ಮರಳಿ ಎದ್ದು ಬಾ ಜಪಾನ್…

ಸಾತ್ವಿಕ್ ಎನ್ ವಿ

ಮತ್ತೆ ಅದೇ ಹಾಡು ಕೇಳುವ ಪ್ರಸಂಗ ಬರುತ್ತದೆ ಎಂದುಕೊಂಡಿರಲಿಲ್ಲ.

ರೈಲಿನಲ್ಲಿ ಹೋಗುತ್ತಿರುವಾಗ ನಾಲ್ವರು ವಿದೇಶಿಯರು ಇದಕ್ಕಿದ ಹಾಗೆ ಎದ್ದು ನಿಂತು ಹಾಡತೊಡಗಿದರು. ಬೋಗಿಯಲ್ಲಿನ ಜನರಿಗೆಲ್ಲ ಆಶ್ಚರ್ಯ. ಯಾರೋ ಹಿರಿಯರು ಆ ವಿದೇಶಿಯರನ್ನು ಕೇಳಿದಾಗ ಅಲ್ಲಿದ್ದ ಜನರಿಗೆ ಕಣ್ಣಾಲಿಗಳು ತುಂಬಿ ಬಂದವು. ವಿಷಯವಿಷ್ಟೇ. ಅವರು ಜಪಾನಿಯರು. ಅದರಲ್ಲಿ ಒಬ್ಬ ರೇಡಿಯೋ ಕೇಳುತ್ತಿದ್ದ. ಇದಕ್ಕಿದ ಹಾಗೆ ರೇಡಿಯೋದಲ್ಲಿ ಜಪಾನ್ ನಲ್ಲಿ ಭೂಕಂಪವಾಗಿ ಸಾಕಷ್ಟೂ ಸಾವು ನೋವುಗಳಾಗಿರುವುದು ತಿಳಿದುಬಂತು. ಆಗ ಆ ಜಪಾನಿಯರು ಎದ್ದು ನಿಂತು ತಮ್ಮ ರಾಷ್ಟ್ರ ಗೀತೆಯನ್ನು ಹಾಡುವ ಮೂಲಕ  ಸಾವು ನೋವುಗಳಿಗೆ ಈಡಾದ ತಮ್ಮ ದೇಶವಾಸಿಗಳಿಗೆ ಸಂತಾಪ ಸೂಚಿಸಿದ್ದರು. ಇದು ಎಲ್ಲೋ ಓದಿದ್ದ ಸಂಗತಿ.

ಮತ್ತೆ ಈಗ ನೆನಪಾದದ್ದು ಘೋರವಾಗಿ ಅಪ್ಪಳಿಸಿದ ಸಮುದ್ರದ ಸುನಾಮಿಯ ಹೊಡೆತಕ್ಕೆ ಸಿಕ್ಕಿ ಜಪಾನಿನ ಒಂದು ಭಾಗವೇ ಉಳಿದ ಪ್ರದೇಶದೊಂದಿಗೆ ಸಂಪರ್ಕ ಕಳೆದುಕೊಂಡಿದೆ. ೮.೯ ಮ್ಯಾಗ್ನಟ್ಯುಡ್ ಇದ್ದ ಭೂಕಂಪ ಇಂಥ ಸುನಾಮಿಯನ್ನು ಎಬ್ಬಿಸಿದೆ. ಲಕ್ಷಸಂಖ್ಯೆಯ ಜನರು ಸಂತ್ರಸ್ತರಾಗಿದ್ದಾರೆ. ಇದರ ಭೀಕರತೆಯ ವಿವರ ತಿಳಿದು ಬರಬೇಕಷ್ಟೇ.

ಜಪಾನಿಯರಿಗೆ ಇಂಥ ವಿಪತ್ತುಗಳು ಹೊಸತೇನಲ್ಲ. ಇಡೀ ದೇಶವನ್ನೇ ಹೊಸಕಿ ಹಾಕಿದಾಗಲೂ ಎದ್ದು ನಿಂತು  ದೈತ್ಯ ಶಕ್ತಿಯಾಗಿ ಬೆಳೆದು ಬಂದ ಕೀರ್ತಿ ಇವರ ಇತಿಹಾಸದಲ್ಲಿದೆ. ಆದರೆ ಇಂಥ ಸುನಾಮಿಯೊಂದು ಸಾರಿಸಿ ಹಾಕಿದ ಸಾವಿದು ನ್ಯಾಯವೇ? ಪ್ರಕೃತಿ ಈ ಪಾಟಿ ಮುನಿದಿದ್ದು ಯಾಕೆ? ಒಂದಿಷ್ಟು ಕನಿಕರವೂ ಇಲ್ಲದೇ ತನ್ನ ಕಂದಮ್ಮಗಳನ್ನೇ ಆಪೋಷನ ತೆಗೆದುಕೊಳ್ಳುವಾಗ ಒಂದು ಘಳಿಗೆ ಅಡಿಗರ ಭೂಮಿಗೀತ ನೆನಪಿಗೆ ಬಂದರೆ ವಿಶೇಷವೆನಿಲ್ಲ. ಈ ಪ್ರಕೃತಿ ಎಂಬ ತಾಯಿ ‘ಹಕ್ಕಿ ಕೊರಳ ಹಿಚಿಕಿ ಲಾಲಿ ಹಾಡು’ತ್ತಾಳೆ. ಮನುಷ್ಯನೂ ಆಕೆಯ ಮೇಲೆ ಅವ್ಯಾಹತವಾದ ಧಾಳಿ ಮಾಡುತ್ತಾನೆ. ಆಕೆ ಸೋತಂತೆ ಮಾಡಿ ಸೋಲಿಸಿರುತ್ತಾಳೆ. ಅಲ್ಲಿಗೆ ಅನೇಕ ಜನರ ಜೀವಗಳು ಆಕೆಯ ಹಸಿದ ಹೊಟ್ಟೆಗೆ ಸೇರಿ ಮರುಹುಟ್ಟು ಪಡೆಯಲು ಹವಣಿಸುತ್ತಿರುತ್ತವೆ.

ಅದೇನೆ ಇರಲಿ, ಇಂದು ಸೋತ ಕೈಯಲ್ಲಿರುವ ಜಪಾನಿಗಳಿಗಾಗಿ ಒಂದು ಘಳಿಗೆ ಮರುಗೋಣ. ವಿಶ್ವವೇ ಜಪಾನಿನ ನೆರವಿಗೆ ನಿಲ್ಲಲಿ. ಎಂಥ ಘನ ರಾಷ್ಟ್ರವಾದರೂ ಇಂಥ ಸೂತಕದ ಸಮಯದಲ್ಲಿ ಮನಸ್ಥೈರ್ಯ ತುಂಬುವ ಕೈಗಳ ಕಡೆಗೆ ನೋಡುತ್ತಿರುತ್ತದೆ. ಭಾರತೀಯರಾದ ನಾವು ನಮ್ಮ ಸಹೋದರರಿಗೆ ಧೈರ್ಯ ತುಂಬುತ್ತಾ ವಿಶ್ವಮಾನವರಾಗೋಣ.

ಜಪಾನ್ ನೀನೆಂದರೆ ಹೋರಾಟ, ಹಟ, ಸಾಧನೆ. ನೀನು ನಿನ್ನ ಎಂದಿನ ಕೆಚ್ಚನ್ನು ತೋರಿಸಿ ಬೇಗನೇ ಮರಳಿ ಮುಂಚಿನ ಸ್ಥಿತಿಗೆ ಬಾ….. ಸಹೋದರರನ್ನು ಕಳೆದುಕೊಂಡಿರುವ ಜಪಾನಿಗರೇ ಇದೋ ನಿನ್ನ ಭಾರತೀಯ ಸಹೋದರನ ಸಂತಾಪಗಳು.

ಚಿತ್ರಕೃಪೆ: thedailyinquirer.net