ಜ್ಞಾನಿಗಳಿಗೆ ಸಾವಿಲ್ಲ. ಆದರೆ ಗಡ್ಕರಿ, ದಾವೂದ್ ನಂತಹ ಬುದ್ದಿವಂತರಿಗೆ ಸಾವಿದೆ!

– ಮಹೇಂದ್ರ ಕುಮಾರ್

           ಸ್ವಾಮಿ ವಿವೇಕಾನಂದರು ಮತ್ತು ದಾವೂದ್ ಇಬ್ರಾಹಿಂ, ಇಬ್ಬರೂ ಸಮಾನ ಬುದ್ದಿವಂತರು. ಸ್ವಾಮಿ ವಿವೇಕಾನಂದರು ತಮ್ಮ ಬುದ್ದಿವಂತಿಕೆಯನ್ನು ಸದುಪಯೋಗ ಪಡಿಸಿಕೊಂಡರು. ಆದರೆ ದಾವೂದ್ ಇಬ್ರಾಹಿಂ ದುರುಪಯೋಗ ಪಡಿಸಿಕೊಂಡ. ಈ ಹೇಳಿಕೆಯನ್ನು ದೇಶದ ಮಹಾನ್ ರಾಷ್ಟ್ರಭಕ್ತಿಯ  ಪ್ರತೀಕ ಎಂದು ಹೇಳಿಕೊಳ್ಳುವ ಭಾರತೀಯ ಜನತಾಪಕ್ಷದ, ಆರ್ ಎಸ್ ಎಸ್ ಗರಡಿಯಲ್ಲಿ ಪಳಗಿ ಏಕಾಏಕಿ ಆ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ಗಡ್ಕರಿ ಬಾಯಿಂದ ಉದುರಿರುವ ಅಣಿಮುತ್ತುಗಳು..

ಹೇಳಿಕೇಳಿ ಈತ ದೇಶಭಕ್ತರನ್ನು ಹುಟ್ಟು ಹಾಕುವ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಕಟ್ಟಾಳು. ಪ್ರತೀ ವರ್ಷ ವಿವೇಕಾನಂದ ಜಯಂತಿಯನ್ನು ಆಚರಿಸುವ ಪಕ್ಷದ ರಾಷ್ಟ್ರನಾಯಕ. ಇಷ್ಟೇ ಅಲ್ಲದೇ ರಾಷ್ಟ್ರೀಯ  ಕಾರ್ಯಕಾರಣಿಗಳಿಂದ ಹಿಡಿದು ಸಣ್ಣ ಸಣ್ಣ ಕಾರ್ಯಕ್ರಮಗಳವರೆಗೂ ವಿವೇಕಾನಂದರ ಭಾವಚಿತ್ರಗಳನ್ನು ಬಳಸಿಕೊಳ್ಳುವ ರಾಜಕೀಯ ಪಕ್ಷದ ಮುಂದಾಳು.

ಈ ಹೇಳಿಕೆಯನ್ನು ಕೊಡುವಾಗ ಒಂದೋ ತಲೆ ಕೆಟ್ಟಿರಬೇಕು, ಇಲ್ಲವಾದಲ್ಲಿ ವಿವೇಕಾನಂದರ ಬಗ್ಗೆ ಮತ್ತು ಅವರ ಆದರ್ಶ ಚಿಂತನೆಗಳ ಬಗ್ಗೆ ಯಾವುದೇ ಅರಿವಿಲ್ಲದೇ ಒಬ್ಬ ಸಾದಾರಣ ಇವರ ನಾಯಕರೆಂದು ಭಾವಿಸಿರಬೇಕು.. ವಿವೇಕಾನಂದರ ಬಗ್ಗೆ ಸಣ್ಣ ಅರಿವೂ ನಿತಿನ್ ಗಡ್ಕರಿಗೆ ಇದ್ದಿದ್ದೇ ಆದಲ್ಲಿ ಆತನ ಬಾಯಿಂದ ಈ ಮಾತುಗಳು ಹೊರಬರುತ್ತಿರಲಿಲ್ಲ. ಇವರುಗಳಿಗೆ ಆದರ್ಶ ವ್ಯಕ್ತಿಗಳು ಬಳಕೆಗೆ ಮಾತ್ರಾ…

ಜನರನ್ನ ದಿಕ್ಕುತಪ್ಪಿಸಲು ಇವರ ಪ್ರೇರಣಾದಾಯಕ ಆದರ್ಶಗಳನ್ನ ತಿರುಚಿ ತಮಗೆ ಹೇಗೆ ಬೇಕೋ ಹಾಗೆ ಬಳಸಿಕೊಳ್ಳುವ ಬುದ್ದಿವಂತಿಕೆ ಇರುವ ಇವರುಗಳು ಯಾವುದಾದರೂ ಒಳ ಅಜೆಂಡಾ ಇಟ್ಟುಕೊಂಡು ಅಸಹ್ಯಕರ ಮಾನಸಿಕತೆಯಿಂದ ಈ ಮಾತುಗಳನ್ನ ಹೇಳಿರುವ ಸಾಧ್ಯತೆಯೂ ತಳ್ಳಿಹಾಕುವಂತಿಲ್ಲ..ದಾವೂದ್ ಬುದ್ದಿವಂತ ಹಾಗೆಯೇ ನಿತಿನ್ ಗಡ್ಕರಿ ಸಹಾ ಬುದ್ದಿವಂತ. ದಾವೂದ್ ತನ್ನ ಬುದ್ದಿವಂತಿಕೆಯನ್ನ  ಸಮಾಜ ಘಾತುಕ ಕೆಲಸಕ್ಕೆ ಬಳಸಿದ. ಗಡ್ಕರಿ ತನ್ನ ಉಧ್ಯಮ ಬೆಳೆಸಲು, ಪಕ್ಷದ ಅಧಿಕಾರವಿರುವ ರಾಜ್ಯಗಳಿಂದ ಹಣ ಸಂಗ್ರಹಿಸಲು ಸಂಘ(ಆರ್ ಎಸ್ ಎಸ್) ದೊಂದಿಗೆ ಸೇರಿ ಬಿಜೆಪಿ ಚುಕ್ಕಾಣಿ ಹಿಡಿದು ಜನರನ್ನ ದಾರಿ ತಪ್ಪಿಸಿ ಪಕ್ಷ ಬೆಳೆಸಲು.. ಹೋಲಿಕೆ ಸರಿಯಾಗುತಿತ್ತು ತಾನೇ…?

ವಾಜಪೇಯಿ, ಲಾಲಕೃಷ್ಣ ಅಡ್ವಾಣಿ, ನರೇಂದ್ರ ಮೋದಿ ಇವರೆಲ್ಲಾ ಬುದ್ದಿವಂತರೇ ಆದರೆ ಕೊನೇ ಪಕ್ಷ ಇವರಿಗೆ ದಾವೂದ್ ನ ಬುದ್ದಿವಂತಿಕೆಯನ್ನ ಹೋಲಿಸಿಕೊಳ್ಳಲೂ ಸಾಧ್ಯವಿಲ್ಲ. ಅಂತದ್ದರಲ್ಲಿ ಚೇತನದ ಚಿಲುಮೆ, ದೇಶದ ಯುವಕರ ಸ್ಫೂರ್ತಿ, ಪ್ರಪಂಚವೇ ಗೌರವಿಸುವ ಸ್ವಾಮಿ ವಿವೇಕಾನಂದರೊಂದಿಗೆ ದಾವೂದ್ ನ ಬುದ್ದಿವಂತಿಕೆಯನ್ನು ಹೋಲಿಸಿದಾಗ ನೀವು(ಸಂಘ ಪರಿವಾರ) ಸಹಿಸಿಕೊಳ್ಳುತ್ತೀರಿ, ಬಾಯಿಗೆ ಬೀಗ ಹಾಕಿಕೊಳ್ಳುತ್ತೀರಿ ಎಂದಾದರೆ ನಿಮಗೂ ದಾವೂದ್ ಗೂ ಯಾವುದೇ ವ್ಯತ್ಯಾಸವಿಲ್ಲ. ಮುಖಗಳು ಮಾತ್ರಾ ಬೇರೆ ಬೇರೆ ಅಷ್ಟೆ.

ಗಡ್ಕರಿ ಹೇಳಿಕೆಗೆ ಹೊಸ ವ್ಯಾಖ್ಯಾನಗಳನ್ನು ಸಂಘ ಮತ್ತು ಬಿಜೆಪಿ ಕೊಡಲು ಪ್ರಯತ್ನಿಸುತ್ತಿದೆ. ಸ್ವಾಮೀ ವಿವೇಕಾನಂದರ ಸ್ಫೂರ್ತಿಯ ಮಾತುಗಳನ್ನು ನೀವು ಬುದ್ದಿವಂತಿಕೆಗೆ ಹೋಲಿಸುವುದಾದರೆ ನೀವು ಆ ದಿವ್ಯ ಚೇತನಕ್ಕೆ ಅವಮಾನ ಮಾಡುತಿದ್ದೀರಿ ಎಂದೇ ಅರ್ಥ. ಬುದ್ದಿವಂತಿಕೆ ಎಂಬ ಪದಬಳಕೆಯಾಗುವುದು ಯಾವಗ ಮತ್ತು ಎಂತಹಾ ವ್ಯಕ್ತಿಗಳ ಮೇಲೆ ಎಂಬುದನ್ನ ಮೊದಲು ನೀವು ಅರ್ಥ ಮಾಡಿಕೊಳ್ಳಬೇಕು. ಟಾಟಾ ಬಿರ್ಲಾ, ಧೀರೂ ಬಾಯಿ ಅಂಬಾನಿ, ಲಕ್ಷ್ಮಿ ಮಿತ್ತಲ್, ವಾರೆನ್ ಬಾಫೆಟ್, ಬಿಲ್ ಗೇಟ್ಸ್, ಅಥವಾ ಇನ್ನೊಂದು ಮುಖದಲ್ಲಿ ನೋಡುವುದಾದರೆ ಪ್ರಚಲಿತದಲ್ಲಿರುವ ನಿಮ್ಮಂತಹಾ ರಾಜಕಾರಣಿಗಳು.

ಅದೇ ಕವಿಗಳನ್ನ, ಸಾಹಿತಿಗಳನ್ನ, ವಿಧ್ವಾಂಸರನ್ನ, ಸಮಾಜ ಸುಧಾರಕರನ್ನ ಆದರ್ಶಗಳನ್ನ ಮೈವೆತ್ತ ಮಹಾನ್ ವ್ಯಕ್ತಿಗಳನ್ನ ಅದೇರೀತಿ ಭಕ್ತಿಯ ಸುಧೆಯನ್ನು ಹರಿಸಿ ಅದರಲ್ಲೇ ಸಮಾಜಕ್ಕೆ ಹೊಸ ಹೊಸ ದಿಕ್ಕು ಕೊಟ್ಟ ಕನಕ ದಾಸರನ್ನ, ಪುರಂದರ ದಾಸರನ್ನ, ಬಸವಣ್ಣನವರನ್ನ,  ನಾರಾಯಣ ಗುಗುರುಗಳನ್ನ.  ಇತ್ತೀಚಿನ ವ್ಯಕ್ತಿಗಳ ಬಗ್ಗೆ ಹೇಳುವುದಾದರೆ  ಕುವೆಂಪು, ಬೇಂದ್ರೆ, ಸಿದ್ದಗಂಗಾ ಶ್ರೀಗಳು ಇವರ್ಯಾರನ್ನೂ ಬುದ್ದಿವಂತರು ಅಂತ ಕರೆಯೊಲ್ಲ.. ಜ್ನಾನಿಗಳು ಅಂತ ಕರೀತಾರೆ. ಇನ್ನು ಪ್ರಪಂಚಕ್ಕೆ ಸ್ಫೂರ್ತಿ ತುಂಬಿದ  ಕೋಟಿ, ಕೋಟಿ ಯುವಕರ ಮನಸಿನಾಳದ ಮಾರ್ಗದರ್ಶಕ ಸ್ವಾಮಿ ವಿವೇಕಾನಂದರನ್ನ ಬುದ್ದಿವಂತ ಎಂಬ ಪದಬಳಸಿ ಅವಮಾನಿಸಿದ್ದೂ ಅಲ್ಲದೇ ದಾವೂದ್ ನಂತಹಾ ನಿಕೃಷ್ಟ ಮೂರು ಕಾಸಿನ ದೇಶ ದ್ರೋಹಿಯ ಹೆಸರಿನೊಂದಿಗೆ ತಳುಕು ಹಾಕಿ ಮಾತಾಡಿರುವ ನಿತಿನ್ ಗಡ್ಕರಿಯನ್ನು ಏನೆನ್ನಬೇಕು ಎನ್ನುವುದನ್ನ ನೀವೇ ತೀರ್ಮಾನಿಸಿ.

ಈ ಭೂಮಿ ಇರುವವರೆಗೆ, ಸೂರ್ಯ-ಚಂದ್ರರಿರುವ ವರೆಗೆ ಸ್ವಾಮಿ ವಿವೇಕಾನಂದರು ಮತ್ತು ರಾಮಕೃಷ್ಣ ಪರಮ ಹಂಸರಾಧಿಯಾಗಿ  ಅಂತರಾಳದ ಕಣ್ಣಿನಿಂದ ಸಮಾಜಕ್ಕೆ ಮಾರ್ಗದರ್ಶನಗೈದ ಯಾವುದೇ ಜ್ನಾನಿಗಳಿಗೂ ಸಾವಿಲ್ಲ. ಆದರೆ ಗಡ್ಕರಿ, ದಾವೂದ್ ನಂತಹಾ ಬುದ್ದಿವಂತರಿಗೆ ಸಾವಿದೆ!

ತಮ್ಮ ಓಟ್ ಬ್ಯಾಂಕ್ ಗಾಗಿ ಏನು ಬೇಕಾದರೂ ಹೇಳಿ, ಏನುಬೇಕಾದರೂ ಮಾಡಿ ದಕ್ಕಿಸಿಕೊಳ್ಳಬಹುದು ಎಂಬ ಸಮಾಜ ಘಾತುಕ ಮಾನಸಿಕತೆಗೆ ಕಡಿವಾಣ ಬೀಳದಿದ್ದಲ್ಲಿ ಸ್ವತಂತ್ರ ಪೂರ್ವದ ಸ್ಥಿತಿಗಿಂತಲೂ ಭೀಕರ ಸ್ಥಿತಿಯನ್ನ ನಾವೇ ನಿರ್ಮಾಣ ಮಾಡಿಕೊಳ್ಳುತ್ತೇವೆ.ಗಡ್ಕರಿ ಕೊಟ್ಟ ಇದೇ ಹೇಳಿಕೆಯನ್ನ ಸಂಘಪರಿವಾರ, ಬಿಜೆಪಿಯ ಹೊರಗಿನ ಯಾರಾದರೂ ಕೊಟ್ಟಿದ್ದರೆ ಇಂದಿನ ದೇಶದ ಪರಿಸ್ಥಿತಿಯನ್ನ ಊಹಿಸಿಕೊಳ್ಳಿ. ಅದೆಷ್ಟು ಪ್ರತಿಭಟನೆಗಳು, ಆಕಾಶ ಭೂಮಿ ಒಂದಾಗುವಂತೆ ವಿವೇಕಾನಂದರನ್ನ ಅವಮಾನಿಸಿದ್ದೀರೀ.. ವಿವೇಕಾನಂದರನ್ನ ಅವಮಾನಿಸಿದ್ದೀರೀ.. ಎಂಬಂತಹಾ ಹೋರಾಟಗಳು ನಾವು ನೋಡುತ್ತಿದ್ದೆವು ತಾನೇ..?

ಆದರೆ ಗಡ್ಕರಿ ಬಾಯಿಯಿಂದ ಬಂದ ಈ ಮಾತಿಗೆ ಸಂಘ ತುಟಿ ಪಿಟಿಕ್ ಎನ್ನುತ್ತಿಲ್ಲ.. ಬಿಜೆಪಿ ಮಾತಾಡುತ್ತಿಲ್ಲ.. ಅಂದರೆ ಏನಿದರ ಅರ್ಥ? ನೀವೇ ಊಹಿಸಿಕೊಳ್ಳಿ..
ನಿಮ್ಮ ಸ್ವಾರ್ಥ, ಕುತಂತ್ರಗಳಿಗೆ  ಇಂತಹಾ  ಮಹಾನ್ ವ್ಯಕ್ತಿಗಳನ್ನ, ಆದರ್ಶಗಳನ್ನ ಬಲಿತೆಗೆದುಕೊಳ್ಳುತ್ತೀರಿ ಅಂತಾದರೆ ನಿಮ್ಮನ್ನ ಯಾವ ಗುಂಪಿಗೆ ಸೇರಿಸಬೇಕು? ದೇಶಭಕ್ತರ ಗುಂಪಿಗೋ.. ದೇಶದ್ರೋಹಿಗಳ ಗುಂಪಿಗೋ…?

ಕೊನೆಯದಾಗಿ ಈ ಹೇಳಿಕೆಯ ಹಿಂದಿರುವ ಮರ್ಮ ನನಗೆ ಅನ್ನಿಸಿದಂತೆ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷನ ಮೇಲೆ ಭ್ರಷ್ಟಾಚಾರದ ಆರೋಪ ಬಂದಿದೆ. ಸಂಘದ ಮಾನಸ ಪುತ್ರ ಬೇರೆ. ಅರಗಿಸಿಕೊಳ್ಳುವುದು ಕಷ್ಟವಾಗುತ್ತಿರುವ ಈ ಸಂದರ್ಭದಲ್ಲಿ ಜನರ ದಿಕ್ಕನ್ನು, ವಿರೋಧ ಪಕ್ಷಗಳ ಗಮನವನ್ನು ಬೇರೆಡೆಗೆ ಸೆಳೆದು ಗಡ್ಕರಿಯ ರಾಜೀನಾಮೆ ಪಡೆಯಲು ಈ ತಂತ್ರ ಹಣೆದಿರಬಹುದಾ…?

ಯಾಕೆಂದರೆ ಗಡ್ಕರಿಯ ರಾಜೀನಾಮೆಯನ್ನು ಭ್ರಷ್ಟಾಚಾರದ ಆರೋಪದ ಮೇಲೆ ಪಡೆದರೆ ಬಿಜೆಪಿ ಮುಂದಿನ ಚುನಾವಣೆಯಲ್ಲಿ ಯಾವ ಮುಖ ಹೊತ್ತು ಜನರೆದುರು ಹೋಗುವುದು..?ಆ ಕಾರಣಕ್ಕಾಗಿ ಗಡ್ಕರಿ ಬಾಯಲ್ಲಿ ಇಂತಹಾ ಹೇಳಿಕೆಯನ್ನು ಕೊಡಿಸಿ,ಗಡ್ಕರಿ ರಾಜೀನಾಮೆಯನ್ನು ಪಡೆದು ನಾವು ವಿವೇಕಾನಂದರಿಗೆ ಮತ್ತು ಅವರ ಆದರ್ಶ ಗಳಿಗೆ ನಿಷ್ಟರು ಎಂಬ ಪೋಜು ಕೊಟ್ಟು ಮುಂದಿನ ವರ್ಷ ಬರುವ ವಿವೇಕಾನಂದರ ನೂರೈವತ್ತನೇ ಜಯಂತಿಗೆ ಬರ್ಜರಿ ತಯಾರಿ ನಡೆಸುವ ತಂತ್ರ ಹನೆದಿರಬಹುದಾ..? ಒಂದು ಕಡೆ ಭ್ರಷ್ಟಾಚರದ ಆರೋಪ ಹೊತ್ತಿರುವ ಗಡ್ಕರಿಯ ರಾಜೀನಾಮೆಯನ್ನ ಸಿದ್ದಾಂತದ ಕಾರಣಕ್ಕೆ ಪಡೆದಂತೆ ಇನ್ನೊಂದು ಕಡೆ ಇತ್ತೀಚೆಗಿನ ಒಟ್ಟಾರೆ ಪಕ್ಷದೊಳಗಿನ ಗೊಂದಲವನ್ನ ಬೇರೆಡೆಗೆ ತಿರುಗಿಸುವ ತಂತ್ರ.

ಯಾಕೆಂದರೆ ಅಧಿಕಾರವನ್ನು ಪಡೆಯುವುದಕ್ಕಾಗಿ ಯಾರನ್ನೂ ಬಲಿಕೊಡಲು ಹೇಸದ ಇವರುಗಳು ಸ್ವಾಮೀ ವಿವೇಕಾನಂದರನ್ನೂ ಮತ್ತು ಅವರ ವ್ಯಕ್ತಿತ್ವ ಆದರ್ಶಗಳಿಗೆ  ಮಸಿ ಬಳಿಯುವ ಪ್ರಯತ್ನ ಗಡ್ಕರಿ ಮೂಲಕ ಮಾಡಿರಲೂ ಬಹುದು..ಆದರೆ ಒಂದಂದಂತೂ ಸತ್ಯ, ಪದೇ ಪದೇ ಜನರನ್ನ ದಾರಿತಪ್ಪಿಸಲು ಸಾಧ್ಯವಿಲ್ಲ. ಸ್ವಾಮಿ ವಿವೇಕಾನಂದರಂತಹಾ ಅಗೋಚರ ಮಾರ್ಗದರ್ಶಕರು ನಮ್ಮೊಂದಿಗಿರುವಾಗ ಮತ್ತು ಇಂತಹಾ ಲಕ್ಷಾಂತರ ಜ್ನಾನಿಗಳ ತಪಸ್ಸು ಈ ದೇಶದ ಅಂತಃ ಸತ್ವ ಆಗಿರುವಾಗ  ಗಡ್ಕರಿ, ದಾವೂದ್ ರಂತವರ ಬುದ್ದಿವಂತಿಕೆ ಕೆಲಸ ಮಾಡುವುದಿಲ್ಲ. ಜ್ನಾನಿಗಳ ಮಾರ್ಗದರ್ಶನವೇ ಕೆಲಸ ಮಾಡುವುದು..

ಚಿತ್ರ ಕೃಪೆ : facenfacts.com