ವಿಷಯದ ವಿವರಗಳಿಗೆ ದಾಟಿರಿ

ಆಗಷ್ಟ್ 17, 2019

ರಾಮಸ್ವರೂಪ್ – ಭಾರತೀಯ ಚಿಂತನೆಯ ಶತಮಾನದ ಬೆಳಕು

by ನಿಲುಮೆ

ಡಾ.ರೋಹಿಣಾಕ್ಷ ಶಿರ್ಲಾಲು

ಅನ್ಯಾಕ್ರಮಣದಿಂದ ಸ್ಮೃತಿ ಅಳಿದು ವಿಸ್ಮೃತಿಗೆ ಒಳಗಾಗಿದ್ದ ಭಾರತೀಯ ಮನಸ್ಸುಗಳನ್ನು ಬಿಡುಗಡೆಗೊಳಿಸಲು ಪ್ರಯತ್ನಿಸಿದ ಮಹನೀಯರು, ಬೌದ್ಧಿಕ ದಾಸ್ಯವನ್ನು ಹೋಗಲಾಡಿಸಲು ಅಕ್ಷ ರಶಃ ಹೋರಾಡಿದವರು. ಕಳೆದು ಹೋಗಿದ್ದ ಅಸ್ಮಿತೆಯ ಹುಡುಕಾಟಕ್ಕೆ ಮತ್ತು ಬುದ್ಧಿಗೆ ಹಿಡಿದ ದಾಸ್ಯದ ಮುಸುಕನ್ನು ಸರಿಸಲು ವಿದ್ವತ್ತುಳ್ಳ ಅನೇಕರು ತಮ್ಮ ಬದುಕಿನ ಸಮರ್ಪಣೆಯನ್ನೇ ಮಾಡಿದ್ದಾರೆ. ಬೌದ್ಧಿಕ ಲೋಕದ ಕ್ಷಾತ್ರ ಪ್ರವೃತ್ತಿಯ ಮಹೋನ್ನತರ ಸಾಲಿಗೆ ಸೇರುವ, ಈ ಶತಮಾನದ ಬೆಳಕಾದ ವಿದ್ವಾಂಸರಲ್ಲಿ ರಾಮಸ್ವರೂಪ್‌ ಒಬ್ಬರು. ಭಾರತೀಯ ಮಣ್ಣಿನ ಸತ್ವವನ್ನು ತನ್ನ ಚಿಂತನೆಗಳಲ್ಲಿ ಮೈಗೂಡಿಸಿಕೊಂಡಿದ್ದ ರಾಮಸ್ವರೂಪರು 20ನೇ ಶತಮಾನ ಕಂಡ ಶ್ರೇಷ್ಠ ಚಿಂತಕ ಎಂದರೆ ಅತಿಶಯೋಕ್ತಿಯಲ್ಲ.

1919ರಲ್ಲಿ ಜನಿಸಿದ ರಾಮಸ್ವರೂಪ್‌, ಕ್ವಿಟ್‌ ಇಂಡಿಯಾ ಚಳವಳಿಯಲ್ಲಿ ಜೈಲುವಾಸವನ್ನೂ ಅನುಭವಿಸಿದ್ದರು. ಗಾಂಧಿಯ ಅನುಯಾಯಿಯಾಗಿ ಕಾರ್ಯ ನಿರ್ವಹಿಸಿದ ಇವರು ಕಾರ್ಲ್‌ ಮಾರ್ಕ್ಸ್‌ನ ಚಿಂತನೆಗಳಿಂದ ಪ್ರಭಾವಿತರಾಗಿ ಮಾರ್ಕ್ಸ್‌ವಾದ ಒಂದೇ ಜಗತ್ತಿನ ಸಮಸ್ಯೆಗಳಿಗೆ ಪರಿಹಾರ ಎಂದು ನಂಬಿದ್ದರು. ಸ್ವಾತಂತ್ರ್ಯಾನಂತರದ ಭಾರತದ ವೈಚಾರಿಕ ವಲಯದಲ್ಲಿ ಕಮ್ಯುನಿಸಂಪ್ರಬಾವಿಯಾಗಿ ನೆಲೆಯಾಗುತ್ತಿದ್ದ ಸಂದರ್ಭದಲ್ಲಿ ಭಾರತೀಯ ಕಮ್ಯುನಿಸ್ಟರ ಬಗ್ಗೆ ರಾಮ ಸ್ವರೂಪರಲ್ಲಿ ಹುಟ್ಟಿದ ಅನುಮಾನಗಳಿಗೆ ಕಮ್ಯುನಿಸ್ಟ್‌ ನಾಯಕತ್ವದಲ್ಲಿ ಉತ್ತರವಿರಲಿಲ್ಲ. ಅಂತಿಮವಾಗಿ ಭಾರತದ ಪ್ರಮುಖ ಕಮ್ಯುನಿಸ್ಟ್‌ ವಿರೋಧಿ ವಿಮರ್ಶಕನಾಗಿ ಬದಲಾಗುತ್ತಾರೆ.

ಕಮ್ಯುನಿಸಂ ಬಗ್ಗೆ ಸುಮಾರು 5 ಕೃತಿಗಳನ್ನು ರಚಿಸಿದ ಇವರು ಕಮ್ಯುನಿಸಂನ ದೋಷಗಳನ್ನು ಅದರ ಸಮಕಾಲೀನ ನಡವಳಿಕೆಗಳಿಂದಲೇ ವಿಮರ್ಶಿಸುತ್ತಾರೆ. ಜಗತ್ತಿಗೆ ಕಮ್ಯುನಿಸಂ ಹೇಗೆ ಆಪತ್ಕಾರಿ ಎನ್ನುವ ರಾಮಸ್ವರೂಪರ ನಿಲುವು ಅಂದಿನ ಜಗತ್ತಿನ ಗಮನ ಸೆಳೆದಿತ್ತು. ಕಮ್ಯುನಿಸಂನ ಆಳ್ವಿಕೆಯ ವಿಫಲತೆ ಮತ್ತು ಸೈದ್ಧಾಂತಿಕ ಅಪ್ರಸ್ತುತತೆಯನ್ನು ಕುರಿತು ಅವರು ನಡೆಸಿದ ವಿಮರ್ಶೆ ಅರ್ಧ ಶತಮಾನ ಕಳೆದ ಬಳಿಕವೂ ದಾರ್ಶನಿಕ ಸ್ವರೂಪದ ಬರಹಗಳಂತೆ ಗೋಚರಿಸುತ್ತದೆ ಎಂದರೆ ಅವರ ಚಿಂತನೆಯ ಮೌಲಿಕತೆ ಅರಿವಾಗಬಹುದು. ಆದರೆ ನಮ್ಮ ವೈಚಾರಿಕ ವಲಯ ಈ ಬರಹಗಳಿಗೆ ಕಿವುಡಾಗಿ, ಕುರುಡಾಗಿ ವರ್ತಿಸಿದ ಪರಿಣಾಮ ಇಂದಿಗೂ ಪ್ರಬುದ್ಧತೆಯ ಹೆಸರಿನಲ್ಲಿ ಕಮ್ಯುನಿಸಂನ್ನು ಆರಾಧನೆಯ ಸ್ವರೂಪದಲ್ಲಿ ನೋಡುತ್ತಿದೆ. ಅವರು ಅಂತಿಮವಾಗಿ ಕಮ್ಯುನಿಸಂಗೆ ಪರ್ಯಾಯವನ್ನು ಕಂಡಿದ್ದು ಗಾಂಧಿಯ ಚಿಂತನೆಗಳಲ್ಲಿ. ಗಾಂಧಿಯ ಚಿಂತನೆಯ ಹಿಂದಿರುವ ಹಿಂದುತ್ವದಲ್ಲಿ.

ಅವರು ಬರವಣಿಗೆಯನ್ನು ಮಾಡುತ್ತಿದ್ದ ಕಾಲಘಟ್ಟದಲ್ಲಿ ಅವರ ವಿಚಾರಗಳಿಗೆ ರಾಜಕೀಯ ಬಲವಾಗಲೀ, ಅಕಾಡೆಮಿಕ್‌ ವಲಯದ ಬೆಂಬಲವಾಗಲೀ, ಮಾಧ್ಯಮದ ಪ್ರಚಾರವಾಗಲೀ ಸಿಗಲಿಲ್ಲ. ಪ್ರಸ್ತುತ ಕಾಲಘಟ್ಟದ ನಮ್ಮ ವೈಚಾರಿಕ ಜಗತ್ತು ತಕ್ಕಮಟ್ಟಿಗಾದರೂ ಭಿನ್ನ ವಿಚಾರದ ಸಂವಾದಕ್ಕೆ ತೆರೆದುಕೊಂಡಿದೆ. ರಾಜಕೀಯ ಅಧಿಕಾರದ ಬೆಂಬಲ, ಮಾಧ್ಯಮಗಳ ಪ್ರಚಾರ, ಸಾಮಾಜಿಕ ಮಾಧ್ಯಮಗಳ ಚರ್ಚೆಗಳು ವಿಚಾರಶೀಲ ಲೇಖಕರಿಗೆ ಬೆಂಬಲವಾಗಿ ಒದಗುತ್ತಿವೆ. ಆದರೆ ಇದ್ಯಾವುದರರ ಸಹಾಯವೂ ಇಲ್ಲದಿದ್ದ ಕಾಲಘಟ್ಟದಲ್ಲಿ ತಪಸ್ಸಿನಂತೆ ಜ್ಞಾನದ ಆರಾಧನೆಯನ್ನು ಮಾಡುತ್ತಾ, ಸತ್ಯದ ಹುಡುಕಾಟದಲ್ಲಿ ಕಂಡದ್ದನ್ನು ನಿರ್ಭಯವಾಗಿ ಪ್ರತಿಪಾದಿಸಿದರು. ಕಮ್ಯುನಿಸಂನ ತೆಕ್ಕೆಯಲ್ಲಿ ವಿಚಾರವಾದದ ಹೆಸರಿನಲ್ಲಿ ಬಂಧಿಯಾಗಿದ್ದ ಸಂಗತಿಗಳನ್ನು ಮುಕ್ತವಾದ ಚರ್ಚೆಗೆ ತಂದು ನಿಲ್ಲಿಸಿದವರು ರಾಮಸ್ವರೂಪ್‌. ಅವರ ಕಾರ್ಯದ ಮಹತ್ವ ಅರ್ಥವಾಗಬೇಕಾದರೆ ಅಂದಿನ ವೈಚಾರಿಕ ಲೋಕದ ಮನಸ್ಥಿತಿಯನ್ನು ಅರಿತುಕೊಳ್ಳಬೇಕು. ಜಡಗೊಂಡಂತಿದ್ದ ಭಾರತೀಯ ಬೌದ್ಧಿಕ ಜಗತ್ತಿಗೆ ತನ್ನ ಸತ್ಯ ಸಾಕ್ಷಾತ್ಕಾರದ ಪ್ರವೃತ್ತಿಯಿಂದಲೇ ಚುರುಕು ಮುಟ್ಟಿಸಿದ ರಾಮಸ್ವರೂಪರನ್ನು ನಡೆಸಿಕೊಂಡ ರೀತಿ ಮಾತ್ರ ದುಃಖಕರವಾಗಿತ್ತು. ಅವರು ಬದುಕಿದ್ದ ಕಾಲಘಟ್ಟದವರೆಗೂ (1998) ನಮ್ಮ ವಿಚಾರ ಪ್ರಪಂಚಕ್ಕೆ ಅನಾಮಿಕರಾಗಿಯೇ ಉಳಿದಿದ್ದರು. ದಶಕಗಳ ಕಾಲ ದಾಖಲೆಗಳನ್ನು ಮುಂದಿಟ್ಟುಕೊಂಡೇ ವಿಚಾರ ಮಂಡನೆ ಮಾಡಿದರೂ, ನಮ್ಮ ವೈಚಾರಿಕ ಲೋಕದೊಳಗೆ ಮನೆಮಾಡಿದ್ದ ಅಸ್ಪೃಶ್ಯತೆಯ ಪರಿಣಾಮವಾಗಿ ರಾಮಸ್ವರೂಪರ ವಿಚಾರಗಳಿಗೆ ಸರಿಯಾದ ನ್ಯಾಯ, ಮನ್ನಣೆ ಸಿಗದೇ ಹೋಯಿತು. ಇತಿಹಾಸದ ನಿರೂಪಣೆಗಳ ಹುಸಿತನವನ್ನು ಬಯಲುಗೊಳಿಸಿದ ಇವರ ಬರವಣಿಗೆಗಳು ಮಾರ್ಕ್ಸ್‌ವಾದಿ ವಿಚಾರವಾದದ ಸೆರೆಯಲ್ಲಿ ಬಂಧಿಯಾಗಿ ಉಳಿಯಿತು.

ಮಾರ್ಕ್ಸ್‌ವಾದ, ಮಾವೋವಾದ, ಕಮ್ಯುನಿಸಂ, ಇಸ್ಲಾಮಿಕ್‌ ಮತ್ತು ಕ್ರಿಶ್ಚಿಯಾನಿಟಿಯ ಮೂಲಭೂತವಾದದ ಎದುರಿಗೆ ಹಿಂದುತ್ವದ ವಿಶ್ವಾತ್ಮಕತೆಯನ್ನು ರಾಮಸ್ವರೂಪ್‌ ಪ್ರತಿಪಾದಿಸುತ್ತಾರೆ. ನಮ್ಮ ದೇಶದ ಬೌದ್ಧಿಕ ವಲಯ ವಿಚಾರವಾದದ ಭ್ರಮೆಯಲ್ಲಿ ಕಮ್ಯುನಿಸಂ ಮತ್ತು ಮತೀಯ ಮೂಲಭೂತವಾದಿಗಳ ಕೈಯಲ್ಲಿ ಹೇಗೆ ಸಿಲುಕಿಕೊಂಡಿತ್ತು ಎನ್ನುವುದನ್ನು ತೋರಿಸಿಕೊಡುತ್ತಾರೆ. ಭಿನ್ನ ಧಾರೆಯ ವಿಚಾರಗಳಿಗೆ ಪ್ರವೇಶವನ್ನು ನೀಡದ ಒಂದು ಬಗೆಯ ವೈಚಾರಿಕ ಸರ್ವಾಧಿಕಾರದ ನಡುವೆಯೂ ರಾಮಸ್ವರೂಪರು ಬಲವಾಗಿಯೇ ತಮ್ಮ ಆಲೋಚನೆಗಳನ್ನು ಪ್ರತಿಪಾದಿಸಿದರು. ಜ್ಞಾನ ಪ್ರಸಾರದ ಎಲ್ಲಾ ಕೇಂದ್ರಗಳೂ, ಅಕಾಡೆಮಿಗಳು, ವಿಶ್ವವಿದ್ಯಾಲಯಗಳೂ ಮಾರ್ಕ್ಸ್‌ವಾದದ ಅಮಲಿನಲ್ಲಿ ತೇಲುತ್ತಿದ್ದಾಗ ಇವ್ಯಾವುದರ ನೆರವೂ ಇಲ್ಲದೆ ಸಲಗದಂತೆ ಎದುರು ನಿಂತರು.

13 ಬಹು ಮಹತ್ವದ ಕೃತಿಗಳನ್ನು ರಚಿಸಿದ ಇವರ ಒಂದೊಂದು ಕೃತಿಯೂ ಭಾರತೀಯ ವಿದ್ವತ್‌ ಲೋಕದ ಶ್ರೇಷ್ಠ ಕಾಣಿಕೆಗಳೆನ್ನಬಹುದು. Hindu View of Christianity and Islam, Understanding Islam through Hadis : Religious Faith or Fanaticism, Gandhism and Communism, A Hindu – Buddhist Rejoinder ಮೊದಲಾದ ಕೃತಿಗಳು ವಿಚಾರಲೋಕದಲ್ಲಿ ದಿಗ್ಭ್ರಮೆಯನ್ನೇ ಸೃಷ್ಟಿಸಿತು. ನಮ್ಮ ದೇಶದಲ್ಲಿ ನಡೆಯುವ ಅಸಹಿಷ್ಣುತೆ, ಮತಾಂಧತೆಯ ಚರ್ಚೆಯಲ್ಲಿ ಹಿಂದೂ ಧರ್ಮವನ್ನೇ ಅಪರಾಧಿಯ ಸ್ಥಾನದಲ್ಲಿ ನಿಲ್ಲಿಸಲಾಗುತ್ತದೆ. ಇದಕ್ಕೆ ಮುಖ್ಯ ಕಾರಣ ಕ್ರಿಶ್ಚಿಯನ್‌ ಮತ್ತು ಇಸ್ಲಾಂನ ರಿಲೀಜಿಯನ್‌ ದೃಷ್ಟಿಯಿಂದಲೇ ಹಿಂದೂ ಧರ್ಮವನ್ನು ನೋಡುತ್ತಿರುವುದು.ಆದರೆ ರಾಮ್‌ಸ್ವರೂಪ್‌ ಹಿಂದೂ ಧರ್ಮದ ದೃಷ್ಟಿಯಿಂದಲೇ ಈ ರಿಲಿಜಿಯನ್‌ಗಳನ್ನು ವಿಮರ್ಶಿಸುತ್ತಾರೆ. ಹಿಂದೂ ಆಧ್ಯಾತ್ಮಿಕತೆಯ ಧಾರಣೆಯ ಮುಂದೆ ಪ್ರವಾದಿ ಪ್ರವರ್ತಿತ ಮತಗಳು ಆಧ್ಯಾತ್ಮಿಕವಾಗಿ ಹೇಗೆ ಕುಬ್ಜವಾಗಿವೆ ಎನ್ನುವುದನ್ನು ಗುರುತಿಸುತ್ತಾರೆ. ಸೆಮೆಟಿಕ್‌ ಪಂಥಗಳ ಏಕದೇವೋಪಾಸನೆ, ಪ್ರವಾದಿ ತತ್ವಗಳು ಜಗತ್ತಿನ ಜನರನ್ನು ಹೇಗೆ ಬಲಿಪಶುಗಳನ್ನಾಗಿಸಿತು; ಜಿಹಾದ್‌, ಮತಾಂತರದ ಸಿದ್ಧಾಂತಗಳು ಇದಕ್ಕೆ ಹೇಗೆ ಕಾರಣ ಎನ್ನುವುದನ್ನು ಶೋಧಿಸುತ್ತಾರೆ. ಮತಾಂಧತೆ ಮತ್ತು ಅಸಹಿಷ್ಣುತೆಯ ಮೂಲ ಆಧ್ಯಾತ್ಮಿಕತೆಯ ಕಲ್ಪನೆಯನ್ನೆ ಹೊಂದಿರದ ಮತ ಪ್ರವರ್ತಕರು ಎನ್ನುವುದನ್ನು ಆಧಾರಸಹಿತ ವಿವರಿಸುತ್ತಾರೆ. ಇಂತಹ ಸಂದರ್ಭದಲ್ಲಿ ಜಗತ್ತಿನ ಜನರಿಗೆ ತೃಪ್ತಿ ನೀಡಬಲ್ಲ ಆಧ್ಯಾತ್ಮಿಕತೆಗೆ ಹಿಂದೂ ಧರ್ಮವೇ ಆಯ್ಕೆಯಾಗಿರುತ್ತದೆ. ಯಾಕೆಂದರೆ ಶತಮಾನಗಳ ಕಾಲ ಭೌತಿಕ ಹಾಗೂ ಸೈದ್ಧಾಂತಿಕ ದಾಳಿಯ ನಂತರವೂ ಈ ಪರಂಪರೆ ಉಳಿದುಕೊಂಡಿರುವುದು ಈ ಕಾರಣದಿಂದಲೇ. ಏಕದೇವೋಪಾಸನೆಯಅಪಾಯವನ್ನು, ಅದರ ಅಸಹಿಷ್ಣು ಹಾಗೂ ಆಕ್ರಮಣಶೀಲ ಗುಣದ ಅಪಾಯವನ್ನು ತೋರಿಸಿಕೊಡುತ್ತಾರೆ.

ರಾಮ್‌ಸ್ವರೂಪ್‌ ವಿಶ್ವದ ಮತತತ್ವಗಳನ್ನು ಹಿಂದೂ ಧರ್ಮದ ಜತೆಗೆ ತುಲನಾತ್ಮಕವಾಗಿ ಅಧ್ಯಯನ ನಡೆಸುತ್ತಾರೆ. ಏಕದೇವತಾವಾದಿ ಪಂಥಗಳಿಗಿಂತ ಹಿಂದೂ ಧರ್ಮ ಹೇಗೆ ವಿಶಿಷ್ಟವಾಗಿದೆ ಎನ್ನುವುದನ್ನು ನಿರೂಪಿಸುತ್ತಾರೆ. ಕ್ರಿಶ್ಚಿಯನ್‌ಪೂರ್ವ ಯುರೋಪ್‌ ಹಾಗೂ ಇಸ್ಲಾಮಿಕ್‌ಪೂರ್ವ ಪಶ್ಚಿಮ ಏಷ್ಯನ್‌ ಸಂಸ್ಕೃತಿಯ ಶೋಧದ ಬಗ್ಗೆ ಕುತೂಹಲವನ್ನು ತಾಳಿದ್ದ ಅವರು ಮಿಷನರಿ ಮಾದರಿಯ ಆಕ್ರಮಣಶೀಲತೆಯ ಪರಿಣಾಮಗಳ ಕಡೆಗೆ ಜಗತ್ತಿನ ಗಮನ ಸೆಳೆಯುತ್ತಾರೆ. ಇದರ ಜತೆಗೆ ಜಗತ್ತಿನ ಮಾನವೀಯ ಭವಿಷ್ಯಕ್ಕಾಗಿ, ಸರ್ವರ ಒಳಿತಿಗಾಗಿ ಹಿಂದೂ ಧರ್ಮದ ಮೌಲ್ಯಗಳು ಹೇಗೆ ಅವಶ್ಯಕ ಎನ್ನುವುದನ್ನೂ ಪ್ರಸ್ತುತಪಡಿಸುತ್ತಾರೆ. ಪಾಶ್ಚಿಮಾತ್ಯ ರಿಲಿಜಿಯನ್‌ ಹಾಗೂ ವಿಜ್ಞಾನದ ಮಿತಿಗಳ ಬಗ್ಗೆ ಆಳವಾದ ಅರಿವನ್ನು ಪಡೆದಿದ್ದ ರಾಮಸ್ವರೂಪರು, ಹಿಂದೂ ಧರ್ಮವನ್ನು ವಿಶ್ವದ ಸಮಸ್ಯೆಗಳಿಗೆ ಶಾಶ್ವತವಾದ ಪರಿಹಾರವಾಗಿ ಕಂಡುಕೊಳ್ಳುತ್ತಾರೆ.

‘ಹದೀಸ್‌ಗಳು ಚಿತ್ರಿಸುವ ಇಸ್ಲಾಂ’ ಕೃತಿ ಇಸ್ಲಾಂನ ವಿಮರ್ಶಾತ್ಮಕ ಅಧ್ಯಯನಗಳಲ್ಲೊಂದು. ಇಸ್ಲಾಂನ ಜಡ ಸ್ವಭಾವದ ಹಿಂದಿರುವ ಕಾರಣಗಳ ಶೋಧವನ್ನು ಮಾಡುವ ಈ ಕೃತಿ, ಬದಲಾವಣೆಯನ್ನು ವಿರೋಧಿಸುವ, ಮತೀಯವಾದಿ ಮಾನಸಿಕತೆಯ ಕಾರಣಗಳನ್ನು ಹದೀಸ್‌ ಸಾಹಿತ್ಯದಲ್ಲಿ ಕಾಣುತ್ತಾರೆ. ಆದರೆ ಈ ಕೃತಿಯನ್ನು ಅಭಿವ್ಯಕ್ತಿ ಸ್ವಾತಂತ್ರ್ಯದ ಕತ್ತು ಹಿಸುಕಲು ಸಿದ್ಧವಾಗಿದ್ದ ದಿಲ್ಲಿ ಸರಕಾರ ನಿಷೇಧಿಸಿತು. ವರ್ಷಗಳ ಹೋರಾಟದ ನಂತರ ದಿಲ್ಲಿ ಉಚ್ಚ ನ್ಯಾಯಾಲಯವು ಈ ನಿಷೇಧವನ್ನು ಹಿಂಪಡೆಯಿತು. ರಾಮ್‌ಸ್ವರೂಪ್‌ ತಮ್ಮ ವಿದ್ವತ್‌ ಪರಂಪರೆಯನ್ನು ಸೀತಾರಾಮ್‌ ಗೋಯೆಲ್‌ ಎಂಬ ಅಷ್ಟೇ ವಿದ್ವತ್‌ಪೂರ್ಣ ವ್ಯಕ್ತಿಗೆ ಮಾರ್ಗದರ್ಶಕನಾಗಿ ಮುಂದುವರಿಸಿದರು. ತಮ್ಮ ಕೃತಿಗಳನ್ನು ಪ್ರಕಟಿಸಲು ಪ್ರಕಾಶಕರು ಮುಂದೆ ಬಾರದಿದ್ದಾಗ ‘ವಾಯ್ಸ್‌ ಆಫ್‌ ಇಂಡಿಯಾ’ ಎನ್ನುವ ಪ್ರಕಾಶನ ಸಂಸ್ಥೆಯನ್ನು ದಿಲ್ಲಿಯಲ್ಲಿ ಸ್ಥಾಪಿಸಿ ಹಲವು ವಿದ್ವಾಂಸರ ಕೃತಿಗಳ ಪ್ರಕಟಣೆಗೆ ನೆರವಾದರು.

ದಿಟ್ಟ ಹಾಗೂ ನೇರ ವಿಚಾರ ಮಂಡನೆಯ ರಾಮಸ್ವರೂಪರನ್ನು ಈ ದೇಶದ ವೈಚಾರಿಕ ವಲಯ ಗುರುತಿಸಲೇ ಇಲ್ಲ. ಅವರ ಕೃತಿಗಳು ನಮ್ಮ ಇತಿಹಾಸಕಾರರಿಗೆ, ವಿಶ್ವವಿದ್ಯಾಲಯಗಳ ಅಧ್ಯಯನ ಪೀಠಗಳಿಗೆ ಅಧ್ಯಯನದ ಸರಕಾಗಲೇ ಇಲ್ಲ. ದೇಶದ ಯಾವೊಂದು ವಿಶ್ವವಿದ್ಯಾಲಯವೂ ಬಹುಶಃ ಈ ಮಹಾಮೇಧಾವಿಯ ಹೆಸರಿನಲ್ಲಿ ಅಧ್ಯಯನ ಕೇಂದ್ರವನ್ನು ತೆರೆಯಲೇ ಇಲ್ಲ. 2019-2020 ರಾಮ್‌ಸ್ವರೂಪ್‌ ಅವರ ಜನ್ಮ ಶತಮಾನ ವರ್ಷ. ಪ್ರಾಜ್ಞರೊಬ್ಬರ ಜನ್ಮಶತಮಾನವನ್ನು ಈ ದೇಶದ ವಿದ್ವತ್‌ ಸಂಸ್ಥೆಗಳು ಗೌರವದಿಂದ ಆಚರಿಸುವಂತಾಗಬೇಕು. ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ, ವಿಶ್ವವಿದ್ಯಾಲಯಗಳ ಮೂಲಕ ರಾಮಸ್ವರೂಪ್‌ ಹೆಸರಿನಲ್ಲಿ ಅಧ್ಯಯನ ಕೇಂದ್ರವನ್ನು ಆರಂಭಿಸಬೇಕು. ಆ ಮೂಲಕ ಎಲ್ಲಾ ಸವಾಲುಗಳ ನಡುವೆಯೂ ಅಧ್ಯಯನವನ್ನೇ ಜೀವನದ ವ್ರತವಾಗಿಸಿಕೊಂಡ ಈ ಮಹನೀಯರಿಗೆ ಗೌರವವನ್ನು ಸಲ್ಲಿಸಬೇಕು. ವಿಶ್ವವಿದ್ಯಾಲಯಗಳು ಈ ಸಂದರ್ಭದಲ್ಲಾದರೂ ಅವರ ವಿಚಾರಗಳಿಗೆ ಮುಖಾಮುಖಿಯಾಗಬೇಕು. ಅವರ ಕೃತಿಗಳು ದೇಶದ ಬೇರೆ ಬೇರೆ ಭಾಷೆಗಳಿಗೆ ಅನುವಾದಗೊಳ್ಳಬೇಕಾಗಿದೆ. ಕನ್ನಡ ಭಾಷೆಗೆ ಸರಕಾರಿ ಅನುವಾದ ಅಕಾಡೆಮಿಯೊಂದಿದ್ದರೂ, ಅನುವಾದಕ್ಕಾಗಿಯೇ ಕೆಲಸ ಮಾಡುವ ವಿಶ್ವವಿದ್ಯಾಲಯಗಳ ವಿಭಾಗಗಳಿದ್ದರೂ ಅವರ ಪುಸ್ತಕಗಳು ಕನ್ನಡಕ್ಕೆ ಬಂದಿಲ್ಲ! (ಸಾಹಿತ್ಯ ಸಿಂಧು ಪ್ರಕಾಶನ ಅವರ ‘ಹದೀಸ್‌ ಚಿತ್ರಿಸುವ ಇಸ್ಲಾಂ’ ಪುಸ್ತಕವನ್ನು 2012ರಲ್ಲಿ ಪ್ರಕಟಿಸಿದೆ). ಹಿಂದು ಚಿಂತನೆಯನ್ನೇ ಅಪಾಯಕಾರಿಯಾಗಿ ಬಿಂಬಿಸುತ್ತಾ ಬಂದ ನಮ್ಮ ಸೋಗಲಾಡಿ ಬುದ್ಧಿಜೀವಿ ಬಳಗ ರಾಮಸ್ವರೂಪರನ್ನು ಅವರ ಚಿಂತನೆಯ ಸತ್ವ ಹಿಂದುತ್ವದಲ್ಲಿದೆ ಮತ್ತು ಸೆಕ್ಯುಲರಿಸಂ ಹೆಸರಿನಲ್ಲಿ ಓಲೈಸುತ್ತಾ ಬಂದ ರಿಲಿಜಿಯನ್‌ಗಳ ಅಪಾಯಗಳನ್ನು ನಿರ್ಭೀತವಾಗಿ ಪ್ರತಿಪಾದಿಸುತ್ತಾರೆ ಎನ್ನುವ ಕಾರಣಕ್ಕಾಗಿ ವ್ಯವಸ್ಥಿತವಾಗಿಯೇ ಮೂಲೆಗುಂಪು ಮಾಡಿತು ಎನ್ನುವುದರಲ್ಲಿ ಸಂಶಯವಿಲ್ಲ. ಇನ್ನಾದರೂ ವಿಚಾರಕ್ಕೆ ತೊಡಿಸಿದ ಪರದೆ ಸರಿಯಲಿ, ಶತಮಾನದ ಬೆಳಕು ದೇಶದೆಲ್ಲೆಡೆ ಪಸರಿಸಲಿ.

ನಿಮ್ಮ ಅನಿಸಿಕೆ...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Google photo

You are commenting using your Google account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s

Note: HTML is allowed. Your email address will never be published.

Subscribe to comments