ಎರಡು ಹೇಳಿಕೆಗಳು ಮತ್ತು ಇಬ್ಬಗೆ ನೀತಿಗಳು

– ರಾಕೇಶ್ ಶೆಟ್ಟಿ

* ಹೇ ಹಿಂದುಸ್ಥಾನ್,ನೀವು 100 ಕೋಟಿ ಜನಗಳು ಇದ್ದೀರಿ ಅಲ್ವಾ? ನಾವು 25 ಕೋಟಿ ಇದ್ದೀವಿ ಅಲ್ವಾ? ಹದಿನೈದು ನಿಮಿಷಗಳ ಕಾಲ ಪೋಲಿಸರನ್ನು ಪಕ್ಕಕ್ಕೆ ಕೂರಿಸಿ ನಮ್ಮ ತಾಕತ್ತು ತೋರಿಸುತ್ತೇವೆ.
* ಅರೆ,ಯಾವ ಮೋದಿ?ಎಲ್ಲಿಯ ಮೋದಿ? ಅವನಿಗೆ ಧೈರ್ಯವಿದ್ದರೆ ಹೈದರಾಬಾದ್ ಗೆ ಒಂದು ಬಾರಿ ಬಂದು ಹೋಗಲು ಹೇಳಿ.
* ನಾವು ಇಲ್ಲಿಂದ ಹೋಗುವುದಾದರೆ ತಾಜ್ ಮಹಲ್,ಚಾರ್ಮಿನಾರ್ ಎಲ್ಲವನ್ನೂ ಜೊತೆಗೆ ಕೊಂಡೊಯ್ಯುತ್ತೇವೆ,ಕಡೆಗೆ ಉಳಿಯುವುದು ಮುರುಕಲು ರಾಮ ಮಂದಿರವೊಂದೆ.

ಹೇಗಿದೆ ಮೇಲಿನ ವಾಕ್ಯಗಳು? ಓದಿದರೆ ಮೈ ಉರಿಯುವಂತೆ ಇದೆಯಲ್ಲವೇ? ಇದೆಲ್ಲ ವಾರದ ಹಿಂದೆ ಹೈದರಾಬಾದ್ ನಲ್ಲಿ MIM ಪಕ್ಷದ ಶಾಸಕ ಅಕ್ಬರುದ್ದೀನ್ ಒವೈಸಿ ಮಾಡಿದ ಕೋಮು ದ್ವೇಷದ ಕಿಡಿ ಹಚ್ಚುವ ಭಾಷಣದ ಕೆಲವೇ ಕೆಲವು ವಾಕ್ಯಗಳಷ್ಟೇ. ಸುಮಾರು 45 ನಿಮಿಷಗಳಷ್ಟಿರುವ ಆ ಇಡಿ ಭಾಷಣದ ತುಂಬಾ ಇರುವುದು ದ್ವೇಷ ಹುಟ್ಟಿಸುವ,ಬೆಂಕಿ ಹಚ್ಚುವಂತ ಇಂತ ಮಾತುಗಳೇ.ಈ ಮೇಲಿನ ವಾಕ್ಯಗಳಲ್ಲಿ ನಿಮಗೆ ಬೆಂಕಿ ಹಚ್ಚುವಂತದ್ದು ಏನು ಕಾಣದಿದ್ದರೆ,ಬಹುಷಃ ಒವೈಸಿಯ ಉರ್ದು ಮಿಶ್ರಿತ ಹಿಂದಿ ಭಾಷಣವನ್ನು ಅನುವಾದ ಮಾಡುವಲ್ಲಿ ನಾನು ಸೋತಿದ್ದೇನೆ ಅಷ್ಟೇ ಹೊರತು ಅವನ ಭಾಷಣ ತಂಪಾಗಿರಲಿಲ್ಲ.ಒವೈಸಿಯ ಭಾಷಣವನ್ನು ಕೇಳಿ ಉನ್ಮತ್ತರಾದವರು ಏನೆಲ್ಲಾ ಮಾಡಬಹುದು ಅನ್ನುವ ಸ್ಯಾಂಪಲ್ ಬೇಕು ಅನ್ನಿಸಿದರೆ 2012ರ ಆಗಸ್ಟ್ ತಿಂಗಳಲ್ಲಿ ,ಮುಂಬೈನ ಆಜಾದ್ ಮೈದಾನದಲ್ಲಿ ಏನಾಗಿತ್ತು ಅನ್ನುವುದನ್ನೊಮ್ಮೆ ನೆನಪಿಸಿಕೊಳ್ಳಿ.ಅಂದ ಹಾಗೆ ಈ ಅಕ್ಬರ್ ಒವೈಸಿ ಯಾರು ಗೊತ್ತಾ,ಈ ದೇಶದ ಸಂಸತ್ತಿನಲ್ಲಿ ನಿಂತು “ಕೇಂದ್ರ ಸರ್ಕಾರಕ್ಕೆ,ಇಲ್ಲಿರುವ ಸಂಸದರಿಗೆ ನಾನು ಎಚ್ಚರಿಕೆ ಕೊಡುತಿದ್ದೇನೆ,ಒಂದು ವೇಳೆ ಅಸ್ಸಾಂ ಗಲಭೆಯ ಮುಸ್ಲಿಂ ನಿರಾಶ್ರಿತರಿಗೆ ಸರಿಯಾದ ಪರಿಹಾರ ಸಿಗಲಿಲ್ಲವಾದರೆ, ಮುಸ್ಲಿಂ ಯುವಕರು ಮುಲಭೂತವಾದಿಗಳಾಗುವುದನ್ನು ನೋಡಬೇಕಾಗುತ್ತದೆ’ ಅಂತ ಬೆದರಿಕೆ ಹಾಕುವಂತ ಭಾಷಣ ಮಾಡಿದ್ದ ಅಸಾದುದ್ದೀನ್ ಒವೈಸಿಯ ತಮ್ಮ.

ಠಾಕ್ರೆ ಸತ್ತಾಗ ಮುಂಬೈ ಸ್ತಬ್ಧವಾಗಿದ್ದನ್ನು ಪ್ರತಿಭಟಿಸಿ ಸಿಟ್ಟನ್ನು ಫೇಸ್ಬುಕ್ ಮೂಲಕ ಹೊರ ಹಾಕಿದ್ದಕ್ಕೆ ಕಾಲೇಜು ವಿದ್ಯಾರ್ಥಿನಿಯರನ್ನು ನಿಂತ ನಿಲುವಲ್ಲೇ ಬಂಧಿಸುವ ಈ ವ್ಯವಸ್ಥೆಯ ಕಣ್ಣಿಗೆ, ಒವೈಸಿಯನ್ನು ಕಂಬಿಯ ಹಿಂದೆ ಹಾಕಲು ವಾರಗಳೇ ಬೇಕಾಯಿತು.ಅದೂ, ಯಥಾ ಪ್ರಕಾರ ಜೈಲಿಗೆ ಕರೆ ಬಂದಾಗ ರಾಜಕಾರಣಿಗಳಿಗೆ ಬರುವ ದೊಡ್ಡ ರೋಗ ಬಂದಿತ್ತು ಅನ್ನುವ ನಾಟಕವೆಲ್ಲ ಆದಮೇಲೆ! ಇದೆಲ್ಲ ವ್ಯವಸ್ಥೆಯ ವ್ಯಂಗ್ಯವಲ್ಲದೇ ಮತ್ತಿನ್ನೇನು?

ಕಳೆದ ಲೋಕಸಭಾ ಚುನಾವಣೆಯ ಪ್ರಚಾರ ಸಭೆಯೊಂದರಲ್ಲಿ ವರುಣ್ ಗಾಂಧೀ ‘ಕೈ ಕತ್ತರಿಸುವ’ ಶಬ್ದ ಬಳಸಿದಾಗ ಆಕಾಶ-ಭೂಮಿ ಒಂದಾಗುವಂತೆ ಅಬ್ಬರಿಸಿ ಬೊಬ್ಬಿರಿದ್ದಿದ್ದ ಸುದ್ದಿ ಮಾಧ್ಯಮಗಳು,ಒವೈಸಿಯ ಭಾಷಣದ ಬಗ್ಗೆ ಮಾತ್ರ ಅಬ್ಬರಿಸಲೂ ಇಲ್ಲ,ಬೊಬ್ಬಿರಿಯಲೂ ಇಲ್ಲ.ಯಾಕೆ? ಮಾತನಾಡಲು ಭಯವೆ? ಅಥವಾ ಇದು ಸಿಕ್ಯುಲರ್ ಮನಸ್ಥಿತಿಯೆ? ತಪ್ಪು ಮಾಡುವುದನ್ನು ಖಂಡಿಸುವುದಾದರೆ ಎರಡು ಬದಿಯ ಅವಿವೇಕಿಗಳನ್ನು,ಅತಿರೇಕಿಗಳನ್ನು ಟೀಕಿಸಬೇಕಲ್ಲವೇ? ಕೇಂದ್ರ ಸರ್ಕಾರದ
‘ಪದ್ಮಶ್ರೀ’ ಪತ್ರಕರ್ತರೆಲ್ಲ ಎಲ್ಲಿ ಹೋಗಿದ್ದಾರೆ? ಹಿಂದೂ ಮೂಲಭೂತವಾದಿಗಳು ಮಾತನಾಡಿದಾಗ ಎದ್ದು ಬರುವ ಸೆಕ್ಯುಲರ್ ಪುಣ್ಯಾತ್ಮರ ಪತ್ತೆಯೇ ಇಲ್ಲ. ಮುಸ್ಲಿಂರನ್ನು ಗುತ್ತಿಗೆ ಪಡೆದಂತೆ ಆಡುವ ಕಾಂಗ್ರೆಸ್ಸೂ,ಸಮಾಜವಾದಿ ಪಕ್ಷಗಳ ಸುದ್ದಿಯೂ ಇಲ್ಲ.ಎಲ್ಲಾ ಹೋಗಿ ಬಿಟ್ಟರೇನು ಅಂದುಕೊಳ್ಳುವಷ್ಟರಲ್ಲಿ “ಅತ್ಯಾಚಾರಗಳು ಇಂಡಿಯಾದಲ್ಲಿ ಆಗುತ್ತವೆ ಭಾರತದಲ್ಲಲ್ಲ” ಅನ್ನುವ ಆರ್.ಎಸ್.ಎಸ್ ನಾಯಕ ಮೋಹನ್ ಭಾಗವತ್ ಅವರ ಹೇಳಿಕೆಯ ಚುಂಗು ಹಿಡಿದುಕೊಂಡು,ಎಲ್ಲರೂ ಪ್ರತ್ಯಕ್ಷರಾಗಿ ಬಿಟ್ಟರಲ್ಲ!

ನಮ್ಮೆಲ್ಲ ವಿಕೃತಿಗಳ ಸಮರ್ಥನೆಗೆ ಪಾಶ್ಚಾತ್ಯ ಸಂಸ್ಕೃತಿಯನ್ನು ದೂಷಿಸುವ ಅಂಶದ ಮುಂದುವರೆದ ಭಾಗದಂತೆ ಕಂಡ ಭಾಗವತ್ ಅವರ ಹೇಳಿಕೆಯನ್ನು ಒಪ್ಪಲಾಗದೂ ಅನ್ನುವುದರಲ್ಲಿ ಎರಡು ಮಾತಿಲ್ಲ. ಬೇರೆ ಬೇರೆ ವಿಷಯಗಳಿಗೆ ಸಂಬಂಧ ಪಟ್ಟ ಈ ಹೇಳಿಕೆಗಳನ್ನು,ವ್ಯಕ್ತಿಗಳನ್ನು ಸಮೀಕರಿಸುವುದು ನನ್ನ ಉದ್ದೇಶವಲ್ಲ.ಆದರೆ,ಈ ಎರಡು ವ್ಯಕ್ತಿಗಳ ಹೇಳಿಕೆ ಮತ್ತು ಮಾಧ್ಯಮಗಳ ಮತ್ತು ಸಿಕ್ಯುಲರ್ ಮನಸ್ಥಿತಿಗಳ ಇಬ್ಬಗೆ ನೀತಿಯ ಅನಾವರಣಕ್ಕೆ ಇದಕ್ಕಿಂತ ಬಹುಷಃ ಒಳ್ಳೆ ಉದಾಹರಣೆ ಸಿಗಲಿಕ್ಕಿಲ್ಲವೇನೋ.ಒವೈಸಿಯ ಮಾತಿಗೆ ಕಮಕ್-ಕಿಮಕ್ ಅನ್ನದಿದ್ದ ಜನರೆಲ್ಲ ಭಾಗವತ್ ಅವರು ಮಾತನಾಡಿದ ತಕ್ಷಣ ಎದ್ದು ಬಂದು ಬಿಟ್ಟರು.ಬೃಂದಾ ಕಾರಟ್ ಅವರಿಗೆ ಮನುಸ್ಮೃತಿಯ ನೆನಪಾಯಿತು.

ಸಿಕ್ಯುಲರ್ ಜನಗಳೇನೋ ಬರಲಿಲ್ಲ.ಅದು ಅವರ ಜಾಯಮಾನ ಅಂದುಕೊಳ್ಳೋಣ.ಆದರೆ, ಮೋದಿಗೆ ’ಮೌತ್ ಕಾ ಸೌದಾಗರ್’ ಅನ್ನುವ ಬಿರುದು-ಬಾವಲಿ ನೀಡಿದ್ದ ಮುಸ್ಲಿಂ ಬುದ್ದಿ ಜೀವಿ ಜಾವೇದ್ ಅಕ್ತರ್,ಭಾಗವತ್ ಭಾಷಣದ ಬಗ್ಗೆ ಪ್ರತಿಕ್ರಿಯಿಸುತ್ತಾ,”ಹೆಂಗಸರನ್ನು ದ್ವೇಷಿಸುವ ಮತ್ತು ಅವರನ್ನು ಅಡಿಯಾಳುಗಳಾನ್ನಗಿಸ ಬಯಸುವ ಬಲಪಂಥೀಯರ ಮನಸ್ಥಿತಿ ಬಯಲಾಗಿದೆ” ಅಂತೇಳಿ ತಾನು ಮಾತ್ರ ಒವೈಸಿಯ ಬಗ್ಗೆ ಮಾತನಾಡದೇ ಬೆತ್ತಲಾದೆ ಅನ್ನುವುದನ್ನು ಮರೆತಿದ್ದಾರೆ.
ಒವೈಸಿಯ ತಲೆ ಕೆಟ್ಟ ಭಾಷಣವನ್ನು ಮೊದಲು ವಿರೋಧಿಸಬೇಕಾದ ಹೊಣೆ ಶಾಂತಿ-ಸೌಹಾರ್ದತೆ ಬಯಸುವ ಮುಸ್ಲಿಂ ನಾಯಕರಾದರಾಗಿರಬೇಕಾಗಿತ್ತು.ದುರದೃಷ್ಟವಶಾತ್ ಅಂತ ಒಬ್ಬೇ ಒಬ್ಬ ನಾಯಕನೂ ಇದುವರೆಗೂ ಕಾಣಿಸಿಕೊಂಡೂ ಇಲ್ಲ ಮಾತನಾಡಿಯೂ ಇಲ್ಲ.

ಈ ದೇಶದ ಜಾತ್ಯಾತೀತರ ಲೆಕ್ಕಾಚಾರಗಳೇ ಅರ್ಥವಾಗುವುದಿಲ್ಲ ನೋಡಿ. ಹೆಸರಿನಲ್ಲೇ “ಮುಸ್ಲಿಂ” ಅಂತ ಇಟ್ಟುಕೊಳ್ಳುವ ಪಕ್ಷಗಳು ಇವರಿಗೆ ಕೋಮುವಾದಿಗಳಾಗಿ ಕಾಣುವುದಿಲ್ಲ.ಅಂತವರ ಸಖ್ಯ ಬೆಳೆಸಿಯೂ ಕೂಡ ಕಾಂಗ್ರೆಸ್ಸ್ ಮತ್ತು ಅದರಂತ ಪಕ್ಷಗಳು ಜಾತ್ಯಾತೀತರಾಗಿ ಬಿಡುತ್ತವೆ.ಆದರೆ ಹೆಸರಿನಲ್ಲಿ “ಭಾರತ” ಇರುವ ಬಿಜೆಪಿಯೊಂದಿಗಿನ ಸಖ್ಯ ಕೋಮುವಾದಿಗಳನ್ನಾಗಿಸುತ್ತದೆ…! ಇವತ್ತಿಗೆ ಆಂಧ್ರದಲ್ಲಿ ಪಡೆದುಕೊಂಡಿರುವ ಒಂದಂಕಿಯ ಸಂಖ್ಯಾಬಲದಿಂದಲೇ ಈ ಪರಿ ಹಾರಾಡುತ್ತಿರುವ ಈ ಪಕ್ಷ ಮುಂದೆ ಸಮ್ಮಿಶ್ರ ಸರ್ಕಾರದ ಈ ಯುಗದಲ್ಲಿ ಎರಂಡಂಕಿಯ ಸ್ಥಾನ ಪಡೆದರೆ ಈ ದೇಶದ ಶಾಂತಿಗೆ ಯಾವ ಪರಿ ಭಂಗ ತಂದಿತೂ ಊಹಿಸಿ.ಅಸ್ಸಾಂ ಗಲಭೆಯ ಸಂದರ್ಭವನ್ನು ಬಳಸಿಕೊಂಡು ಮುಸ್ಲಿಂ ಮತಗಟ್ಟೆಯನ್ನು ಸೆಕ್ಯುಲರ್ ಪಕ್ಷಗಳಿಂದ ಕಸಿಯಲು ಹೊರಟು ನಿಂತಿರುವ ಒವೈಸಿಗಳಿಗೆ ಮುಸ್ಲಿಂ ಮತದಾರರು ವೋಟಿಂಗ್ ಮಷೀನುಗಳಂತೆ ಕಾಣುತಿದ್ದಾರಷ್ಟೆ.ತಮ್ಮನ್ನು ವೋಟ್ ಬ್ಯಾಂಕ್ ಗಳಾಗಿ ಬಳಸಿಕೊಂಡ ಕಾಂಗ್ರೆಸ್ಸ್ ಮುಸ್ಲಿಂರಿಗಾಗಿ ಏನು ಮಾಡಿದೆ ಅನ್ನುವುದನ್ನು ಸಾಚಾರ್ ಆಯೋಗ ವರದಿ ಬಯಲು ಮಾಡುತ್ತದೆ.ಬಹುಷಃ ಒವೈಸಿಯಂತವರ ಪಕ್ಷವನ್ನು ನಂಬಿದರೂ ಅದೇ ಗತಿಯೇ ಆದೀತು.

ಮುಂಬೈ ಸರಣಿ ಬಾಂಬ್ ಸ್ಪೋಟವನ್ನು ಸಮರ್ಥಿಸಿಕೊಳ್ಳುತ್ತಾ,ಅಲ್ಲಲ್ಲಿ ಹಿಂದೂ ದೇವತೆಗಳನ್ನು ಅಪಹಾಸ್ಯ ಮಾಡುತ್ತಾ ಒವೈಸಿಯೇನೋ ಬೆಂಕಿ ಉಗುಳುವ ಭಾಷಣ ಮಾಡಿ ಕಂಡೋರ ಮಕ್ಕಳನ್ನು ಬಾವಿಗೆ ತಳ್ಳಿ ತಾನು ಎಸಿ ರೂಮಿನಲ್ಲಿ ಕುಳಿತು ಬಿಡುತ್ತಾನೆ.ಅವನ ಭಾಷಣ ಕೇಳುತಿದ್ದ ಜನರ ಮನಸ್ಸಿನಲ್ಲಿ ಶಾಶ್ವತವಾಗಿ ದ್ವೇಷ ಅನ್ನುವುದು ಮಡುಗಟ್ಟಿ ಹೋಗುತ್ತದೆ.ಮತ್ತೆ ಅದೊಂದು ದಿನ ಗಲಭೆಯಾಗಿ ಸ್ಫೋಟವಾಗುತ್ತದೆ.ಆದರೆ ಈ ಗಲಭೆಯಲ್ಲಿ ಬಲಿಯಾಗುವ ಬಹುತೇಕರು ಒಪ್ಪೊತ್ತಿನ ಊಟಕ್ಕೆ ಪರದಾಡುವವರೇ. ಅವರಿಗೆ ಈ ಅಕ್ಬರುದ್ದಿನ್ ಒವೈಸಿ ಯಾರು? ತನ್ನನ್ನು ಹೊಡೆಯಲು ಬಂದವರು ಯಾರು? ಬಾಬರಿ ಮಸೀದಿ ಎಲ್ಲಿತ್ತು? ತಸ್ಲೀಮಾ ನಸ್ರೀನ್ ಅಂದರೇನು? ಊಹೂಂ,ಇದ್ಯಾವುದರ ಅರಿವೆ ಇರುವುದಿಲ್ಲ ಆದರೂ ಕೈಲಾಗದ ವೋಟ್ ಬ್ಯಾಂಕ್ ದುರಾಸೆಗೆ ಬಿದ್ದ ಸರ್ಕಾರ ಆಡಳಿತದಲ್ಲಿ ಪಾಪದವರ ಪಾಡು ಕೇಳುವವರು ಯಾರು?

ಅಂತೂ-ಇಂತೂ ಒವೈಸಿ ಅನ್ನುವ ಕಮ್ಯುನಲ್ ಕ್ಯಾನ್ಸರ್ ಜೈಲಿಗೆ ಹೋಗಿಯಾಗಿದೆ.Taken for Granted ಅನ್ನುವಂತೆ ಮಾತನಾಡಿರುವ ಅವನಿಗೆ ಮತ್ತು ಅವನಂತ ಇತರರಿಗೆ ಒಂದು ಪಾಠವಾಗುವಂತ ಶಿಕ್ಷೆಯಾಗಬೇಕಿದೆ. ಬಹುಷಃ ಹಾಗೇ ಆದಾಗ ಮಾತ್ರ,ನೆಮ್ಮದಿಯಿಂದ ಬದುಕಿನ ಬಂಡಿ ಎಳೆಯುತ್ತಿರುವ ಭಿನ್ನ ಧರ್ಮದ ಜನರ ನಡುವೆ ದ್ವೇಷ ಹುಟ್ಟಿಸುವಂತ ಎಲ್ಲಾ ರೀತಿಯ ವಿಕೃತ ಮನಸ್ಸುಗಳಲ್ಲಿ ಒಂದು ಬಗೆಯ ಭಯ ಮೂಡಬಹುದು.

ಕಡೆಯದಾಗಿ ಹೇಳುವುದಾದರೆ,ಮೋಹನ್ ಭಾಗವತ್ ಭಾಷಣದ ಆಯ್ದ ಭಾಗವನ್ನು ತೆಗೆದುಕೊಂಡು ತಿರುಚಿ ಈ ಮಾಧ್ಯಮಗಳು ಏನೇ ತಿಪ್ಪರಾಲಾಗ ಹಾಕಿ ಆರ್.ಎಸ್.ಎಸ್ ಅನ್ನು ವಿರೋಧಿಸಬಹುದು.ಆದರೆ, ಆರ್.ಎಸ್.ಎಸ್ ನ ಸೈದ್ಧಾಂತಿಕ ನಿಲುವನ್ನು ವಿರೋಧಿಸುವ ನನ್ನಂತ ಹಲವರು ಸಹ ಸಂಘದ ನಿಸ್ವಾರ್ಥ ಕಾರ್ಯಕರ್ತರ ಕಮಿಂಟ್ಮೆಂಟ್ ಬಗ್ಗೆ ಮಾತನಾಡಲಾರರು.ಹಾಗೆಯೇ, ಒವೈಸಿ ಭಾಷಣದ ಪೂರ್ಣ ಪಾಠವನ್ನು ಕೇಳಿದ ಮೇಲೆಯೂ ಬಾಯಿ ಬಿಡದ ಸಿಕ್ಯುಲರ್ ಜನಗಳನ್ನು ಜನ ನಂಬಲಾರರು.