ಗಡ್ಕರಿಯ ಅ”ವಿವೇಕ” ಮತ್ತು ಸಂಘದ “ಸ್ವಾಮಿ”ನಿಷ್ಠೆ…!

– ರಾಕೇಶ್ ಶೆಟ್ಟಿ

“ಇನ್ನೊಬ್ಬ ವಿವೇಕಾನಂದನಿದ್ದಿದ್ದರೆ ಅವನಿಗೆ ತಿಳಿಯುತಿತ್ತು – ಈ ವಿವೇಕಾನಂದ ಏನು ಮಾಡಿದ್ದಾನೆ ಎಂದು… ಇರಲಿ, ಕಾಲಾಂತರದಲ್ಲಿ ಮತ್ತೆಷ್ಟು ಮಂದಿ ವಿವೇಕಾನಂದರು ಉದಿಸಲಿರುವರೋ!” ಸ್ವಾಮೀಜಿ ದೇಹತ್ಯಾಗದ ದಿನ ತಮ್ಮಷ್ಟಕ್ಕೆ ತಾವೇ ಹೇಳಿಕೊಂಡ ಮಾತುಗಳಿವು. ನಿಜ ವಿವೇಕಾನಂದ ಮಾಡಿ ಹೋಗಿದ್ದೇನು? ಯಾರನ್ನಾದರು ಕೇಳಿ ನೋಡಿ, ತಟ್ಟನೆ “ಅವರು ಸರ್ವ ಧರ್ಮ ಸಮ್ಮೇಳನದಲ್ಲಿ ಹಿಂದೂ ಧರ್ಮದ ಶ್ರೇಷ್ಠತೆಯನ್ನು ಜಗತ್ತಿಗೆ ಸಾರಿದರು” ಅಂತಲೇ ಹೇಳುತ್ತಾರೆ..ಮುಂದೇನು ಮಾಡಿದ್ದರು ಅಂತ ಕೇಳುವಷ್ಟರಲ್ಲಿ ಮಾತು ತಡವರಿಸುತ್ತದೆ… ಬಹುಷಃ ಇದೆಲ್ಲವನ್ನೂ ಅರಿತೇ ಸ್ವಾಮೀಜಿ ಬಹುಷಃ ಮೇಲಿನ ಮಾತನ್ನು ಹೇಳಿದ್ದರು ಅನ್ನಿಸುತ್ತದೆ.

ಆದರೆ,ಮುಂದೊಂದು ದಿನ ತಾನು ಪ್ರತಿಪಾದಿಸುತ್ತಿರುವ “ರಾಷ್ಟ್ರೀಯತೆ(?)” ಅನ್ನುವ ಪದವನ್ನು ಹಿಡಿದು ಪಕ್ಷವೊಂದು ಉದಯಿಸಬಹುದು ಮತ್ತು ಅದಕ್ಕೊಬ್ಬ ಮೇಧಾವಿ ಅಧ್ಯಕ್ಷ ಬಂದು ಅವನು “ಸ್ವಾಮಿ ವಿವೇಕಾನಂದರ ಬುದ್ದಿಮತ್ತೆಯನ್ನು ಮುಂಬೈನ ಕಪ್ಪು ಜಗತ್ತಿನ ಕಳ್ಳನಾಗಿದ್ದವನ ಬುದ್ದಿ ಮತ್ತೆಗೆ ಸರಿಸಮ” ಅಂತೇಳಬಹುದು ಅನ್ನುವುದನ್ನು ಮಾತ್ರ ಊಹಿಸಿರಲಿಕ್ಕಿಲ್ಲ…!

ಹೋದ ಬಂದ ಕಡೆಯೆಲಲ್ಲೆಲ್ಲ ವಿವೇಕಾನಂದರ ಫೋಟೋ ಇರಿಸಿ “ಯುವ ದಿನ” ಆಚರಿಸುವ ಪಕ್ಷ/ಸಂಘಕ್ಕೆ ಗಡ್ಕರಿ ಹೇಳಿಕೆ ಅಂತ ಮಹಾಪರಾಧವೇನು ಅನ್ನಿಸಿಲ್ಲ ಅನ್ನುವುದೇ ವಿಪರ್ಯಾಸ.ಕೆಲ ವರ್ಷಗಳ ಹಿಂದೆ ಕರಾಚಿ ನೆಲದಲ್ಲಿ ನಿಂತು ಅಡ್ವಾಣಿ “ಜಿನ್ನಾ ಜಾತ್ಯಾತೀತವಾದಿ”ಯಾಗಿದ್ದರು ಅನ್ನುವ ಸತ್ಯವನ್ನು ಹೇಳಿದಾಗ ನಿಂತ ನಿಲುವಲ್ಲೇ ಅವರನ್ನು ಮಾಡದ ತಪ್ಪಿಗೆ ಅಪರಾಧಿ ಸ್ಥಾನದಲ್ಲಿ ನಿಲ್ಲಿಸಿ ಅವಮಾನಕಾರಿಯಾಗಿ ನಡೆಸಿಕೊಂಡಿದ್ದ ಸಂಘಕ್ಕೆ, ಈಗ ತಮ್ಮ ಪ್ರೀತಿಯ ನಾಗಪುರದ ಹುಡುಗ ಸ್ವಾಮೀ ವಿವೇಕಾನಂದರನ್ನು ಯಕಶ್ಚಿತ್ ಕಳ್ಳನೊಬ್ಬನ ಜೊತೆ ಹೋಲಿಸಿದಾಗ ಏನು ಮಾಡಬೇಕು ಅನ್ನಿಸುತ್ತಿಲ್ಲವಾದರೆ,ಅಲ್ಲಿಗೆ ಸಂಘದ “ಸ್ವಾಮಿ” ನಿಷ್ಠೆ ಅರ್ಥವಾಗದೇನು?

ಎಲ್ಲ ರಾಜಕಾರಣಿಗಳಂತೆ ಗಡ್ಕರಿ ತಮ್ಮ ಮಾತಿಗೆ ಸ್ಪಷ್ಟನೆ ನೀಡುತ್ತ “ತಮ್ಮ ಮಾತನ್ನು ತಿರುಚಲಾಗಿದೆ” ಅನ್ನುವ ಅದೇ ಹಳೆ ರಾಜಕಾರಣಿಗಳ ಡೈಲಾಗ್ ಹೇಳಿದ್ದಾರೆ.ಮೊನ್ನೆ ಕಾನೂನು ಸಚಿವರು ಕೇಜ್ರಿವಾಲ್ಗೆ ಪ್ರಾಣ ಬೆದರಿಕೆ ಹಾಕಿ ಕಡೆಗೆ ಇದೇ ಹಳಸಲು ಸಮಜಾಯಿಷಿ ನೀಡಿದ್ದು.ಜನರ ಕಿವಿ ಮೇಲೆ ಹೂ ಇಡುವುದು ಬಹಳ ಸುಲಭ ಅನ್ನುವುದು ಈ ರಾಜಕಾರಣಿಗಳ ಅಭಿಪ್ರಾಯವಿರಬಹುದು.

ಜಿನ್ನಾ ಮುಸ್ಲಿಂ ಅನ್ನುವ ಕಾರಣಕ್ಕೋ ಅಥವಾ ದೇಶ ಒಡೆದ ಅನ್ನುವ ಕಾರಣಕ್ಕೋ ಅಡ್ವಾಣಿ ಹೇಳಿದ ಸತ್ಯವನ್ನೋ ಜೀರ್ಣಿಸಿಕೊಳ್ಳಲಾಗದ ಸಂಘಕ್ಕೆ, ಸಹಸ್ರಾರು ವರ್ಷ ಪರಕೀಯರ ಕಪಿಮುಷ್ಟಿಯಲ್ಲಿ ಸಿಕ್ಕಿ ನರಳಿ ತನ್ನತನವನ್ನೇ ಮರೆತು ಕೀಳರಿಮೆಯ ಭಾವನೆಯಲ್ಲಿ ನರಳುತಿದ್ದ ಧರ್ಮ/ಧರ್ಮೀಯರನ್ನು ತನ್ನ ಮಾತಿನ ಚಿಲುಮೆಯಿಂದ ಇಡಿ ಜಗತ್ತೇ ತಿರುಗಿ ನೋಡುವಂತೆ ಮಾಡಿದ ಸ್ವಾಮಿ ವಿವೇಕಾನಂದರು ಸಂಘದ ದೃಷ್ಟಿಯಲ್ಲಿ “ಜಿನ್ನಾ” ಗಿಂತ ತೂಕ ಇಲ್ಲದವರೇನು?ಸಂಘವನ್ನು,ಸಂಘದ ಹಿಂದೂ ಧರ್ಮವನ್ನು ಟೀಕಿಸುವ ಎಡಪಂಥೀಯರೇ,ವಿವೇಕಾನಂದರು ಪ್ರತಿಪ್ರಾದಿಸಿದ ಹಿಂದೂ ಧರ್ಮದ ಬಗ್ಗೆಯಾಗಲಿ ಅಥವಾ ವಿವೇಕಾನಂದರ ಬಗ್ಗೆಯಾಗಲಿ ಎಂದಿಗೂ ಇಷ್ಟು ಕೇವಲವಾಗಿ ಮಾತನಾಡಿದ್ದಿಲ್ಲ.ವಿವೇಕಾನಂದರನ್ನು ಟೀಕಿಸಲೇಬೇಕು ಅಂತ ಹೊರಟ ಕೆಲವರಿಗೆ ಸಿಕ್ಕಿದ್ದು “ಮಾಂಸಹಾರ,ಧೂಮಪಾನ” ಇಂತವಷ್ಟೆ…!

ಕಳೆದ ವರ್ಷ ದಿನೇಶ್ ಅಮೀನ್ ಮಟ್ಟು ವಿವೇಕಾನಂದರ ಆಹಾರ ಪದ್ಧತಿಯ ಬಗ್ಗೆ ಬರೆದಾಗ ಶಿವಮೊಗ್ಗದ ಪ್ರಜಾವಾಣಿ ಕಚೇರಿ ನುಗ್ಗಿದ್ದ ಸ್ವಾಮಿ ವಿವೇಕಾನಂದ ಅಭಿಮಾನಿಗಳು ಯಾಕೋ ಬಿಜೆಪಿಯ ಕಚೇರಿಯೊಳಗೆ ನುಗ್ಗುವ ಧೈರ್ಯ ಮಾಡಿಲ್ಲವಲ್ಲ..! ಯಾಕೆ ಗಡ್ಕರಿ,ಬಿಜೆಪಿ ಇವರಿಗೆ ಸ್ವಾಮೀಜಿಗಿಂತ ದೊಡ್ಡವರೇನು?

“ಬಿಜೆಪಿ”ಗೂ ನಮಗೂ ಸಂಬಂಧವಿಲ್ಲ ,ಗಡ್ಕರಿಯನ್ನು ಇರಿಸಿಕೊಳ್ಳುವುದು ಬಿಜೆಪಿಗೆ ಬಿಟ್ಟ ವಿಚಾರ ಅಂತ ಸಂಘ ಎಷ್ಟೇ ಸಮಜಾಯಿಷಿ ನೀಡಿದರೂ, ಅಡ್ವಾಣಿಯವರನ್ನು “ಜಿನ್ನಾ” ಹೇಳಿಕೆ ಮುಂದಿಟ್ಟುಕೊಂಡು ಹಿಂದೆ ಸರಿಸಿದವರು ಯಾರು ಅನ್ನುವುದು ಅರ್ಥವಾಗದೇ ಇರುತ್ತದೆಯೇನು? ಜಿನ್ನಾ ಬಗ್ಗೆ ಮಾತನಾಡಿದ ಅಡ್ವಾಣಿಯ ತಲೆದಂಡವಾಗುವುದಾದರೆ, ತಾನು ಹಗಲು-ರಾತ್ರಿ ಜಪ ಮಾಡುವ “ರಾಷ್ಟ್ರೀಯತೆ,ಹಿಂದೂ ಧರ್ಮ” ಅನ್ನುವುದನ್ನು ಪುನಃ ಸಂಸ್ಥಾಪನೆ ಮಾಡಿಹೋಗಲೆಂದೇ ಜನಿಸಿದ್ದ ಮಹಾಪುರುಷನ ಬಗ್ಗೆ ಕೀಳಾಗಿ ಮಾತನಾಡಿದ “ಗಡ್ಕರಿ” ಯ ತಲೆದಂಡ ಮಾಡುವುದಿಲ್ಲವೇ? ಮಾಡುವುದಿಲ್ಲವೆಂದಾದರೆ,ಅಲ್ಲಿಗೆ ನಿಮ್ಮ “Double Standard” ಏನು ಅನ್ನುವುದು ಇನ್ನು ಸ್ಪಷ್ಟವಾದಂತೆಯೇ ಸರಿ…
ಚಿತ್ರ ಕೃಪೆ : http://www.sanghparivar.org