ಅಂತರ್ಜಾತಿ ಮತ್ತು ಅಂತರ್ಧಮೀಯ ವಿವಾಹಗಳಿಂದ ಜಾತಿ ವಿನಾಶ ಸಾಧ್ಯವೆ?

-ಮು.ಅ ಶ್ರೀರಂಗ, ಬೆಂಗಳೂರು

ನಮ್ಮ ಸಮಾಜದಲ್ಲಿ ಜನಸಾಮಾನ್ಯರಿಂದ ಹಿಡಿದು ಪ್ರಬುದ್ಧರವರೆಗೆ, ಸಾಹಿತಿಗಳು,ಚಿಂತನಶೀಲರನ್ನು ಕಾಡುತ್ತಿರುವುದು ಜಾತಿಯ ಸಮಸ್ಯೆ. ಇದೊಂದು ಸಮಸ್ಯೆ ಇಲ್ಲದಿದ್ದರೆ ಚೆನ್ನಾಗಿರುತಿತ್ತು ಎಂದು ನಮಗೆ ಒಂದಲ್ಲ ಒಂದು ಸಲ ಅನಿಸುವುದು ಸಹಜ ತಾನೇ?ಅಂತರ್ಜಾತಿ ಮತ್ತು ಅಂತರ್ಧಮೀಯ ವಿವಾಹಗಳಿಂದ ಈ ಸಮಸ್ಯೆಯನ್ನು ಆದಷ್ಟೂ  ನಿವಾರಿಸಬಹುದು ಎಂಬ ಮಾತುಗಳನ್ನು ಆಗಾಗ ಕೇಳುತ್ತಿರುತ್ತೇವೆ. ಇಂತಹ ವಿವಾಹಗಳಿಗಿರುವ ಕೆಲವು ಸಮಸ್ಯೆಗಳನ್ನು ಮೂರು ಮುಖ್ಯವಾದ ಆಯಾಮಗಳಿಂದ ಚರ್ಚಿಸುವುದು ಈ ಲೇಖನದ ಉದ್ದೇಶ.

(೧) ಜಾತಿ ಮತ್ತು ಧರ್ಮ:-  ನಮ್ಮ ದೇಶದಲ್ಲಿರುವ ಜಾತಿಗಳು ಉಪಜಾತಿಗಳು ಅವುಗಳೊಳಗಿನ ಪಂಗಡಗಳು ಹಲವು. ಬಹು ಭಾಷಾ ಬಹು ಸಂಸ್ಕೃತಿಗಳ ನಮ್ಮ ದೇಶದಲ್ಲಿ ಇದು ಸಹಜ ಕೂಡ. ಪ್ರತಿಜಾತಿಗೂ ಹತ್ತಾರು ಉಪ ಜಾತಿಗಳು,ಪಂಗಡಗಳು. ಒಂದೇ ಜಾತಿಯವರಾದರೂ ಈ ಉಪ ಜಾತಿ ಪಂಗಡಗಳ ಕಾರಣದಿಂದ ಅವುಗಳ ನಡುವೆಯೇ ವಿವಾಹಕ್ಕೆ ಮೊದಲ ಪ್ರಾಶಸ್ತ್ಯ. ಬೇರೆ ಆಯ್ಕೆ ಇಲ್ಲವಾದರೆ ಮಾತ್ರ ಅದೇ ಜಾತಿಯ ಇತರ ಉಪಜಾತಿ, ಪಂಗಡಗಳ ನಡುವೆ ವಿವಾಹಕ್ಕೆ ಅರೆ ಮನಸ್ಸಿನಿಂದ ಒಪ್ಪಿಗೆ ನೀಡಬಹುದು. ಇಂತಹ ವಿದ್ಯಮಾನ ಇಂದು ಸರ್ಕಾರ ಮತ್ತು ಸಮಾಜ ಯಾವ ಜಾತಿಯವರನ್ನು ಮುಂದುವರಿದವರೆಂದು ಹೇಳುತ್ತಾ ಬಂದಿದೆಯೋ ಅವರಿಗಷ್ಟೇ ಸೀಮಿತವಾದುದಲ್ಲ. ಸಮಾಜದ ತೀರಾ ಕೆಳಸ್ತರದಲ್ಲಿರುವ ಜಾತಿಗಳ ತನಕ ಈ ತಾರತಮ್ಯ ಆಚರಣೆಯಲ್ಲಿದೆ. ಕೆಲವೊಂದು ಸಂದರ್ಭಗಳಲ್ಲಿ ಇವರುಗಳ ನಡುವೆ ಊಟ-ತಿಂಡಿಗಳ ಸೇವನೆ ಸಹ ನಿಷಿದ್ಧ ಎಂಬ ಪರಿಸ್ಥಿತಿ ಇದೆ. ಈ ರೀತಿ ಒಂದೇ ಜಾತಿಯೊಳಗೆ ವಿವಾಹಕ್ಕೆ ಇಷ್ಟೊಂದು ಸಮಸ್ಯೆಗಳಿರುವಾಗ ಒಂದೇ ಧರ್ಮದ ಬೇರೆ ಬೇರೆ ಜಾತಿಗಳ ನಡುವೆ ವಿವಾಹ ಆಗೊಮ್ಮೆ ಈಗೊಮ್ಮೆ ನಡೆಯುತ್ತಿರುತ್ತದೆ. ಇಲ್ಲ ಎನ್ನುವಂತಿಲ್ಲ. ಆದರೆ ಅದು ಒಂದು exಛಿeಠಿಣioಟಿ ಆಗಬಹುದಷ್ಟೆ. ಜತೆಗೆ ಇಂತಹ ವಿವಾಹಗಳ ಕಾರಣದಿಂದಲೇ ನಡೆಯುತ್ತಿರುವಂತಹ “ಮರ್ಯಾದ ಹತ್ಯೆಗಳು” ಈ ಸಮಸ್ಯೆಯನ್ನು ಇನ್ನಷ್ಟು ಜಟಿಲವಾಗಿಸಿದೆ.

ಇನ್ನು ಅಂತರ್ಧಮೀಯರ  ನಡುವಿನ ವಿವಾಹ , ಅಪರೂಪದಲ್ಲಿ ಅಪರೂಪ. ಭಾರತದಿಂದ ವಿದೇಶಗಳಿಗೆ ಹೋದ ಗಂಡು ಹೆಣ್ಣುಗಳು ಅನ್ಯ ಧರ್ಮೀಯರನ್ನು ವಿವಾಹವಾಗಿರುವುದು ಉಂಟು. ಭಾರತದಲ್ಲಿದ್ದುಕೊಂಡೆ ಅನ್ಯಧರ್ಮೀಯರನ್ನು ವಿವಾಹವಾಗಿರುವ ಉದಾಹರಣೆಗಳೂ ನಮ್ಮಲ್ಲುಂಟು. ಇದು ನಮ್ಮ  ಸಮಾಜದ ಅತೀ ಶ್ರೀಮಂತರು, ಸಿನಿಮಾ ನಟ ನಟಿಯರು, ಕ್ರೀಡಾಪಟುಗಳಿಗೆ ಯಾವುದೇ ಸಮಸ್ಯೆಯಾಗದೇ ಮಾಮೂಲದ ಸಂಗತಿಗಳಾಗಿರಬಹುದು. ಆದರೆ  ಬಹುಪಾಲು ಜನಸಾಮಾನ್ಯರಿಗೆ ಇದು ಕೇವಲ ವಿವಾಹವಾಗುವ ಗಂಡು-ಹೆಣ್ಣಿಗೆ ಮಾತ್ರ ಸೀಮಿತವಾಗದೆ ಅವರ ಕುಟುಂಬವರ್ಗದವರು, ಆಪ್ತರು, ಬಂಧು-ಭಾಂದವರು ಜತೆಗೆ ಎರಡು ಧರ್ಮಗಳ ನಡುವಿನ  ಸಮಸ್ಯೆಯಾಗಿಬಿಡಬಹುದು.

(೨) ಆರ್ಥಿಕ ಪರಿಸ್ಥಿತಿ:- ಅಂತರ್ಜಾತಿ, ಅನ್ಯ ಧರ್ಮೀಯರ ನಡುವಿನ ವಿವಾಹದಲ್ಲಿ ಪ್ರಮುಖ ಪಾತ್ರವಹಿಸುವುದು ಗಂಡು ಹೆಣ್ಣಿನ ಆರ್ಥಿಕ ಪರಿಸ್ಥಿತಿ. ಇಬ್ಬರಿಗೂ ಪ್ರತಿ ತಿಂಗಳು ನಿಗದಿತವಾಗಿ ಸಂಬಳ ಬರುವಂತಹ ಕೆಲಸವಿದ್ದರೆ ಪರವಾಗಿಲ್ಲ. ಏಕೆಂದರೆ ಇಂತಹ ವಿವಾಹಗಳು ಒಂದು ಆದರ್ಶದ ಗುಂಗಿಗೋ,ಪರಸ್ಪರ ಪ್ರೇಮದ ಪರಿಣಾಮದಿಂದಲೋ ಆಗುವ ಸಂಭವಗಳೇ ಜಾಸ್ತಿ. ಹೀಗಾಗಿ ಆದರ್ಶದ ಗುಂಗು ಇಳಿದಮೇಲೆ ಸಹಜವಾಗಿ ಸಣ್ಣ ಪುಟ್ಟ ಕಾರಣಗಳಿಗೂ ಮನಸ್ತಾಪ ಹುಟ್ಟಬಹುದು. ನಿನ್ನನ್ನು ಮದುವೆಯಾಗಿ ನಾನು ಕೆಟ್ಟೆ ಎಂದು ಇಬ್ಬರಲ್ಲಿ ಒಬ್ಬರಿಗೆ ಅನ್ನಿಸಿದರೂ ಸಾಕು. ಕಡ್ಡಿಯೇ ಗುಡ್ದವಾಗಿ ವಿವಾಹ ವಿಚ್ಛೇದನೆ ತನಕ ಪರಿಸ್ಥಿತಿ ವಿಕೋಪಕ್ಕೆ ಹೋಗಬಹುದು. ಆಗ ಹೆಣ್ಣಿಗೆ ಕೋರ್ಟು -ಕಛೇರಿಗಳು ಕೊಡಿಸಬಹುದಾದ ಪರಿಹಾರಧನ ಎಷ್ಟೇ ಇರಲಿ;ಆಕೆಗೂ ಒಂದು ಕೆಲಸವಿದ್ದರೆ ಎರಡು ಹೊತ್ತಿನ ಊಟಕ್ಕೆ ಚಿಂತೆಯಿಲ್ಲ. ಇಲ್ಲವಾದರೆ ಆಕೆಯ ಗತಿ ಏನು?ಜೀವನ ಸಾಗಿಸುವುದು ಹೇಗೆ? ನಾನು ಬಡವ ಆಕೆ ಬಡವಿ ಒಲವೇ ನಮ್ಮ ಬದುಕು, ಒಲವೇ ಜೀವನ ಸಾಕ್ಷಾತ್ಕಾರ ಮುಂತಾದ ಡೈಲಾಗುಗಳು ನಾಟಕ ಸಿನಿಮಾಗಳಲ್ಲಿ ಕೇಳುವುದಕ್ಕೆ ಚನ್ನಾಗಿರುತ್ತದೆ. ಆದರೆ ಜೀವನ ಎನ್ನುವುದು ನಾಟಕ, ಸಿನಿಮಾ ಅಲ್ಲ. ಹಸಿವು ಮುಂಬಾಗಿಲಿನಿಂದ  ಬಂದಾಗ ಆದರ್ಶ ಹಿಂಬಾಗಿಲಿನಿಂದ ಹೊರಟುಹೋಗುತ್ತದೆ ಎಂಬ ಮಾತೊಂದಿದೆ.

(೩) ರಾಜಕೀಯ ಪರಿಸ್ಥಿತಿ:- ನಮ್ಮದು ಜಾತ್ಯಾತೀತ ಮತ್ತು ಪ್ರಜಾಪ್ರಭುತ್ವದ ದೇಶ. ಇಲ್ಲಿ ಜಾತಿ,ಮತ,ಸಾಮಾಜಿಕ ಅಂತಸ್ತು ಇತ್ಯಾದಿ ಯಾವುದೇ ಅಂಶಗಳಿಂದ  ಯಾರನ್ನೂ ಪ್ರತ್ಯೇಕಿಸಿ ನೋಡುವಂತಿಲ್ಲ.ಎಲ್ಲರೂ ಸಮಾನರು  ಇದು ನಮ್ಮ ಸಂವಿಧಾನದ ಆಶಯ ಮತ್ತು ಗುರಿ.ಸ್ವಾತಂತ್ರ್ಯಪೂರ್ವದ ಪರಿಸ್ಥಿತಿಗೂ  ಇಂದಿನ ಸ್ಥಿತಿಗೂ ಇಲ್ಲಿನ ಪ್ರಜೆಗಳ ಜೀವನ ಸಾಕಷ್ಟು ಸುಧಾರಿಸಿದೆ. ಐತಿಹಾಸಿಕ,ಸಾಮಾಜಿಕ ಕಾರಣಗಳಿಂದಾಗಿ ಹಿಂದೆ ಇರುವವರನ್ನು ಮುಖ್ಯವಾಹಿನಿಗೆ ತರುವ ಕೆಲಸ ನಮ್ಮ ಸರ್ಕಾರಗಳಿಂದ ನಿರಂತರವಾಗಿ ನಡೆಯುತ್ತಲಿದೆ. ಇದು ಸ್ವಾಗತಾರ್ಹ. ಆದರೆ ಈ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸುವಾಗ ಆಗಿರಬಹುದಾದಂತಹ  ಕೆಲವೊಂದು ತಾಂತ್ರಿಕ ಸಮಸ್ಯೆಗಳಿಂದ   ಜಾತಿ-ಜಾತಿಗಳ ನಡುವಿನ ಅಂತರ ಜಾಸ್ತಿಯಾಗುತ್ತಿದೆಯೇ ಎಂಬ ಅನುಮಾನ ಕೆಲವೊಮ್ಮೆ ಬರುವುದು ಸಹಜ. ಈ ಅಂತರ ಆದಷ್ಟು ಬೇಗ ಕಡಿಮೆಯಾದರೆ ಅಂತರ್ಜಾತಿ ವಿವಾಹಗಳಿಗೆ ಅನುಕೂಲವಾಗಬಹುದು.

ಇಂತಹ ಸನ್ನಿವೇಶದಲ್ಲಿ ಒಂದು ಆಶಾಕಿರಣವೆಂದರೆ ಶಿಕ್ಷಣದ ಬಗ್ಗೆ ನಮ್ಮಲ್ಲಿನ ಎಲ್ಲಾ ಜಾತಿ-ಮತ-ಧರ್ಮದ ಜನರಲ್ಲಿ ಮೂಡಿರುವ ಅರಿವು ಮತ್ತು ಜಾಗೃತಿ. ಇದು ಸ್ವಾತಂತ್ರ್ಯಪೂರ್ವದ ದಿನಗಳಿಗೆ ಹೋಲಿಸಿದರೆ ಸಮಾಧಾನ ತರುವಂತಹ ವಿಷಯ. ಶಿಕ್ಷಣ ಪಡೆದವರೆಲ್ಲರೂ ಸುಸಂಸ್ಕೃತರೂ,ವಿಶಾಲ ಮನೋಭಾವದವರೂ ಆಗುತ್ತಾರೆಂದು ನಿರೀಕ್ಷಿಸಲಾಗದಿದ್ದರೂ  ಸಹ ಪಟ್ಟಣ ಪ್ರದೇಶಗಳಲ್ಲಿ,ನಗರಗಳಲ್ಲಿ ಅಲ್ಪ ಸ್ವಲ್ಪವಾದರೂ ಬದಲಾವಣೆಯ ಗಾಳಿ ಬೀಸುತ್ತಿದೆ. ಇದು ಒಳ್ಳೆಯ ಸೂಚನೆ. ಹಳ್ಳಿಗಳಲ್ಲಿ ಪರಿಸ್ಥಿತಿ ಸುಧಾರಿಸಬೇಕಾಗಿದೆ. ಆದರೆ ಈ ಜಾತಿ ಸಮಸ್ಯೆ ಅಲ್ಲಿ ಹಿಂದಿನಷ್ಟು ಭೀಕರವಾಗಿಲ್ಲ. ಜನಗಳಲ್ಲಿ ಜಾಗೃತಿಯೆನ್ನುವುದು ರಾತ್ರಿ ಕಳೆದು ಬೆಳಗಾಗುವುದರೊಳಗೆ ಬರುವ ವಿದ್ಯಮಾನವಲ್ಲ. ಸಭೆಗಳಲ್ಲಿ ಜಾತಿ ವಿನಾಶದ ಪರ ಠರಾವು ಮಂಡಿಸಿ ಘೋಷಣೆ ಕೂಗಿದರೆ ಆಗುವಂತಹುದಲ್ಲ. ನಮ್ಮ ನಮ್ಮ ಮಿತಿಗಳಲ್ಲೇ ನಮ್ಮ ಅಕ್ಕ ಪಕ್ಕ ವಾಸಿಸುವ ಜನಗಳು ಯಾವುದೇ ಜಾತಿ-ಮತ-ಧರ್ಮಗಳಿಗೆ ಸೇರಿರಲಿ ಅವರ ಜತೆ ಸೌಹಾರ್ದಯುತವಾಗಿ ನಡೆದುಕೊಳ್ಳಲು ಪ್ರಾರಂಭಿಸಿ,ಅವರಲ್ಲಿರಬಹುದಾದ ಅನುಮಾನಗಳಿಗೆ ಯಾವುದೇ ಕಾರಣವಿಲ್ಲ ಎಂದು ನಮ್ಮ ನಡೆ-ನುಡಿಗಳಲ್ಲಿ ಬದಲಾವಣೆ ತಂದುಕೊಳ್ಳಬೇಕು. ಈ ಒಂದು ಪ್ರಯತ್ನವೇ-ಅದು ಎಷ್ಟೇ ಪುಟ್ಟ ಹೆಜ್ಜೆಯಾಗಿರಲಿ-ನಾವು ಸಾಗಬೇಕಾಗಿರುವ ಹಾದಿಗೆ ಇಡುವ ಮೊದಲ ಧೃಡ ಹೆಜ್ಜೆ ಆಗಬಹುದು.

ಗಂಡು-ಹೆಣ್ಣು ಮತ್ತು ಅವರಿಬ್ಬರ ತಂದೆ-ತಾಯಿಗಳು ಒಪ್ಪಿ ಮಾಡಿದ Arranged Marriage ಗಳು ವರ್ಷ ಕಳೆಯುವುದರೊಳಗೆ ಮುರಿದು ಬೀಳಬಹುದು;ಮುರಿದುಬಿದ್ದಿವೆ. ಅಂತರ್ಜಾತಿ ವಿವಾಹವಾದವರು ಸುಖವಾಗಿ ಸಂಸಾರ ನಡೆಸಿದ್ದಾರೆ;ನಡೆಸುತ್ತಲೂ ಇದ್ದಾರೆ. ನಮ್ಮ ನಮ್ಮ ಜೀವನಗಳಲ್ಲಿ ನಾವು ಎದುರಿಸಬೇಕಾಗಿಬರುವ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳಲು ಗಣಿತದ ಸೂತ್ರಗಳಂತಹ ಉಪಾಯಗಳಿಲ್ಲ. ಆಯಾ ಸನ್ನಿವೇಶಕ್ಕೆ ತಕ್ಕಂತೆ ನಾವೇ ಸಮಸ್ಯೆಗಳಿಗೆ ಪರಿಹಾರ ಹುಡುಕಿಕೊಳ್ಳಬೇಕು. ಬೇರೆ ದಾರಿ ಇಲ್ಲ.

ಚಿತ್ರ ಕೃಪೆ : http://www.mantraforvashikaran.com