ಬೆಂಕಿಯಲ್ಲಿ ಅರಳುವ ಹೂವುಗಳು…

ಅದುವರೆಗೂ ಇದ್ದದ್ದೆಲ್ಲಾ ಮಾಡಿ, ದಾರಿ ಹೋಕರಿಗೆ ದಮ್ಮಯ್ಯಾ ಹಾಕಿ ದೂಡಲು ಸಹಾಯ ಮಾಡುವಂತೆ ವಿನಂತಿಸಿ ಏನೆಲ್ಲಾ ಸರ್ಕಸ್ ಮಾಡಿದ್ದರೂ ಸ್ಟಾರ್ಟ್ ಆಗದ ಕಾರು ಫಿಟ್ಟರ್ ಕೈ ಸೋಂಕಿದ ಕೂಡಲೇ ಗುಯ್ ಗುಯ್ ಎನ್ನುತ್ತದೆ. ಒಂದರ್ಥದಲ್ಲಿ ಇವರೆಲ್ಲಾ ಪಲ್ಸ್ ಹಿಡಿದು ಪರೀಕ್ಷಿಸುವ ಡಾಕ್ಟರ್ ತರಹದವರು. ಮುಟ್ಟಿದ ಕೂಡಲೇ ನಾಚಿಕೆ ಮುಳ್ಳು ಮುನಿಯುವಂತೆ ಇವರ ಕೈ ತಾಗಿದ ಕೂಡಲೆ ಸಮಸ್ಯೆ ಸರಿಯಾಗುತ್ತದೆ. ಅಷ್ಟು ಚೆನ್ನಾಗಿ ಯಂತ್ರದ ಭಾಷೆಯನ್ನು ಅರ್ಥೈಸಿಕೊಂಡಿರುವ ಫಿಟ್ಟರ್ ಗಳಿದ್ದಾರೆ.

ಫಿಟ್ಟರ್ ಆಗಬೇಕೆಂದು ಬಯಸುವವರಿಗೆ ಐಟಿಐಗಳು ಶಿಕ್ಷಣ ಕೊಡುತ್ತವೆ. ದುರಂತವೋ ಅಥವಾ ಒಳ್ಳೆಯ ಬೆಳವಣಿಗೆಯೆಂಬಂತೆ ಇವರಲ್ಲಿ ಶೇ.99ರಷ್ಟು ಮಂದಿ ವಿದೇಶದಲ್ಲೋ, ಮಹಾನಗರದಲ್ಲೋ ದೊಡ್ಡ ಕಂಪೆನಿಗಳಲ್ಲಿ ಭವಿಷ್ಯ ಕಂಡುಕೊಳ್ಳುತ್ತಾರೆ. ಉಳಿದವರು ಮೈ – ಕೈಗೆ ಗ್ರೀಸ್ ತಾಗುವ ಕೆಲಸ ಕಷ್ಟ ಎಂದು ಫೀಲ್ಡ್ ನಿಂದ ದೂರವಾಗುತ್ತಾರೆ. ಕಂಪೆನಿ ಶೋರೂಮ್ ಹೊರತು ಪಡಿಸಿ ಹೆಚ್ಚಿನ ಫಿಟ್ಟರ್ ಗಳೆಲ್ಲಾ 7ರಿಂದ 10ನೇ ಕ್ಲಾಸ್ ನಂತರ ಶಾಲೆ – ಕಾಲೇಜು ಮುಖ ನೋಡಿದವರಲ್ಲಾ. ಆರ್ಥಿಕ ಕಾರಣದಿಂದ ಅರ್ಧದಷ್ಟು ಜನ ಈ ಕ್ಷೇತ್ರಕ್ಕೆ ಬಂದರೆ ಉಳಿದವರು ಓದಿ ಏನು ಮಣ್ಣು ಹೊರುವುದು ಎಂದು ಫಿಟ್ಟಿಂಗ್ ಕೆಲಸಕ್ಕಿಳಿಯುತ್ತಾರೆ.
ಪ್ರಾರಂಭದಲ್ಲಿ ಯಾರಾದರೊಬ್ಬ ಎಕ್ಸಪರ್ಟ್ ಫಿಟ್ಟರ್ ಬಳಿ ಕೆಲಸ ಮಾಡುತ್ತಾರೆ. ಅಲ್ಲಿ ಸಮಯದ ಮಿತಿ ಇರುವುದಿಲ್ಲ. ಬೆಳಿಗ್ಗೆ 8ಕ್ಕೆ ಕೆಲಸಕ್ಕೆ ಹಾಜರಾದರೆ ಮತ್ತೆ ಮನೆ ಮುಖ ನೋಡುವಾಗ ರಾತ್ರಿ 11 ಆದರೂ ಆಯ್ತು. ಪ್ರಾರಂಭದಲ್ಲಿ ಸಂಬಳ ಕೇಳೋ ಹಾಗಿಲ್ಲ. ಊಟ ಹಾಕಿದರೇನೆ ದೊಡ್ಡದು. ಹೆಚ್ಚಿನವರೆಲ್ಲಾ ಕೆಲಸ ಕಲಿಯುವವರಿಗೆ ವಾರಕ್ಕಿಷ್ಟು ಎಂದು ಪ್ರೋತ್ಸಾಹ ಧನ ಕೊಡುತ್ತಾರೆ. ಜೊತೆಗೆ ಒಮ್ಮೊಮ್ಮೆ ಗುರುವಿನಿಂದ ಲಿವರ್, ಸ್ಪಾನರ್ ಏಟು ತಿನ್ನಬೇಕಾಗುತ್ತದೆ! ಫಿಟ್ಟಿಂಗ್ ಕೆಲಸದ ಪಾಠಗಳನ್ನು ಇಲ್ಲೇ ಕಲಿಯುವ ಇವರ ಬದುಕು ಯಾವತ್ತಿದ್ದರೂ ಬೆಂಕಿಯ ಜೊತೆ ಸರಸವಾಡಿದಂತೆ. ಗಾಯಗಳೆಲ್ಲಾ ಆಗುವುದು ಜುಜುಬಿ ಎಂಬಂತೆ. ಆದರೂ ಬೆಂಕಿಯಲ್ಲಿ ಅರಳಿದ ಹೂವು ಎಂಬಂತೆ ಮುಂದೆ ತಮ್ಮ ಕ್ಷೇತ್ರದಲ್ಲೇ ಉಜ್ವಲ ಭವಿಷ್ಯ ಕಟ್ಟಿಕೊಳ್ಳುವ ಹಲವಾರು ಯುವ ಚೇತನಗಳನ್ನು ಇಲ್ಲಿ ಕಾಣಬಹುದು.