ದೇಶ – ಭಾಷೆಗಳ ನಡುವೆ

– ರಾಕೇಶ್ ಶೆಟ್ಟಿ

ಆಗ ದೇಶದಲ್ಲಿ ಆಹಾರ ಸಮಸ್ಯೆಯಿತ್ತು.ಅಂತ ಕ್ಲಿಷ್ಟಕರ ಸಮಯದಲ್ಲಿ ಪ್ರಧಾನಿಯಾಗಿದ್ದವರು ಲಾಲ್ ಬಹದ್ದೂರ್ ಶಾಸ್ತ್ರಿಗಳು.ಆಹಾರದ ಸಮಸ್ಯೆಗೆ ಅಮೇರಿಕಾ PL480 (food for peace) ಕಾರ್ಯಕ್ರಮದಲ್ಲಿ ಕಳಿಸುತಿದ್ದ ಗೋಧಿ ತುಂಬಾ ಕಳಪೆ ಮಟ್ಟ ಮುಟ್ಟಿದಾಗ,ಅಂತ ಗೋಧಿಯನ್ನ ಬಳಸುವುದನ್ನ ವಿರೋಧಿಸಿದ ಶಾಸ್ತ್ರಿಗಳು ‘ಇಂತ ಅವಮಾನದ ಬದಲು ಒಪ್ಪೊತ್ತು ಉಪವಾಸ ಇರೋಣ’ ಅಂತ ದೇಶದ ಜನಕ್ಕೆ ಕರೆ ಕೊಟ್ಟಿದ್ದರು,ಹಾಗೆ ಕರೆಕೊಡುವ ಮೊದಲೇ ಅವರ ಮನೆಯಲ್ಲಿ ರಾತ್ರಿ ಅಡಿಗೆ ಮಾಡುವಂತಿಲ್ಲ ಅಂತ ಹೇಳಿದ್ದರು! , ‘ನೀ ಬಯಸುವ ಬದಲಾವಣೆ ನಿನ್ನಿಂದಲೇ ಆಗಲಿ’ ಅನ್ನುವ ಗಾಂಧೀ ಮಾತನ್ನ ಪಾಲಿಸಿ ತೋರಿಸಿದ್ದರು ಶಾಸ್ತ್ರಿಗಳು!

ಆರ್.ಎಸ್.ಎಸ್ ನ ಎರಡನೇ ಸರಸಂಘಚಾಲಕರಾದ ಶ್ರೀ ಮಾಧವ ಸದಾಶಿವ ಗೋಲ್ವಾಲ್ಕರ್ ಅವರ “ಚಿಂತನಗಂಗಾ” ಪುಸ್ತಕದ ಸುತ್ತ ಅಂತರ್ಜಾಲದಲ್ಲಿ ನಡೆಯುತ್ತಿರುವ ಚರ್ಚೆ ಫ಼ಾಲೋ ಮಾಡುವಾಗ “ಸಂಘದಲ್ಲಿ ವಿಚಾರ ಸ್ವಾತಂತ್ರವಿದೆಯೇ” ಎನ್ನುವ ಪದ ಬಳಕೆ ನೋಡಿ ನಗು ಬಂತು.ಅಸಲಿಗೆ ಯಾವುದೇ ಸಂಘಟನೆ,ಸ್ವಸ್ಥ ಸಮಾಜದಲ್ಲಿ ವಿಚಾರ ಸ್ವಾತಂತ್ರ್ಯವಿರಲೇಬೇಕು ಅದು ಇರಲಿ ಅಂತ ಕೇಳುವುದು ತಪ್ಪೇನು ಅಲ್ಲ.ಆದರೆ ವಿಚಾರ ಸ್ವಾತಂತ್ರ್ಯದ ಬಗ್ಗೆ ಕೇಳಿದವರು ಯಾರು ಅನ್ನುವುದು ಮುಖ್ಯವಾಗುತ್ತದಲ್ಲವೇ? ವೇದಾಂತ ಇರೋದು ಬೇರೆಯವ್ರಿಗೆ ಹೇಳೋಕ್ ಮಾತ್ರ ಅಂದುಕೊಂಡವರಿಗಾಗಿಯೇ ಗಾಂಧೀಜಿಯವರು ‘ನೀ ಬಯಸುವ ಬದಲಾವಣೆ ನಿನ್ನಿಂದಲೇ ಆಗಲಿ’  ಅಂದಿದ್ದು.

ಹಿಂದಿ ಹೇರಿಕೆಯ ಬಗ್ಗೆ ನನ್ನ ಅಭಿಪ್ರಾಯವನ್ನು ವರ್ಷದ ಹಿಂದೆಯೇ ರಾಷ್ಟ್ರಭಾಷೆಯಿಲ್ಲದ ರಾಷ್ಟ್ರದಲ್ಲಿ ಅನ್ನುವ ಲೇಖನದಲ್ಲಿ ಹೇಳಿದ್ದೇನೆ.ಚಿಂತನಗಂಗಾ ಚರ್ಚೆಯಲ್ಲಿ ಹಿಂದಿ ಹೇರಿಕೆಯನ್ನ ಹಿಡಿದು ಅನ್ಯ ಧರ್ಮೀಯರ ಬಗ್ಗೆ ಆರ್.ಎಸ್.ಎಸ್ ನ ಧೋರಣೆ, ಬಿಜೆಪಿಯ ರಾಜಕೀಯದ ಬಗ್ಗೆ ಕೂಡ ಚರ್ಚೆಗಳಾಗಿವೆ.

ಹಿಂದಿ ಹೇರಿಕೆಯ ವಿಷಯ ಬಂದಾಗ ಬಳಗದವರು ಬಿಜೆಪಿಯ ಮೇಲೆ ಕೆಂಡಾಮಂಡಲರಾದಂತೆ, ಕಾಂಗ್ರೆಸ್ಸಿನ ಮೇಲೂ ಮತ್ತೆ ಹಿಂದಿ ಹೇರಿಕೆಯ ಬಗ್ಗೆ ಇದುವರೆಗೂ ಚಕಾರವೆತ್ತದ ಜೆಡಿಎಸ್ ನಂತಹ ಪಕ್ಷಗಳ ಮೇಲೆ ಯಾಕೆ ಮಾತನಾಡುವುದಿಲ್ಲ ಅನ್ನುವುದು ಪ್ರಶ್ನೆ…! ಅಸಲಿಗೆ ಭಾರತದಲ್ಲಿ ಹಿಂದಿ ಹೇರಿಕೆಯ ಕರ್ಮಕಾಂಡಕ್ಕೆ,ಹೋರಾಟಕ್ಕೆ ಮುನ್ನುಡಿ ಬರೆದವರು ನ್ಯಾಷನಲ್ ಕಾಂಗ್ರೆಸ್ಸಿನ ಚಕ್ರವರ್ತಿ ರಾಜಗೋಪಾಲಚಾರಿಯವರಲ್ಲವೇ? ಹಿಂದಿ ಹೇರಿಕೆಯ ವಿಷಯ ಬಂದಾಗ ಭಾರತದ ಎಲ್ಲ ರಾಜಕೀಯ ಪಕ್ಷಗಳದ್ದು (ದಕ್ಷಿಣದ ಪ್ರಾದೇಶಿಕ ಪಕ್ಷಗಳನ್ನ ಹೊರತುಪಡಿಸಿ) ಒಂದೇ ಚಾಳಿ,ಹಾಗಿದ್ದಾಗ ಅದ್ಯಾಕೆ ಕೇವಲ ಬಿಜೆಪಿಯ ಮೇಲೆ ಬಳಗದವರ ವಿಶೇಷ ಮಮಕಾರವೇಕೆ? ಭಾರತ ಅನ್ನುವ ಪದ ಕೇಳಿದರೆ ಮೈ ಪರಚಿಕೊಂಡಂತೆ ಮಾಡುವುದು ಕನ್ನಡ ಪ್ರೇಮವಲ್ಲ ,ಹಾಗೇಯೇ ಕನ್ನಡಾಭಿಮಾನ ಅನ್ನುವುದು ರಾಷ್ಟ್ರದ್ರೋಹವೇನಲ್ಲ ಅನ್ನುವುದು ಸೋ-ಕಾಲ್ಡ್ ಭಾಷಾಭಿಮಾನಿಗಳಿಗೆ ಮತ್ತು ದೇಶಾಭಿಮಾನಿಗಳಿಗೆ ತಿಳಿದಿರಬೇಕು.ಇಲ್ಲದಿದ್ದರೆ ಭಾಶಾಭಿಮಾನಿಗಳ-ದೇಶಾಭಿಮಾನಿಗಳ ನಡುವಿನ ಕಂದಕದಲ್ಲಿ ’ಶತ್ರುವಿನ ಶತ್ರು ಮಿತ್ರ ಅನ್ನುವು ಸಿದ್ಧಾಂತವಾದಿಗಳು ಬೇಳೆ ಬೇಯಿಸಿಕೊಳ್ಳುತ್ತರಾಷ್ಟೆ!’

ಈ ದೇಶಕ್ಕೆ ರಾಷ್ಟ್ರ ಭಾಷೆಯ ಅಗತ್ಯವಿಲ್ಲ ಅನ್ನುವುದು ಭಾಷಾಭಿಮಾನಿಗಳ ವಾದವಾದರೆ,ಸಂವಹನಕ್ಕಾಗಿ ಒಂದು ಭಾಷೆ ಬೇಕು,ಬಹು ರಾಜ್ಯಗಳಲ್ಲಿ ಹಿಂದಿ ಮಾತನಾಡುವುದರಿಂದ ಅದೇ ಇರಲಿ ಅನ್ನುವುದು ಇನ್ನೊಂದು ಬಣದ ಅಂಬೋಣ.ತ್ರಿ-ಭಾಷ ಸೂತ್ರದ ಮೂಲಕ ಅದನ್ನ ಹೇರುತ್ತಲೂ ಬಂದಿದ್ದಾರೆ,ತ್ರಿ-ಭಾಷಾ ಸೂತ್ರವನ್ನು ವಿರೋಧಿಸುವುದಕ್ಕಿಂತ ಉತ್ತರದ ರಾಜ್ಯಗಳಲ್ಲಿ ಮೂರನೇ ಭಾಷೆಯಾಗಿ ದಕ್ಷಿಣ ಭಾರತದ ಭಾಷೆಯನ್ನ ಕಲಿಯಲು ಒತ್ತಾಯಿಸಬಹುದಲ್ಲವೇ?

ಪಕ್ಕದ ರಾಜ್ಯದ ಮುಖ್ಯಮಂತ್ರಿ ಜಯಲಲಿತಾ ತಮಿಳು ಭಾಷೆಯನ್ನ ಆರನೇ ತರಗತಿಯವರೆಗೂ ಕಡ್ಡಾಯ ಮಾಡುವ ಮಾತುಗಳನ್ನಡುತ್ತಿರುವ ಈ ಸಮಯದಲ್ಲಿ ನಾವು ಕನಿಷ್ಠ ನಮ್ಮ ’ಮುಖ್ಯಮಂತ್ರಿ ಚಂದ್ರು’ ಕಳೆದ ಜೂನ್ನಲ್ಲಿ ಕನ್ನಡ ಅಭಿವೃದ್ಧಿ ಪ್ರಾಧಿಕಾರ “ಐಟಿ ಮತ್ತು ಬಹುರಾಷ್ಟ್ರೀಯ ಕಂಪನಿಗಳ ಪ್ರವಾಹದಲ್ಲಿ ಕರ್ನಾಟಕ ಅದರಲ್ಲೂ ರಾಜಧಾನಿ ಬೆಂಗಳೂರಿನಲ್ಲಿ ನೆಲೆಸಿರುವವರು ಇನ್ನು ಮುಂದೆ ಪ್ರಾಥಮಿಕ ಕನ್ನಡ ಭಾಷೆ ಪರೀಕ್ಷೆಯಲ್ಲಿ ತೇರ್ಗಡೆಯಾಗುವುದು ಕಡ್ಡಾಯವಾಗಲಿದೆ” ಅನ್ನುವ ಪ್ರಸ್ತಾವನೆಯೊಂದನ್ನು ರಾಜ್ಯ ಸರಕಾರಕ್ಕೆ ಸಲ್ಲಿಸಿದ್ದರಲ್ಲಾ ಅದರ ಕಥೆ ಏನಾಯಿತು ಅಂತ ಯೋಚಿಸಿದ್ದೇವಾ? ಅವರ ಪ್ರಸ್ತಾವನೆ ಬಂದ ೧೫-೨೦ ದಿನ ಹಾರಾಡಿ-ಚೀರಾಡಿ ತೆಪ್ಪಗಾದೆವಲ್ಲ.ಈ ವಿಷಯದ ಬಗ್ಗೆ ಚರ್ಚೆಯಾಗಬೇಕು ಅನ್ನಿಸಲಿಲ್ಲವೇ ಮಾನ್ಯರೇ? ಅಥವಾ ಎಲ್ಲವನ್ನೂ ನಾವೇ ಮಾಡಬೇಕು ಅಂತೇನಿಲ್ಲ ಅನ್ನುವ ಸಿದ್ಧ ಉತ್ತರ ಕೊಡುತ್ತಿರೋ?

ಈ ದೇಶವನ್ನ ಭಾಷೆಯ ಆಧಾರದ ಮೇಲೆ ವಿಂಗಡಿಸಿದ್ದೇ ತಪ್ಪು ಅನ್ನುವ ಸಂಘದ ಮಾತುಗಳು ನಗು ತರಿಸುವಂತದ್ದೇ ನಿಜ.ಬಹುರಾಷ್ಟ್ರೀಯ ಕಂಪೆನಿಗಳಿಲ್ಲದ ಕಾಲದಲ್ಲಿ ಬಹುಷಃ ಸಂಘದ ಈ ಥಿಯರಿ ವರ್ಕ್ ಆಗುತಿತ್ತೋ ಏನೋ ಆದರೆ, ಈಗ ಬಹುರಾಷ್ಟ್ರೀಯ ಕಂಪೆನಿಗಳಲ್ಲಿ ದುಡಿಯುವ ಸಂಘದ ಅಪ್ಪಟ ಅನುಯಾಯಿಗಳಿಗೂ ಸತ್ಯದ ಅರಿವಾಗಿರುವುದು ಸುಳ್ಳೇನಲ್ಲ.ಕಡೇ ಪಕ್ಷ ಈಗಲಾದರೂ ಸಂಘ ತನ್ನ ಈ ಹಳೆ ಹಾಡನ್ನ ನಿಲ್ಲಿಸಬೇಕು…

ಸಂಘದ ಸಭೆ ಸಮಾರಂಭದಲ್ಲಿ ರಾಜ್ಯದ ಮುಖ್ಯಮಂತ್ರಿ-ಮಂತ್ರಿಗಳು ಭಾಗವಹಿಸುವುದು ತಪ್ಪು ಅನ್ನುವುದಾದರೇ , ಕರವೇ ಅವರ ದಶಮಾನೋತ್ಸವದಲ್ಲಿ ಭಾಗವಹಿಸಿದ್ದು ತಪ್ಪಾ!? ಸಂಘ ಮಾಡುವ ಸಮಾವೇಷದಿಂದ ಮಾತ್ರವೇ ದ್ವೇಷದ ಕಿಡಿ ಹೊತ್ತುತ್ತದಯೇ? ಯಾಕೆ ನಿಮ್ಮ ಕಣ್ಣಿಗೆ ಬೇರೆ ಸಂಘಟನೆಗಳ ಸಮಾವೇಷ ಕಾಣಿಸಲಿಲ್ಲವಾ? ಸಂಘವನ್ನ ಟೀಕಿಸಿದಷ್ಟು ಸುಲಭವಾಗಿ ಉಳಿದ ಸಂಘಟನಗಳನ್ನೂ ಟೀಕಿಸಬಲ್ಲಿರಾ? ಇನ್ನು ಅನ್ಯಧರ್ಮೀಯರ ಬಗ್ಗೆ ಸಂಘ ಮತ್ತು ಬಿಜೆಪಿಯ ಅಸಹನೆಯ ಬಗ್ಗೆಯೂ ಆತಂಕ ವ್ಯಕ್ತವಾಗಿದೆ.ಅಸಲಿಗೆ ಈ ಸೆಕ್ಯುಲರ್ ಅನ್ನುವ ಪಕ್ಷಗಳೇ ತಾನೇ ನಮ್ಮ ದೇಶದಲ್ಲಿ ಹೆಚ್ಚು ಅಧಿಕಾರದಲ್ಲಿದಿದ್ದು.ಅವರನ್ನ ಕೇವಲ ವೋಟ್ ಬ್ಯಾಂಕ್ ಮಾಡಿಕೊಳ್ಳದೇ ಅನ್ಯ ಧರ್ಮೀಯರ ಒಳಿತಿಗೆ ಕೆಲ್ಸ ಮಾಡಿದ್ದಾರ ಅನ್ನುವುದು ಮುಖ್ಯವಲ್ಲವೇ? ಅಂತ ಕೆಲಸವೇನಾದರೂ ಮಾಡಿದ್ದರೆ ಸ್ವಾತಂತ್ರ್ಯ ಬಂದು ೬೪ ವರ್ಷಗಳಾದ ಮೇಲೆ ಮೀಸಲಾತಿ ಕೊಡುವಷ್ಟು ಅವರು ಹಿಂದುಳಿಯುತ್ತಿರಲಿಲ್ಲ ಅಲ್ವಾ?

ಸಂಘದ ಹಿಂದಿಯ ಪ್ರೀತಿಯ ಬಗ್ಗೆ ಮಾತನಾಡುತ್ತಲೇ ಬಳಗವೂ ಸೆಕ್ಯುಲರ್ ಪಕ್ಷದ ಹಾಗೆ ಮಾತನಾಡಿದ್ದು ರಾಜಕೀಯಕ್ಕಿಳಿಯುವ ಮುನ್ಸೂಚನೆಯೇ? ಇಳಿಯುವುದಾದರೆ ಇಳಿಯಲಿ ಆದರೆ ಹಿಂದಿಯನ್ನ ವಿರೋಧಿಸುವುದೇ ಕನ್ನಡ ಪ್ರೀತಿ,ಹಿಂದೂ ಸಮಾವೇಷಗಳನ್ನ ವಿರೋಧಿಸುವುದೇ ಸೆಕ್ಯುಲರಿಸಂ ಅಂದುಕೊಳ್ಳದೇ ಸರ್ವೇ ಜನಃ ಸುಖಿನೋ ಭವಂತು ಅನ್ನುವ ಧ್ಯೇಯವಿಟ್ಟುಕೊಂಡು ಮುಂದುವರೆಯಿರಿ ಒಳ್ಳೆಯದಾಗಲಿ.