ಮೋದಿ vs. ಕೇಜ್ರಿವಾಲ್ ; ನಾನೇಕೆ ಮೋದಿಯನ್ನು ಬೆಂಬಲಿಸುತ್ತೇನೆ?

– ರಾಕೇಶ್ ಶೆಟ್ಟಿ

“Politics is the last resort for the scoundrels” ಅಂದವನು George Bernard Shaw.ಆತನ ಮಾತಿಗೆ ಪೂರಕವಾಗಿಯೇ ನಮ್ಮ ದೇಶದ ಕೆಲವು ರಾಜಕಾರಣಿಗಳೂ ಮಾಡಿ ತೋರಿಸಿದ ಮೇಲೆ,ಚುನಾವಣೆ ಬಂತೆಂದರೆ ಮತ್ತೊಬ್ಬ ನವಪುಢಾರಿಯ ಜನನ ಅಂದುಕೊಳ್ಳುತ್ತ ನಮ್ಮ ಜನರು, ಅದರಲ್ಲೂ ಮುಖ್ಯವಾಗಿ ನಗರ ಕೇಂದ್ರಿಕೃತ ಮತದಾರರು ಈ ಚುನಾವಣೆ,ರಾಜಕೀಯಗಳಿಂದಲೇ ದೂರವುಳಿಯುತಿದ್ದರು.ರಾಜಕೀಯ ಅಂದರೆ ಗಲೀಜು ಅಂತೆಲ್ಲ ರೇಜಿಗೆ ಪಟ್ಟುಕೊಳ್ಳುವವರೇ ಹೆಚ್ಚಿದ್ದರು.

ಎಲ್ಲ ಕೆಟ್ಟದಕ್ಕೂ ಒಂದು ಅಂತ್ಯವಿದ್ದಂತೆ,ಒಳ್ಳೆಯದಕ್ಕೂ ಆರಂಭವಿರಬೇಕಲ್ಲವೇ? ಇತ್ತೀಚೆಗೆ ಮುಗಿದ ಪಂಚ ರಾಜ್ಯಗಳ ಚುನಾವಣೆಯಲ್ಲಿ ಮತದಾನದ ಪ್ರಮಾಣ ಹೆಚ್ಚಿರುವುದು ಭಾರತದ ಪ್ರಜಾಪ್ರಭುತ್ವ ವ್ಯವಸ್ಥೆಯ ಆರೋಗ್ಯಕರ ದೃಷ್ಟಿಯಿಂದ ಒಳ್ಳೆಯ ಬೆಳವಣಿಗೆ.ಈ ಪಂಚ ರಾಜ್ಯಗಳ ಚುನಾವಣೆಯಲ್ಲಿ ಎಲ್ಲರನ್ನು ಚಕಿತಗೊಳಿಸಿದ ಮತ್ತೊಂದು ಪ್ರಧಾನ ಅಂಶ, ದೆಹಲಿಯಲ್ಲಿ ಕೇಜ್ರಿವಾಲ್ ನೇತೃತ್ವದ ‘ಆಪ್’ ಪಕ್ಷ ೨೮ ಸೀಟುಗಳನ್ನು ಗೆದ್ದು,ಕಡೆಗೆ ಕಾಂಗ್ರೆಸ್ಸ್ ಪಕ್ಷದ ಬಾಹ್ಯಬೆಂಬಲದಿಂದ ಸರ್ಕಾರವನ್ನು ರಚಿಸಿ ಮುಖ್ಯಮಂತ್ರಿ ಗದ್ದುಗೆಯೇರಿದ್ದು. ಎಲ್ಲಾ ರಾಜಕೀಯ ಪಕ್ಷಗಳು ಕಾಂಗ್ರೆಸ್ಸ್ ಹಾಕಿಕೊಟ್ಟ ಹಾದಿಯಲ್ಲೇ ಸಾಗಿ ರಾಜಕಾರಣ ಮಾಡುವಾಗ ಭಿನ್ನ ಹಾದಿಯಿಡಿದು  ‘ಆಪ್’ ಪಕ್ಷ ೨೮ ಸೀಟು ಗೆದ್ದಿದ್ದು ಸಾಮಾನ್ಯ ಸಂಗತಿಯೇನಲ್ಲ.

ಸಹಜವಾಗಿಯೇ ಮೀಡಿಯಾಗಳ ಹೊಸ ಡಾರ್ಲಿಂಗ್ ಆಗಿ ಕೇಜ್ರಿವಾಲ್ ಹೊರಹೊಮ್ಮಿದರು.ಅಲ್ಲಿಯವರೆಗೂ ಮೋದಿಯ ಎದುರಿಗೆ ಯಾರು,ಯಾರು ಅಂದುಕೊಳ್ಳುತಿದ್ದವರಿಗೆ ಎದುರಿಗೆ ನಿಲ್ಲಿಸಲು ಒಬ್ಬ ಸಿಕ್ಕಂತಾಗಿತ್ತು.ಆಗ ‘ಮೋದಿ vs ಕೇಜ್ರಿವಾಲ್’ ಅನ್ನುವ ಹೊಸ ರಾಗ ಶುರುವಿಟ್ಟುಕೊಂಡರು.

ಸತತ ೧೩ ವರ್ಷಗಳ ಕಾಲದಿಂದ ಮುಖ್ಯಮಂತ್ರಿಯಾಗಿದ್ದುಕೊಂಡು,೪ ನೇ ಬಾರಿಗೆ ಗೆದ್ದು,ಗದ್ದುಗೆ ಹಿಡಿದು ತನ್ನ ಅಭಿವೃದ್ಧಿ ಮಂತ್ರದಿಂದಲೇ ದೇಶದ ಗಮನ ಸೆಳೆದು ಇಂದು ‘ಪ್ರಧಾನಿ ಅಭ್ಯರ್ಥಿ’ಯಾಗಿ ನಿಂತ ನಾಯಕನೊಬ್ಬನ ಎದುರಿಗೆ ಒಂದು ವರ್ಷದ ಹಿಂದಷ್ಟೇ ‘ಅಣ್ಣಾ ಹಜಾರೆ’ಯವರ ಹೋರಾಟದ ಗರ್ಭ ಸೀಳಿ, ನಂಬಿದವರಿಗೆ ಮೋಸ ಮಾಡಿಕೊಂಡು ಜನಿಸಿದ ಆಪ್ ಪಕ್ಷದ ಕೇಜ್ರಿವಾಲ್ ಅವರನ್ನು ನಿಲ್ಲಿಸಿ ನೋಡುವುದೇ ಮೊದಲಿಗೆ ಹಾಸ್ಯಾಸ್ಪದವಾದದ್ದು ಎನಿಸುತ್ತದೆ.

ಈ ರೀತಿಯ ಹೋಲಿಕೆಯನ್ನೂ ಒಂದು ಕಂಪೆನಿಯ ಮಟ್ಟಕ್ಕೆ ಇಳಿಸಿ ನೋಡಿದರೆ ; ಒಂದು ವ್ಯಕ್ತಿಯನ್ನು ಕೆಲಸಕ್ಕೆ ತೆಗೆದುಕೊಳ್ಳಬೇಕಾದರೇ ಆತನಿಗೆ ಆ ಸ್ಥಾನಕ್ಕೆ ಬೇಕಾದ ವಿದ್ಯಾರ್ಹತೆಯಿದ್ದರೂ,ಆ ಕೆಲಸದಲ್ಲಿ ಅವನಿಗಿರುವ ‘ಅನುಭವ’ವೇ ಬಹುಮುಖ್ಯ ಪಾತ್ರವಹಿಸುತ್ತದೆ.ಅದು ಸಹಜ ಕೂಡ.ಒಮ್ಮೆ ಊಹಿಸಿ ನೋಡಿ,ಕಂಪೆನಿಯ CEO ಸ್ಥಾನಕ್ಕೆ ಒಬ್ಬ Fresher ಅನ್ನು ಪ್ರತಿಷ್ಟಾಪಿಸುವ ಐಡಿಯಾ ಎಷ್ಟು ಬಾಲಿಶವೆನಿಸುತ್ತದೆ! ಯಕಶ್ಚಿತ್ ಒಂದು ಕಂಪೆನಿಯೊಳಗಿನ ಹುದ್ದೆಗೆ ಇಷ್ಟು ಮಹತ್ವಕೊಡುವಾಗ,ದೇಶವನ್ನು ಮುನ್ನಡೆಸಲು ‘Fresher’ ಅಥವಾ ಆಡಳಿತದ ಅನುಭವ ಇಲ್ಲದವರನ್ನು ತಂದು ಕೂರಿಸಬಹುದೇ? ಒಬ್ಬ CEO ವಿಫಲನಾದರೇ,ಹೆಚ್ಚೆಂದರೆ ಒಂದು ಕಂಪೆನಿ ಮತ್ತು ಅದರಲ್ಲಿ ಕೆಲಸ ಮಾಡುವ ಸಾವಿರಾರು ಜನರು ಮುಳುಗಬಹುದು ಮತ್ತದು ಆ ಕಂಪೆನಿಯೊಳಗೆ ಹರಾಜಕತೆಗೆ ಕಾರಣವಾಗಲೂಬಹುದು.ಇನ್ನು ೧೦೦+ ಕೋಟಿಯ ಜನರ ದೇಶವನ್ನು ಇಂತವರ ಕೈಗೆ ಕೊಟ್ಟರೆ …!?

ಕೇಜ್ರಿವಾಲ್ ಅವರಿಗೆ ಆಡಳಿತದ ಅನುಭವ ಇಲ್ಲವೆನ್ನುವಾಗ ಕೆಲವರು ರಾಜೀವ್ ಗಾಂಧಿಯ ಉದಾಹರಣೆ ಕೊಡುತಿದ್ದಾರೆ.ಪಾಪ ಅವರಿಗೆ ಅಷ್ಟು ಇತಿಹಾಸದ ಅರಿವಿರಲಿಕ್ಕಿಲ್ಲ.  ರಾಜೀವ್ ಗಾಂಧಿ ಈ ದೇಶದಲ್ಲಿ ಸಂಪರ್ಕ ಕ್ರಾಂತಿಯನ್ನು ತಂದಿದ್ದು ನಿಜವೇ.ಮೊದಲಿಗೆ ಕ್ಲೀನ್ ಇಮೇಜ್ ಇಟ್ಟುಕೊಂಡಿದ್ದ ರಾಜೀವ್ ಕಡೆಗೆ ಬೋಫೋರ್ಸ್ ಮಸಿ ಅಂಟಿಸಿಕೊಂಡರು.ಅದೆಲ್ಲವನ್ನೂ ಬಿಡಿ.ಅನನುಭವ ಎಂತ ಅನಾಹುತಗಳಿಗೆ ಕಾರಣವಾಗಬಹುದು ಎನ್ನಲಿಕ್ಕೆ ರಾಜೀವ್ ಗಾಂಧಿಯವರೇ ಸರಿಯಾದ ಉದಾಹರಣೆ.ಶ್ರೀಲಂಕಾ,ಎಲ್.ಟಿ.ಟಿ.ಇ ಮತ್ತು ಶಸ್ತ್ರಾಸ್ತ್ರಗಳ ಮಾಫಿಯಾಗಳು ಸೇರಿ ಹೆಣಿದಿದ್ದ ಖೆಡ್ಡಾದೊಳಗೆ ಮುಗ್ಧವಾಗಿಯೇ ಸಾಗಿದ ರಾಜೀವ್, ಭಾರತೀಯ ಶಾಂತಿ ಪಾಲನ ಪಡೆಯನ್ನು ದ್ವೀಪ ರಾಷ್ಟ್ರಕ್ಕೆ ಕಳಿಸಿ ನಮ್ಮ ಸೈನಿಕರ ಸಾವಿಗೆ ಕಾರಣವಾಗುವುದಲ್ಲದೇ,ಕಡೆಗೆ ಅವರೂ ಬಲಿಯಾದರು. ಶಾ ಬಾನು ಪ್ರಕರಣದಲ್ಲಿ ಮುಸ್ಲಿಂರ ಓಲೈಕೆಗಾಗಿ,ಮಹಿಳಾ ಹಿತಾಸಕ್ತಿಯನ್ನೂ ಬಲಿಕೊಟ್ಟು,ಸಂವಿಧಾನಕ್ಕೆ ತಿದ್ದುಪಡಿ ತಂದು ದೇಶದ ಕೋಮು ಸಾಮರಸ್ಯಕ್ಕೆ ಮೊದಲ ಕೊಳ್ಳಿಯಿಟ್ಟರು.ಅವತ್ತಿನಿಂದ ಇವತ್ತಿನವರೆಗೂ  ಈ ದೇಶ ಕಂಡ ಕೋಮು ದಳ್ಳುರಿ ಮತ್ತು ತುಷ್ಟೀಕರಣದ ರಾಜಕೀಯಕ್ಕೆ ಶ್ರೀಕಾರ ಹಾಕಿದ್ದು ಇದೇ ಅನನುಭವಿ ರಾಜೀವ್ ಗಾಂಧಿ…! ಜಮ್ಮು-ಕಾಶ್ಮೀರದ ರಾಜ್ಯಪಾಲರಾಗಿದ್ದ ಜಗಮೋಹನ್ ಅವರು ಪದೇ ಪದೇ ಕಾಶ್ಮೀರದ ಪರಿಸ್ಥಿತಿ ಕೈ ಮೀರುತ್ತಿರುವುದನ್ನು ತಿಳಿಸಿದಾಗಳು ಬೇಜವಬ್ದಾರಿಯಿಂದ ವರ್ತಿಸಿ ಲಕ್ಷಾಂತರ ಕಶ್ಮೀರಿ ಪಂಡಿತರ ಹತ್ಯೆಗೆ,ದುರಂತಕ್ಕೆ ಕಾರಣರಾಗಿದ್ದು ಇದೇ ಅನನುಭವಿ ರಾಜೀವ್ ಗಾಂಧಿಯಲ್ಲವೇ? ಈಗ ಹೇಳಿ ಇನ್ನೊಬ್ಬ ರಾಜೀವ್ ಗಾಂಧಿ ನಮಗೆ ‘ಕೇಜ್ರಿವಾಲ್’ ರೂಪದಲ್ಲಿ ಬೇಕಾ?

೧೩ ವರ್ಷಗಳ ಕಾಲ ಒಂದು ರಾಜ್ಯದ ಮುಖ್ಯಮಂತ್ರಿಯಾಗಿ ಯಶಸ್ವಿಯಾಗಿ ಆಡಳಿತ ನಡೆಸಿದ ಅನುಭವ ಮತ್ತು ಅದಕ್ಕೂ ಮುಂಚಿನ ಸಂಘಟನಾ ಕಾರ್ಯದ ಅನುಭವ ಪಡೆದ ಪ್ರತಿಭೆಯ ಜೊತೆಗೆ ಭ್ರಷ್ಟಚಾರ ವಿರೋಧಿ ಹೋರಾಟದ ಮುಂಚೂಣಿಯಲ್ಲಿದ್ದವರನ್ನು ಇಟ್ಟುಕೊಂಡು ತುಲನೆ ಮಾಡುವುದೇ ಅಪ್ರಾಯೋಗಿಕವಲ್ಲವೇ? ಈ ಟಿ.ಆರ್.ಪಿ ಮೀಡಿಯಾಗಳು ಸೃಷ್ಟಿಸುತ್ತಿರುವ ಸಾಮೂಹಿಕ ಸನ್ನಿಗೆ ಬಲಿಯಾಗಿ ನಾನಂತು ಆಪ್ ಪಕ್ಷವನ್ನು ಬೆಂಬಲಿಸಲಾರೆ.ನನ್ನ ಬೆಂಬಲ ಮೋದಿಗೆ. ನಾನೇಕೆ ಮೋದಿಯನ್ನು ಬೆಂಬಲಿಸುತ್ತೇನೆ ಮತ್ತು ಕೇಜ್ರಿವಾಲ್ ಅವರನ್ನು ಬೆಂಬಲಿಸುವುದಿಲ್ಲವೆಂದರೆ ;

ಕೇಜ್ರಿವಾಲ್ ಮತ್ತವರ ಪಕ್ಷದ ನೈತಿಕ ಭ್ರಷ್ಟಚಾರ :

ಕೇಜ್ರಿವಾಲ್ ಅವರು ಸರ್ಕಾರಿ ನೌಕರಿಗೆ ಸೇರಿದ್ದು ೧೯೯೫ ರಲ್ಲಿ. ೨೦೦೦ನೇ ಇಸವಿಯಲ್ಲಿ, ಉನ್ನತ ಶಿಕ್ಷಣದ ಕಾರಣ ಹೇಳಿ ೨ ವರ್ಷಗಳ ಸಂಬಳ ಸಹಿತ ರಜೆ (ವಾಪಸ್ಸು ಬಂದ ಮೇಲೆ ೩ ವರ್ಷಗಳ ಕಾಲ ಕೆಲಸದಲ್ಲಿ ಮುಂದುವರೆಯಬೇಕು ತಪ್ಪಿದರೆ ೨ ವರ್ಷಗಳ ಸಂಬಳವನ್ನು ದಂಡದ ರೂಪದಲ್ಲಿ ಕಟ್ಟಬೇಕು ಅನ್ನುವ ಶರತ್ತಿನ ಮೇಲೆ) ಪಡೆದು ಹೋದ ಕೇಜ್ರಿವಾಲ್ ಮತ್ತೆ ಕೆಲಸಕ್ಕೆ ಹಿಂದಿರುಗಿದ್ದು ೨೦೦೩ ರಲ್ಲಿ.ಹಾಗೆ ಬಂದವರು ಕೆಲಸ ಮಾಡಿದ್ದು ೧೮ ತಿಂಗಳು ಅದಾದ ಮೇಲೆ ಮತ್ತೆ ೧೮ ತಿಂಗಳ ‘ಸಂಬಳರಹಿತ ರಜೆ’…!(ಅಂದರೆ ೧೦ ವರ್ಷಗಳ ಸರ್ಕಾರಿ ಕೆಲಸದಲ್ಲಿದ್ದ ಅವಧಿಯಲ್ಲಿ ಕೆಲಸ ಮಾಡಿದ ಅವಧಿ ೬ ವರ್ಷ ೮ ತಿಂಗಳು). ೩ ವರ್ಷಗಳ ಕೆಲಸ ಮಾಡಬೇಕೆಂಬ ಶರತ್ತನ್ನು ಉಲ್ಲಂಘಿಸಿದ್ದನ್ನು ಸರ್ಕಾರ ಪ್ರಶ್ನಿಸಿದಾಗ ಉಳಿದ ೧೮ ತಿಂಗಳ ಅವಧಿಯ ವೇತನವನ್ನು ದಂಡದ ರೂಪದಲ್ಲಿಯೂ ಕಟ್ಟಿದರು.

ಫೆಬ್ರವರಿ ೨೦೦೬ರಲ್ಲಿ ಕೆಲಸಕ್ಕೆ ರಾಜಿನಾಮೆ ನೀಡಿ ಹೊರಬಂದು ಪರಿವರ್ತನ ಹೆಸರಿನ NGO ಸ್ಥಾಪಿಸಿದರು.ಪರಮ ಪ್ರಾಮಾಣಿಕ ಅಧಿಕಾರಿಗಳಿಗೆ ಎತ್ತಂಗಡಿಯ ಶಿಕ್ಷೆ ಮಾಮುಲಲ್ಲವೇ? ಉದಾಹರಣೆಗೆ; ಸೋನಿಯಾ ಅಳಿಯ ರಾಬರ್ಟ್ ವಾಧ್ರಾನ ಅಕ್ರಮವನ್ನೇ ಪ್ರಶ್ನಿಸಿ ದಿಟ್ಟ ಅಧಿಕಾರಿ ‘ಅಶೋಕ್ ಖೇಮ್ಕಾ’ ತಮ್ಮ ‘೨೦’ ವರ್ಷಗಳ ಸರ್ವೀಸಿನಲ್ಲಿ ‘೪೩‘ ಬಾರಿ ವರ್ಗಾವಣೆಗೊಳಗಾಗಿದ್ದಾರೆ…!  ಆದರೆ, ಸೋಜಿಗವೆಂದರೆ ಕೇಜ್ರಿವಾಲ್ ಸರ್ಕಾರಿ ಹುದ್ದೆಯ ಕಾಲಾವಧಿಯ ಉದ್ದಕ್ಕೂ ದೆಹಲಿ ಬಿಟ್ಟು ಇನ್ನೆಲ್ಲಿಗೂ ವರ್ಗಾವಣೆಯಾಗಿಲ್ಲ ಎನ್ನುವುದು…! ಅದು ಹೇಗೆ ಸಾಧ್ಯವಾಗಿರಬಹುದು?

ಕೇಜ್ರಿವಾಲ್ ಹೇಳಿಕೆಗಳು ಮತ್ತು ಯು-ಟರ್ನ್ ಗಳು ಎಷ್ಟು ಸ್ಪೀಡ್ ಆಗಿವೆ ಎಂದರೆ,ಸದ್ಯದಲ್ಲೇ ಇರುವ ’ಯು-ಟರ್ನ್’ ಬೋರ್ಡುಗಳನ್ನು ತೆಗೆದು ’ಕೇಜ್ರಿವಾಲ್ ಟರ್ನ್’ ಎಂದು ಮಾಡಬೇಕಾಗಬಹುದು ಎಂದೆಲ್ಲ ಜೋಕುಗಳು ಹುಟ್ಟಿಕೊಳ್ಳುತ್ತಿವೆ. ನಾನಿದನ್ನು , ಯು-ಟರ್ನ್ ಎಂದು ಲೈಟ್ ಆಗಿ ಹೇಳುವ ಬದಲು “ನೈತಿಕ ಭ್ರಷ್ಟಚಾರ”ವೆಂದು ಕರೆಯುತ್ತೇನೆ.ಭ್ರಷ್ಟಚಾರವೆಂಬುದು ಕೇವಲ ಹಣದ ಜೊತೆಗೆ ಮಾತ್ರ ಆಗಬೇಕೆಂದೆನಿಲ್ಲ.ಎರಡು ನಾಲಿಗೆಯ ಮನುಷ್ಯರು ಸಹ ಭ್ರಷ್ಟರೇ.ಕೇಜ್ರಿವಾಲ್ ಮತ್ತವರ ಪಕ್ಷದ ನೈತಿಕ ಭ್ರಷ್ಟತನದ ಕೆಲವು ಸ್ಯಾಂಪಲ್ ವಿಡಿಯೋ ತುಣುಕುಗಳು ಮತ್ತು ಬರಹಗಳು ಇಲ್ಲಿವೆ ನೋಡಿ.

• ಕೇಜ್ರಿವಾಲ್ ನೈತಿಕತೆಯಿಲ್ಲದ ಎಡಬಿಡಂಗಿ ನಡೆ-ನುಡಿಗಳು1 
• ಕೇಜ್ರಿವಾಲ್ ನೈತಿಕತೆಯಿಲ್ಲದ ಎಡಬಿಡಂಗಿ ನಡೆ-ನುಡಿಗಳು2
• ಶೀಲಾದೀಕ್ಷಿತ್ ಭ್ರಷ್ಟಚಾರದ ಬಗ್ಗೆ ಚುನಾವಣೆಗೆ ಮೊದಲು ಮತ್ತು ನಂತರದ ಮಾತು 
  
• ಕಾಮನ್ ವೆಲ್ತ್ ಭ್ರಷ್ಟಚಾರದ ಬಗ್ಗೆ ೩೭೦ ಪುಟಗಳ ವರದಿ ನೀಡಿದ್ದು ಈಗ ಮರೆತು ಹೋಗಿದೆಯೇ?
  
• ಕಾಶ್ಮೀರದ ಬಗೆಗಿನ ಮಾತು ’ಆಪ್’ ಪಕ್ಷದ ಪ್ರಶಾಂತ್ ಭೂಷಣ್ ಅವರ ದೇಶವಿರೋಧಿ ಧೋರಣೆ 
• ಆಪ್ ಪಕ್ಷದ ’ದಿಗ್ವಿಜಯ್ ಸಿಂಗ್’ ಕುಮಾರ್ ವಿಶ್ವಾಸ್ ಮಾತು 
• “ಮೋಸ್ಟ್ ವಾಂಟೆಡ್ ಉಗ್ರ ಯಾಸಿನ್ ಭಟ್ಕಳ್” ಬಗ್ಗೆ ಕಮಲ್ ಫಾರೂಖಿ ಹೇಳಿದ್ದು
• ಕಮಲ್ ಫಾರೂಖಿ ಕೇಜ್ರಿವಾಲ್ ಅವರನ್ನು ಭೇಟಿಯಾಗಿದ್ದು 
• ದೆಹಲಿಯ ಕಾನೂನು ಸಚಿವ ಸೋಮನಾಥ್ ಬಾರ್ತಿ ವಿರುದ್ಧದ ಆರೋಪ 
• ಸೋಮನಾಥ್ ಬಾರ್ತಿಯನ್ನು ಬೆಂಬಲಿಸಿದ ಕೇಜ್ರಿವಾಲ್ 
• ಆಪ್ ಪಕ್ಷದ ’ದಿಗ್ವಿಜಯ್ ಸಿಂಗ್’ ಕುಮಾರ್ ವಿಶ್ವಾಸ್ ದೃಷ್ಟಿಯಲ್ಲಿ ದಕ್ಷಿಣ ಭಾರತೀಯ ಹೆಣ್ಣು ಮಕ್ಕಳು!

ಉಳಿದವರ ಭ್ರಷ್ಟಚಾರದ ಬಗ್ಗೆ ಮಾತನಾಡುವಾಗ ಅವರ ಮೇಲೆ ಮುರಿದುಕೊಂಡು ಬೀಳುವ ಕೇಜ್ರಿವಾಲ್,ತಮ್ಮ ಪಕ್ಷದ ವಿರುದ್ಧ ಇದೇ ಆರೋಪ ಬಂದಾಗ ವರ್ತಿಸುವ ರೀತಿ ವಿಚಿತ್ರವಾಗಿರುತ್ತದೆ.

ಇಂಡಿಯಾ ಟೀವಿಯಲ್ಲಿ ರಜತ್ ಶರ್ಮಾ ನಡೆಸಿಕೊಡುವ ‘ಆಪ್ ಕಿ ಅದಾಲತ್’ ಕಾರ್ಯಕ್ರಮದಲ್ಲಿ, ದೆಹಲಿಯಲ್ಲಿ ಆಪ್ ಪಕ್ಷ ಟಿಕೆಟ್ ನೀಡಿದವರ ಮೇಲೆ ಇರುವ ಆರೋಪಗಳ ಬಗ್ಗೆ ಗಮನ ಸೆಳೆದಾಗ ,ಕೇಜ್ರಿವಾಲ್ ಅವರನ್ನು ಸಮರ್ಥಿಸಿಕೊಳ್ಳುತ್ತಾರೆ. ಸಮರ್ಥಿಸಿಕೊಳ್ಳುವ ಭರದಲ್ಲಿ ಆಕ್ರಮಣಕಾರಿಯಾಗುತ್ತಾರೆ.

ಪ್ರಸ್ತುತ ದೆಹಲಿಯ ಸರ್ಕಾರದಲ್ಲಿ ಪ್ರವಾಸೋದ್ಯಮ,ಆಡಳಿತ ಸುಧಾರಣೆ,ಕಲೆ ಮತ್ತು ಸಂಸ್ಕೃತಿ ಹಾಗೂ ಕಾನೂನು ಸಚಿವಾರಾಗಿರುವ ಸೋಮನಾಥ ಭಾರ್ತಿಯವರ ಮೇಲೆ ವಕೀಲ ವೃತ್ತಿ ಸಂಹಿತೆಯನ್ನು ಉಲ್ಲಂಘಿಸಿ ಪ್ರಕರಣ ನಡೆಯುವಾಗ ಸಾಕ್ಷ್ಯವನ್ನು ತಿರುಚುವ ಆರೋಪ ಕೇಳಿಬಂದಿದೆ. ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರಿನಲ್ಲಿ ನಡೆದಿತ್ತು ಎನ್ನಲಾದ ಸಾಲ ಪ್ರಕರಣದಲ್ಲಿ ಆರೋಪಿಯ ಪರ ವಾದಿಸಿದ್ದ ಸೋಮನಾಥ್, ಕೇಸಿನ ಸಾಕ್ಷಿದಾರರ ಜೊತೆ ಮಾತನಾಡಿ ಅದರ ಧ್ವನಿ ಮುದ್ರಿಕೆ ಮಾಡಿಕೊಂಡಿದ್ದರು.ಇವರ ಈ ನಡೆ ನ್ಯಾಯಪೀಠಕ್ಕೆ ಅಚ್ಚರಿ ಮೂಡಿಸಿತ್ತು ಮತ್ತು ನ್ಯಾಯಾಧೀಶೆ ಪೂನಂ ಅವರು “ಪ್ರತಿವಾದಿ ಮತ್ತು ವಕೀಲ ಸೋಮನಾಥ ಭಾರ್ತಿ ನಡೆಸಿರುವ ಕೃತ್ಯ ಸಾಕ್ಷ್ವನ್ನು ತಿರುಚುವಂತಾದ್ದಾಗಿತ್ತು.ಒಬ್ಬ ವಕೀಲರಾಗಿ ಭಾರ್ತಿ ತಮ್ಮ ವೃತ್ತಿ ಸಂಹಿತೆಯನ್ನು ಉಲ್ಲಂಘಿಸಿದ್ದಾರೆ.ಪ್ರಕರಣ ವಿಚಾರಣೆ ಕೋರ್ಟಿನಲ್ಲಿ ನಡೆಯುತ್ತಿರಬೇಕಾದರೆ,ಸಾಕ್ಷಿಯನ್ನು ಮಾತನಾಡಿಸಿ ಪ್ರಕರಣದ ವಿವರವನ್ನು ಪಡೆದುಕೊಳ್ಳುವ ಕ್ರಿಯೆ ವಕೀಲಿ ವೃತ್ತಿ ಸಂಹಿತೆಗೆ ವಿರುದ್ಧವಾದದ್ದು ಮತ್ತು ಖಂಡನೀಯ” ಎಂದಿದ್ದರು.

ಇಂಡಿಯಾ ಟೀವಿಯ ರಜತ್ ಶರ್ಮ ಹೇಳಿದಂತೆ, ಆಪ್ ಪಕ್ಷ ‘ಗಂಗೋತ್ರಿ’ ಅಲ್ಲವೇ.ಹಾಗಾಗಿ ಅಲ್ಲಿ ಬಂದವರೆಲ್ಲ ಪರಮ ಪಾವನರಾಗುತ್ತಾರೆ.ಅದೇ ದರ್ಪದಲ್ಲಿ ಕೇಜ್ರಿವಾಲ್ ಸೋಮನಾಥ್ ಭಾರ್ತಿಯವರನ್ನು ಸಮರ್ಥಿಸಿಕೊಳ್ಳುತ್ತ, ನ್ಯಾಯಾಧೀಶರು ಮಾಡಿದ ಅಬ್ಸರ್ವೇಷನ್ನೇ ಸರಿಯಿಲ್ಲವೆನ್ನುತ್ತಾರೆ.ಹೇಗಿದೆ ನೋಡಿ ವಾದ.ಇವರು ಹೇಳಿದ್ದೆಲ್ಲ ಅಂತಿಮ ಸತ್ಯ…! (ಪೋಲಿಸರ ಕರ್ತವ್ಯಕ್ಕೆ ಅಡ್ಡಿಪಡಿಸಿದ ಆರೋಪದ ಮೇಲೆ ಇದೇ ಸಚಿವರ ಮೇಲೆ FIR ದಾಖಲಿಸಲಾಗಿದೆ)

ಈಗ ಹೇಳಿ, ಉಳಿದ ಎರಡು ನಾಲಿಗೆಯ ಬೇರೆ ಪಕ್ಷಗಳಿಗೂ,ರಾಜಕಾರಣಿಗಳಿಗೂ ಮತ್ತು ಪರಮ ಪವಿತ್ರನೆಂದು ಕರೆಸಿಕೊಳ್ಳುವ ಆಮ್ ಆದ್ಮಿ ಪಕ್ಷ ಮತ್ತು ಕೇಜ್ರಿವಾಲ್ ಅವರಿಗೂ ಏನು ವ್ಯತ್ಯಾಸವಿದೆ? ಯಾವ ಶೀಲಾ ದಿಕ್ಷೀತ್ ಅವರನ್ನು ಚುನಾವಣೆಯ ಮೊದಲು “ದೆಹಲಿಯ ಭ್ರಷ್ಟಚಾರದ ಸಿಂಬಲ್” ಎಂದು ಕರೆದು ೩೭೦ ಪುಟಗಳ  ಕಾಮನ್ವೆಲ್ತ್ ಹಗರಣದ ವರದಿ ತಯಾರಿಸಲಾಗಿತ್ತೋ ಇಂದು ಅದೇ ಶೀಲಾ ದಿಕ್ಷೀತ್ ಅವರ  ಭ್ರಷ್ಟಚಾರಕ್ಕೆ ’ಸಾಕ್ಷ್ಯ ಕೊಡಿ’ ಎಂದು ಬಿಜೆಪಿಯ ನಾಯಕರನ್ನು ಕೇಳುವವರೆಗೂ ಬಂದು ನಿಂತಿದ್ದಾರೆ ಕೇಜ್ರಿವಾಲ್ ಇದು ನೈತಿಕ ಭ್ರಷ್ಟಚಾರವಲ್ಲದೇ ಮತ್ತಿನ್ನೇನು?

ಇನ್ನು ಆಪ್ ಪಕ್ಷದೊಳಗಿರುವ ಮತ್ತು ಈಗ ಪಕ್ಷ ಸೇರಲು ಬಯಸುತ್ತಿರುವ ಕೆಲವರ ಹೇಳಿಕೆಗಳು ಮತ್ತೆ ನಡವಳಿಕೆಗಳನ್ನು ಗಮನಿಸಿ.

• ಇಂಡಿಯನ್ ಮುಜಾಹಿದ್ದೀನ್ ನ ಪ್ರಮುಖ ಮತ್ತು ಭಾರತಕ್ಕೆ ಬೇಕಾಗಿದ್ದ ಮೋಸ್ಟ್ ವಾಂಟೆಡ್ ಉಗ್ರ ಯಾಸಿನ್ ಭಟ್ಕಳ್ ಅನ್ನು ಬಿಹಾರ ಪೋಲಿಸರು ಬಂಧಿಸಿದಾಗ ಅವನನ್ನು ಮುಸ್ಲಿಂ ಅನ್ನುವ ಕಾರಣಕ್ಕಾಗಿ ಬಂಧಿಸಲಾಗಿದೆ ಅನ್ನುವಂತೆ ಮಾತನಾಡಿ ಸಮಾಜವಾದಿ ಪಕ್ಷದಿಂದ ಹೊರದಬ್ಬಿಸಿಕೊಂಡು ಬಂದು ‘ಕಮಲ್ ಫಾರೂಖಿ’ಯಂತವರು ಇಂದು ತಟ್ಟುತ್ತಿರುವುದು ’ಆಪ್’ ಬಾಗಿಲನ್ನು.
• “ಒಸಾಮ ಮತ್ತವನ ಕುಟುಂಬ ನಿಶ್ಯಸ್ತ್ರವಾಗಿದ್ದಾಗ ಅವರನ್ನು ಕೊಲ್ಲಲಾಯಿತು,ಇದರಿಂದ ಉಗ್ರಗಾಮಿತನ ಹೆಚ್ಚುತ್ತದೆ”. “ಹುರಿಯತ್ ಕಾನ್ಫರೆನ್ಸ್ ಅನ್ನು ಟೀಕಿಸುವ ಮೂಲಕ ಯಾಸಿನ್ ಮಲಿಕ್ ಕಾಶ್ಮೀರಿಗಳ ಹೋರಾಟವನ್ನು ಸಡಿಲಗೊಳಿಸುತಿದ್ದಾರೆ.ಇವರೆಲ್ಲ ಭಾರತದ ವಿರುದ್ಧ ಒಗ್ಗಟ್ಟಾಗಿ, ತಮ್ಮೊಳಗಿನ ಭಿನ್ನಾಭಿಪ್ರಾಯಗಳನ್ನು ಪರಿಹರಿಸಿಕೊಳ್ಳಬೇಕು” ಅಂತೆಲ್ಲ ಟ್ವಿಟರ್ ನಲ್ಲಿ ಅಣಿಮುತ್ತು ಉದುರಿಸುತಿದ್ದ ‘ಕಮಲ್ ಮಿತ್ರ ಚೆನಾಯ್’ ಆಪ್ ಪಕ್ಷವನ್ನು ಸೇರಿದ್ದಾರೆ.
• ಇನ್ನೊಂದೆಡೆ, ಆಪ್ ಪಕ್ಷದ ಪ್ರಮುಖ ನಾಯಕ ಪ್ರಶಾಂತ್ ಭೂಷಣ್ ಕಾಶ್ಮೀರದ ವಿವಾದವನ್ನು ಕೆಣಕುತ್ತ, ಕಶ್ಮೀರಿಗಳು ಬಯಸಿದರೆ ಅವರನ್ನು ಸ್ವತಂತ್ರರಾಗಲು ಬಿಡಬೇಕು, ಅಲ್ಲಿಂದ ಸೇನೆಯನ್ನು ವಾಪಾಸು ಕರೆಸಿಕೊಳ್ಳಬೇಕು ಅಂತೆಲ್ಲ ದೇಶದ್ರೋಹಿಯಂತೆ ಬಡಬಡಿಸುತಿದ್ದಾರೆ. ನೆನಪಿರಲಿ ಪ್ರಶಾಂತ್ ಭೂಷಣ್ ಆಪ್ ಪಕ್ಷದ ನ್ಯಾಷನಲ್ ಎಕ್ಸಿಕ್ಯೂಟಿವ್ ಕಮಿಟಿಯಲ್ಲಿರುವವರು.

ದೆಹಲಿ ಫಲಿತಾಂಶ ಬಂದ ಮೊದ ಮೊದಲು, “ಹಿಂಬಾಗಿಲಲ್ಲಿ ಕೈ ಜೋಡಿಸಿರುವ ಕಾಂಗ್ರೆಸ್ಸ್ ಮತ್ತು ಬಿಜೆಪಿಗಳೇಕೆ ಒಟ್ಟಾಗಿ ಸರ್ಕಾರ ರಚಿಸಬಾರದು?’ ಅನ್ನುವಂತ ಕೇಜ್ರಿವಾಲ್ ಹೇಳಿಕೆಯಲ್ಲಿ ನಮಗೆ ರಾಹುಲ್ ಗಾಂಧಿಯ ಜೋಕುಗಳು ನೆನಪಾಗುತ್ತದಾದರೂ,ಕೇಜ್ರಿವಾಲ್ ಅನ್ನುವ ಮನುಷ್ಯ ರಾಹುಲ್ ಗಾಂಧಿಯಂತೆ  ‘ಮುಗ್ಧ’ನಲ್ಲ…! (ಮುಗ್ಧ ಅನ್ನುವುದು ಅವಕಾಶ ಮೂರ್ತಿಗಳ ಡೆಫಿನೇಷನ್ನು.ನನ್ನದಲ್ಲ) ಅನ್ನುವುದು ಅವರು ಅಣ್ಣಾ ಹಜ಼ಾರೆಯವರ ಹೋರಾಟದ ಗರ್ಭ ಸೀಳಿಕೊಂಡು ಬಂದು ನಿಂತಾಗಲೇ ಗೊತ್ತಾಗಿದೆ.

ಚುನಾವಣೆಯ ಮೊದಲು, ನಾಳೆಯ ದಿನ ಅತಂತ್ರ ಫಲಿತಾಂಶ ಬಂದರೆ, ಯಾವುದೇ ಕಾರಣಕ್ಕೂ ಕಾಂಗ್ರೆಸ್ಸ್, ಬಿಜೆಪಿ ಎರಡೂ ಪಕ್ಷಗಳ ಜೊತೆಗೆ ಕೈ ಜೋಡಿಸಲಾರೆ,ನನ್ನ ಮಕ್ಕಳ ಮೇಲೆ ಆಣೆ ಅಂತೆಲ್ಲ ಬಡಬಡಿಸಿದ್ದ ಕೇಜ್ರಿವಾಲ್,ಮಾತು ತಪ್ಪಿದ್ದೇಕೆ?

ಅದು ಬಿಡಿ. ಆಪ್ ಪಕ್ಷ ಲೋಕಸಭಾಚುನಾವಣೆಗೆ ಸ್ಪರ್ಧಿಸುವ ಘೋಷಣೆ ಮಾಡಿದಾಗ ಕೇಜ್ರಿವಾಲ್, ನಾನು ಲೋಕಸಭೆ ಸ್ಪರ್ಧಿಸುವುದಿಲ್ಲವೆಂದಿದ್ದರು.ಈಗ ವರಸೆ ಬದಲಾಯಿಸಿದ್ದಾರೆ.ಪಕ್ಷ ಬಯಸಿದರೆ ಸ್ಪರ್ಧಿಸುತ್ತಾರಂತೆ…! ಒಂದೆಡೆ, ಬಂಡಾಯವೆದ್ದಿರುವ ಬಿನ್ನಿಯವರ ಬಗ್ಗೆ ಲೋಕಸಭೆ ಚುನಾವಣೆಗೆ ಟಿಕೆಟ್ ನೀಡಿಲ್ಲವೆಂದು ಅವರು ಹೀಗೆ ಮಾಡುತಿದ್ದಾರೆ,ನಾವು ಈಗ ಶಾಸಕರಾಗಿರುವವರಿಗೆ ಟಿಕೆಟ್ ನೀಡುವುದಿಲ್ಲವೆನ್ನುತ್ತಾರೆ?ಹಾಗಿದ್ದರೆ ಈ ನಿಯಮಗಳು ಕೇಜ್ರಿವಾಲ್ ಅವರಿಗೆ ಅನ್ವಯವಾಗುವುದಿಲ್ಲವೇ? ಅಥವಾ ಅವರು ಅವರ ಪಕ್ಷದ ನಿಯಮಗಳಿಗಿಂತ ದೊಡ್ಡವರೇ?

ಇಂತ ಎಡಬಿಡಂಗಿ ನಡೆಗಳು,ತಾನು ಏನು ಮಾಡ ಹೊರಟಿದ್ದೇನೆ ಅನ್ನುವುದು ಕೇಜ್ರಿವಾಲ್ ಅವರಿಗಾಗಲಿ ಅವರ ಆಮ್ ಆದ್ಮಿ ಪಕ್ಷಕ್ಕಾಗಲಿ ಸ್ಪಷ್ಟತೆ ಇಲ್ಲವೆನಿಸುವುದಕ್ಕೆ ಸಾಕ್ಷಿಗಳಲ್ಲವೇ? ಅಥವಾ ಹೀಗೆ ತಮ್ಮ ಹೇಳಿಕೆಯನ್ನೇ ಪದೇ ಪದೇ ಬದಲಿಸುವಾಗ ಅವರ ನೈತಿಕತೆ ಸತ್ತು ಬಿದ್ದಿತ್ತೆ?

ಆಪ್ ಪಕ್ಷದ ಮತ್ತು ಕೇಜ್ರಿವಾಲ್ ಅವರ ಮಾತುಗಳ ಎಡಬಿಡಂಗಿತನ ಒಂದು ಕಡೆಯಾದರೆ, ಇನ್ನು ಅಧಿಕಾರವಹಿಸಿಕೊಳ್ಳುವ ದಿನ ಯಾವುದೇ ಸರ್ಕಾರಿ ಬಂಗಲೆ ಬಳಸುವುದಿಲ್ಲ,ಭದ್ರತೆ ಬೇಡ ಇತ್ಯಾದಿ ಇತ್ಯಾದಿ ಘೋಷಣೆಗಳು.(ಆ ನಂತರ ಅವರ ಒಂದೊಂದೆ ಹೇಳಿಕೆಯಿಂದ ಹಿಂದೆ ಸರಿದದ್ದು ,ಯು-ಟರ್ನ್ ಹೊಡೆದಿದ್ದು ಗೊತ್ತಿರುವಂತದ್ದೆ). ಅಧಿಕಾರವಹಿಸಿಕೊಂಡ ಮೇಲೆ, ಜನತಾ ದರ್ಬಾರ್ ಮಾಡುತ್ತೇನೆ ಎಂದು ಸುದ್ದಿಯಾದರು. ಆಯೋಜಿಸಿದ ಜನತಾ ದರ್ಬಾರಿಗೊಂದು ಸೂಕ್ತ ವ್ಯವಸ್ಥೆಯನ್ನೂ ಮಾಡಿಕೊಳ್ಳದೇ,ಕನಿಷ್ಟ ಭದ್ರತಾ ವ್ಯವಸ್ಥೆಯನ್ನು ಮಾಡಿಕೊಳ್ಳದೇ ಅದನ್ನು ಅರ್ಧಕ್ಕೆ ನಿಲ್ಲಿಸಿ ಎದ್ದು ಬಂದರು.ಈಗ ಹೇಳುತ್ತಿರುವುದು ಇನ್ನು ಮುಂದೆ ಈ ಜನತಾ ದರ್ಬಾರನ್ನು ಕೇವಲ ಆನ್ಲೈನ್ ಮೂಲಕ ಮಾಡುತ್ತೆವೆಂದು.

ಹಾಗೆ ನೋಡ ಹೋದರೆ ಜನತಾ ದರ್ಬಾರ್ ಅನ್ನುವುದು ಕೇಜ್ರಿವಾಲ್ ತಂದಿರುವ ಹೊಸ ವ್ಯವಸ್ಥೆಯೇನಲ್ಲ. ಕರ್ನಾಟಕದಲ್ಲಿ ಬಿಜೆಪಿ-ಜೆಡಿಎಸ್ ಸರ್ಕಾರದಲ್ಲಿ ಕುಮಾರಸ್ವಾಮಿ ಕೇಜ್ರಿವಾಲ್ಗಿಂತ ಒಂದು ಹೆಜ್ಜೆ ಮುಂದೆ ಹೋಗಿ ಗ್ರಾಮ ವಾಸ್ತವ್ಯವನ್ನೂ ಮಾಡುತಿದ್ದರು.ಗುಜರಾತಿನಲ್ಲಿ ೨೦೦೩ರಿಂದ ಅಸ್ತಿತ್ವದಲ್ಲಿರುವ ’ಸ್ವಾಗತ್’ ಅನ್ನುವ ಜನಸಂಪರ್ಕ ವ್ಯವಸ್ಥೆ ೧೧ ವರ್ಷಗಳಿಂದ ಸುಗಮವಾಗಿ ನಡೆದುಕೊಂಡು ಬರುತ್ತಿದೆ.ಅದರಲ್ಲೂ ಖುದ್ದು ಸಿಎಂ ಮೋದಿ ಹಾಜರಿರುತ್ತಾರೆ.(SWAGAT – State Wide Attention on Grievances by Application of Technology ).ಎಷ್ಟಾದರೂ ಅದು ’ಮೋದಿ’ ಅವರಲ್ಲವೇ ಹಾಗಾಗಿ ನಮ್ಮ ’ಮೀಡಿಯಾ’ಗಳ ಕಣ್ಣಿಗದು ಬೀಳುವ ಸಂಭವವೇ ಇಲ್ಲ ಬಿಡಿ.

ಕೇಜ್ರಿವಾಲ್ ತಂಡ ಇಂತ ಎಡಬಿಡಂಗಿ ಆಡಳಿತ ನೀಡುವ ಮುನ್ನ ನೆನಪಿನಲ್ಲಿಟ್ಟುಕೊಳ್ಳಬೇಕಾದದ್ದು ಏನೆಂದರೆ, ಆಪ್ ಪಕ್ಷ  ಹಣ,ತೋಳ್ಬಲವಿಲ್ಲದೆ ಚುನಾವಣೆ ಎದುರಿಸಿ ಬಂದಿದ್ದು ಈ ದೇಶದ ರಾಜಕೀಯ ವ್ಯವಸ್ಥೆಯಲ್ಲಿ ಶುದ್ಧ ರಾಜಕೀಯದ ಶುಭಾರಂಭ ಕ್ಕೆ ಮುನ್ನುಡಿ ಬರೆದಿದೆ ಎನ್ನುವುದು.ದೆಹಲಿಯ ಜನ ಆಪ್ ಪಕ್ಷದ ಮೇಲೆ ಭರವಸೆಯಿಟ್ಟಿದ್ದಾರೆ.ಮೊದಲು ದೆಹಲಿಯಲ್ಲಿ ಮೈಕ್ ಪಕ್ಕಕ್ಕಿಟ್ಟು,ಮೀಡಿಯಾಗಳಿಂದ ದೂರವುಳಿದು ಜನ ಮೆಚ್ಚುವಂತ ಆಡಳಿತ ನೀಡಿ ಸೈ ಅನ್ನಿಸಿಕೊಂಡು, ಆ ನಂತರ ದೇಶದ ರಾಜಕಾರಣದೆಡೆಗೆ ಹೊರಳುವುದು ಬಿಟ್ಟು, ಆಪ್ ಪಕ್ಷ ಅವಸರದಲ್ಲಿ ದೆಹಲಿ ಜನರ ನಂಬಿಕೆಯ ಜೊತೆಗೆ, ನವ ರಾಜಕಾರಣದ ಆಶಯಕ್ಕೂ ಎಳ್ಳು-ನೀರು ಬಿಡಲು ಹೊರಟಿದ್ದಾರ ಅನ್ನಿಸುತ್ತಿದೆ.

ಬರುವ ಲೋಕಸಭಾ ಚುನಾವಣೆಗಾಗಿ ’Mass Membership Drive’ ಮಾಡಲು ಹೊರಟಿದೆ.ನಮ್ಮ ಐಟಿ ಕಂಪೆನಿಗಳು ಮಾಡುವ ‘Mass Recruitment Drive’ ನಂತೆ…! ಒಮ್ಮೆ ಯೋಚಿಸಿ.ಶುದ್ಧ ರಾಜಕಾರಣದ ಬಗ್ಗೆ ಮಾತನಾಡುವ ಆಪ್ ಪಕ್ಷದ ಈ ರೀತಿಯ ಸಾಮೂಹಿಕ ನೊಂದಾವಣಿಯಲ್ಲಿ ಎಂತೆಂತವರೆಲ್ಲ ಬಂದು ಪಕ್ಷದೊಳಗೆ ತೂರಿಕೊಳ್ಳಬಹುದು ಎಂದು…!

ಲೋಕಸಭಾ ಚುನಾವಣೆಗೆ ಹೊರಟಿದ್ದೀರಿ ಭ್ರಷ್ಟಚಾರವೊಂದನ್ನು ಬಿಟ್ಟು ನಿಮ್ಮ ಪಕ್ಷದ ರೀತಿ-ನೀತಿ ಸಿದ್ದಾಂತಗಳೇನು ಅಂತ ಕೇಳಿದರೆ,ಇನ್ನು ೧೫ ದಿನ ಕಾಯಿರಿ ನಮ್ಮ ವಿದೇಶಾಂಗ ನೀತಿ,ಆರ್ಥಿಕ ನೀತಿ ಇತ್ಯಾದಿಗಳ ಬಗ್ಗೆ ವಿವರಿಸುತ್ತೇವೆ ಅನ್ನುತ್ತಾರೆ ಮಹಾಶಯರು…! ಆಪ್ ಪಕ್ಷವನ್ನು ಸ್ಥಾಪಿಸಿ ವರ್ಷಗಳು ಕಳೆದಿವೆ. ಪಕ್ಷಕ್ಕೊಂದು ನೀತಿ-ಸಿದ್ಧಾಂತವನ್ನು ವರ್ಷವಾದರೂ ರೂಪಿಸಿಕೊಳ್ಳದವರ ಕೈಗೆ ದೇಶವನ್ನು ಕೊಡಬೇಕೆ?

ಇನ್ನೂ ಚುನಾವಣೆಯಲ್ಲಿ ಮತಗಳಿಕೆಯ ವಿಚಾರಕ್ಕೆ ಬಂದರೆ ಕೇಜ್ರಿವಾಲ್, ಆಂಧ್ರದಲ್ಲಿ ಕಳೆದ ಲೋಕಸಭೆ ಮತ್ತು ವಿಧಾನಸಭೆ ಚುನಾವಣೆಯಲ್ಲಿ ‘ಚಿರಂಜೀವಿ’ ನಿರ್ವಹಿಸಿದ ಮತ ವಿಭಜನೆಯ ಕೆಲಸವೊಂದನ್ನು ಬಿಟ್ಟು ಇನ್ನೇನು ಸಾಧಿಸಲಾರರು. ಚಿರಂಜೀವಿ ತೆಲುಗು ಸಿನೆಮಾ ಶೈಲಿಯಲ್ಲಿ ’ಪ್ರಜಾರಾಜ್ಯಂ’ ಹೆಸರಿನ ಪಕ್ಷ ಸ್ಥಾಪಿಸಿ, ಭೀಷಣ ಭಾಷಣ ಮಾಡುತ್ತಾ ಕಡೆಗೆ ಹೋಗಿ ಸೇರಿಕೊಂಡಿದ್ದು ಕಾಂಗ್ರೆಸ್ಸ್ ಪಕ್ಷವನ್ನು.ಆ ಮೂಲಕ ಪರಮ ಭ್ರಷ್ಟ ರಾಜಶೇಖರ ರೆಡ್ಡಿಯನ್ನು ಮತ್ತೊಮ್ಮೆ ಅಧಿಕಾರದ ಗದ್ದುಗೆಗೆ ತಂದು ಕೂರಿಸಿದ ಪಾಲು ಚಿರಂಜೀವಿಗೂ ಸಲ್ಲುತ್ತದೆ.ಈಗ ಯುಪಿಎ ಸರ್ಕಾರದ ಭ್ರಷ್ಟಚಾರ,ದುರಾಡಳಿತ,ಬೆಲೆಯೇರಿಕೆ ಮತ್ತದಕ್ಕೆ ಮಂತ್ರಿವರ್ಯರು ಕೊಡುವ ದರ್ಪದ ಹೇಳಿಕೆಗಳು ಇವೆಲ್ಲವನ್ನೂ ನೋಡಿ ಜನರು ಮೋದಿಯೆಡೆಗೆ ಹೊರಟಿರುವಾಗ ಎದುರಿಗೆ ಬಂದು ನಿಂತಿರುವ ಹೊಸ ಚಿರಂಜೀವಿ ಈ ’ಕೇಜ್ರಿವಾಲ್’

ಇತ್ತೀಚೆಗೆ ತಾನೇ ಸಿ.ಎನ್.ಎನ್ ಮತ್ತು ಎನ್.ಡಿ.ಟಿ.ವಿಯಲ್ಲಿ ಕೇಜ್ರಿವಾಲ್ ರಾಜ್ದೀಪ್ ಸರ್ದೇಸಾಯಿ ಮತ್ತು ಬರ್ಖಾ ದತ್ ಅವರಿಗೆ ನೀಡಿದ ಸಂದರ್ಶನವನ್ನೂ ನೋಡಿದೆ.ಇಡೀ ಸಂದರ್ಶನದುದ್ದಕ್ಕೂ ಕೇಜ್ರಿವಾಲ್ ಬರಿ “ಕೆಡವುವುದರ” ಬಗ್ಗೆ ಹೇಳಿದರೆ ಹೊರತು “ಕಟ್ಟುವುದರ” (Constructive) ಬಗ್ಗೆ ಮಾತನಾಡಲೇ ಇಲ್ಲ ಈ ಮನುಷ್ಯ. ವ್ಯವಸ್ಥಿತವಾಗಿ ಕೆಡವಲೂ ಸಹ ಸಮಯಬೇಕಾಗುತ್ತದೆ. ಹಾಗೆಯೇ ಕೆಡವಿದ ಮೇಲೆ ಮತ್ತೆ ಕಟ್ಟುವುದು ಹೇಗೆ ಅನ್ನುವುದು ತಿಳಿಯದೇ ಕೆಡುವುದೂ ಅರಜಾಕತೆಯೆಡಿಗಿನ ಮೊದಲ ಹೆಜ್ಜೆ.ವ್ಯವಸ್ಥೆಯ ಮೇಲೆ ಸಾತ್ವಿಕ ಸಿಟ್ಟು,ಆಕ್ರೋಶ ಮಾನ್ಯ ಕೇಜ್ರಿವಾಲ್ ಅವರಿಗಿದ್ದಂತೆಯೇ, ಅವರನ್ನು ಜನಲೋಕಪಾಲದಲ್ಲಿ ಬೆಂಬಲಿಸಿದ ನಮ್ಮಂತ ಯುವಕರಿಗೂ ಇದೆ.ಆದರೆ ಈ ರೀತಿ ಗೊತ್ತು ಗುರಿಯಿಟ್ಟುಕೊಳ್ಳದೇ,ಅವಸರಕ್ಕೆ ಬಿದ್ದೂ ಎಲ್ಲವನ್ನೂ ಕೆಡವುತ್ತ, ಕೆಡವಿದ್ದನ್ನು ಕಟ್ಟುವ ಬಗ್ಗೆಯೇ ಚಿಂತನೆ ಇಲ್ಲದೇ ಹೋದರೆ “ಅರಜಾಕತೆ”ಯೇ ಉಂಟಾಗುವುದು.

ದೆಹಲಿ ರಾಜ್ಯದ ಸುಪರ್ದಿಗೆ ಪೋಲಿಸ್ ವ್ಯವಸ್ಥೆ ಬರಬೇಕು ಅನ್ನುವುದು ನ್ಯಾಯವಾದ ಬೇಡಿಕೆಯೇ ಸರಿ.ಆದರೆ,ಹಾಗಂತ ಮುಖ್ಯಮಂತ್ರಿಯೊಬ್ಬ ತನ್ನ ಸಚಿವರನ್ನು,ಶಾಸಕರನ್ನು ಕರೆದುಕೊಂಡು ಬಂದು ಧರಣಿ ಕೂರುವುದು ಸಂವಿಧಾನಕ್ಕೆಸಗುವ ಅಪಮಾನವಲ್ಲವೇ? ಮುಖ್ಯಮಂತ್ರಿಯಾಗಿ ಪ್ರತಿಜ್ಞಾವಿಧಿ ಸ್ವೀಕರಿಸುವಾಗ ಕಾನೂನು ಸುವ್ಯವಸ್ಥೆಗೆ ಭಂಗ ತರದಂತೆ ಮತ್ತು ಅದನ್ನು ರಕ್ಷಿಸುವ ಶಪಥ ತೆಗೆದುಕೊಂಡಿರುವುದಿಲ್ಲವೇ? ಈ ದೇಶಕ್ಕೊಂದು ಸಂವಿಧಾನವಿದೆ,ಒಂದು ವ್ಯವಸ್ಥೆಯಿದೆ,ವಿಧಾನವಿದೆ ಅದರಂತೆ ನಡೆಯಲೂ ಕೇಜ್ರಿವಾಲ್ ತಂಡ ತಯಾರಿಲ್ಲ ಅಥವಾ ಅವರ ಬೇಡಿಕೆಗೆ ಕ್ಯಾರೇ ಎನ್ನದ ಕಾಂಗ್ರೆಸ್ಸ್ ಸಂಗವನ್ನು ತೊರೆಯುವ ಉಮ್ಮೇದಿಯೂ ಇಲ್ಲ.ಇದೆಂತ ದ್ವಂದ್ವ ನಿಲುವು? “ಕ್ರಾಂತಿ”ಗೂ, “ದೊಂಬರಾಟ”ಕ್ಕೂ (ದೊಂಬರಾಟದ ಕಲಾವಿದರ ಕ್ಷಮೆ ಕೋರುತ್ತ) ವ್ಯತ್ಯಾಸವಿದೆ.ಆಪ್ ಕ್ರಾಂತಿಯ ಭ್ರಮೆಯಲ್ಲಿರುವವರಿಗೆ ಇದು ಅರ್ಥವಾದರೊಳಿತು.

ಕೇಜ್ರಿವಾಲ್ ಅವರನ್ನು ಕುರುಡಾಗಿ ಮತ್ತು ಸಿನಿಕರಾಗಿ ಬೆಂಬಲಿಸಲು ಹೊರಟವರು ನೆನಪಿನಲ್ಲಿಟ್ಟುಕೊಳ್ಳಬೇಕಾದದ್ದು; ಮುಂದೆ ಬರುತ್ತಿರುವುದು ಲೋಕಸಭಾ ಚುನಾವಣೆಯೇ ಹೊರತು ವಿಧಾನಸಭೆಯದ್ದಲ್ಲ.ಒಂದು ದೇಶದ ಚುಕ್ಕಾಣಿ ಯಾರ ಕೈಗೆ ಹೋಗಬೇಕು ಅನ್ನುವುದನ್ನು ನಿರ್ಧರಿಸುವಂತಹ ಅತ್ಯಂತ ಮಹತ್ವದ ಜವಬ್ದಾರಿಯದು.ದೇಶ ಪ್ರಗತಿಯ ಪಥದಲ್ಲಿ ಸಾಗಬೇಕಾದರೆ,ಕೇಂದ್ರದಲ್ಲಿ ಸದೃಢ ಮತ್ತು ಸ್ಥಿರ ಸರ್ಕಾರ ಬರಲೇಬೇಕು.ಭಾರತದ ಇತಿಹಾಸವನ್ನು ಗಮನಿಸಿದರೆ ಆ ರೀತಿಯ ಆಡಳಿತ ನೀಡಿರುವುದು ಕಾಂಗ್ರೆಸ್ಸ್ ಮತ್ತು ಬಿಜೆಪಿ ಪಕ್ಷಗಳು ಮಾತ್ರ. ತೃತೀಯ ರಂಗ ಇದುವರೆಗೂ ಈ ದೇಶಕ್ಕೆ ಅಧಿಕಾರ ನಡೆಸಿದ ೭ ವರ್ಷಗಳಲ್ಲಿ ೬ ಪ್ರಧಾನಿಗಳನ್ನು ನೀಡಿದೆ…! ಚಂದ್ರಶೇಖರ್ ನಂತರ ಪಿ.ವಿ ನರಸಿಂಹ ರಾವ್ ಬಂದಾಗ ದೇಶದ ಆರ್ಥಿಕ ಸ್ಥಿತಿ ಹೇಗಿತ್ತು ಅನ್ನುವುದನ್ನೊಮ್ಮೆ ನೆನಪಿಸಿಕೊಳ್ಳಿ.ಆ ನಂತರ ಅದು ತಹಬದಿಗೆ ಬಂದಿದ್ದು ಕೇಂದ್ರದಲ್ಲೊಂದು ಸ್ಥಿರ ಸರ್ಕಾರಕ್ಕೆ ಅಸ್ತಿತ್ವಕ್ಕೆ ಬಂದ ಕಾರಣದಿಂದಲೇ ಅಲ್ಲವೇ? ಹೆಚ್.ಡಿ ದೇವೆಗೌಡ,ಐ.ಕೆ ಗುಜ್ರಾಲ್ ನಂತರ ಬಂದ ವಾಜಪೇಯಿಯವರ ಸರ್ಕಾರ ನರಸಿಂಹ ರಾವ್ ಅವರ ಹಾದಿಯ ಮುಂದಿನ ಹಂತಕ್ಕೆ ಭಾರತವನ್ನು ತಲುಪಿಸಿದ್ದೇ ಹೊರತು ತೃತೀಯ ರಂಗದ ಸರ್ಕಾರಗಳಲ್ಲ.

ಆ ಕಾಲಕ್ಕೇನೋ ಭಾರತದ ಉಗ್ರರ ಉಪಟಳ ಇಷ್ಟು ಮಟ್ಟದಲ್ಲಿ ಏರಿಕೆ ಕಂಡಿರಲಿಲ್ಲ.ಭ್ರಷ್ಟಚಾರವೂ ಬ್ರಹ್ಮಾಂಡ ರೂಪ ತಾಳಿರಲಿಲ್ಲ.ದಿನನಿತ್ಯದ ವಸ್ತುಗಳ ಬೆಲೆ ಈ ಪರಿ ಏರಿಕೆ ಕಂಡಿರಲಿಲ್ಲ ಮತ್ತು ಅವೆಲ್ಲಕ್ಕಿಂತ ಮುಖ್ಯವಾಗಿ ದೇಶದ ಆರ್ಥಿಕ ಸ್ಥಿತಿ ಈ ಪರಿ ಹಳ್ಳಹಿಡಿದಿರಲಿಲ್ಲ.ಈಗ ಹೇಳಿ ಇಂತ ವಿಷಮ ಪರಿಸ್ಥಿತಿಯಲ್ಲಿ ಕೇಂದ್ರದಲ್ಲೊಂದು ಸದೃಢ ಮತ್ತು ಅನುಭವವು ಳ್ಳವರ  ಸರ್ಕಾರವನ್ನು ಬಯಸುತ್ತಿರೋ ಅಥವಾ ಸಿನಕತನಕ್ಕೆ ಮತ್ತು ಕ್ರಾಂತಿಯ ಭ್ರಾಂತಿಗೆ ಸಿಲುಕಿ ಅತಂತ್ರ ಸರ್ಕಾರವೊಂದು ಬರುವಂತೆ ನಿರ್ಣಯ ತೆಗೆದುಕೊಳ್ಳುತ್ತಿರೋ?

ನರೇಂದ್ರ ಮೋದಿಯನ್ನು ನಾನೇಕೆ ಪ್ರಬಲವಾಗಿ ಬೆಂಬಲಿಸುತ್ತೇನೆ :

೨೦೦೧ ರಿಂದ ೨೦೧೪ರವರೆಗೆ ಸತತವಾಗಿ ಮುಖ್ಯಮಂತ್ರಿಯಾಗಿದ್ದುಕೊಂಡು ಅಭಿವೃದ್ಧಿ ಪಥದಲ್ಲಿ ರಾಜ್ಯವೊಂದನ್ನು ಮುನ್ನಡೆಸಿದ ಆಡಳಿತಾತ್ಮಕ ಅನುಭವ,ಜನಪರ ಆಡಳಿತ,ಜನರನ್ನು ಸರತಿ ಸಾಲಿನಲ್ಲಿ ನಿಲ್ಲಿಸಿ ಕೈಯೊಡ್ಡುವ ಯೋಜನೆಗಳಿಗಿಂತ ಸ್ವಾಭಿಮಾನಿ ಬದುಕು ಕಟ್ಟಿಕೊಡುವ ಮಾತನಾಡುವ ಮೋದಿ ನನಗೆ ನನ್ನ ದೇಶವನ್ನು ಮುನ್ನಡೆಸಲು ಸೂಕ್ತವ್ಯಕ್ತಿಯಂತೆ ಕಾಣುತ್ತಾರೆ. ದೇಶದ ಇತಿಹಾಸದಲ್ಲಿ ಅತಿಹೆಚ್ಚು ದೂಷಣೆಗೊಳಗಾದ ಮತ್ತು ಟಾರ್ಗೆಟ್ ಮಾಡಲ್ಪಟ್ಟ ಮುಖ್ಯಮಂತ್ರಿಯೆಂದರೆ ಮೋದಿ.ಇಡೀ ಸೆಕ್ಯುಲರ್ ಮೀಡಿಯಾಗಳು,ಸೆತಲ್ವಾಡ್ ರಂತಹ ಸೋ-ಕಾಲ್ಡ್ ಹೋರಾಟಗಾರರು,ಕಾಂಗ್ರೆಸ್ಸಿಗರು,ಕೇಂದ್ರ ಸರ್ಕಾರ,ಕಮ್ಯುನಿಸ್ಟರು,ಕಾಲೆಳೆಯುತಿದ್ದ ಸ್ವ-ಪಕ್ಷೀಯರು ಹೀಗೆ ಯಾರ ಕೈಗೂ ಸಿಗದೇ ಇಂದು ಪ್ರಧಾನಿ ಅಭ್ಯರ್ಥಿಯಾಗುವ ಮಟ್ಟಕ್ಕೆ ಬಂದು ನಿಂತವನ Caliber ಎಂತದ್ದಿರಬಹುದು? ಸತತವಾಗಿ ನೆಗೆಟಿವ್ ಸುದ್ದಿಗಳೇ ಹರಡುವಾಗಲೂ ತನ್ನ ಕೆಲಸದಿಂದಲೇ ಉತ್ತರಕೊಡುತ್ತ ಬಂದ ಮೋದಿ ಇಷ್ಟವಾಗುವುದು ಅವರ ಕೆಲಸಗಳಿಂದಲೇ.

ನಿನ್ನೆ ರಾಮಲೀಲಾದಲ್ಲಿ ಮೋದಿ ಮಾಡಿದ ಭಾಷಣವನ್ನು ಕೇಳಿದ ಮೇಲೆ ಅವರಿಗೇ ಏಕೆ ನಾನು ಮತ ನೀಡಬೇಕು ಅನ್ನುವುದಕ್ಕೆ ಇನ್ನೊಂದು ಕಾರಣವೂ ಸಿಕ್ಕಂತಾಯಿತು.ನನಗೆ ಎಲ್ಲಕ್ಕಿಂತ ಗಮನ ಸೆಳೆದಿದ್ದು ’ಒಕ್ಕೂಟ ವ್ಯವಸ್ಥೆ’ಯ ಬಗ್ಗೆ ಮೋದಿ ಹೇಳಿದ ಮಾತುಗಳು.ನಿಜವಾಗಿಯೂ ಭಾರತಕ್ಕೆ ಎಲ್ಲರನ್ನೂ ಸರಿಸಮಾನವಾಗಿ ಕಾಣುವ ಮತ್ತು ಕೇಂದ್ರವೆಂದರೆ ಕೊಡುವವ,ರಾಜ್ಯವೆಂದರೆ ಕೈಯೊಡ್ಡುವವ ಅನ್ನುವ ಮನಸ್ಥಿತಿ ತೊಲಗಬೇಕು.ಗುಜರಾತಿ ಅಸ್ಮಿತಾ ಅನ್ನುವ ಮೋದಿಯವರಿಗೆ ಪ್ರಾದೇಶಿಕತೆಗೆ ನೀಡಬೇಕಾದ ಗೌರವ ಮತ್ತು ಸ್ವಾತಂತ್ರ್ಯದ ಅರಿವಿದೆ ಅನ್ನುವುದು ಅವರ ಮಾತಿನಿಂದ ತಿಳಿಯುಅದೆ.

ಭಾಷಣದ  ಹೈಲೈಟ್ಸ್ :

ಮೋದಿಯವರ ೭ ಅಂಶದ ಕಾರ್ಯಕ್ರಮಗಳು :

ಭಾರತೀಯ ಕೌಟುಂಬಿಕ ಮೌಲ್ಯಗಳ ಮತ್ತು ವ್ಯವಸ್ಥೆಯ ರಕ್ಷಣೆ,ಕೃಷಿಯ ಬೆಳವಣಿಗೆ,ಮಹಿಳಾ ಸಬಲೀಕರಣ,ಅರಣ್ಯ ಮತ್ತು ಭೂಮಿಯ ರಕ್ಷಣೆ,ಯುವ ಸಮಬಲೀಕರಣ,ಪ್ರಜಾಪ್ರಭುತ್ವ ಮೌಲ್ಯಗಳ ರಕ್ಷಣೆ ಮತ್ತು ಜ್ಞಾನಾರ್ಜನೆಗಾಗಿ ಹೊಸ ಸಂಸ್ಥೆಗಳ ನಿರ್ಮಾಣ

ಮಹಿಳಾ ಸಬಲೀಕರಣದ ಬಗ್ಗೆ :

ಮಹಿಳೆಯರನ್ನು ಕುಟುಂಬ ನಿರ್ಮಾಣದಿಂದ ದೇಶ ನಿರ್ಮಾಣದೆಡೆಗೆ ಸಾಗುವಂತೆ ಮಾಡಬೇಕು.ಈ ದೇಶದಲ್ಲಿ ನಮ್ಮ ತಾಯಂದಿರು ಮತ್ತು ಅಕ್ಕ-ತಂಗಿಯರ ಜೊತೆ ನಡೆಯುತ್ತಿರುವುದು ತಲೆ ತಗ್ಗಿಸುವಂತದ್ದು.ಮಹಿಳಾ ಶಿಕ್ಷಣದ ಬಗ್ಗೆ ಮಾತನಾಡುತ್ತ ’ಮಗಳನ್ನು ಉಳಿಸಿ,ಮಗಳನ್ನು ಓದಿಸಿ’ ಅನ್ನುವ ಆದೋಂಲನ ಆಗಬೇಕಿದೆ.ಮಹಿಳಾ ಭ್ರೂಣ ಹತ್ಯೆಗಿಂತ ದೊಡ್ಡ ದುರಂತ ಇನ್ನೊಂದಿಲ್ಲ.

ಮೋದಿಯವರ 5T plan : ಟಾಲೆಂಟ್,ಟೂರಿಸಂ,ಟೆಕ್ನಾಲಜಿ,ಟ್ರೆಡಿಶನ್ ಮತ್ತು ಟ್ರೇಡ್.

ಪಿ.ಎಂ ಪಟ್ಟಕ್ಕೆ ಮೋದಿ Time Tested ಕ್ಯಾಂಡಿಟೇಟ್ ಆಗಿದ್ದಾರೆ. ಅದಕ್ಕೆ ಬೇಕಾದ Proven Track Record ಕೂಡ ಅವರ ಬಳಿಯಿದೆ. ಆದ್ದರಿಂದಲೇ ಇವತ್ತು ರತನ್ ಟಾಟಾ,ಇನ್ಫೋಸಿಸ್ ನಾರಾಯಣ ಮೂರ್ತಿಯಂತವರು ಅವರ ಪರ ಮಾತನಾಡುತಿದ್ದಾರೆ. ಇನ್ನು ಆಪ್ ಪಕ್ಷಕ್ಕೆ ಮತ ನೀಡುವುದು ಪರೋಕ್ಷವಾಗಿ ಕಾಂಗ್ರೆಸ್ಸಿಗೆ ಮತ ನೀಡಿದಂತೆ ಎನ್ನುತ್ತ ಕಿರಣ್ ಬೇಡಿಯವರು ಟ್ವೀಟ್ ಮಾಡಿದ ಇನ್ನೊಂದು ಮಾತು ಅತಿ ಮುಖ್ಯವಾಗುತ್ತದೆ.“For me it’s India First! Stable, Well Governed, Administered, Accountable and Inclusive. As an independent voter, my vote is for NaMo”. ಹೆಸರಾಂತ ಲೇಖಕ ಚೇತನ್ ಭಗತ್ ಆಪ್ ಬಗ್ಗೆ ಬರೆಯುತ್ತಾ, “Get the priorities right: India first, AAP second” ಅನ್ನುತ್ತಾರೆ.

ವೈಯುಕಿಕ್ತವಾಗಿ ನನಗೆ ಭಾರತವೇ ಮೊದಲು.ಸದೃಢ,ಸ್ಥಿರ ಸರ್ಕಾರ ನೀಡುವ ಭರವಸೆ ತೋರುವ ಅಭ್ಯರ್ಥಿಗೆ ನನ್ನ ಮತ.ಹಾಗಾಗಿಯೇ ನಾನು ಮೋದಿಯನ್ನು ಪ್ರಬಲವಾಗಿ ಬೆಂಬಲಿಸುತ್ತೇನೆ. ಅಂದ ಹಾಗೆ ನಿಮಗೂ ಭಾರತ ಮೊದಲಾ?