ರೋಗಿಗಳ ದೀರ್ಘಕಾಲದ ನೋವನ್ನು ಅರ್ಥೈಸಿಕೊಳ್ಳುವಾಗ ನೋಡಬೇಕಾದ ಮನೋ-ಸಾಮಾಜಿಕ ಮತ್ತು ಕೌಟುಂಬಿಕ ಅಂಶಗಳು

-ಡಾ| ಸುಧಾ ಪ್ರಸಾದ್

ಭೌತ-ಸಾಮಾಜಿಕ, ಮನೋ-ಸಾಮಾಜಿಕ, ವಾತಾವರಣಾವಲಂಬಿತ ಮತ್ತು ಕೌಟುಂಬಿಕ ಸ್ಥಿತಿಗತಿಗಳನ್ನವಲಂಬಿತ ಅಂಶಗಳು ರೋಗಿಯ ದೀರ್ಘಕಾಲದ ನೋವಿಗೆ ಕಾರಣಗಳಾಗಿರಬಹುದು. ದೀರ್ಘಕಾಲದ ನೋವು ಕೌಟುಂಬಿಕವಾಗಿ ಮನೆಯ ಸದಸ್ಯರಮೇಲೆ ಋಣಾತ್ಮಕ ಪರಿಣಾಮಗಳಿಗೆ ಕಾರಣವಾಗುತ್ತದೆ. ಸತತ ನೋವೆಂದು ಹೇಳುವುದನ್ನು ಅನುಮೋದಿಸುವ ಕುಟುಂಬ, ಅಂತಹ ನೋವಿಗೆ ಭಾಗಶಃ ತಾನೇ ಕಾರಣವಾಗಿರಲೂಬಹುದು!  

65 ವರ್ಷದ ಶ್ರೀಮತಿ ಲಕ್ಷ್ಮಿ ಎಂಬಾಕೆ ಮೊಳಕಾಲುಗಂಟಿನ ನೋವಿನ ಪರಿಹಾರಕ್ಕಾಗಿ ಎರಡೂ ಮೊಳಕಾಲುಗಂಟುಗಳ ಬದಲಾವಣೆಯ ಶಸ್ತ್ರಚಿಕಿತ್ಸೆಗೆ ಒಳಗಾದರು. ನಂತರ ಪಡೆಯಬೇಕಾದ ಪುನರುಜ್ಜೀವನ ಚಿಕಿತ್ಸೆಗಳನ್ನು ಆಕೆ ಅದೇ ಆಸ್ಪತ್ರೆಯಲ್ಲಿ ಪಡೆದುಕೊಳ್ಳಲು ಸಾಧ್ಯವಾಗಲಿಲ್ಲ; ಆದರೆ ಆಸ್ಪತ್ರೆಯಿಂದ ಮರಳಿ ಮನೆಗೆ ಕಳಿಸುವಾಗ ಕೊಟ್ಟ ಚಿಕಿತ್ಸಾಕ್ರಮಗಳ ಸಾರಾಂಶಯಾದಿಯಲ್ಲಿ ಹೇಳಲಾದ  ವ್ಯಾಯಾಮಗಳನ್ನೆಲ್ಲ ಆಕೆ ಮನೆಯಲ್ಲೇ ನಡೆಸಿದರು. ಶಸ್ತ್ರಚಿಕಿತ್ಸೆ ಮುಗಿದು ಒಂದು ತಿಂಗಳ ನಂತರವೂ ಸಹ ಆಕೆ ಎತ್ತರದ ಕುರ್ಚಿಯಲ್ಲೇ ಕುಳಿತಿದ್ದರು, ಮಲಗುವುದಕ್ಕೆ ಆಧಾರವಾಗಿ ಹಲವು ದಿಂಬುಗಳನ್ನು ಒಂದರಮೇಲೊಂದರಂತೇ ಇಟ್ಟುಕೊಂಡಿದ್ದರು, ನಡೆಯುವುದಕ್ಕೆ ವಾಕರ್ ಬಳಸುತ್ತಿದ್ದರು ಅಥವಾ ಯಾರನ್ನೋ ಹಿಡಿದುಕೊಂಡು ನಡೆದಾಡುತ್ತಿದ್ದರು. ನೋವು ಬರುತ್ತದೆ, ಬುದ್ದುಬಿಡುತ್ತೇನೆ ಎಂಬ ಹೆದರಿಕೆ ಆಕೆಯ ಮನದಲ್ಲಿ ಆಳವಾಗಿ ಬೇರೂರಿ ಆಕೆ ಮಲಗೇ ಇರುವಂತೇ ಮಾಡಿತ್ತು. ಆಕೆಯ ಕುಟುಂಬದವರು ಆಕೆಗೆ ಇನ್ನೇನೋ ತೊಂದರೆಯಿರಬೇಕೆಂಬ ಅನಿಸಿಕೆಯಿಂದ ನಮ್ಮ ಕ್ಲಿನಿಕ್ಕಿನ ಸಲಹೆ-ಸಹಾಯ ಬಯಸಿ ನಮ್ಮಲ್ಲಿಗೆ ಬಂದರು. ಒಬ್ಬ ಅನುಭವಿಯ ಮಾರ್ಗದರ್ಶನದಲ್ಲಿ ಒಂದೇ ವಾರದಲ್ಲಿ ಆಕೆ ಯಾರ ಸಹಾಯವೂ ಇಲ್ಲದೇ ನಡೆಯುವಂತಾದರು. ವಾರಗಳ ನಂತರ ಯಾವ ಹೆದರಿಕೆಯೂ ಇಲ್ಲದೇ ನಡೆದಾಡಿದರೆ, ತಿಂಗಳನಂತರ ಮೆಟ್ಟಿಲುಗಳನ್ನೇರಲು ತೊಡಗಿದರು, ಕಾರನ್ನೇರಿ ಎಲ್ಲರಂತೇ ಆರಾಮವಾಗಿ ಇರಲಾರಂಭಿಸಿದರು. ಮನಸ್ಸಿನಾಳದಲ್ಲಿದ್ದ ನೋವು ಮತ್ತು ಬೀಳುವ ಭಯವನ್ನು ಪರಿಹರಿಸದಿದ್ದರೆ, ಶಸ್ತ್ರಕ್ರಿಯೆಯ ಬಳಿಕವೂ ದೀರ್ಘಕಾಲದ ನೋವಿನಿಂದ ಆಕೆ ಬಳಲುತ್ತಲೇ ಇರಬೇಕಾಗುತ್ತಿತ್ತು. ಬಹಳದೊಡ್ಡ ಶಸ್ತ್ರಚಿಕಿತ್ಸೆಯಿಂದ ಆಯಾಸಗೊಂಡಿರುತ್ತಾರೆಂಬ ಸಹಾನುಭೂತಿಯಿಂದ ಹೆಜ್ಜೆಹೆಜ್ಜೆಗೂ ಆಕೆಗೆ ಸಹಾಯಮಾಡಲು ಮುಂದಾಗುವ ಕುಟುಂಬ ತಮಗರಿವಿಲ್ಲದೇ ಆಕೆಯ ನೋವು ದೀರ್ಘಕಾಲ ಅಥವಾ ಶಾಶ್ವತವಾಗಿ ಹಾಗೇ ಉಳಿದುಬಿಡಲು ಕಾರಣೀಭೂತರಾಗಬಹುದಿತ್ತು!      

ಮನೋ-ಭೌತಿಕ ಕುಟುಂಬಗಳೆಂದರೇನು?

 ಕುಟುಂಬದಲ್ಲಿ ಕಾಣುವ ಅತಿಯಾದ ಕಾಳಜಿ, ಕುಟುಂಬದ ಸದಸ್ಯರ ನಡುವಣ ಸ್ವಾಭಿಮಾನದ ಗೋಡೆಗಳು, ಕಟ್ಟುನಿಟ್ಟಾದ ನಿಯಮಗಳು ಮತ್ತು ಅವುಗಳ ಅನುಸರಣೆಗಳಂತಹ ನಿಗದಿತ ನಡವಳಿಕೆಗಳ ಅಸ್ಥಿತ್ವ ಮನೆಯ ಸದಸ್ಯರಲ್ಲಿ ಯಾರಲ್ಲಾದರೊಬ್ಬರಲ್ಲಿ ದೀರ್ಘಕಾಲದ ನೋವಿಗೆ, ದೌರ್ಬಲ್ಯಕ್ಕೆ ಕಾರಣವಾಗಬಹುದು. ಉದಾಹರಣೆಗೆ: ತನ್ನ ಬೆಳೆದ ಮಕ್ಕಳು ತನ್ನನ್ನು ಲಕ್ಷ್ಯಿಸುತ್ತಿಲ್ಲ ಎಂದು ತಾಯಿಯೊಬ್ಬಳು ಬೇಸರಗೊಳ್ಳಬಹುದು. ದೀರ್ಘಕಾಲ ತಾನು ಬಾಯ್ಬಿಟ್ಟು ಕಾಳಜಿವಹಿಸಿರೆಂದು ಕೇಳಲಾಗದ್ದನ್ನು ಶಾರೀರಕ ನೋವೆನ್ನುತ್ತಾ ಪಾಲನೆ, ಪೆÇೀಷಣೆಮಾಡಿಸಿಕೊಳ್ಳುವುದರ ಮೂಲಕ ಪರೋಕ್ಷವಾಗಿ ಮಕ್ಕಳು ಕಾಳಜಿನೀಡುವಂತೇ ಅವಕಾಶ ಕಲ್ಪಿಸಿಕೊಳ್ಳಬಹುದು.

 ಮಕ್ಕಳಲ್ಲಿ ಹೇಗೆ ಇಂತಹ ನೋವು ಬರಬಹುದೆಂದು ಅವಲೋಕಿಸೋಣ:

 15 ವರ್ಷದ ರಮೇಶ ತನಗೆ ತೀವ್ರ ತಲೆನೋವೆಂದು ಹೇಳುತ್ತಿದ್ದುದು ಆತ ಶಾಲೆಗೆ ಹೋಗದೇ  ತಪ್ಪಿಸಿಕೊಳ್ಳುವಂತಾಗುತ್ತಿತ್ತು. ತಾರುಣ್ಯದ ಹೊಸ್ತಿಲಲ್ಲಿರುವ ಆತನಿಗೆ ಮನೆಯಲ್ಲಿ ಪಾಲಕರ ಪೆÇ್ರೀತ್ಸಾಹ ಕಮ್ಮಿ ಇರುವುದು ಆತನ ತಲೆನೋವಿಗೆ ಕಾರಣವಾಗಿರಬಹುದು.

ಇನ್ನೊಂದೆಡೆ, 6ವರ್ಷದ ಕೃಷ್ಣ ಮತ್ತೆ ಮತ್ತೆ ಹೊಟ್ಟೆನೋವೆನ್ನುತ್ತಾ ಸ್ಕೂಲಿಗೆ ಚಕ್ಕರ್ ಹೊಡೆಯುತ್ತಿದ್ದ. ತರಗತಿಯ ಎಲ್ಲಾ ಪರೀಕ್ಷೆಗಳಲ್ಲಿ ಆತ ಅನುತ್ತೀರ್ಣನಾಗಿದ್ದ! ಹೊಟ್ಟೆನೋವಿದೆಯೆಂದು ಹೇಳಿ, ಶಾಲೆಗೆ ಹೋಗದಿರಲು ಪಾಕರಿಂದ ಆಗಾಗ ಅನುಮತಿ ಗಿಟ್ಟಿಸಿಕೊಳ್ಳುತ್ತಿದ್ದ ಆ ಬಾಲಕನ ಜೊತೆಗೆ ನಾವು ಮಾತನಾಡಿ ಆತನ ನೈಜ ಸಮಸ್ಯೆ ಏನೆಂದು ತಿಳಿದುಕೊಳ್ಳಬಹುದು.

ಸಾಮಾಜಿಕ ಭದ್ರತೆಯ ಅಂಶಗಳು

ಮನೆ, ಕಚೇರಿಯಲ್ಲಿನ ಮಾರ್ಗದರ್ಶನ ಮತ್ತು ಹೊಂದಾಣಿಕೆ, ಆದಾಯ, ಕಾನೂನು ಸಮಸ್ಯೆಗಳು, ಸಾಲಗಳು, ಪರಿಹಾರ ಇವುಗಳಿಗೆ ಸಂಬಂಧಿತವಾದ ತೊಂದರೆ ಕೆಲಸಕ್ಕೆ ಹಾಜರಾಗದಿರುವುದಕ್ಕೆ ಕಾರಣವಾಗಿರಬಹುದು. ಮನಸ್ಸನ್ನು ಬೇರೆಡೆಗೆ ಸೆಳೆಯುವುದರಿಂದ ಅಥವಾ ಸಲಹೆಯ ಮೇರೆಗೆ ತನ್ನನ್ನೇ ತಾನು ವಿಮರ್ಶೆಮಾಡಿಕೊಳ್ಳುವುದರಿಂದ ಸಮಸ್ಯೆ ನಿವಾರಣೆಯಾಗಬಹುದು.

ಕೆಲಸದಿಂದ ತಪ್ಪಿಸಿಕೊಳ್ಳಲು ಚಿಕ್ಕಪುಟ್ಟ ಗಾಯಗಳು-ಆಘಾತ ಅಥವಾ ರೋಗ-ಇವುಗಳ ಸಬೂಬನ್ನು ಹೇಳುತ್ತಾ ದೀರ್ಘಕಾಲ ಹಾಗೆ ಮಾಡುವುದರಿಂದ ನೋವು ಉಲ್ಬಣಿಸಬಹುದು.

ನೋವಿನ ವ್ಯವಸ್ಥಾಪನೆಯ ಸಮಗ್ರ ಅನುಸಂಧಾನ

ನೋವಿನ ವ್ಯವಸ್ಥಾಪನೆಯ ಪ್ರಮುಖ ಉದ್ದೇಶ ದೈಹಿಕ, ಭೌತ-ಸಾಮಾಜಿಕ, ಮನೋ-ಸಾಮಾಜಿಕ, ವಾತಾವರಣಾವಲಂಬಿತ ಮತ್ತು ಕೌಟುಂಬಿಕ ಸ್ಥಿತಿಗತಿಗಳಿಂದ ತಲೆದೋರಬಹುದಾದ ನೋವುಗಳನ್ನು ನಿವಾರಿಸುವುದಾಗಿದೆ.

 ಡಾ| ಸುಧಾ ಪ್ರಸಾದ್ ಅವರ ಸಂಪರ್ಕ :

Jaya Pain Clinic & Diagnostic Center, 9448848973, Blog: http://jayapainclinicanddiagnostics.blogspot.in/

ಚಿತ್ರ ಕೃಪೆ : http://www.timelesshypnotherapy.com