ರಿಲಿಜನ್ನಿನ ಅಫೀಮು “ಶಂಕರಾಚಾರ್ಯ ಹಿಲ್” ಅನ್ನು “ತಖ್ತ್-ಈ-ಸುಲೇಮಾನ್” ಆಗಿಸುತ್ತದೆ

– ರಾಕೇಶ್ ಶೆಟ್ಟಿ

ಬೆಳಗ್ಗೆ ಎದ್ದು ನಮ್ಮಲ್ಲಿ ಕೆಲವರು ಹೇಳುತಿದ್ದ “ನಮಸ್ತೆ ಶಾರದ ದೇವಿ ಕಾಶ್ಮಿರಪುರವಾಸಿನಿ||” ಅನ್ನುವ ಉದ್ಘೋಷವನ್ನು ಇನ್ಮುಂದೆ ಬದಲಾಯಿಸಬೇಕಾದ ಅನಿವಾರ್ಯತೆ ಬರಬಹುದು ಅನ್ನಿಸುತ್ತಿದೆ.ಯಾಕೆಂದರೆ, ನಮ್ಮ ’ಭಾರತೀಯ ಪುರಾತತ್ವ ಇಲಾಖೆ’ ಮಾಡುತ್ತಿರುವ ಕೆಲಸವೇ ಅಂತದ್ದು.

ಟ್ರಿಬ್ಯೂನ್ ಪೇಪರಿನಲ್ಲಿ ಬಂದ ವರದಿಯ ಪ್ರಕಾರ,ಜಮ್ಮು-ಕಾಶ್ಮೀರದ “ಶಂಕರಾಚಾರ್ಯ ಹಿಲ್” ಅನ್ನು ಭಾರತೀಯ ಪುರಾತತ್ವ ಇಲಾಖೆ “ತಖ್ತ್-ಈ-ಸುಲೇಮಾನ್” ಅಂತ ಬದಲಾಯಿಸಿದೆ.ಕಾಶ್ಮೀರವನ್ನು ಈ ಹಿಂದೆ ಶಾರದ ದೇಶ,ಶಾರದ ಪೀಠ ಅಂತೆಲ್ಲ ಕರೆಯುತಿದ್ದರು.ಮೇಲೆ ಹೇಳಿದ್ದ “ನಮಸ್ತೆ ಶಾರದ ದೇವಿ ಕಾಶ್ಮಿರಪುರವಾಸಿನಿ||” ಅದನ್ನೇ ಸಾರುತ್ತಿದೆ.ಇನ್ನು ಶಂಕರಾಚಾರ್ಯರು ದೇಶದ ನಾಲ್ಕು ಮೂಲೆಗಳಿಗೂ ಸಾಗಿ ಶಾರದ ಪೀಠಗಳನ್ನು ಸ್ಥಾಪಿಸಿದ್ದು ಎಲ್ಲರಿಗೂ ತಿಳಿದಿರುವುದೇ,ಹಾಗಿದ್ದ ಮೇಲೆ,ಇವನೆಲ್ಲಿಂದ ಬಂದ ಸುಲೇಮಾನ್?

ದಾಲ್ ನದಿಯ ಕಡೆಗೆ ಮುಖಮಾಡಿ ನಿಂತಿರುವ ಈ ಪರ್ವತವಿರುವುದು ಶ್ರೀನಗರದಲ್ಲಿ.ಇದೇ ಜಾಗದಲ್ಲಿ ಆದಿ ಶಂಕರಾಚಾರ್ಯರು 788-820 ADರಲ್ಲಿ ನೆಲೆಸಿದ್ದರು ಅನ್ನುತ್ತದೆ ಇತಿಹಾಸ.ಪಂಡಿತ್ ಆನಂದ್ ಕೌಲ್ ಅವರ ಪ್ರಕಾರ ಈ ದೇವಸ್ಥಾನದ ನಿರ್ಮಾಣ ಮಾಡಿದ್ದು ಸಂಡಿಮನ್ ಎಂಬುವವ 2629 -2564 BC ಯಲ್ಲಿ.ಆ ನಂತರ ರಾಜ ಗೋಪಾದಿತ್ಯ 426–365 BCರಲ್ಲಿ ಮತ್ತು ರಾಜ ಲಲಿತಾಧಿತ್ಯ 697–734BC ರಲ್ಲಿ ಇದರ ಪುನುರುಜ್ಜೀವನ ಮಾಡಿಸಿದ್ದರು.ಝೈನ್-ಉಲ್-ಅಬಿದ್ದೀನ್ ಅವರು ದೇವಸ್ಥಾನದ ಮೇಲ್ಛಾವಣಿಯನ್ನು ದುರಸ್ತಿ ಮಾಡಿಸಿದ್ದರು.1841–1846ರಲ್ಲಿ ಸಿಖ್ ಗವರ್ನರ್ ಶೇಕ್ ಗುಲಾಂ ಮೊಹಿದುದ್ದೀನ್ ಕೂಡ ದುರಸ್ತಿ ಮಾಡಿಸಿದ್ದರು.ಇದನ್ನು ಜ್ಯೋತೇಶ್ವರ ದೇವಸ್ಥಾನವೆಂದು ಕರೆಯಲಾಗುತಿತ್ತು.ಬೌದ್ಧರಿಗೂ ಪೂಜ್ಯನೀಯವಾದ ಸ್ಥಳವಿದು.ಅವರಿದನ್ನು ಪಾರಸ್- ಪಹಾರ್ ಅನ್ನುತ್ತಾರೆ.ಶಂಕರರು ಇಲ್ಲಿ ಶಿವಲಿಂಗ ಪ್ರತಿಷ್ಟಾಪಿಸಿದ್ದರು.ಶಂಕರರು ಇಲ್ಲಿ ಬಂದನಂತರ,ಈ ಪರ್ವತ ಮತ್ತು ದೇವಸ್ಥಾನವನ್ನು ಶಂಕರಾಚರ್ಯರ ಹೆಸರಿನಿಂದಲೇ ಗುರಿತಿಸಲಾಗುತ್ತಿದೆ.

ಇತಿಹಾಸ ಹೀಗಿರುವಾಗ ,”ಪುರಾತತ್ವ ಇಲಾಖೆಯು ಹಾಕಿರುವ ಮಾಹಿತಿ ಫಲಕದಲ್ಲಿ ದೇವಸ್ಥಾನದ ಮೇಲ್ಛಾವಣಿಯನ್ನು ಮುಘಲ್ ದೊರೆ ಷಹಜಹಾನ್ ಕಟ್ಟಿಸಿದ ಅಂತಷ್ಟೇ ಹೇಳುತ್ತಿದೆಯೇ ಹೊರತು,ಈ ಮೊದಲು ದೇವಸ್ಥಾನ ನಿರ್ಮಾಣವಾಗಿದ್ದು ಯಾರ ಕಾಲದಲ್ಲಿ ಅನ್ನುವ ಮಾಹಿತಿಯನ್ನು ಹಾಕಲಾಗಿಲ್ಲ…! ಮುಘಲ್ ದೊರೆ ಜಹಂಗೀರನ ಹೆಂಡತಿಯ ನೂರ್ ಜಹಾನ್ ಆದೇಶದ ಮೇರೆಗೆ ದ್ವಂಸಗೊಳಿಸಲಾಗಿದ್ದ ಲಿಂಗವನ್ನು ಮತ್ತೆ ಪ್ರತಿಷ್ಟಾಪಿಸಿದ್ದು ಡೋಗ್ರಾ ರಾಜಮನೆತನದ ಅರಸರು ಅನ್ನುವ ಮಾಹಿತಿಯೂ ಇಲ್ಲ.” ಅನ್ನುತ್ತಾರೆ ಕಾಶ್ಮೀರಿ ಇತಿಹಾಸಕಾರ ಪ್ರೇಂದುಮಾನ್ ಜೋಸೆಫ್ ಧರ್.

ಆದರೆ, ಭಾರತೀಯ ಪುರಾತತ್ವ ಇಲಾಖೆ ಈಗ ಹೆಸರು ಬದಲಾಯಿಸುತ್ತಿರುವುದರ ಹಿಂದಿನ ಉದ್ದೇಶವೇನು? ನಮ್ಮ ಸಂಸ್ಕೃತಿಯ ಕುರುಹುಗಳನ್ನು ಆದಷ್ಟು ಬೇಗ ಕಾಶ್ಮೀರದಿಂದ ಅಳಿಸುವುದೇ? ಇಲ್ಲವೆಂದಾದರೆ, ಎಲ್ಲಿಯ ಆದಿ ಶಂಕರಾಚಾರ್ಯರು,ಎಲ್ಲಿಯ ಸುಲೇಮಾನ್? ಗೋಕುಲಾಷ್ಟಮಿ-ಇಮಾಂ ಸಾಬಿಯ ಸಂಬಂಧ…!? ಇದು ಕಾಶ್ಮೀರಿ ಮುಸಲ್ಮಾರನ್ನು ಓಲೈಸುವ ಸೆಕ್ಯುಲರ್ ರಾಜಕೀಯದ ಮುಂದುವರೆದ ಭಾಗವಲ್ಲದೇ ಮತ್ತಿನ್ನೇನು?

ಹೆಸರು ಬದಲಾಗಿದ್ದೇಕೆ ಅನ್ನುವುದರ ಹಿಂದೆ ಜೀಸಸ್ ಕಾಶ್ಮೀರದಲ್ಲಿದ್ದರು ಅನ್ನುವ ಒಂದು ಊಹೆಯ ಕತೆಯ ಕಾರಣವಿದೆ.ಇತಿಹಾಸಕಾರರು ಜೀಸಸ್ ಅನ್ನುವ ವ್ಯಕ್ತಿ ಐತಿಹಾಸಿಕವಾಗಿ ಇದ್ದನೆಂಬುದಕ್ಕೆ ಸಾಕ್ಷ್ಯವಿಲ್ಲ ಎನ್ನುತ್ತಿದ್ದಾರೆ.ಆದರೂ ಈಗಲೂ ಕೆಲವರು ಕ್ರಿಸ್ತ ಕಾಶ್ಮೀರಕ್ಕೆ ಬಂದಿದ್ದರು ಅನ್ನುವ ಸುದ್ದಿಯ ಉಸಿರು ಕಾಪಾಡುತ್ತಲೇ ಇದ್ದಾರೆ.ಈ “ತಖ್ತ್-ಈ-ಸುಲೇಮಾನ್” ಅನ್ನುವ ಹೆಸರು ಹುಟ್ಟಿಕೊಂಡಿದ್ದು ಅಲ್ಲಿಂದಲೇ, “Jesus in Kashmir- The Lost Tomb’ ಅನ್ನುವ ಪುಸ್ತಕ ಬರೆದಿರುವ ಸುಜಾನೆ ಒಲ್ಸನ್ ಅವರ ಪ್ರಕಾರ ಒಂದು ಕಾಲದಲ್ಲಿ ಕಾಶ್ಮೀರ ಯಹೂದಿಗಳಿಂದ ಆಳಲ್ಪಡುತಿತ್ತು.ಮತ್ತು ಸುಲೇಮಾನ್ ಎಂದರೆ,ಇಸ್ರೇಲಿನ ರಾಜ ಸೋಲೋಮನ್ ಅಂತೆ.ಒಂದು ವೇಳೆ ಒಲ್ಸನ್ ಹೇಳುವ ಪ್ರಕಾರ ಯಹೂದಿಗಳು ಕಾಶ್ಮೀರವನ್ನು ಆಳಿದ್ದರೆ,ಅದಕ್ಕೆ ಸಂಬಂಧಿಸಿದ ಕುರುಹುಗಳು,ಸ್ಥಳಗಳೇಕಿಲ್ಲ?

ಸಾಧು ರಂಗರಾಜನ್ ಅವರು ’ಜೀಸಸ್ ಇನ್ ಇಂಡಿಯಾ’ ಲೇಖನದಲ್ಲಿ, ಜೀಸಸ್ ಹಿಮಾಲಯದ ದಕ್ಷಿಣ ಭಾಗದಲ್ಲಿದ್ದರು.ಅವರ ವಯಸ್ಸಿನ ೧೩ನೇ ವಯಸ್ಸಿಗೆ ಇಲ್ಲಿಗೆ ಬಂದು, ೨೯ನೇ ವರ್ಷದಲ್ಲಿ ಇಲ್ಲಿಂದ ಸಿದ್ಧಿ ಪಡೆದು ಜೆರುಸಲೇಂ ಕಡೆಗೆ ಹೊರಟರು,ಶಿಲುಬೆಗೇರಿಸಿದಾಗ ಆದ ಆಘಾತವನ್ನು ಯೋಗಶಕ್ತಿಯ ಮೂಲಕ ತಡೆದುಕೊಂಡು ನಂತರ ಮತ್ತೆ ಹಿಮಾಲಕ್ಕೆ ಬಂದು ತಮ್ಮ ದೇಹವನ್ನು ಇಲ್ಲೇ ತ್ಯಜಿಸಿದರು ಅಂತೆಲ್ಲ ಬರೆಯುತ್ತಾರೆ.

ಸಾಧು ರಂಗರಾಜನ್ ಅವರ ಈ ಕತೆಯನ್ನು ಟೀಕಿಸಿ ಪತ್ರ ಬರೆದ ಪಾಂಡಿಚೇರಿಯ ಸ್ವಾಮಿ ದೇವಾನಂದ ಸರಸ್ವತಿಯವರು ಈ ವಾದ ಪೊಳ್ಳು ಎಂದು ಹಲವು ಅಂಶಗಳನ್ನು ದಾಖಲಿಸುತ್ತಾರೆ.ಈ ಜೀಸಸ್ ಇನ್ ಇಂಡಿಯಾ ಅನ್ನುವ ಕತೆಯನ್ನು ಹುಟ್ಟು ಹಾಕಿದ್ದು ರಷ್ಯಾದ ಪತ್ರಕರ್ತ ನಿಕೋಲಸ್ ನೊಟೊವಿಚ್.ಪ್ರೊಫೆಸರ್ ಮಾಕ್ಸ್ ಮುಲ್ಲರ್ ಅವರು ಈ ಬಗ್ಗೆ ಸಾಕ್ಷ್ಯಗಳನ್ನು ಕೇಳಿದಾಗ ನಿಕೋಲಸ್ ಅವರಿಗೆ ಅದನ್ನು ಸಾಬೀತು ಮಾಡಲಾಗಲಿಲ್ಲ ಅನ್ನುತ್ತಾರೆ ಖ್ಯಾತ ಇತಿಹಾಸಕಾರರಾದ ಸೀತರಾಂ ಗೋಯೆಲ್ ಅವರು.ಇನ್ನು ಆಸ್ಟ್ರೇಲಿಯಾದ ಥಿಯಾಲಜಿಸ್ಟ್ ಬಾರ್ಬರ ಥಿಯರಿಂಗ್ ಅವರ ಪ್ರಕಾರ ಜೀಸಸ್ ಅವರ ಕೊನೆಯ ದಿನಗಳ ಬಗ್ಗೆ ಯಾವುದೇ ದಾಖಲೆಯಿಲ್ಲ.

ಜೀಸಸ್ ಅವರು ಐತಿಹಾಸಿಕವಾಗಿ ಇದ್ದರೋ ಇಲ್ಲವೋ,ಅಥವಾ ಅವರು ಹಿಮಾಲಯದಲ್ಲಿ ಬಂದು ನೆಲೆಸಿದ್ದರೋ,ಇಲ್ಲವೋ ಇವೆಲ್ಲವೂ ಸೆಕೆಂಡರಿ.ಸದ್ಯದ ವಿಷಯ ಶಂಕರಾಚಾರ್ಯ ಪರ್ವತದ ಹೆಸರು ಬದಲಾವಣೆಯೇಕೆ ಆಗಬೇಕು? ಅದೇಕೆ ಪ್ರತಿಬಾರಿಯೂ ಹಿಂದೂ ಶ್ರದ್ಧೆಯನ್ನೇ ಅಲುಗಾಡಿಸಲಾಗುತ್ತದೆ? ಪ್ರಶ್ನಿಸಲಾಗುತ್ತದೆ? ಎಲ್ಲವನ್ನೂ ಸುಮ್ಮನೇ ಒಪ್ಪಿಕೊಳ್ಳುತ್ತೇವೆ ಎಂದೇ? ಅಸಲಿಗೆ ಕಾಶ್ಮೀರಿಗಳಿಗೆ ಹೆಸರು ಬದಲಾವಣೆಯಿಂದ ಆಗುವುದೇನು? ಅವರ ಹಸಿವು ನೀಗುತ್ತದೆಯೇ? ಯುವಕರಿಗೆ ಕೆಲಸಗಳು ಸಿಗುತ್ತವೆಯೇ? ಇಲ್ಲ.ಅದ್ಯಾವುದನ್ನು ಕೊಡಲಾಗುವುದಿಲ್ಲವಲ್ಲ.ಹಾಗಾಗಿ ಸರ್ಕಾರದ ವಿರುದ್ಧದ ಅವರ ಸಿಟ್ಟನ್ನು ರಿಲಿಜನ್ನು ಅನ್ನುವ ಅಫೀಮು ತಿನ್ನಿಸುವ ಮೂಲಕ ಕಡಿಮೆ ಮಾಡಿಸುವ ಕೆಲಸವಷ್ಟೇ ಇದು.

ಹಾಗೆ ನೋಡ ಹೋದರೆ, ಕಾಶ್ಮೀರದ ಸಮಸ್ಯೆ ಕೇವಲ ರಿಲಿಜನ್ನಿನದಲ್ಲ,ಸರ್ಕಾರಿ ವ್ಯವಸ್ಥೆಯದ್ದು ಕೂಡ ಗಣನೀಯ ಕೊಡುಗೆಯಿದೆ.ಕಾಶ್ಮೀರವನ್ನು ಆಳಿದ  ಅಬ್ದುಲ್ಲಾಗಳು,ಮುಫ್ತಿಗಳು ಅಥವಾ ಕಾಂಗ್ರೆಸ್ಸು ಮಾಡಿದ್ದು ಬ್ರಹ್ಮಾಂಡ ಭ್ರಷ್ಟಚಾರವನ್ನೇ.ಆಡಳಿತ ಯಂತ್ರ ಕುಸಿದು ಬಿದ್ದು ಜನರು ಕೆಂಗಣ್ಣು ಬೀರಿದಾಗಲೆಲ್ಲ ಇವರು ಬಳಸಿದ್ದು ರಿಲಿಜನ್ನು ಎನ್ನುವ ಅಫೀಮಿನ ಗುರಾಣಿಯನ್ನೇ.ಅದಿನ್ನೂ ಜೀವಂತವಾಗಿದೆ.ವಿಪರ್ಯಾಸವೆಂದರೆ,ತಮ್ಮದೇ ನಾಡಿನಲ್ಲಿ ನಿರಾಶ್ರಿತರಾಗಿರುವ ಕಾಶ್ಮೀರಿ ಪಂಡಿತರು,ಕಾಶ್ಮೀರದಲ್ಲಿ ಇದ್ದೂ ಇಲ್ಲದಂತಿರುವ ಹಿಂದುಳಿದ,ದಲಿತ,ಬುಡಕಟ್ಟುಗಳ ನೋವು ’ಮಾನವ ಹಕ್ಕುಗಳ ಗುತ್ತಿಗೆ’ದಾರರಿಗೆ,ಸರ್ಕಾರಕ್ಕೆ,ಸಂಘಟನೆಗಳಿಗೆ ಕೇಳುತ್ತಿಲ್ಲ.ಖುದ್ದು ಉಗ್ರರ ಗುಂಡಿಗೆ ಬಲಿಯಾದ ಕಾಶ್ಮೀರಿ ಮುಸ್ಲಿಮರ ರಕ್ತವೂ ಕೆಲವರಿಗೆ ಕಾಣುವುದಿಲ್ಲ.ಇನ್ನು ಆರ್ಟಿಕಲ್ ೩೭೦ ಅನ್ನುವ ಶೋಷಕ ವಿಧಿಯನ್ನು ಕಿತ್ತುಬಿಸಾಡುವ ಗಂಡು ಪ್ರಧಾನಿಯೊಬ್ಬ ನಮಗಿನ್ನು ಸಿಕ್ಕಿಯೇ ಇಲ್ಲ.ಅಂತವನೊಬ್ಬ ಸಿಗುವವರೆಗೆ ಈ ರೀತಿಯ ಅಫೀಮು ತಿನ್ನಿಸುವ ಕೆಲಸ ನಡೆಯುತ್ತಲೇ ಇರುತ್ತದೆ.ಮತ್ತು ನಮ್ಮಂತವರು ಅದನ್ನು ವಿರೋಧಿಸುತ್ತ ನಮ್ಮ ದನಿಯನ್ನು ದಾಖಲಿಸುತ್ತಲೇ ಇರಬೇಕಾಗುತ್ತದೆ.

ಖುಷಿಯ ವಿಷಯವೆಂದರೆ, ನಾನು ಈ ಲೇಖನವನ್ನು ಬರೆದು ಪಬ್ಲಿಷ್ ಮಾಡಬೇಕು ಎನ್ನುವಾಗ ಕಾಶ್ಮೀರದ ಮುಖ್ಯಮಂತ್ರಿ ಒಮರ್ ಅಬ್ದುಲ್ಲಾ ಅವರ ಭಾನುವಾರದ ಟ್ವೀಟ್ ನೋಡಿದೆ.ಅವರು ಹೆಸರು ಬದಲಾಯಿಸುವ ಯಾವ ಪ್ರಸ್ತಾಪವೂ ನಮ್ಮ ಮುಂದಿಲ್ಲ ಅಂದಿದ್ದಾರೆ.ಆದರೆ, ಸುಮ್ಮ ಸುಮ್ಮನೇ ಸುದ್ದಿ ಹುಟ್ಟಿಕೊಳ್ಳುವುದೇಗೆ ಸಾಧ್ಯ? ಅದಕ್ಕೆ ಉತ್ತರವಿಲ್ಲ.ಕಾಶ್ಮೀರದ ಹಲವು ಪ್ರಶ್ನೆಗಳಂತೆ!