ಕಾಂಗ್ರೆಸ್ ಸಂಸದ ಭಾರತಕ್ಕೆ ಸೇರಿದವನಲ್ಲವೇ?

ಮಹೇಶ ಪ್ರಸಾದ ನೀರ್ಕಜೆ

ಅರುಣಾಚಲ ಪ್ರದೇಶ ಪ್ರವಾಸದಲ್ಲಿರುವ ಬಾಬಾ ರಾಮ್ ದೇವ್ ಸಮಾವೇಶಕ್ಕೆ ಬಂದಿದ್ದ ಅಲ್ಲಿನ ಕಾಂಗ್ರೆಸ್ ಸಂಸದ ನಿನಾಂಗ್ ಎರಿಂಗ್ ಬಾಬಾ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದರು ಎಂಬುದು ಇತ್ತೀಚಿನ ಸುದ್ದಿ. “ಯು ಬ್ಲಡಿ ಇಂಡಿಯನ್”, “ಸಾಲೆ ಕುತ್ತೇ, ಮೈಕ್ ತೋಡ್ ದೂಂಗಾ, ಸ್ಟೇಜ್ ಫೋಡ್ ದೂಂಗಾ, ಯೋಗಾ ಕರ್ನೇ ಆಯೀ ಹೇ, ಯೋಗಾ‌ ಕರ್. ಕರಪ್ಷನ್ ಕೆ ಬಾರೇ ಮೇ ಬೋಲೇಗಾ ತೋ ಮಾರ್ ಡಾಲೂಗಾ!” ಇತ್ಯಾದಿ. ಈ ಬಗ್ಗೆ ಸಾಕಷ್ಟು ವಿವರಗಳು ಸಿಗುತ್ತಿವೆ ಅಂತರ್ಜಾಲದಲ್ಲಿ. ನಮ್ಮ ಟಿವಿ ಮಾಧ್ಯಮಗಳು ಭಾರತ ಬಾಂಗ್ಲಾದೇಶ ಕ್ರಿಕೆಟ್ ಪಂದ್ಯದಲ್ಲಿ ಹೇಗೆ ಭಾರತ ಬಾಂಗ್ಲಾದೇಶದ ಮೇಲೆ ಸೇಡು ತೀರಿಸಿಕೊಂಡಿತು ಎಂದು ವಿಮರ್ಷಿಸುವುದರಲ್ಲಿ ಬ್ಯುಸಿಯಾಗಿದ್ದವು. ಅವುಗಳಿಗೆ ಹೇಗೆ ಈಶಾನ್ಯ ಭಾರತದ ಮಂದಿ ಹೇಗೆ ಭಾರತದ ಮೇಲೆ ಸೇಡು ತೀರಿಸಿಕೊಳ್ಳುತ್ತಿದ್ದಾರೆ ಎಂದು ಬೇಕಿಲ್ಲ. ಇರಲಿ. ಈಗ ಪ್ರಶ್ನೆಯೇನೆಂದರೆ ಕಾಂಗ್ರೆಸ್ ಸಂಸದ ಬಾಬಾರನ್ನು “ಯೂ ಬ್ಲಡಿ ಇಂಡಿಯನ್”ಅನ್ನಬೇಕಿದ್ದರೆ ಆತ ಇಂಡಿಯನ್ ಅಲ್ಲವೇ? ಎಲ್ಲಿಯವನು ಆತ? ಚೈನಾದವನೇ? ಅಥವಾ ಬೋಡೋ ದೇಶದವನೇ? ಅಥವಾ ಬೇರೆ ಪಾಶ್ಚಿಮಾತ್ಯ ದೇಶದವನೇ?

ನಿನಾಂಗ್ ಮಾತ್ರವಲ್ಲ, ಈಶಾನ್ಯ ಭಾರತದಲ್ಲಿ ಮಹುಪಾಲು ಜನ ತಾವು ಭಾರತೀಯರು ಎಂದು ಕರೆಸಿಕೊಳ್ಳುವುದಿಲ್ಲ. ಇದಕ್ಕೆ ಅಪವಾದಗಳಿರಬಹುದು, ಆದರೆ ಬಹುಪಾಲು ಸತ್ಯ ಇದು. ಸದ್ಯಕ್ಕೆ ಈ ನಿಂದನೆ ಪ್ರಕರಣವನ್ನು ಬಿಟ್ಟು ಸಾಮಾನ್ಯವಾಗಿ ಈಶಾನ್ಯ ಭಾರತದ ಜನ ಯಾಕೆ ಈ‌ರೀತಿ ಯೋಚಿಸುತ್ತಾರೋ ನೋಡೋಣ. ಭಾರತದ ಯಾವ ತಪ್ಪಿಗೆ ಈಶಾನ್ಯ ಭಾರತದ ಮಂದಿ ಈ ರೀತಿ ದ್ವೇಷ ಕಾರುತ್ತಾರೆ? ಉತ್ತರ ಹುಡುಕಿದರೆ ನಮ್ಮಲ್ಲೇ ಸುಲಭವಾಗಿ ಸಿಗುತ್ತದೆ. ಇಲ್ಲೇ ಬೆಂಗಳೂರಿನಲ್ಲಿ ಕಾಣಸಿಗುವ ಅಲ್ಲಿನ ಯುವಕ ಯುವತಿಯರನ್ನು ನಾವು ಎಷ್ಟು ವಿಚಿತ್ರವಾಗಿ ನೋಡುತ್ತೇವೆ ಯೋಚಿಸಿ. ಗೆಳೆಯರ ಬಳಗದಲ್ಲೇ ಎಷ್ಟೋ ಜನ ಇಂಥವರನ್ನು “ಚೈನೀಸ್, ಚೈನೀಸ್” ಎಂದು ಮೂದಲಿಸುವವರನ್ನು ನೋಡಿ ಉರಿದು ಹೋಗಿದ್ದೇನೆ. ಅಲ್ಲಾ ಸ್ವಾಮಿ, ಅವರು ಭಾರತದವರೇ ತಾನೆ, ಚೈನೀಸ್ ಎಂದು ಕರೆದು ಧೂರ್ತ ಚೈನಾ ದೇಶದ ವಾದವನ್ನೇ ಪುರಸ್ಕರಿಸುತ್ತಿದ್ದೀರಲ್ಲ ಎಂದು ಅನಿಸುತ್ತದೆ. ಅಂಥಾ ಮನೋಭಾವದಿಂದಾಗಿಯೇ ಅವರು ಇಂದು ನಮ್ಮನ್ನು ದ್ವೇಷಿಸುತ್ತಿದ್ದಾರೆ. ವಾಜಪೇಯಿ ಸರಕಾರವೊಂದನ್ನು ಹೊರತುಪಡಿಸಿ ಇಲ್ಲಿವರೆಗಿನ ಮಹಾನ್ ಭಾರತದ ಅತಿಮಹಾನ್ ಸರಕಾರಗಳು ಈಶಾನ್ಯವನ್ನು ಎಷ್ಟು ಕಡೆಗಣಿಸಿದ್ದಾರೆದಂದು ತಿಳಿದರೆ ಅಲ್ಲಿನವರು ಏಕೆ ಸಿಡಿದು ಬೀಳುತ್ತಾರೆಂದು ಅರ್ಥವಾಗುತ್ತದೆ. ಮೊದಲನೆಯದಾಗಿ ಅಲ್ಲಿನ ಬಂಡುಕೋರರಿಂದ ಜನರನ್ನು ರಕ್ಷಿಸಲು ಸರಕಾರ ಇಷ್ಟು ವರ್ಷಗಳಿಂದಲೂ ವಿಫಲವಾಗಿದೆ. ಚೈನಾ ಕಡೆಯಿಂದ ಮಾರಕಾಸ್ತ್ರಗಳನ್ನು ತರುವ ಉಗ್ರರನ್ನು ನೋಡಿಯೂ ಬಿಎಸ್ಸೆಫ್ ಯೋಧ ಸುಮ್ಮನಿರುತ್ತಾನೆ. ಏಕೆ ಹೇಳಿ, ಆ ಉಗ್ರ ಚೈನಾದಿಂದ ತರುತ್ತಿರುವುದು ಅತ್ಯಾಧುನಿಕ ರೈಫಲ್. ಯೋಧನ ಕೈಯಲ್ಲಿರುವುದು ಸರಿಸಾಟಿಯಲ್ಲದ ಇನ್ಸಾಸ್ ತೋಪು. ಉಗ್ರರನ್ನು ವಿರೋಧಿಸಿದರೆ ಈತನಿಗೆ ಉಳಿವಿಲ್ಲ. ಆಧುನಿಕ ಶಸ್ತ್ರಾಸ್ತ್ರ ಸರಕಾರ ಕೊಡಿಸುತ್ತಿಲ್ಲ. ತನ್ನ ಜನರನ್ನೇ ರಕ್ಷಿಸಲು ಸಾಧ್ಯವಾಗದ ಕುನ್ನಿ ಸರಕಾರವನ್ನು ಅಲ್ಲಿನ ಜನ ಯಾಕಾದರೂ ಗೌರವಿಸುತ್ತಾರೆ? ಇದು ಎಲ್ಲ ಕಡೆ ಕೇಳಿ ಬರುವ ಪ್ರಶ್ನೆ.

ಮುಖ್ಯ ಭಾರತದಿಂದ ಯಾರೇ ಆದರೂ ಅಲ್ಲಿನ ಮಕ್ಕಳನ್ನು ಕರೆತಂದು ಶಿಕ್ಷಣ ಕೊಡಿಸಲು ಮುಂದೆ ಬಂದರೆ ಅಲ್ಲಿನವರು ತಮ್ಮ ಮಕ್ಕಳನ್ನು ಕಳಿಸಲು ತಯಾರಿದ್ದಾರಂತೆ. ಅವರಿಗೂ‌ ತಮ್ಮ ಮಕ್ಕಳು ಕಲಿತು ಮುಂದೆ ಬರಬೇಕೆಂದು ಆಸೆ ಇರುವುದು ಸಹಜ ತಾನೆ. ಆದರೆ ಸರಕಾರ ಅಥವಾ ಜನ ಇದನ್ನು ಪ್ರೋತ್ಸಾಹಿಸುತ್ತದೆಯೇ, ಖಂಡಿತಾ ಇಲ್ಲ. ಸಂಘಪರಿವಾರದ ಕೆಲವು ಜನ ಅಲ್ಲಿನ ಕೆಲವು ಮಕ್ಕಳನ್ನು ಕರೆತಂದು ತಮ್ಮ ತಮ್ಮ ಮನೆಗಳಲ್ಲಿ, ಸಣ್ಣ ಪುಟ್ಟ ಶಾಲೆಗಳಲ್ಲಿಟ್ಟುಕೊಂಡು ಓದು ಬರಹ ಕಲಿಸುತ್ತಿದ್ದಾರಂತೆ. ಈ ಬಗ್ಗೆ ಕೆಲ ಸಮಯಗಳ ಹಿಂದೆ ಪತ್ರಿಕೆಗಳಲ್ಲಿ ವರದಿ ಬಂದಿತ್ತು – ಅವರೇನೋ ಚೈಲ್ಡ್ ಟ್ರಾಫಿಕಿಂಗ್ ಮಾಡುತ್ತಿದ್ದಾರೆ ಹಾಗೆ ಹೀಗೆ ಅಂತ. ಹೆತ್ತವರ ಒಪ್ಪಿಗೆ ಮೇರೆಗೆ ಮಕ್ಕಳನ್ನು ಕರೆತಂದರೂ ಕೂಡ ಅದು ಟ್ರಾಫಿಕಿಂಗ್ ಆಗುತ್ತದೆಯೇ? ಈ ಪತ್ರಿಕೆಗಳಲ್ಲಿ ಬರೆಯುವವರು ಅಥವಾ ಅವರ ಕೈಯಲ್ಲಿ ಬರೆಸುವವರು ಮನುಷ್ಯರೋ ಅಥವಾ‌ ಕಲ್ಲು  ಹೃದಯದವರೋ ಎಂದು ಇಂಥಾ ಸುದ್ದಿಗಳನ್ನು ಓದಿದರೆ ಸಂಶಯವಾಗುತ್ತದೆ.

ಪರಿಸ್ಥಿತಿ ಹೀಗೆಯೇ ಮುಂದುವರೆದರೆ ನಾಳೆ ಬಾಬಾ ಅಥವಾ ಯಾರೇ ಆದರೂ ಈಶಾನ್ಯ ಭಾರತಕ್ಕೆ ಹೋಗಲು ವೀಸಾ ತೆಗೆದುಕೊಳ್ಳಬೇಕಾದ ಪರಿಸ್ಥಿತಿ ಬಂದರೆ ಆಶ್ಚರ್ಯವಿಲ್ಲ. ಮೇರಾ ಭಾರತ್ ಮಹಾನ್! ಮಾತು ಶೀರ್ಷಿಕೆಯ ವಿಷಯಕ್ಕಿಂತ ಬಹು ದೂರ ಹೋಯಿತು. ಆದರೆ Symptoms ಗಳ ಬಗ್ಗೆಯೇ ಬರೆಯುವುದಕ್ಕಿಂತ ಅದರ ಮೂಲ ಹುಡುಕುವುದು ಮುಖ್ಯ. ಏನಂತೀರಿ?

ಚಿತ್ರ ಕೃಪೆ : ಐನ್ಯೂಸ್ ಇಂಡಿಯ