ಹಳ್ಳಿಗರೇ ಕರೆಂಟ್ ಉಳಿಸಿ, ಎಂಜಿ ರೋಡಿಗೆ ಲೈಟ್ ಹಾಕಬೇಕು

ಸಾತ್ವಿಕ್ ಎನ್ ವಿ

ಪ್ರಪಂಚ ಹೀಗೆನೇ!
ಯಾರು ಪಾಲಿಸ್ತಾರೋ ಅವರ ಮೇಲೆಯೇ ಎಲ್ಲವನ್ನು ಹೇರಿ ಅರಾಮದಲ್ಲಿ ಇದ್ದು ಬಿಡುತ್ತೆ. ‘ಉಳಿಸಿ’ ಅಂತ ಸರ್ಕಾರ ಯಾವುದಾದ್ರು ಅಭಿಯಾನ ಮಾಡಿದ್ರೆ ಅದರ ಟಾರ್ಗೆಟ್ ಮಧ್ಯಮ ಇಲ್ಲವೇ ಕೆಳವರ್ಗವೇ ಆಗಿರುತ್ತೆ. ಅದು ನೀರುಳಿಸಿ ಎಂಬುದೋ, ಪೆಟ್ರೋಲ್ ಉಳಿಸಿ ಅಂತಲೋ, ಕಡೆಗೆ ವಿದ್ಯುತ್ ಉಳಿಸಿ ಅಂತಾನೋ ಇರಬಹುದು. ಇಲ್ಲಿ ‘ಉಳಿಸಬೇಕಾದವರು’ ಯಾವುದನ್ನು ಕಡಿಮೆ ಪಡೆಯುತ್ತಿರುತ್ತಾರೋ ಅವರೇ! ವಿಚಿತ್ರ, ಆದ್ರೂ ಸತ್ಯ.
ಉದಾಹರಣೆಗೆ ನೀರು ಉಳಿಸಿ-ಮಿತವಾಗಿ ಬಳಸಿ ಅಂತ ಹೇಳಲಾಗುತ್ತೆ. ಆದ್ರೆ ಅದನ್ನು ಪಾಲಿಸಬೇಕಾದ ಜನತೆಗೆ ವಾರಕ್ಕೆ ಒಮ್ಮೆಯೋ ಎರಡು ಬಾರಿಯೋ ನೀರು ಬಂದ್ರೆ ಅದೇ ಹೆಚ್ಚು. ಒಮ್ಮೆ ಎಲ್ಲಿಯಾದ್ರೂ ಈ ಜನರು ಈ ನಿಯಮಗಳನ್ನು ಪಾಲಿಸುವಲ್ಲಿ ಸೋತರೆ ನಾವೆಲ್ಲ ಬೊಬ್ಬೆ ಹಾಕಿ ಬಿಡ್ತೇವೆ. ಅದ್ರೆ ಆ ಬೊಬ್ಬೆಯಲ್ಲಿ ಸತ್ಯವೊಂದು ಮುಚ್ಚಿ ಹೋಗಿರುತ್ತೆ. ಒಬ್ಬ ಶ್ರೀಮಂತನ ಮನೆಯ ಟಾಯ್ಲೆಟ್ ನಲ್ಲಿ ಬಳಕೆಯಾಗುವ ನೀರಿನಷ್ಟು ಸಾಮಾನ್ಯ ಜನರ ಕುಡಿಯುವ ನೀರು ಶುದ್ಧವಾಗಿರಲ್ಲ.

ಇನ್ನು ನೀರುಳಿಸುವ ಪಾಠ ಹೇಳುವ ‘ಕಾನ್ವೆಂಟ್ ಪರಿಸರವಾದಿಗಳ’ ಮನೆಗೊಮ್ಮೆ ಹೋಗಿ ಬನ್ನಿ, ನಿಮಗೆ ಖಂಡಿತಾ ವಿದ್ಯುತ್ ಇಲ್ಲದಿದ್ರು ಶಾಕ್ ಆಗಬಹ್ದು.ನೀರನ್ನು ಶುದ್ಧ ಮಾಡೋಕೆ ಅದರ ಎರಡು ಪಟ್ಟೂ ನೀರನ್ನು ಹೊರಗೆ ಚೆಲ್ಲೋ ಫಿಲ್ಟರ್ ಗಳನ್ನು ಯೂಸ್ ಮಾಡ್ತಾ ಇರ್ತಾರೆ. ಕೇಳಿದ್ದೇ ಆದ್ರೆ ಮತ್ತೆ  ಶುದ್ಧತೆ ಪಾಠ ಶುರುವಾಗುತ್ತೆ. ನಮ್ಮ ಊರಿನ ಬಾವಿಗಳಲ್ಲಿ ನೀರು ನೋಡಿ ಎಷ್ಟೋ ವರ್ಷಗಳೇ ಕಳೆದು ಹೋದವು. ಬೇಸಿಗೆಯಲ್ಲಿ ಹಳ್ಳಿ ಹೆಣ್ಣು ಮಕ್ಕಳ ಪಾಡು ದೇವರಿಗೆ ಮುಟ್ಟಿತ್ತಿರುತ್ತದೆ. ಇಚೇ ನಗರಗಳಲ್ಲಿ ಕಾರಿಗೆ ಆದ ಕೊಳೆಯ ತೊಳೆಯಲು ಕೊಳವೆ ಬಾವಿಯನ್ನು ಇನ್ನಷ್ಟು ಆಳ ಮಾಡುತ್ತಿರುತ್ತಾರೆ.ಪಾಪ ಹಳ್ಳಿ ಜನರಿಗೆ ಕಾಮೆಂಟ್ ಹಾಕಲು ಫೇಸ್ ಬುಕ್, ಟ್ವೀಟರ್ ಗಳಿಲ್ಲದ ಕಾರಣ ತಡಬಡಾಯಿಸುತ್ತಿರುತ್ತಾರೆ!
ಹಳ್ಳಿಗಳಲ್ಲಿ ಕರೆಂಟೆಂಬೋ ಕರೆಂಟ್ ಕೈಕೊಡೋ ಪರಿ ನೋಡಿದ್ರೆ ನಮ್ಮ ರಾಜಕಾರಣಿಗಳೇ ಬೆಟರ್ ಅನ್ಬೇಕು. ಚುನಾವಣೆಯಲ್ಲಿಯಾದ್ರೂ ಒಮ್ಮೆ ಬರ್ತಾರೆ. ಅದ್ರೂ ಆಕಾಶವಾಣಿಯಲ್ಲಿ ಒಂದು ಯುನಿಟ್ ಉಳಿತಾಯ ಎರಡು ಯುನಿಟ್ ಉತ್ಪಾದನೆಗೆ ಸಮ ಅನ್ನೋ ಜಾಹೀರಾತು ಜಾಹೀರು ಮಾಡಿ ನಗೆಪಾಟಿಲಿಗೆ ಈಡಾಗುತ್ತಾರೆ. ಅವತ್ತಿಗೆ ಕರೆಂಟ್ ಹೋಗಿ ಎಷ್ಟೋ ದಿನ ಕಳೆದಿರಬಹುದು.ಜನ ಇದನ್ನು ಕೇಳಿ (ಬ್ಯಾಟರಿ ರೇಡಿಯೋ ಆಗಿದ್ರೆ) ನಗಬೇಕೋ ಅಳಬೇಕೋ ಅಂತ ತಿಳಿಯದೇ ಒದ್ದಾಡುತ್ತಿರುತ್ತಾರೆ. ಬೆಂಗಳೂರಿನ ಉದ್ಯಾನದ ಕಾರಂಜಿಗಳು, ಎಂ ಜಿ ರೋಡಿನ ಸ್ಟ್ರೀಟ್ ಲೈಟ್ ಗಳು ರಾತ್ರಿಯಾಗುತ್ತಲೇ ರಂಗು ಪಡೆಯುತ್ತವೆ.
ಅಲ್ಲೇ ಪಕ್ಕದಲ್ಲಿಯೇ ಇರುವ ಕೊಳಗೇರಿಯ ಗುಡಿಸಿಲಿನಲ್ಲಿರುವ ಮಗುವಿನ ಬಾಯಾರಿಕೆಯ ಬಿಕ್ಕಳಿಕೆಯ ಸದ್ದು ಪಬ್ಬುಗಳ ಮಬ್ಬು ಬೆಳಕಿನಲ್ಲಿ ಕೇಳುವುದೇ ಇಲ್ಲ.

(ಚಿಕ್ರಕೃಪೆ: s436.photobucket.com)