವಲ ಮುಖಭಾವ, ಆಂಗಿಕ ಚಲನೆ, ಚಿತ್ರದ ನಿರೂಪಣೆಗಳು ಮಾತ್ರ. ಇವುಗಳ ಸಹಾಯದಿಂದಲೇ ಚಿತ್ರಕಥೆಯನ್ನು ಅರ್ಥಮಾಡಿಕೊಳ್ಳು ಪ್ರಯತ್ನಿಸುತ್ತಿದ್ದೆ. ಒಂದು ವೇಳೆ English ಅಡಿಬರಹಗಳಿಲ್ಲದಿದ್ದರೆ ಸಿನೆಮಾ ಅರ್ಥವೇ ಆಗುತ್ತಿರಲಿಲ್ಲ. Miracle in cell No. 7 ಚಿತ್ರವನ್ನು ಇತ್ತೀಚೆಗೆ ರಮೇಶ್ ಅರವಿಂದ್ ಮುಖ್ಯಭೂಮಿಕೆಯಲ್ಲಿ ಕನ್ನಡಕ್ಕೆ ‘ಪುಷ್ಫಕ ವಿಮಾನ’ ಎಂಬ ಹೆಸರಿನಲ್ಲಿ ರಿಮೇಕ್ ಕೂಡ ಮಾಡಲಾಯಿತು. ನಾಯಕನ ನಟನೆ ಅದ್ಭುತವಾಗಿದ್ದರೂ ಚಿತ್ರವು ನಿರೀಕ್ಷೆಯನ್ನು ಹುಸಿಗೊಳಿಸಿತು. ಕೊರಿಯನ್ ಭಾಷೆಯಲ್ಲಿ ನಿರ್ಮಾಣವಾದ ಚಿತ್ರ ನನ್ನ ಅಂತರಂಗವನ್ನು ಕಲುಕಿದಷ್ಟೂ ಕನ್ನಡದಲ್ಲಿ ರಿಮೇಕ್ ಮಾಡಿದ ಚಿತ್ರ ಅಂತರಂಗಕ್ಕಿಳಿಯಲಿಲ್ಲ. ಪ್ರಾಯಶಃ ಕೊರಿಯನ್ ಭಾಷೆಯ ಚಿತ್ರವನ್ನೇ ಕನ್ನಡದಲ್ಲಿ ಡಬ್ಬಿಂಗ್ ಮಾಡಿದ್ದರೆ ಚಿತ್ರ ಇನ್ನಷ್ಟು ಅರ್ಥಗಳನ್ನು ಮೂಡಿಸುತ್ತಿತ್ತೇನೋ.

ಕನ್ನಡ ಚಿತ್ರರಂಗದಲ್ಲಿ ಡಬ್ಬಿಂಗ್ ವಿಷಯ ಪ್ರಸ್ತಾಪವಾದಗಲೆಲ್ಲಾ ಚಿತ್ರರಂಗದ ಪಟ್ಟಭದ್ರಹಿತಾಸಕ್ತಿಗಳು ಜಾಗೃತರಾಗಲು ಶುರುಮಾಡಿಬಿಡುತ್ತವೆ. ಕನ್ನಡ ಪರ ಸಂಘಟನೆಗಳೂ ಕೂಡ ಇದಕ್ಕೆ ಕೈ ಜೋಡಿಸಿಬಿಡುತ್ತವೆ.. ಡಬ್ಬಿಂಗ್ ವಿರೋಧಿಗಳು ‘ಡಬ್ಬಿಂಗ್ ಬೇಡ, ಡಬ್ಬಿಂಗ್ನಿಂದ ಕನ್ನಡ ಚಿತ್ರರಂಗ ತನ್ನ ಅಸ್ತಿತ್ವವನ್ನೇ ಕಳೆದುಕೊಳ್ಳುತ್ತದೆ’ ಎಂದು ಸುಳ್ಳು ಪ್ರಚಾರ ಮಾಡಿಬಿಡುತ್ತವೆ. ಡಬ್ಬಿಂಗ್ ಚಿತ್ರಗಳಿಂದ ಕನ್ನಡ ಚಿತ್ರರಂಗಕ್ಕಾಗುವ ನಷ್ಟಗಳೇನು? ಎಂದು ಪ್ರಶ್ನಿಸಿದರೆ ಅವರಿಂದ ಬರುವ ಉತ್ತರಗಳು ತರ್ಕರಹಿತವಾಗಿರುತ್ತವೆ. ಇಲ್ಲಿನ ತಂತ್ರಜ್ಞರು, ನಟರು, ಚಿತ್ರರಂಗದಲ್ಲಿ ದುಡಿಯುವ ಕಾರ್ಮಿಕರು ಬೀದಿಪಾಲಾಗುತ್ತಾರೆ. ಇಲ್ಲಿನ ಸಂಸ್ಕೃತಿಯ ಮೇಲೆ ಬೇರೆ ಭಾಷೆ ಚಿತ್ರಗಳಿಂದ ಆಕ್ರಮಣಗಳಾಗುತ್ತವೆ, ಡಬ್ಬಿಂಗ್ ಮಾಡುವುದಕ್ಕಿಂತ ರಿಮೇಕ್ ಮಾಡಿದರೆ ಇವರೆಲ್ಲರಿಗೂ ಕೆಲಸ ದೊರೆಯುತ್ತದೆ ಎಂದುಬಿಡುತ್ತಾರೆ ಡಬ್ಬಿಂಗ್ ವಿರೋಧಿಗಳು. ಕಥೆ ಎರವಲು ಪಡೆದು ರಿಮೇಕ್ ಸಿನೆಮಾ ತಯಾರಿಸಿಬಿಟ್ಟರೆ ಸಿನೆಮಾ ಭರ್ಜರಿ ಪ್ರದರ್ಶನಗೊಳ್ಳುತ್ತದೆ ಎಂಬ ತಪ್ಪು ಕಲ್ಪನೆಯಲ್ಲಿ ಬಹುತೇಕ ಚಿತ್ರಗಳನ್ನು ಇಲ್ಲಿನ ಸಂಸ್ಕೃತಿಗೆ ಹೊಂದುವಂತೆ ಮಾರ್ಪಾಟುಮಾಡಿ ಚಿತ್ರಿಸಲಾಗುತ್ತದೆ. ರಿಮೇಕ್ ಮಾಡಿದ ಬಹುತೇಕ 90ರಷ್ಟು ಚಿತ್ರಗಳು ಯಶಸ್ಸು ಕಾಣದೆ ಹಳ್ಳ ಹಿಡಿಯುತ್ತವೆ. ಹೊಸತನವನ್ನು ಬಯಸುವ ಕನ್ನಡ ಭಾಷಿಗರು ಸ್ವಂತ ಕಥೆಯನ್ನು ಹೆಣೆದು ಚಿತ್ರೀಕರಿಸಿದ ಚಿತ್ರಗಳನ್ನೇ ತಿರಸ್ಕರಿಸುವ ಈ ಕಾಲದಲ್ಲಿ ಯಾವುದೋ ಭಾಷೆಯ ಚಿತ್ರವನ್ನು ಕನ್ನಡಕ್ಕೆ ರಿಮೇಕ್ ಮಾಡಿದರೆ ತಿರಸ್ಕರಿಸಲಾರರೇ? ಆ ಚಿತ್ರಗಳು ಕನ್ನಡಕ್ಕೆ ರಿಮೇಕ್ ಆಗುವುದಿಕ್ಕಿಂತಲೂ ಮುಂಚೆ ಮೂಲ ಭಾಷೆಯಲ್ಲಿ English ಅಡಿಬರಹಗಳ ಸಹಾಯದಿಂದ ವೀಕ್ಷಿಸಿಬಿಟ್ಟಿರುತ್ತಾರೆ.

ಕನ್ನಡ ಸಿನೆಮಾರಂಗದಲ್ಲಿ ಜಾರಿಯಲ್ಲಿರುವಂತೆ (ಕಾನೂನಾತ್ಮಕವಾಗಿ ಅಲ್ಲ) ಗುಜರಾತಿ, ಬಂಗಾಳಿ ಹಾಗೂ ಪಂಜಾಬಿ ಭಾಷೆಗಳಲ್ಲೂ ಡಬ್ಬಿಂಗ್ ನಿಷೇಧ ಜಾರಿಯಲ್ಲಿದೆ. ಆದರೆ ಡಬ್ಬಿಂಗ್ ವಿರೋಧಿ ಚಳುವಳಿಯನ್ನು ಮೊದಲು ಪ್ರಾರಂಭಿಸಿದ್ದು ಕನ್ನಡ ಚಿತ್ರರಂಗ. 60ರ ದಶಕದಲ್ಲಿ ತಮಿಳು ಹಾಗೂ ತೆಲುಗಿನ ಬಹುತೇಕ ಸಿನೆಮಾಗಳು ಕನ್ನಡಕ್ಕೆ ಡಬ್ಬ್ ಮಾಡಿದ್ದರಿಂದ ಜನ ಹೆಚ್ಚು ಹೆಚ್ಚು ಡಬ್ಬಿಂಗ್ ಚಿತ್ರಗಳನ್ನೇ ನೋಡಲು ಮುಂದಾಗುತ್ತಿದ್ದರು. ಇತ್ತ ಕನ್ನಡ ಚಿತ್ರರಂಗದಲ್ಲಿ ಆರ್ಥಿಕ ಸಂಕಷ್ಟದ ಕಾರಣದಿಂದ ಸಿನೆಮಾಗಳ ನಿರ್ಮಾಣ ತ್ರಾಸದ ಕೆಲಸವಾಗಿತ್ತು. 1960ರಲ್ಲಿ ಒಂದೇ ಒಂದು ಕನ್ನಡ ಸಿನೆಮಾವೂ ಬಿಡುಗಡೆ ಕಾಣಲಿಲ್ಲ. ಬೇರೆ ಭಾಷೆಗಳ ಚಿತ್ರಗಳು ಕನ್ನಡಕ್ಕೆ ಡಬ್ಬ್ ಮಾಡಿ ಬಿಡುಗಡೆಗೊಳಿಸುತ್ತಿದ್ದರಿಂದ ಕನ್ನಡ ಚಿತ್ರರಂಗದ ಕಲಾವಿದರನ್ನು ಜನ ಬಹುತೇಕ ಮರೆತುಬಿಟ್ಟಿದ್ದರು. ಈ ಎಚ್ಚರಿಕೆಯಿಂದ ಜಾಗೃತರಾದ ಕನ್ನಡ ಚಿತ್ರರಂಗದ ಮಹನೀಯರು ಡಬ್ಬಿಂಗ್ ವಿರೋಧಿ ಚಳುವಳಿಯನ್ನು ಪ್ರಾರಂಭಿಸಿದರು. ಪದ್ಮಭೂಷಣ ಡಾ|| ರಾಜ್ ಕುಮಾರ್ ರವರು ಈ ಚಳುವಳಿಯ ನೇತೃತ್ವವನ್ನು ವಹಿಸಿಕೊಂಡರು. ಅಂದಿನಿಂದ ಇಂದಿನವರೆಗೂ ಯಾವುದೇ ಪರಭಾಷಾ ಸಿನೆಮಾ ಕನ್ನಡಕ್ಕೆ ಡಬ್ಬ್ ಆಗಿರಲಿಲ್ಲ. ಇತ್ತೀಚೆಗೆ ಬಿಡುಗಡೆ ಹೊಂದಿದ ‘ಸತ್ಯದೇವ್ IPS’ ಚಿತ್ರ ನಿಷೇಧದ ನಂತರ ಬಿಡುಗಡೆಗೊಂಡ ಪ್ರಥಮ ಚಿತ್ರ.

ಕನ್ನಡ ಚಿತ್ರರಂಗದ ಈ ನಡೆ ಅಂಸಂವಿಧಾನಕವೂ ಕೂಡ, ಸಂವಿಧಾನದಲ್ಲಿ ಭಾಷೆಯ ಆಧಾರದ ತಾರತಮ್ಯ ಶಿಕ್ಷಾರ್ಹ ಅಪರಾಧ, ಚಿತ್ರವನ್ನು ವೀಕ್ಷಿಸುವ ಸಹೃದಯನಿಗೆ ತನಗೆ ಯಾವ ಭಾಷೆ ಬೇಕೋ ಆ ಭಾಷೆಯಲ್ಲಿ ಸಿನೆಮಾ ವೀಕ್ಷಿಸುವ ಹಕ್ಕನ್ನು ಸಂವಿಧಾನ ನೀಡಿದೆ. ಕನ್ನಡಿಗನೊಬ್ಬ ತಮಿಳಿನಲ್ಲಿ ಚಿತ್ರ ವೀಕ್ಷಿಸಿದರೆ ಅದು ಕನ್ನಡ ವಿರೋಧಿ ಚಟುವಟಿಕೆಯಲ್ಲ! ತಮಿಳಿನ ಚಿತ್ರವೊಂದು ಕನ್ನಡಿಗನ ಅಂತರಂಗಕ್ಕೆ ತುಂಬಾ ಹತ್ತಿರವಿದ್ದಾಗ ಆ ಚಿತ್ರವನ್ನು ಸಹೃದಯಿಗನಾಗಿ ವೀಕ್ಷಿಸುವುದು ಅವನ ಆಯ್ಕೆಯಾಗುತ್ತದೆ. ಇದನ್ನೇ ಆಯ್ಕೆಯ ಸ್ವಾತಂತ್ರ್ಯ ಎಂದೂ ಕರೆಯಬಹುದು. ಕನ್ನಡಕ್ಕಾಗಿ ದನಿ ಎತ್ತರಿಸುವ ಕನ್ನಡ ಸಂಘಟನೆಗಳು ಡಬ್ಬಿಂಗ್ ವಿರೋಧಿಸುವುದು ಒಂದು ರೀತಿ ಕನ್ನಡ ವಿರೋಧಿ ಚಟುವಟಿಕೆ ಎಂಬುದು ನನ್ನ ಅಭಿಪ್ರಾಯ. ಒಂದು ವೇಳೆ ಕನ್ನಡಿಗನು ತನ್ನ ಅಂತರಂಗಕ್ಕೆ ಹತ್ತಿರವೆನಿಸಿದ ತಮಿಳು ಚಿತ್ರವೊಂದನ್ನು ಕನ್ನಡಕ್ಕೆ ಡಬ್ಬ್ ಮಾಡಿ ಏಕಕಾಲಕ್ಕೆ ಎರಡೂ ಭಾಷೆಯಲ್ಲಿ ಬಿಡುಗಡೆಗೊಳಿಸುವುದರಿಂದ ಆತ ಆ ಸಿನೆಮಾವನ್ನು ಕನ್ನಡದಲ್ಲಿ ವೀಕ್ಷಿಸಲು ಮುಂದಾಗುತ್ತಾನೆ. ಅಲ್ಲಿಗೆ ಕನ್ನಡ ಗೆದ್ದಂತಾಗುತ್ತದೆ, ಇತ್ತ ಕನ್ನಡಿಗನಿಗೆ ತನ್ನದೇ ಭಾಷೆಯಲ್ಲಿ ಕನ್ನಡ ಸಿನೆಮಾ ನೋಡಿದ ಸಂತೃಪ್ತಭಾವ ಮೂಡುತ್ತದೆ. ಸಿನೆಮಾಗಳ ಡಬ್ಬಿಂಗ್ ಕತೆ ಒಂದುಕಡೆಯಾದರೆ, ಒಳ್ಳೆಯ ಕಾರ್ಯಕ್ರಮಗಳನ್ನೂ ಡಬ್ಬಿಂಗ್ ಮಾಡದಂತೆ ಕನ್ನಡ ಟೆಲಿವಿಷನ್ ಅಸೋಸಿಯೇಷನ್ ನಿರ್ಬಂಧ ಹೇರಿದೆ. ಖ್ಯಾತ ನಟ ಅಮೀರ್ ಖಾನ್ ತನ್ನ ‘ಸತ್ಯವೇವ ಜಯತೆ’ ಕಾರ್ಯಕ್ರಮವನ್ನು ದೇಶದ ಎಲ್ಲಾ ಭಾಷಿಕರಿಗೂ ತಲುಪುವ ಉದ್ದೇಶದಿಂದ ಪ್ರಮುಖ ಭಾಷೆಗಳಲ್ಲಿ ಡಬ್ಬಿಂಗ್ ಮಾಡಲು ಮುಂದಾದಾಗ ಇದೇ ಕನ್ನಡ ಟೆಲಿವಿಷನ್ ಅಸೋಸಿಯೇಷನ್ ನಿಂದ ಪ್ರತಿರೋಧ ಎದುರಾಗಿ ಡಬ್ಬಿಂಗ್ ಕೆಲಸ ನಿಂತಿತು. ಭಾರತದ ಎಲ್ಲಾ ಭಾಷಿಕರಿಗೂ ತಲುಪಿದ ಆ ಕಾರ್ಯಕ್ರಮ ಕನ್ನಡಿಗರನ್ನು ತಲುಪಲಿಲ್ಲ. ಹಿಂದಿ ಭಾಷೆ ಗೊತ್ತಿದ್ದ ಕನ್ನಡಿಗರು ಮಾತ್ರ ಆ ಕಾರ್ಯಕ್ರಮ ವೀಕ್ಷಿಸುವಂತಾಯಿತು. Discovery, NGC, Animal Planet ಚಾನೆಲ್ ಗಳ ಬಹುತೇಕ ಕಾರ್ಯಕ್ರಮಗಳು ಕೂಡ ಈ ನಿರ್ಬಂಧದಿಂದ ಕನ್ನಡಕ್ಕೆ ಡಬ್ಬ್ ಆಗಲೇ ಇಲ್ಲ. ಇಂಗ್ಲೀಷ್ ಮಾಧ್ಯಮದ ಮಕ್ಕಳಿಗೆ ಮಾತ್ರ ಆ ಚಾನೆಲ್ ಗಳ ಭಾಷೆ ಅರ್ಥವಾಯಿತು. ಹಳ್ಳಿಗಾಡಿನ ಮಕ್ಕಳಿಗೆ ಕಾರ್ಯಕ್ರಮಗಳು ತಲುಪಲೇ ಇಲ್ಲ, ಇದರಿಂದಾಗಿ ಕನ್ನಡದ ಮಕ್ಕಳು ಬೌದ್ಧಿಕ ನಷ್ಟ ಅನುಭವಿಸಬೇಕಾಯಿತು.

ಕನ್ನಡ ಚಿತ್ರರಂಗದಲ್ಲಿ ಡಬ್ಬಿಂಗ್ ಅವಕಾಶ ನೀಡಿಬಿಟ್ಟರೆ, ಇಲ್ಲಿನ ಸಂಸ್ಕೃತಿಯ ಮೇಲೆ ಬೇರೆ ಭಾಷಿಕರ ಆಕ್ರಮಣ ಎದುರಿಸಬೇಕಾಗುತ್ತದೆ ಎಂದು ಸುಳ್ಳು ಹೇಳುವ ಪಟ್ಟಭದ್ರ ಹಿತಾಸಕ್ತಿಗಳಿಗೆ ತಾವು ಬಿಡುಗಡೆಗೊಳಿಸುವ ಮೂರನೇ ದರ್ಜೆಯ ಸಿನೆಮಾಗಳಿಂದ ಸಂಸ್ಕೃತಿಯ ಮೇಲೆ ಆಕ್ರಮಣವಾಗುವುದಿಲ್ಲವೇ ಎಂದು ಪ್ರಶ್ನಿಸುವ ಅವಶ್ಯಕತೆ ಇದೆ. ಒಂದು ಭಾಷೆಯ ಚಿತ್ರರಂಗಕ್ಕಿಂತ ಮತ್ತೊಂದು ಭಾಷೆಯ ಚಿತ್ರಂಗಕ್ಕೆ ಕೊಂಚ ವ್ಯತ್ಯಾಸಗಳಿದ್ದರೂ ಸಾಂಸ್ಕೃತಿಕವಾಗಿ ಇಡೀ ಭಾರತೀಯ ಚಿತ್ರರಂಗಗಳು ಭಾರತದ ಸಂಸ್ಕೃತಿಯನ್ನು ಪ್ರತಿನಿಧಿಸುತ್ತವೆ ಎಂಬುದು ಅರ್ಥವಾಗುತ್ತಿಲ್ಲವೇಕೆ? ಇನ್ನು ಸ್ಥಳೀಯ ತಂತ್ರಜ್ಞರು ಬೀದಿಪಾಲಾಗುತ್ತಾರೆ, ಕಲಾವಿದರಿಗೆ ಹೆಚ್ಚಿನ ಅವಕಾಶ ಸಿಗುವುದಿಲ್ಲ ಎನ್ನುವ ಪ್ರಶ್ನೆಗೆ, ತಮಿಳು, ತೆಲುಗು, ಮಲಯಾಳಂ, ಹಿಂದಿ ಚಿತ್ರರಂಗದಲ್ಲಿ ಡಬ್ಬಿಂಗ್ ಅವಕಾಶವಿದ್ದರೂ ಹೇಗೆ ಸಾಕಷ್ಟು ಮುಂದುವರೆದಿದ್ದಾರೆ? ಹೇಗೆ ಅವಕಾಶಗಳನ್ನು ಸೃಷ್ಟಿಸಿಕೊಳ್ಳುತ್ತಿದ್ದಾರೆ? ನಿಜ ಹೇಳಬೇಕೆಂದರೆ ನಮಗಿಂತಲೂ ಈ ಚಿತ್ರರಂಗಗಳು ಮುಂಚೂಣಿಯಲ್ಲಿವೆ.. ಏಕೆ ಗೊತ್ತೇ? ಡಬ್ಬಿಂಗ್ ಭಯದಿಂದ ಹೆಚ್ಚು ಹೆಚ್ಚು ಕೆಲಸಮಾಡಲು ಸಿದ್ಧರಾಗುತ್ತಾರೆ, ಸ್ಪರ್ಧೆಯಲ್ಲಿ ಹೊಸತನಗಳನ್ನು ಹುಡುಕಿ ಯಶಸ್ವಿಯಾಗುತ್ತಿದ್ದಾರೆ. 1960ರ ಡಬ್ಬಿಂಗ್ ವಿರೋಧ ಚಳುವಳಿಗೂ ಮುಂಚೆ ಕರ್ನಾಟದಲ್ಲಿ ಚಿತ್ರಮಂದಿರಗಳ ಸಂಖ್ಯೆ ಕಡಿಮೆ ಇತ್ತು, ಬಿಡುಗಡೆಗೊಳ್ಳುತ್ತಿದ್ದ ಸಿನೆಮಾಗಳೂ ಕಡಿಮೆ ಇದ್ದವು, ಇದೇ ಕಾರಣಕ್ಕಾಗಿ ಕಲಾವಿದರು ಅವಕಾಶ ವಂಚಿತರಾಗುತ್ತಿದ್ದರು. ಈಗಿನ ಸನ್ನಿವೇಶ ಹಾಗಿಲ್ಲ, ಊರಿಗೊಂದರಂತೆ, ಕೇರಿಗೆರಡರಂತೆ ಚಿತ್ರಮಂದಿರಗಳಿವೆ. ವರ್ಷವೊಂದಕ್ಕೆ ಬಿಡುಗಡೆಯಾಗುವ ಸಿನಮಾಗಳ ಸಂಖ್ಯೆ 150 ಮುಟ್ಟುತ್ತಿವೆ, ಹೀಗಿರುವಾಗ ಸಿಗುವ ಅವಕಾಶಗಳಿಗೇನೂ ಕೊರತೆಯುಂಟಾಗುವುದಿಲ್ಲ,

ಡಬ್ಬಿಂಗ್ ವಿರೋಧಿಸುವುದರಿಂದ ಬೇರೆ ಭಾಷಿಕರಿಗೆ ನಮ್ಮ ಸಣ್ಣತನವನ್ನು ನಾವೇ ಎತ್ತಿ ತೋರಿಸಿದಂತಾಗುತ್ತದೆ. ನಮ್ಮ ಭಾಷೆಯ ಚಲನಚಿತ್ರವೊಂದನ್ನು ಬೇರೆ ಭಾಷೆಯಲ್ಲಿ ಡಬ್ಬಿಂಗ್ ಮಾಡಿ ಪ್ರಸಾರ ಮಾಡಿವಾಗ ಖುಷಿಪಡುವ ನಾವು, ಬೇರೆ ಭಾಷೆಯ ಸಿನೆಮಾಗಳನ್ನು ಕನ್ನಡಕ್ಕೆ ಡಬ್ಬಿಂಗ್ ಮಾಡಿಸಿ ಕನ್ನಡದಲ್ಲೇ ಚಿತ್ರವೀಕ್ಷಿಸುವ ಆನಂದವನ್ನು ಅನುಭವಿಸೋಣ. ಈಗಿನ ಚಿತ್ರರಂಗದ ಪರಿಸ್ಥಿತಿಯನ್ನು ಕಣ್ಣಾರೆ ಕಾಣಲು ವರನಟರೇನಾದರು ಇದ್ದಿದ್ದರೆ ಡಬ್ಬಿಂಗಿಗೆ ತಾವೇ ಬೆಂಬಲ ಸೂಚಿಸುತ್ತಿದ್ದರೇನೋ. ಡಬ್ಬಿಂಗ್ ಬೇಕೋ ಬೇಡವೋ ಎಂದು ಚರ್ಚೆಗಳಾಗುತ್ತಿರು ಈ ಸಂದರ್ಭದಲ್ಲಿ ಕನ್ನಡದಲ್ಲಿ ಹೊಸತನಗಳು ಕಾಣುತ್ತಿರುವುದು ಶ್ಲಾಘನೀಯ. ಈಗೀಗ ಬಿಡುಗಡೆಗೊಳ್ಳುತ್ತಿರುವ ಕನ್ನಡ ಚಿತ್ರಗಳು ಬೇರೆ ಭಾಷೆಗೆ ಡಬ್ಬಿಂಗ್ ಮಾಡುತ್ತಿದ್ದಾರೆಂದರೆ ಡಬ್ಬಿಂಗ್ ಮಾಡುವ ಭಾಷೆಯಲ್ಲಿ ಕಾಣದ ಹೊಸತನವನ್ನು ನಾವು ಕಂಡಿದ್ದೇವೆ ಎಂದರ್ಥ. ಭಾಷೆಯ ಆಧಾರದಲ್ಲಿ ನಿರ್ಬಂಧವೇರುವುದನ್ನು ನಿಲ್ಲಿಸಿದ್ದೇ ಆದರೆ ಮುಂದೊಂದು ದಿನ ಬೇರೆ ಭಾಷೆಗಳಲ್ಲಿ ಬಿಡುಗಡೆಯಾಗುವ ಚಿತ್ರಗಳಿಗೆ ಇಲ್ಲಿ ಮಾರುಕಟ್ಟೆಯೇ ಇಲ್ಲವಾಗಬಹುದು. ಕನ್ನಡದ ಅಥವಾ ಕನ್ನಡದಲ್ಲಿ ಡಬ್ಬ್ ಮಾಡಿದ ಚಿತ್ರಗಳಿಗೆ ಮಾತ್ರ ಸಹೃದಯರು ಮನ್ನಣೆ ನೀಡಬಹುದು, ಇವೆಲ್ಲಾ ಅಂಶಗಳನ್ನು ಮನಗಾಣುವ ಜರೂರು ಕನ್ನಡ ಚಿತ್ರರಂಗಕ್ಕಿದೆ.